د افغانستان د سوداګرۍ او پانګونې اتاق د سیمې هېوادونو سره د سوداګرۍ پراختیا، کورنیو تولیداتو معرفت او د صادراتو زیاتوالي په موخه د ایران – افغانستان سوداګریز مرکز سره هوکړه لیک لاسلیک کړ.

ددی هوکړه لیک پربنسټ د افغانستان د سوداګرۍ او پانګونې اتاق او د ایران – افغانستان سوداګریز مرکز به د ګډو نندارتونونو جوړولو، په دی نندارتونونو کې د افغانستان او ایران تولیداتو پیژندګلوۍ، د دواړو هېوادونو سوداګرو ترمنځ د ګډو ناستو برابرولو او د ګډون پانګونو لپاره د دواړو هېوادونو پانګوالو هڅولو برخه کې یو د بل سره همکاري کوي.

دغه هوکړه لیک د اتاق عامل پلاوي د پالیسۍ او تخنیکي مرستیال او سرپرست ښاغلي محمد انور عارفي او د ایران – افغانستان سوداګریز مرکز رئیسې آغلې سمانه عبدالحی راضي په واسطه د اتاق په مرکزي دفتر کې لاسلیک شو.

دوشنبه، تلې ۲۴مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق مدیره پلاوي دارلانشاء رئیس ښاغلي خان محمد سرفراز باز، د مدیره پلاوي غړو هر یو ښاغلي خان جان الکوزي، ضیاءالدین اچکزي، احمد ضیاء عظیمي شینوزاده او سید پرویز سادات هوفیاني، د سوداګرۍ او صنعت، کرنې او مالدارۍ وزارتونو سرپرست وزیرانو، د افغانستان لپاره د ایران جمهور رئیس ځانګړي استازي ښاغلي حسن کاظم قمي، د افغانستان اورګاډي پټلۍ رئیس، د اتاق د پالیسۍ او تخنیکي مرستیال ښاغلي محمد انور عارفي، د کابل سوداګرۍ اتاق لومړي مرستیال ښاغلي احمد شاه حکیمي، د سپین بولدک اتاق رئیس او د دواړو هېوادونو سوداګرو او پانګوالو د "افغانستان – ایران پانګونې فرصتونو ناسته" چې په انتر کانتیننتال هوټل کې جوړه شوې وه، ګډون وکړ.
 
ښاغلي مهمند د افغانستان او ایران ترمنځ د سوداګریزو اړیکو په اړه خبرې وکړې او دا ډول ناستې یې د دواړو هېوادونو ترمنځ د سوداګریزو او اقتصادي اړیکو د پیاوړتیا لپاره مهمې وبللې. هغه د دغه هېواد په بندرونو کې د افغان سوداګرو لپاره د ایران له خوا د لازیاتو اسانتیاوو په رامنځته کولو، له چابهار بندر څخه د افغانستان تر بندرونو پورې د اورګاډي کرښې په بشپړېدو، افغان وګړو او سوداګرو ته د ویزو د ورکړې پر اسانتیاوو، د وارداتي او صادراتي توکو پر معیاري کولو ټینګار وکړ او د دواړو هېوادونو ترمنځ د سوداګریزو هوکړو څخه يې د افغانستان د خصوصي سکتور د ملاتړ ډاډ ورکړ.  

ښاغلي مهمند د افغانستان اوسنی وضعیت د پانګونې لپاره یو ښه فرصت وباله او د کانونو د استخراج، د کرنې د میکانیزه کیدو، د انرژۍ د تولید او همدارنګه په چابهار بندر کې د دواړو هېوادونو د سوداګرو د ګډې پانګونې غوښتنه وکړه.

