د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک په داسی حال کې چې، د ECO سازمان عمومي منشي ښاغلي خسرو نوزیري، د IRU عمومي منشي ښاغلي اومبرتودوپروتو، د TIR مدیرې آغلې تاتیانا ری بلت او د پاکستان، قزاقستان، روسيې، ازبکستان، تاجکستان او ایران ټرانزیټ مسؤلینو حضور درلود په هغې آنلاین ناسته کې چې د نړیوالو ټرانزیټي محصولاتو لیږد برخه کې د ایکو سازمان د فعالیتونو، د ایکو په سیمه کې د سرحدي دروازو لا ښه کولو، په شنو کرښو د تګ راتګ، برښنايي صفونو او د ټرانزیټ ډیجیټلي کیدو په موخه جوړه شوې وه، ګډون وکړ.

ښاغلي خسرو د ECO-TIR سیستم د لاسته راوړنو او فعالیتونو په اړه مفصل معلومات وړاندی کړل او د سیمې هېوادونو رول يې د یاد سیستم په پراختیا کې اړین وباله.
نوموړي د یاد سیستم تطبیق برخه کې د سیمې هېوادونو په همکارۍ ټینګار وکړ.

ښاغلي هوتک د سیمې هېوادونو د همکارۍ نه شتون، د موټر چلوونکو لپاره د ویزو نه ورکړه او د سیمې هېوادونو سره د دوه اړخیزو او څو اړخیزو هوکړه لیکونو نه شتون د افغانستان د ټرانزیټ په وړاندی سترې ننګونې وبللې او د ECO-TIR ادارې څخه يې وغوښتل چې په هېواد کې د یاد سیستم ظرفیت لوړونې او لازمو آسانتیاوو رامنځته کولو برخه کې همکاري وکړي.

دوشنبه، تلې ۱۰مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار، د اتاق لومړي مرستیال ښاغلي محمد یونس مهمند او د اتاق د مدیره پلاوي غړي ښاغلي عصمت الله وردګ، د افغانستان او پاکستان لپاره د نړیوال بانک (IFC) استازي ښاغلي زیشان شیخ، د امریکا متحده ایالاتو پراختیايي ادارې (USAID) او د آسیايې پراختیا بانک (ADB) له مسؤلینو سره په ترکیه کې په جوړه شوې ناسته کې د لیدنې ترڅنګ، د افغانستان خصوصي سکتور ستونزو او نړیوالو همکاریو په اړه یې خبرې اترې وکړې.

ښاغلي توکل احمدیار د دغې غونډې د جوړیدو د هرکلي په ترڅ کې د تمویل کوونکو له خوا د پراختیایي پروژو د پیسو د ورکړې په اړه خبرې وکړې او زیاته یې کړه "په افغانستان کې ډیرې پراختیایي پروژې چې د خصوصي سکتور له خوا پلې شوې وې یا نیمګړې پاتې دي چې پیسې يې باید د نړیوال بانک او پراختیايي بانک لخوا تحویل کړی شوی وې خو تر اوسه د بېلابېلو دلایلو له امله د دې پروژو پیسې نه دي ورکړل شوي او د هېواد خصوصي سکتور په دې برخه کې له ګڼو ننګونو سره مخ دی.
ښاغلي احمديار له نړيوال بانک او آسیا پراختيايي بانک څخه د يادې شوې ستونزې د هواري غوښتنه وکړه.

ښاغلي محمد یونس مهمند د سوداګریزو موخو لپاره بهرنیو هېوادونو ته د سوداګرو د پیسو د لېږد ستونزې ته په اشارې سره زیاته کړه "افغان سوداګر کولای شي خپلې پیسې د مرکزي اسیا درېیو هېوادونو (قزاقستان، ازبکستان او ترکمنستان) ته د بانک له لارې انتقال کړي خو نورو هيوادونو ته نه شي نه کولی چې، د بانک له لارې پیسې ولیږدوي.
نوموړي د سوداګرو د پیسو د انتقال په برخه کې د اسانتیاوو په رامنځته کولو کې د بانکونو او نړیوالو موسسو د همکارۍ غوښتنه وکړه.

