ښاغلي محمد یونس مهمند، د افغانستان د سوداګرۍ او پانګونې اتاق لومړي مرستيال، ایران هېواد ته د خپل سفر په ترڅ کې په داسې حال کې چې د مشهد ښار والي او مرستیال، محترم میراجان سلیمان خېل د افغانستان-ایران ګډ اتاق رئیس، محترم توکلي د مشهد د سوداګرۍ اتاق رئیس، او د ترکمنستان، تاجکستان، او افغانستان سوداګریز قونسلونه او د سیمې د هېوادونو د اتاقونو رئیسان هم موجود وو، د منځنۍ اسیا او افغانستان لپاره د ایران د صادراتو د نندارتون په پرانیست غونډه کې ګډون وکړ.
ښاغلي مهمند وویل، د دې ډول نندارتونونو جوړول د هېوادونو د تولیدي محصولاتو په معرفي، د صادراتو په زیاتولو، د سوداګرو تر منځ د نظریاتو تبادله، او د ګاونډیو هېوادونو او سیمې ترمنځ د سوداګریزو او اقتصادي اړیکو په پراختیا کې مهم رول لري، او په راتلونکي کې یې هم د ورته نندارتونونو پر جوړولو ټینګار وکړ. هغه، زیاته کړه چې ګاونډي هېوادونه باید د خصوصي سکتور لپاره مرسته وکړي، نه دا چې ستونزې ورته جوړې کړي.
د اتاق لومړي مرستیال، د خپل سفر په دویمه ورځ د مشهد د سوداګرۍ اتاق په مقر کې د خراسان رضوي والي، او د افغانستان، تاجکستان، ایران او ترکمنستان د قونسلانو سره هم ولیدل او په افغانستان کې د پانګونې فرصتونو په اړه یې مفصل معلومات ورکړل. هغه وویل، په افغانستان کې عمومي امنیت، د اداري فساد له منځه وړل، او د کوکنارو منع د پانګونې لپاره یو مناسب چاپېریال رامنځته کړی دی. نوموړي له ګډونوالو وغوښتل چې د افغان سوداګرو د ستونزو په حل او په افغانستان کې د ګډو پانګونو لپاره، په ځانګړې توګه د قوش تېپې کانال او د ټاپي پروژه کې، عملي ګامونه واخلي.
د اتاق لومړي مرستیال، د افغانستان له ټولو ګاونډیو هېوادونو او نړۍ سره په سوداګریزو او اقتصادي اړیکو ټینګار وکړ او یادونه یې وکړه چې د دې هېوادونو تر منځ باید سوداګریز خنډونه لرې شي.
ښاغلي سلیمان خېل د سوداګرو په وړاندې موجودو ستونزو، په ځانګړي ډول د ترانسپورت او د لوړو کرایو په اړه، خبرې وکړې او د دې ستونزو د حل غوښتنه یې وکړه.
د خراسان رضوي والي او د غونډې نورو ګډونوالو د افغانستان د سوداګرۍ او پانګونې اتاق د لومړي مرستیال خبرې واورېدې او ډاډ یې ورکړ چې د افغان سوداګرو د ستونزو په حل او په افغانستان کې د پانګونې د هڅونې په برخه کې به همکاري کوي.
شنبه، د ۱۴۰۳ کال د لړم ۵مه