د صنعت او سوداګرۍ وزارت سرپرست ایراني پلاوي او سوداګرو ته د ښه راغلاست په ترڅ کې ایران د افغانستان پخوانی او تاریخي دوست وباله او د سیمې د امنیت په تامین کې یې د دغه هېواد اقتصادي ثبات مهم وباله. هغه د صادراتو او وارداتو د پراختیا، افغان سوداګرو ته د ویزو په ورکړه کې د اسانتیاوو، په هېواد کې د ایراني سوداګرو د پانګونې، د خصوصي سکټور ترمنځ د همغږۍ او د دواړو هېوادونو ترمنځ د اقتصادي او سوداګریزو اړیکو د پیاوړتیا غوښتنه وکړه.

په افغانستان کې د ایران سفیر د دواړو هېوادونو ترمنځ د سوداګریزو او اقتصادي اړیکو پر پراختیا ټینګار وکړ او په دې برخه کې یې د دواړو هېوادونو ترمنځ په بندرونو کې د اسانتیاوو په رامنځته کولو په ځانګړي ډول د چابهار بندر د ګډو پانګونو لپاره د ایراني سوداګرو پر هڅولو، د افغانستان په سوداګریزو توکو د ګمرکي تعرفې په کمولو، د دواړو هېوادونو د اقتصادي ظرفيتونو پېژندلو، د تخصصي سوداګريزو کميټو جوړولو، د دواړو هېوادونو ترمنځ د سوداګريزو تړونونو په رامنځته کولو او د دواړو هېوادونو په پولو کې د ګډو بازارونو په رامنځته کولو کې د ايران دولت د همکارۍ ډاډ ورکړ.

د کرنې او مالدارۍ وزارت سرپرست افغانستان ګاونډیو هېوادونو ته د کرنیزو محصولاتو یو صادرونکی هېواد وباله او د بزګرانو د ظرفیتونو د لوړولو او د کرنې د میکانیزه کیدو برخه کې یې د دوه اړخیزو تړونونو پر عملي کېدو ټینګار وکړ.

د هېواد د اورګاډي پټلۍ رئیس د ایران او افغانستان ترمنځ د اوګاډي پټلۍ د ارزښت په اړه خبرې وکړې او همدارانګه د سیمې هېوادونو په ځانګړې توګه چین او ایران سره يې د افغانستان د اتصال برخه کې د اورګاډي پټلۍ رول اړین وباله.
نوموړي د دواړو هېوادونو خصوصي سکتورونه وهڅول چې په دې برخه کې پانګونه وکړي.

د ناستې په پای کې دواړو هېوادونو د سوداګریزو، اقتصادي او ټرانزیټي اړیکو د پراختیا په موخه د همکاریو یو هوکړه لیک لاسلیک شو او د هېواد سوداګرو ته د ایران سفارت د ښو همکاریو او مرستو په پار، د افغانستان خصوصي سکتور عالي نښان د افغانستان د سوداګرۍ او پانګونې اتاق د مشرتابه لخوا د افغاستان لپاره د ایران جمهور رئیس ځانګړي استازي او سفیر ته ډالۍ کړی شو.

چهار شنبه، تلې ۱۹مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې د مدیره پلاوي دارالانشاء رئیس ښاغلي خان محمد سرفراز باز، د مدیره پلاوي نړیوالو اړیکو رئیس ښاغلي انجنیر سید جاوید برهان او د عامل پلاوي تخنیکي او پالیسۍ مرستیال او سرپرست ښاغلي محمد انور عارفي هم حضور درلود، د UNDP اقتصادي پروګرامونو له مسؤل ښاغلي آتو ګوپتا سره لیدنه ترسره او د کوچنیو سوداګریو پراختیا او ودې په اړه يې خبرې اترې وکړې.
 
ښاغلي ګوپتا د خپلې ادارې لخوا د کوچنیو متشبثینو د ودې او پراختیا او همدارنګه هغو متشبثینو ته چې غواړي سوداګرۍ ته پراختیا ورکړي، د متوسط پورونو د ورکړې په اړه خبرې وکړې. نوموړي د سوداګرو او لویو پانګوالو د هڅونې او د کوچنیو متشبثینو د وړتیا لوړونې په برخه کې د اتاق د هر اړخیزې همکارۍ غوښتنه وکړه.

