د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک په داسی حال کې چې د اتاق د عامل پلاوي د نړیوالو اړیکو، عامه اړیکو او د سوداګرۍ پراختیا ډیپارټمنټونو مسؤلینو يې ملتیا کوله د د افغانستان لپاره د (IOM) ادارې د سروی له مسؤل ښاغلي مطیع الله سیرت سره د لیدنې په ترڅ کې، د افغان سوداګرو ټرانزیټي ستونزو، نړیوالو نندارتونونو ته د افغان سوداګرو نه لاسرسي، د سبسایډي نه شتون، هوايي دهلیزونو او یو شمیر نورو مسایلو په اړه خبرې اترې وکړې.

ښاغلي هوتک د وړتیا لوړونې، سوداګرو ته د لازمو آسانتیاوو برابرولو، په نړیوالو مارکیټونو کې د افغاني محصولاتو لپاره د بازار موندنې او په نړیوالو کنفرانسونو او نندارتونونو کې د افغان سوداګرو ګډون برخه کې د افغانستان د سوداګرۍ او پانګونې اتاق د پروګرامونو په اړه معلومات وړاندی کړل او د اتاق سره يې د (IOM) ادارې د افغان سوداګرو وړتیا لوړونې او مالي او تخنیکي همکاریو هرکلی وکړ.

ښاغلي هوتک نړیوالو مارکیټونو ته د افغان سوداګرو لاسرسي، د ځوان سوداګرو تشبثاتي طرحو ملاتړ او د نویو تشبثاتو رامنځته کولو برخه کې د ګډو پروګرامونو په لاره اچولو کې د (IOM) ادارې د لا زیاتې همکارۍ غوښتنه وکړه.

ښاغلي سیرت د افغان سوداګرو وړتیا لوړونې او نړیوالو نندارتونونو کې د دوی د ګډون برخه کې د (IOM) ادارې له هر اړخیزې همکارۍ ډاډ ورکولو ترڅنګ، په یاده برخه کې د (IOM) ادارې سره د افغانستان د سوداګرۍ او پانګونې اتاق د همکارۍ او همغږۍ غوښتنه وکړه.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د اتاق د مدیره پلاوي غړي ښاغلي عصمت الله وردګ، د هرات سوداګرۍ او پانګونې اتاق مدیره پلاوي رئیس ښاغلي یونس قاضي زاده او د هېواد ستر سوداګر ښاغلي فیض محمد خافي يې ملتیا کوله، په ترکمنستان کې میشت افغان سوداګرو سره لیدنه ترسره کړه.

په دغه کتنه کې، په ترکمنستان کې د افغانستان سفارت سرپرست د لازمو سوداګریزو اسانتیاوو رامنځته کول، د دواړو هېوادونو ترمنځ د سوداګرۍ پراختیا او د ټرانزیټي خدمتونو معیاري کول یې د خپلو کاري لومړیتوبونو په توګه یاد کړل او افغان سوداګرو ته د ویزو ورکړې برخه کې يې د ترکمنستان بهرنیو چارو وزارت سره د یاد سفارت د هر اړخیزې همکارۍ ژمنه وکړه.

ښاغلي مهمند د ترکمنستان او افغانستان ترمنځ په بېلابېلو سوداګریزو، اقتصادي، ټولنیزو او فرهنګي برخو کې له کلونو راهیسې د ښو اړیکو یادولو ترڅنګ، ترکمنستان یې د افغانانو د اوږدمهاله دوست او ورور هېواد په توګه وباله او د اړیکو پر لا پیاوړتیا او پراختیا یې ټینګار وکړ. نوموړي د دواړو هېوادونو ترمنځ په ځانګړې توګه د سوداګرۍ او پانګونې په برخو کې پر همکارۍ ټینګار وکړ.
هغه په دغه هېواد کې له مېشتو افغان سوداګرو وغوښتل چې خپلې عمده ستونزې په ګوته کړي او د افغانستان د سوداګرۍ او پانګونې اتاق، په عشق اباد کې د افغانستان له سفارت او د ترکمنستان د سوداګرۍ اتاق سره د شریکولو له لارې د حل مناسبې لارې چارې ورته ولټوي.

