د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک په داسی حال کې چې د نړیوالو اړیکو او صادراتو د پراختیا څانګې مسؤلینو هم حضور درلود، د هند په ممبۍ ښار کې د افغانستان له جنرال قونسلې آغلې ذکیه وردګ او د هندوستان له نومتو سوداګرو هر یو ښاغلي راجا توکار او ښاغلي چینتان دوشي سره آنلاین ناسته ترسره او د دواړو هېوادونو ترمنځ د پانګونې ګډو فرصتونو په اړه يې خبرې اترې وکړې.

آغلې وردک له افغان سوداګرو سره د ګډو پانګونو په برخه کې د هندي سوداګرو او پانګوالو د هڅونې او دغه راز د سیمې هېوادونو ته د وچې مېوې په ځانګړي ډول د افغان شیرین بویه د صادراتو په برخه کې د هندي سوداګرو د پانګونې یادونه وکړه او د افغانستان د سوداګرۍ او پانګونې اتاق عامل پلاوي سرپرست څخه يې په دې برخه کې د همکارۍ غوښتنه وکړه.

ښاغلي هوتک په افغانستان کې د پانګونې د فرصتونو یادونه وکړه او په افغانستان کې یې د پانګونې لپاره د هند د سوداګرو د هڅونې په برخه کې د افغانستان د قونسلګرۍ هڅې وستایلې او د دواړو هېوادونو د سوداګرو ترمنځ د سوداګریزو غونډو په جوړولو کې يې د اتاق د هر اړخیزو همکاریو ډاډ ورکړ.

سه شنبه، لړم ۲مه، ۱۴۰۲

د افغانستان د سوداګرۍ او پانګونې اتاق مدیره پلاوي غړي ښاغلي خانجان الکوزي او د عامل پلاوي پالیسۍ او تخنیکي مرستیال ښاغلي محمد انور عارفي د ترکيې هېواد د (T&A) ګروپ اف کمپنیز مدیره پلاوي له غړي ښاغلي حسین ګنای سره لیدنه ترسره او د ګډو پانګونو او سوداګرۍ پراختیا په اړه يې خبرې اترې وکړې.  

ښاغلي ګنای په ترکیه او یو شمیر افریقايي او اسیایي هیوادونو کې د (T&A) د شرکتونو د فعالیتونو او پانګونې په اړه معلومات وړاندې کړل او د کانونو او تولیداتو په برخو کې په ځانګړې توګه د لبنیاتو د پروسس په برخه کې یې د یادې ادارې د ګډې پانګونې په اړه خوښي څرګنده کړه. نوموړي په دې برخه کې له یادې ادارې سره د اتاق د هر اړخیزې همکارۍ غوښتنه وکړه.

ښاغلي الکوزي ښاغلي حسین ګنای او د هغه ټیم ته د ښه راغلاست په ترڅ کې د ترکیې له هېواد او خلکو سره د افغانانو د اوږدمهاله او تاریخي اړیکو او همدارنګه یې د دواړو هېوادونو د سوداګرو د ګډو پانګونو په اړه خبرې وکړې اود  سوداګرۍ پراختیا، ګډې پانګونې، د ټرانزیټي ستونزو پر حل او افغان سوداګرو لپاره د ویزې د ورکړې اسانتیاوو په رامنځته کولو يې ټینګار وکړ. نوموړي د سوداګریزو اړیکو غښتلتیا او ګډون پانګونو برخه کې د اتاق د همکارۍ ډاډ ورکړ.

ښاغلي عارفي اتاق د یوې خپلواکې ادارې په توګه یاد کړ او له اړوندو ادارو سره یې د سوداګریزو اړیکو او ګډې پانګونې د پراختیا په موخه د اتاق د تخنیکي همکارۍ چمتووالی څرګند کړ.

دوشنبه، تلې ۲۴مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د اتاق د عامل پلاوی سرپرست رئیس ښاغلي میرویس هوتک او د عامل پلاوي پالیسۍ او تخنیکي مرستیال ښاغلي محمد انور عارفي په حضور کې د خیرخواه او اتفاق مارکیټونو د اتحاديې له رئیس ښاغلي محمد مختار شریفي سره لیدنه ترسره او د یادو مارکیټونو د چارو بشپړیدو او په پخوانیو اورلګیدنو کې زیانمنو شویو هټیوالو ته يې د ویش په اړه خبرې اترې وکړې.

