ښاغلي محمد یونس مهمند، د افغانستان د سوداګرۍ او پانګونې اتاق لومړی مرستيال، د ښاغلي سلطان محمد صافي، د اتاق د مشرتابه پلاوي غړي او د افغان-پاک اتاق مرستيال، ښاغلي میرزمان پوپل د عامل پلاوي مالی او اداری مرستیال، ښاغلي عبدالسلام کوهی د اتاق حقوقی سلاکار او د شمال ختیځ زون د یو شمېر سوداګرو او پانګوالو په حضور کې، د بدخشان له محترم مرستيال والي سره وکتل او د پانګونې پر ستونزو او فرصتونو يې خبرې وکړې.
ښاغلي مهمند، د سوداګرۍ او پانګونې اتاق له خوا په فیضآباد کې د شمال ختیځ زون د پانګونې پر فرصتونو او ستونزو د يوې غونډې په اړه د یاد ولایت مرستيال والي ته معلومات ورکړل. هغه وويل چې بدخشان د طبيعي زيرمو له پلوه بډایه ولايت دی چې په کې د سرو زرو، مس، سرب، جست، تورمالين، کوارتز، تراورتین، ډبرو سکرو او بيوروچ کانونه شتون لري. هغه همداراز، د دې ولايت بندري ارزښت ته په اشارې سره، پر دې ټينګار وکړ چې محلي حکومت دې د واخان دهلېز په ګډون په بندرونو کې سوداګريزې اسانتياوې زیاتې کړي.
د اتاق لومړي مرستيال، د افغانستان او ګاونډیو هېوادونو تر منځ د سوداګریزو اموالو د تبادلې په زیاتولو کې د دې ډول اسانتیاوو رامنځته کول مهم وبلل او په بېلابېلو سکتورونو کې د پانګونې لپاره د سوداګرو د تشويق په برخه کې د سوداګرۍ او پانګونې اتاق د هر اړخيز ملاتړ ډاډ يې ورکړ.
محترم سلطان محمد صافي، د بدخشان د اقتصادي-سوداګريز ارزښت په اړه خبرې وکړې او د خصوصي سکتور ملاتړ یې د بېکارۍ په کموالي او د فقر په له منځه وړلو کې مهم وباله، او له مرستيال والي یې وغوښتل چې د دې ولایت د سوداګرو ملاتړ او ستونزو ته جدي پاملرنه وکړي.
ښاغلي پوپل، د هېواد په نورو زونونو کې د پانګونې د فرصتونو او ستونزو د کنفرانس د جوړولو پر بهیر، په ځانګړې توګه د شمال ختیځ زون په اړه، مفصل معلومات وړاندې کړل.
د بدخشان مرستيال والي، د اتاق د مشرتابه پلاوي راتګ ته ښه راغلاست ووايه او د هېواد د خصوصي سکتور د ملاتړ په اړه یې د مشرتابه هدایت تشريح کړ. هغه، د بدخشان د سوداګرو د ستونزو د حل او د هغوی لپاره د زياتو اسانتياوو رامنځته کولو کې د خپل بشپړ ملاتړ ډاډ ورکړ.
