د افغانستان د سوداګرۍ او پانګونې اتاق د کارنت تیر صادروونکې او ضامنې ادارې په توګه، د نړیوال ځمکني ټرانسپورټ پراختیا، په نړیواله کچه د لیږد برخه کې فعالو شرکتونو د وړتیا لوړونې، په نړیواله کچه د لیږد برخه کې فعالو شرکتونو د فعالیتونو معیاري کولو او په نړیواله کچه د لیږد برخه کې فعالو شرکتونو د موټر چلوونکو او مدیرانو د روزنې په موخه، د ټرانسپورټ او هوايي چلند وزارت سره هوکړه لیک لاسلیک کړ.

یاد هوکړه لیک د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د ټرانسپورټ او هوايي چلند وزارت سرپرست ښاغلي الحاج حمیدالله آخندزاده لخوا د افغانستان د سوداګرۍ او پانګونې اتاق عامل پلاوي سرپرست ښاغلي میرویس هوتک او د ټرانسپورټ او هوايي چلند وزارت د ځمکني ټرانسپورټ معین په حضور کې د یاد وزارت په مرکزي دفتر کې لاسلیک شو.

د افغانستان د سوداګرۍ او پانګونې اتاق مدیره پلاوي سوداګریز مرستیال ښاغلي خیرالدین مایل احمدي د لوګر سوداګرۍ او پانګونې اتاق مدیره پلاوي رئیس ښاغلي مولوي محمد یعقوب او د یاد اتاق د مدیره پلاوي نورو غړیو سره د لیدنې په ترڅ کې، د دوی د شته ستونزو په اړه خبرې اترې وکړې.

ښاغلي مولوي محمد یعقوب د لوګر سوداګرۍ او پانګونې اتاق ستونزو هواري په ځانګړې توګه د دغه اتاق د عامل پلاوي د کارکوونکو د ظرفیتونو د لوړولو، په دغه ولایت کې د صنعتي پارک د جوړولو او په عام المنفعه پروژو کې د سوداګرو د ګډون غوښتنه کوي.

ښاغلي خیرالدین مایل احمدي د لوګر د سوداګرۍ او پانګونې اتاق مدیره پلاوي رئیس او غړو ته د ښه راغلاست پرمهال د هغوی ستونزې او وړاندیزونه واورېدل او یادو ستونزو ته د حل لارو پیداکولو او د دوی د وړاندیزونو پر ځای کولو برخه کې يې د اتاق د هر اړخیزې همکارۍ ژمنه وکړه.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د اتاق د عامل پلاوي سرپرست ښاغلي میرویس هوتک يې ملتیا کوله د ټولګټو وزارت له سرپرست ښاغلي محمد عیسی احساني سره د لیدنې په ترڅ کې، د سوداګریزو لویو لارو شته ستونزو په اړه خبرې اترې وکړې.

ښاغلي مهمند د هېواد سوداګریزو لویو لارو په ځانګړې توګه د سالنګ لويې لارې د ویجاړیدو له امله سوداګرو او د سوداګریزو توکو لیږدوونکو ګاډو ته رامنځته شوې ستونزې بیان او د ټولګټو وزارت له درانه مقام څخه يې وغوښتل چې د یادو لویو لارو بیا جوړولو برخه کې لازمه پاملرنه وکړي.

ښاغلي احساني ښاغلي مهمند او ورسره ټیم ته د ښه راغلاست ویلو او د ښاغلي مهمند د خبرو له اوریدو وروسته، ژمنه وکړه چې یاد وزارت به د ویجاړو شویو لویو لارو په ترمیم او بیا جوړونه کې خپلې نه ستړې کیدونکې هلې ځلې ترسره کړي څو په دی برخه کې د سوداګرو ستونزې حل شي.  

