د امام ابو حنیفه (رح) درېیم ملي او نړیوال نندارتون، چې د افغانستان د سوداګرۍ او پانګونې اتاق له لوري او د صنعت او سوداګرۍ وزارت په همکارۍ د اوو ورځو لپاره په کابل کې جوړ کړی و، د مطبوعاتي کنفرانس او یوې شاندارې غونډې په ترڅ کې پای ته ورسېد، په یاده غونډه کې د ریاست الوزرا سیاسي مرستیال جلالتمآب مولوی عبدالکبیر، د سوداګرۍ او پانګونې اتاق او د کابل اتاق مشرتابه پلاوي، د ریاست الوزرا د دفتر رییس، د چارو ادارې لوۍ رئیس، د صنعت او سوداګرۍ وزارت او اقتصاد وزارت مرستیالیان، د اروپايي ټولنې استازې، د نړیوالو ادارو استازي، بهرني مېلمانه، د نندارتون رئیس او د خصوصي سکتور سلګونه غړي ګډون کړی و.
په پیل کې، د افغانستان د سوداګرۍ او پانګونې اتاق لومړي مرستیال، ښاغلي محمد یونس مهمند، د حکومت چارواکو او داخلي او بهرنیو مېلمنو د هرکلي په ترڅ کې د نندارتون د بریالیتوب لپاره د حکومت، صنعت او سوداګرۍ وزارت د مرستو، د امنیتي ادارو د ښه امنیت، د امر بالمعروف وزارت او نورو اړوند ادارو څخه مننه وکړه.
ښاغلي مهمند، همدارنګه د کورنیو مالي ملاتړکوونکو، نړیوالو بنسټونو او موسسو، د ایراني شرکتونو او د مرکز او ولایتونو شرکتونو څخه مننه وکړه چې خپل تولیدات یې په نندارتون کې وړاندې کړي وو.
د سوداګرۍ او پانګونې اتاق مرستیال، له نړیوالې ټولنې وغوښتل چې د افغانستان د خلکو کنګل شوې شتمنۍ چې خلکو او خصوصي سکتور ته یې زیاتې ستونزې رامنځته کړې دي، بېرته د افغانستان بانک ته ورکړي. هغه همدارنګه له حکومتي چارواکو څخه وغوښتل چې په کابل ښار کې د سوداګرۍ او پانګونې اتاق د نیمګړې ودانۍ په جوړولو کې له اتاق سره مرسته وکړي. ښاغلي مهمند، د مالیې وزارت څخه د ځینو صنفونو د مالیې معافیت لپاره مننه وکړه او له دوی څخه یې وغوښتل چې په مالي چارو کې نورې اسانتیاوې رامنځته کړي.
ورپسې د ریاست الوزرا پیغام د داکتر عبدالواسع له لوري وړاندې شو، په کوم کې چې د امام ابو حنیفه (رح) د درېیم ملي او نړیوال نندارتون د بریالیتوب لپاره مبارکي ویل شوې وه او د خصوصي سکتور څخه غوښتل شوي وو چې د قوش تپې پروژې په څېر لویو اقتصادي پروژو کې ګډون وکړي. په پیغام کې همدارنګه له سوداګرو غوښتل شوي وو چې د ژمي لپاره د خلکو اړتیاوې په پام کې ونیسي.
وروسته، د ریاست الوزرا سیاسي مرستیال، جلالتمآب مولوي عبدالکبیر، د افغانستان د سوداګرۍ او پانګونې اتاق له لوري د دې لوی نندارتون د جوړولو ستاینه وکړه او له ټولو ګډونوالو څخه یې مننه وکړه چې خپل تولیدات یې نندارې ته وړاندې کړي وو. هغه د افغانستان د حکومت له ګاونډیو او سیمهییزو هیوادونو سره د ښو اړیکو یادونه وکړه او د افغانستان بهرنۍ تګلاره یې پر اقتصاد متمرکزه وبلله. نوموړي د خصوصي سکتور د بشپړ ملاتړ ډاډ هم ورکړ، په ځانګړي ډول د پانګونې په برخه کې د لا زیاتو اسانتیاوو د رامنځته کولو په اړه.
دغه راز، ښاغلي نورالحق انور، د چارو ادارې لوی رئیس، ښاغلي احمدالله زاهد، د صنعت او سوداګرۍ وزارت معین، او ښاغلي عبدالطیف نظری، د اقتصاد وزارت مسلکي معین، د خپلو ادارو د پالیسۍ په اړه خبرې وکړې، چې په هغې کې د پانګونې قانون اسانتیاوې، پانګوالو ته د ځمکې وېش، او د اقتصادي پروژو په اړه خبرې وشوې.
ښاغلي الحاج خیرالدین مایل احمدي، د سوداګرۍ اتاق سوداګریز مرستیال، د نندارتون د بریاوو یادونه وکړه او له ټولو حکومتي ادارو، نهادونو، شرکتونو او هغو کسانو څخه یې مننه وکړه چې د نندارتون په بریالیتوب کې یې مرسته کړې وه.
ښاغلي مایل د نندارتون رئیس صابر لطیفي او امنیتي ځواکونو څخه مننه وکړه او له حکومته یې وغوښتل چې د خصوصي سکتور د پانګونې او سوداګرۍ په برخه کې لا زیات ملاتړ وکړي.
ښاغلي میر زمان پوپل، د سوداګرۍ اتاق د مالي او اداري معاونیت سرپرست، د نندارتون د لاسته راوړنو په اړه خبرې وکړې او ویې ویل چې له ۷۰۰ زرو څخه زیاتو کسانو په اوو ورځو کې د امام ابو حنیفه (رح) درېیم ملي او نړیوال نندارتون ته مراجعه کړې وه؛ ۷۰۰ داخلي او بهرني شرکتونو (له ایران، پاکستان او ترکیې څخه) خپل تولیدات او محصولات نندارې ته وړاندې کړي وو؛ په کورني برخه کې ۳۲۴ قراردادونه او هوکړه لیکونه د ۶۰ میلیونه افغانیو په ارزښت لاسلیک شوي او د تولیدي او تجارتي توکو د پلور ارزښت ۷۰ میلیونه افغانۍ شوی دی.
ښاغلي پوپل زیاته کړه: ۷۰ ایراني شرکتونو په ۱۰۰۰ متر مربع ساحه کې برخه اخیستې وه او پاکستان او ترکیې هم درې غرفې لرلې. همدارنګه، د نندارتون په دویمه ورځ او په سرینا هوټل کې د سوداګریز کنفرانس پر مهال له ۱۰۰ څخه زیات تفاهمنامې او قراردادونه د داخلي او بهرنیو شرکتونو ترمنځ د ۵۰ میلیونه ډالرو په ارزښت لاسلیک شوي او یو شمېر بهرنیو شرکتونو په افغانستان کې د پانګونې لپاره خپله چمتووالی څرګند کړ.
د پروګرام په پای کې، د نندارتون ملاتړکوونکي، امنیتي مسوولینو او هغو غرفهدارانو ته چې خپل تولیدات او خدمات یې نندارې ته وړاندې کړي وو، د سوداګرۍ اتاق له لوري ستاینلیکونه ورکړل شوې.