ښاغلي عصمت الله وردګ د یوشمیر هغو شرکتونو ستونزو ته اشاره وکړه چې په دولت کې یې بېلابېلې پروژې بشپړې کړي او یا هم نیمګړې پاتې دي او لا هم د خپلو پیسو د ترلاسه کولو هڅې کوي خو ترلاسه کولی يې نه شي او دغه راز د ویزو د نه ورکولو په برخه کې د سوداګرو ستونزې یې یادې کړې.

په دې ناسته کې د نړیوال بانک، آسیا پرختیايي بانک او USAID مسؤلینو د افغانستان د سوداګرۍ او پانګونې اتاق د مشرتابه له خبرو اوریدلو وروسته ژمنه وکړه، چې د پراختیايي پروژو د تادیاتو په برخه کې به له اړوندو ادارو سره بحث او خبرې وکړي او یادې ستونزې ته به د حل مناسبه لاره بیامومي.

پنجشنبه، تلې ۶مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک د پالیسي او تخنیکي مرستیال ښاغلي محمد انور عارفي او د اتاق سوداګریزو شخړو حل مرکز رئیس ښاغلي توکل خرم په حضور کې، د قزاقستان ایروسین غذايي موادو شرکت له رئیس ښاغلي کراتبانوف اسخت لیدنه ترسره او په هېواد کې يې د سوداګرۍ او پانګونې فرصتونو، په مختلفو برخو په ځانګړې توګه د خوراکي توکو تولید برخه کې د بهرنیو پانګونو جلبونې او د دواړو هېوادونو ترمنځ د سوداګریزو اړیکو ودې په اړه يې خبرې اترې وکړې.
 
ښاغلي هوتک د سوداګرۍ او پانګونې اتاق فعالیتونه او لاسته راوړنې په تفصیل سره بیان کړې او په هېواد کې یې د پانګونې لېوالتیا لرونکو پانګوالو ته د اسانتیاوو په رامنځته کولو کې د اتاق د همکارۍ ډاډ ورکړ. نوموړي ژمنه وکړه، چې د سوداګریزو اړیکو د ښه والي په موخه به د افغان سوداګرو او د خوراکي توکو د تولید شرکت د رئیس ترمنځ ګډه غونډه جوړه کړي.

ښاغلي عارفي په هېواد کې د سوداګرۍ او پانګونې د فرصتونو په اړه معلومات وړاندې کړل او د خوراکي توکو د تولید شرکت له رئیس څخه یې وغوښتل چې دغه فرصتونه په پام کې ونیسي او په بېلابېلو برخو په ځانګړې توګه د افغاني وچې مېوې د صادراتو په برخه کې چې نړیوال شهرت لري، پانګونه وکړي.

ښاغلي کرتبانوف اسخت د ایروسین د خوراکي توکو د تولید شرکت د فعالیتونو په اړه معلومات ورکړل او ژمنه یې وکړه چې له افغان سوداګرو سره د سوداګریزو اړیکو او خوراکي توکو د سوداګرۍ د پراختیا په برخه کې به له اتاق سره په همغږۍ کار وکړي.

یکشنبه، تلې ۹مه، ۱۴۰۲

د افغانستان د سوداګرۍ او پانګونې اتاق د پالیسۍ او تخنیکي مرستیال ښاغلي محمد انور عارفي د دولت سره د اړیکو او غړو څانګو د مسؤلینو او غړو په شتون کې، د کنفرانسونو په تالار کې له یو شمېر ښځینه متشبثینو سره وکتل او د ښځینه متشبثینو لپاره د تخصصي کمیټې د جوړولو په اړه يې خبرې اترې وکړې.