ښاغلي مهمند د کوچنیو متشبثینو د ملاتړ، د هېواد د سوداګرو او پانګوالو د هڅولو او د ګډو کنفرانسونو د جوړولو په برخه کې د خپلې ژمنې ډاډ ورکړ.

یکشنبه، تلې ۲۳مه، ۱۴۰۲

د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي د افغان – پاک ګډ اتاق اجرائیوي رئیس ښاغلي نقیب الله صافي په حضور کې د سمنټو له واردونکو سره لیدنه ترسره او د دوی د ګمرکي ستونزو په اړه يې خبرې اترې وکړې.

د سمنټو واردوونکو له پاکستان څخه د سمنټو پر وارداتو د ګمرکي محصول سل په سلو کې زیاتوالی، د کراچۍ بندر ته د افغان سوداګرو د یو شمېر مالونو پر ننوتلو بندیز او د پاکستان څخه د افغان سوداګریزو او ټرانزیټي توکو د خروج لپاره د معین او مشخص وخت نه ټاکل یاد کړل او د افغانستان د سوداګرۍ او پانګونې اتاق له مشرتابه یې وغوښتل چې د دوی ستونزې له اړوندو دولتي چارواکو سره شریکې کړي او د حل په برخه کې ورسره همکاري وکړي.

ښاغلي الکوزي د پاکستان د دولت له لوري د (اپټا) د تړون څخه سرغړونه د نړیوالو سوداګریزو کنوانسیونونو خلاف عمل وباله او د اړوندو دولتي ادارو سره په همغږۍ یې د پورته یادو ستونزو د حل په برخه کې د اتاق د هر اړخیزې همکارۍ ډاډ ورکړ.

دوشنبه، تلې ۱۷مه، ۱۴۰۲

د افغانستان د سوداګرۍ او پانګونې اتاق د مالیې وزارت ګمرکونو له عمومي ریاست او ټرانزیټي توکو سوداګرو سره ګډه ناسته د افغان – پاک ګډ اتاق رئیس او د اتاق مدیره پلاوي غړي ښاغلي خان جان الکوزي، د ګمرکونو عمومي رئیس ښاغلي عبدالمتین سعید، د ټرانزیټي توکو لیږد سوداګرو استازي ښاغلي نیاز محمد الهام او یو شمیر واردوونکو په ګډون ترسره کړه.

ښاغلي نیاز محمد الهام د سوداګرۍ اتاق له مشرتابه او د ګمرکونو له عمومي رئیس سره د کراچۍ په بندر کې د افغان سوداګرو د ټرانزیټي ستونزو لکه: پاکستان ته د افغانستان د ټرانزیټي جوپو د داخلیدو مخنیوي، د ترانزیت لوړ محصول او د نړیوال ترانزیت د اصولو نه مراعتول شریک کړل او د بدیلو لارو او د ستونزو حل غوښتنه يې وکړه.

ښاغلي خان جان الکوزي په کراچۍ بندر کې د افغان سوداګرو ترانزیتي ستونزې د درک وړ وبللې او د هېواد له سوداګرو یې وغوښتل چې د عباس او چابهار بندرونو له لارې خپل واردات تنظیم کړي. هغه د افغانستان له لارې د پاکستان د ترانزیتي توکو د ټرانزیټي محصول پر لوړولو ټینګار وکړ.

د ګمرکونو عمومي ريئس په کراچۍ بندر کې د هېواد د سوداګرو د ترانزيتي ستونزو د حل په موخه خپلې هڅې یادې کړې او ډاډ يې ورکړ چې ايران به د افغانستان سوداګرو ته د عباس او چابهار په بندرونو کې د ترانزيتي توکو لېږد لپاره لازمې اسانتياوې برابرې کړي. هغه دغه راز ژمنه وکړه چې د سمنټو هغو جوپو ته چې پخوا يې هېواد ته د داخلیدو اجازه نه درلودو، اجازه ورکړي څو هېواد ته داخلې شي.

پنجشنبه، تلې ۲۰مه، ۱۴۰۲