افغان سوداګرو د افغانستان د سوداګرۍ او پانګونې اتاق د لومړي مرستیال او ورسره ملګري پلاوي له سفر څخه خوښي څرګنده کړه او ویې ویل، دغه سفرونه د دواړو هېوادونو ترمنځ د اقتصادي او سوداګریزو اړیکو د ښه والي، د سوداګرۍ او پانګونې برخه کې د شته فرصتونو په ګوته کولو او د سوداګرۍ برخه کې په شته ننګونو د برلاسي حاصولو برخه کې اړین دي.

د افغانستان د سوداګرۍ او پانګونې اتاق مدیره پلاوي سوداګریز مرستیال ښاغلي خیرالدین مایل احمدي په داسی حال کې چې، د مدیره پلاوي د نړیوالو اړیکو رئیس ښاغلي انجنیر سید جاوید برهان او د عامل پلاوي سرپرست رئیس ښاغلي میرویس هوتک يې ملتیا کوله د پاسپورټ ریاست سوداګریز آمر ښاغلي قاري ضیاءالرحمن سره د لیدنې په ترڅ کې، د سوداګرو د پاسپورټ اخیستنې برخه کې پر شته ستونزو او خنډونو خبرې اترې وکړې.

ښاغلي مایل احمدي سوداګرو او د دوی کورنیو ته د سوداګریزو او سیاحتي پاسپورټونو اخذ برخه کې شته ننګونې د قاري صیب ضیاءالرحمن سره شریکې او له دوی څخه وغوښتل چې سوداګرو ته د پاسپورټ صدور برخه کې لازمې آسانتیاوې رامنځته کړي.

ښاغلي قاري صیب ضیاءالرحمن د اتاق مشرتابه پلاوي له خبرو اوریدو وروسته ژمنه وکړه چې د سوداګرو شته ستونزې به د پاسپورټ ریاست له لوړ پوړو چارواکو سره شریکې او د حل مناسبې لارې چارې به ورته ولټوي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د هرات سوداګرۍ او پانګونې اتاق مدیره پلاوي رئیس ښاغلي یونس قاضي زاده يې ملتیا  کوله، د ترکمنستان لپاره افغان سرپرست سفیر ښاغلي حاجي فضل محمد صابر سره لیدنه ترسره او د سوداګریزو اړیکو پراختیا او ګډو همکاریو په اړه يې خبرې اترې وکړې.

یاده لیدنه کې چې د عشق آباد ښار افغان سفارت انګړ کې ترسره شوه، ښاغلي مهمند ترکمنستان ته د خپل سفر موخه د ښاغلي صابر سره شریکه او داسی يې وویل "ترکمنستان د افغانستان له دوست هېوادونو څخه دی چې د ډیرې مودې راهیسې يې د افغانستان سره په مختلفو برخو په ځانګړې توګه د سوداګرۍ برخه کې دوستانه اړیکي درلودې دي."
ښاغلي مهمند هیله څرګنده کړه چې یاد سفر به ښې لاسته راوړنې ولري او د ترکمنستان سوداګرۍ اتاق سره د هوکړه لیک لاسلیکول به د دواړو هېوادونو ترمنځ د سوداګرۍ زیاتوالي سبب وګرځي.

ښاغلي فضل محمد صابر ښاغلي مهمند ته د ښه راغلاست ویلو او ترکمنستان ته د افغانستان سوداګرۍ پلاوي سفر هرکلي کولو ترڅنګ، افغان سوداګرو ته د لازمو آسانتیاوو برابرولو او د دواړو هېوادونو ترمنځ د سوداګرۍ او ټرانزیټ پراختیا برخه کې د ترکمنستان لپاره د افغان سفارت د هر اړخیزې همکارۍ ډاډ ورکړ.