ښاغلي احساني د خپلو خبرو په اوږدو کې د سالنګ لوې لارې د بیاجوړونې او په دی برخه کې د خصوصي سکتور د همکارۍ په نوعیت باندی هم خبرې وکړې چې متقابلا ښاغلي مهمند د خصوصي سکتور ودانیزو شرکتونو له تیاري خبر ورکړ او زیاته يې کړه چې د ودانیزو شرکتونو سره تر سلا مشورو وروسته به د هغوی نظرونه د ټولګټو له وزارت سره شریک کړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د مدیره پلاوي غړي ښاغلي محمد داوود یوسفزي، د بلخ اتاق مدیره پلاوي سرپرست رئیس ښاغلي اسدالله اسدي، د جوزجان اتاق رئیس ښاغلي یولبرز عطايي، د اندخوی اتاق رئیس ښاغلي عبدالمجید نیازي او د هېواد یو شمیر مطرح سوداګرو يې ملتیا کوله د بلخ ولایت له والي ښاغلي محمد یوسف وفا سره د لیدنې په ترڅ کې، د هېواد شمال زون د سوداګرۍ او پانګونې بهیر او د خصوصي سکټور غړیو او سوداګرو شته ستونزو په اړه يې خبرې اترې وکړې.

ښاغلي مهمند د افغانستان د سوداګرۍ او پانګونې اتاق د فعالیتونو او لاسته راوړنو، شته ننګونو او د پانګونې د فرصتونو په اړه معلومات وړاندې کړل او په دې برخه کې یې د بلخ له والي څخه د هر اړخیزې همکارۍ غوښتنه وکړه.

ښاغلي مهمند له اړوندو دولتي ادارو سره د سوداګرو د همکارۍ ډاډ ورکړ او په بهر کې مېشت افغان سوداګر يې وهڅول څود هېواد د کانونو استخراج، د سترو پروژو پلي کولو او یو شمېر نورو چارو کې پانګونه وکړي.

د ولایتي اتاقونو رئیسانو او د هېواد سوداګرو د شته ستونزو په ځانګړي ډول د سوداګرۍ او پانګونې، ترانسپورت او ټرانزیټ، د ګمرکي محصول د لوړوالي، د ترکمنستان له خوا افغان سوداګرو ته د ویزو د نه ورکړې او یو شمېر نورو مسایلو په اړه خبرې وکړې او د بلخ له والي څخه يې په دې برخه کې د لازمې پاملرنې غوښتنه وکړه.

ښاغلي محمد یوسف وفا د اتاق مشرتابه پلاوي او د هېواد سوداګرو د خبرو له اورېدو وروسته د افغانستان د خلکو د اقتصادي وضعیت په ښه والي، ودې او هوساینې کې د ملي سوداګرو رول خورا مهم وباله او د خپلو راتلونکو پلانونو په اړه يې معلومات وړاندی کړل.
نوموړي د سوداګریزو او پانګه ایزو فعالیتونو پر چټکتیا ټینګار وکړ او له کورنیو سوداګرو او پانګوالو یې وغوښتل چې له سیمه ییز حکومت سره لا زیاته همکاري وکړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د بګرامیو خوراکي توکو منډوۍ تاسیساتو او بیو ارزونې او د نیمګړتیاوو او مثبتو ګامونو معلومولو په موخه یادې منډوۍ څخه د لیدنې په ترڅ کې، د خوراکي توکو اتحاديې له یو شمیر غړیو سره لیدنه ترسره کړه.

ښاغلي مهمند د یادې منډوۍ د هټۍ ګانو او ګودامونو په معیاري ډول د جوړولو غوښتنه وکړه او په دی برخه کې يې د افغانستان د سوداګرۍ او پانګونې اتاق د همکارۍ ډاډ ورکړ. نوموړي د خوراکي توکو ټولو سوداګرو څخه وغوښتل چې د ګرانو هېوادوالو اقتصادي وضعیت او د روژې مبارکې میاشتې په نظر کې نیولو سره د خوراکي توکو بیې ټېټې او د اړمنو خلکو سره خپلو مرستو او همکاریو ته دوام ورکړي.

د بګرامیو خوراکي توکو منډوۍ سوداګرو او هټیوالو د روژې مبارکې میاشتې په مناسبت د خوراکي توکو په ټیټه بیه د پلورلو ډاډ ورکړ او د اړوندو دولتي ادارو څخه يې وغوښتل چې د یادې منډوۍ د تاسیساتو په معیاري ډول جوړولو او د هغو لارو او سرکونو چې یادې منډوۍ ته منتهي کیږي کانکریت کولو برخه کې لازم او ګړندي ګامونه پورته کړي.