ښاغلی شریفي د هېواد د سوداګرو او پانګوالو د ستونزو په حل کې د اتاق د دوامداره همکارۍ او د سن سکای شرکت له خوا د خیرخواه د لوی کمپلکس جوړولو پروژې ستاینه وکړه او د سوداګرو او هټیوالو لپاره د ډاډمن کاري چاپېریال په رامنځته کولو او زیانمنو هټیوالو او سوداګرو ته يې د دوکانونو په سپارلو ټینګار وکړ.   

ښاغلي مهمند ښاغلي شریفي ته د ښه راغلاست ویلو ترڅنګ، د افغانستان د سوداګرۍ او پانګونې اتاق د هېواد د خصوصي سکتور ملاتړې وباله او د سن اسکای ودانیز شرکت او دولت ترمنځ د شوي تړون په تطبیق او زیانمنو سوداګرو او هټیوالو ته د یادو دوکانونو په سپارلو يې ټینګار وکړ.

دوشنبه، لړم ۱، ۱۴۰۲

د افغانستان د سوداګرۍ او پانګونې اتاق عامل پلاوي د پالیسۍ او تخنیکي چارو مرستیال ښاغلي محمد انور عارفي، د عامل پلاوي د نړیوالو اړیکو مسؤل ښاغلي امید غفورزي په حضور کې د دییک سازمان بهرنیو اړیکو له رئیس ښاغلي مصطفی ایرول سره لیدنه ترسره او په هېواد کې يې د پانګونې د فرصتونو په اړه خبرې وکړې.

ښاغلي عارفي د ترکیې سوداګریز پلاوي د راتګ هرکلی وکړ او ترکیه یې دوست او د ګډو دیني او کلتوري ارزښتونو لرونکی هیواد وباله.
نوموړي په هېواد کې د پانګونې په برخه کې شته فرصتونه تشریح کړل او په بېلابېلو برخو کې یې د ترکیې د سوداګرو د ګډې پانګونې د رامنځته کولو غوښتنه وکړه.

ښاغلي مصطفی ایرول په افغانستان کې د لویو پروژو د تطبیق لپاره د عمومي شرایطو له برابرولو څخه خوښي څرګنده کړه او د روغتیا، کرنې، انرژۍ او مخابراتو په برخو کې یې خپل پلانونه له ښاغلي عارفي سره شریک کړل.
نوموړي په یادو برخو کې د لویو پروژو د تطبیق لپاره د شرایطو د رامنځته کولو په موخه د اتاق د همکارۍ غوښتنه وکړه.

دوشنبه، تلې ۲۴مه، ۱۴۰۲

د نفتي توکو د کيفيت د کنټرول او په دې برخه کې د ستونزو د هواري په موخه د ریاست الوزرا اقتصادي معاونیت له لوري ګډه غونډه جوړه شوه، چې په کې د دولت لوړ پوړو چارواکو، د سکتوري وزارتونو مشرتابه او د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي ګډون وکړ.  

د ریاست الوزرا اقتصادي مرستيال په تيرو دوو کلونو کې دهېواد دسوداګرو او پانګوالو اقتصادي فعاليتونه مهم وبلل او ددغه سکتور د سوداګرو له خوا يې دبا کيفيته تيلو او ګازو په واردولو ټينګار وکړ.  .

ښاغلي مایل احمدي په هېواد کې د سوداګرو او پانګوالو لپاره د مناسب کاري چاپېریال د رامنځته کولو په برخه کې د دولتي چارواکو هڅې وستایلې او د تېلو او ګازو د کیفیت د کنټرول، مالیاتو، د شرکتونو د کارونې نوم او معیاري تصفیه خانو نشتوالی يې د سوداګرو عمده ستونزې وبللې او د هېواد ریاست الوزرا اقتصادي مرستیال څخه يې په یادو برخو کې د هر اړخیزې همکارۍ غوښتنه وکړه.

پنجشنبه، تلې ۲۷مه، ۱۴۰۲