د ترکمنستان هېواد د رسمي بلنې پربنسټ، د افغانستان د سوداګرۍ او پانګونې اتاق مشرتابه پلاوي یاد هېواد ته د سفر په ترڅ کې، د عشق آباد په نندارتون کې د ګډون ترڅنګ د ترکمنستان هېواد له لوړ پوړو چارواکو سره لیدنه ترسره کړه.
د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د مدیره پلاوي غړیو هر یو ښاغلي عصمت الله وردګ او محمد داوود یوسفزي، د غزني اتاق رئیس او د څارنې پلاوي منشي ښاغلي عبدالمتین قلندري، د هرات سوداګرۍ او پانګونې اتاق رئيس ښاغلي یونس قاضي زاده، د ترکمنستان لپاره د افغانستان سرپرست رئیس ښاغلي فضل محمد صابر، د فاریاب اتاق رئيس ښاغلي سید فرید هاشمي، د اندخوی اتاق رئیس ښاغلي عبدالمجید نیازي او د هرات اتاق مرستیال ښاغلي دشتي يې ملتیا کوله د عشق آباد نندارتون په پرانست غونډه کې ګډون ترسره او د یاد هېواد له لوړ پوړو چارواکو سره يې لیدنه ترسره کړه.

د دغه نندارتون د پرانیستې په مراسمو کې د ترکمنستان د حکومت په استازیتوب د جمهور رئیس لومړي مرستیال او د دغه هېواد د کابینې د شورا رئیس ښاغلي عطابایوف، د ترکمنستان بهرنیو چارو وزیر ښاغلي رشید عوض گولدي یویچ مردوف، د ترکمنستان د بهرنیو چارو وزیر جلالتمآب عبدالرشید عوض ګولدیویچ مردوف او د سوداګرو او صنعتکارانو د اتحادیې رئیس ښاغلي دولت ګډون او وینا وکړه.

دغه راز په هغه کتنه کې چې له دې وروسته د ترکمنستان د پورتنيو مقاماتو په ګډون او د افغانستان د سوداګرۍ او پانګونې اتاق مشرتابه پلاوي په ګډون جوړه شوې وه، ښاغلي مهمند د ترکمنستان او افغانستان ترمنځ د څو کلونو د ښو اړيکو په باب خبرې وکړې.
نوموړي همدا راز په ټول هېواد کې د امنيت د تامين، د کوکنارو د کرکيلې د بشپړ بندېدو او په هېواد کې د اداري فساد د له منځه وړلو يادونه وکړه او د مرمر په ګډون د افغانستان د صادراتو په اړه يې د معلوماتو ورکولو پر مهال له شته فرصتونو څخه د ګټې پورته کولو سره د ترکنستان هېواد سره د سوداګرۍ او پانګونې مختلفو برخو کې د اړیکو د غښتلتیا غوښتنه وکړه.   

په دې کتنه کې د افغان - ترکمن د ګډ اتاق پر جوړولو او په دې برخه کې د عملي ګامونو پورته کولو، د افغان سوداګرو لپاره په ګمرکي بندرونو کې د اسانتیاوو پر رامنځته کولو، د سوداګرۍ او راکړې ورکړې لپاره د بانکي اسانتیاوو، د ګډو پانګونو، د افغانستان او ترکمنستا ترمنځ ترانزیتي شرکت پر جوړولو او د افغانستان ستر نندارتون ته د ترکمن سوداګرو او پانګوالو د بلنې په اړه خبرې وشوې.

د افغانستان د سوداګرۍ او پانګونې اتاق مشرتابه پلاوي د افغان – ترکمن ګډ اتاق رامنځته کولو په موخه د هوکړه لیک او اساسنامې په رامنځته کولو د ټینګار کولو ترڅنګ، زیاته کړه چې د افغان – ترکمن ګډ اتاق افغانستان لوري د سوداګرۍ څیړنې او پراختیا ډیپارټمنټ رامنځته په اړه بحثونه پیل کړي او افغان لوری چمتو دی چې د افغان – ترکمن ګډ اتاق رامنځته کړي.

د ترکمنستان حکومت لوړ پوړو چارواکو هم د دواړو هېوادونو ترمنځ د دوستانه اړیکو پر پیاوړتیا او د سوداګریزو او اقتصادي اړیکو پر پراختیا ټینګار وکړ او ژمنه یې وکړه چې د سوداګرۍ او ګډې پانګونې د پراختیا او همدارنګه ګمرکي او ټرانزیټي برخو کې د لازمو آسانتیاوو د رامنځته کولو په موخه به هر ډول لازمه همکاري وکړي.