ښاغلي عارفي د افغانستان د سوداګرۍ او پانګونې اتاق په هېواد کې د خصوصي سکتور د فعالیتونو یو مهم ملاتړی وباله او د یوې تخصصي کمېټې پر جوړولو یې ټینګار وکړ چې ښځینه متشبثې او د سوداګرۍ مسلکي کسان پکې شامل وي.
نوموړي د دې کمیټې د جوړیدو موخه د ښځینه متشبثینو او سوداګرو د ستونزو حل وګاڼه او له هغوی یې وغوښتل چې د افغانستان د سوداګرۍ اتاق د طرزالعملونو له مخې خپل مشران او غړي اتاق ته معرفي کړي.

متشبثې میرمنو د دغه ډول تخصصي کمیټې د جوړولو په برخه کې د اتاق د همکارۍ هرکلی وکړ او د یوې فعالې کمیټې په جوړولو یې ټینګار وکړ چې وکولای شي په اوسنیو شرایطو کې د افغان متشبثو میرمنو استازیتوب وکړي.

دوشنبه، تلې ۳مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند ترکيې ته د خپل کاري سفر په ترڅ کې، په داسی حال کې چې د اتاق سوداګریزو چارو مرستیال ښاغلي خیرالدین مایل احمدي، خدماتي مرستیال ښاغلي نصیر احمد عرب، د افغان-پاک ګډ اتاق رئیس او د مدیره پلاوي غړي ښاغلي خان جان الکوزي، د کابل اتاق مدیره پلاوي لومړي مرستیال ښاغلي احمد شاه حکیمي او کورنیو سوداګرو او پانګوالو يې ملتیا کوله په افغانستان کې د امریکا متحده ایالاتو د ماموریت شارژدافیرې آغلې کرن دیکر، د افغانستان لپاره د انګلستان سفارت شارژدافیر ښاغلي چترت دیکسن، د ایټالیې استازي، د امریکا متحده ایالاتو پراختیا نړیوالې ادارې (USAID) او د ۷۷ نړیوال شرکت رئیس ښاغلي سلیمان سره لیدنه ترسره کړه.
   
ښاغلي مهمند د هېواد د اوسنيو شرايطو په اړه مفصل معلومات وړاندې کړل او زیاته يې کړه "د افغانستان اقتصادي وضعيت د ډاډ وړ او په ټوليز ډول د امنيت تامين، د کوکنارو د کښت د مخنيوي، په هېواد کې د اداري فساد د پام وړ کموالى او واحد حکومتوالى، د پانګونې او سوداګرۍ چټکتیا لپاره ښه شرايط رامنځته کړي دي.
نوموړي د بهرنيو هېوادونو له استازو وغوښتل، چې د کوکنارو د کرکيلې پر وړاندې مبارزه کې له کروندګرو سره همکاري وکړي او د مناسبو بديلونو په لټه کې شي او بهرني پانګوال په افغانستان کې پانګونې ته وهڅوي.

د اتاق لومړي مرستیال د بهرنیو هېوادونو له خوا افغان سوداګرو ته د ویزو نه ورکول، د ټرانزیټ په برخه کې د مالونو د لېږد لپاره د معیاري لویو لارو نشتوالی او په هېواد کې خپلو بانکي زیرمو ته د سوداګرو او خلکو نه لاسرسی د افغانستان یو له بنسټیزو ستونزو څخه وبلل او د بهرنیو هېوادونو له استازو څخه يې وغوښتل چې د اوسنیو فرصتونو په پام کې نیولو سره د پورته یادو ستونزو په حل کې همکاري وکړي.
نوموړي په هېواد کې د بشردوستانه مؤسسو له خوا د عامه المنفعه پروژو پر تطبیق ټینګار وکړ.

افغان سوداګرو او پانګوالو د هېواد سوداګرو ته د لازمو اسانتیاوو د برابرولو په برخه کې د حکومت له هڅو خوښي څرګنده کړه او اوسنی چاپېریال یې د ګډې پانګونې لپاره مناسب وباله.

د لوېدیځو هېوادونو استازو د اتاق د لومړي مرستیال او افغان سوداګرو د خبرو له اورېدو وروسته، د افغانستان له خلکو سره د مرستو په رسولو او د یادو ستونزو د حل په برخه کې د همکارۍ ډاډ ورکړ.

شنبه، تلې ۸مه، ۱۴۰۲