د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، شمال ختیځ زون ولایتونو ته د خپل کاري سفر پر مهال، چې د اتاق د مشرتابه پلاوي غړي او د افغان پاک ګډ اتاق مرستیال ښاغلي سلطان محمد صافی او د اتاق ارشد سلاکار حاجي اجمل یې ملتیا کوله، د کندز د سوداګرۍ او پانګونې د اتاق له رئیس ښاغلي ګل محمد رجب زاده، د یاد اتاق له مشرتابه او د شمال ختیځ زون له مخکښو سوداګرو او پانګوالو سره ولیدل او د هغوی ستونزې او وړاندیزونه یې واورېدل.
ښاغلي رجب زاده، د افغانستان د سوداګرۍ او پانګونې د اتاق پلاوي ته ښه راغلاست ووایه او یادونه یې وکړه چې د دې ولایت سوداګر د ځمکو د غیر منظم متر کولو او د معیاري ارزونې له نشتون سره مخامخ دي. هغه له مشرتابه پلاوي وغوښتل چې د اړوندو دولتي ادارو په همکارۍ د ستونزو حل ته پاملرنه وکړي.
ښاغلي مهمند، د کندز د اتاق له مشرتابه مننه وکړه چې د خصوصي سکتور ملاتړ او د ستونزو په حل کې یې هڅې کوي. هغه کندز د یوه سرحدي ولایت او د طبیعي، زراعتي، صنعتي او ترانزیتي منابعو څخه بډایه ولایت وباله. نوموړي په تېرو درېیو کلونو کې د حکومت د امنیت ټینګښت، د فساد له منځه وړلو او د کوکنارو د کښت بندېدل لویې لاسته راوړنې وبللې او وویل چې د حکومت اساسي دنده دا ده چې هغو سوداګرو ته سوداګریزې اسانتیاوې برابرې کړي چې غواړي په هېواد کې پانګونه وکړي. نوموړي د دې ولایت له ټولو سوداګرو وغوښتل چې له موجودو فرصتونو څخه ګټه پورته کړي او خپلې ستونزې او نظریات په لیکلي ډول اتاق ته وسپاري ترڅو د اړوندو دولتي ادارو په همکارۍ د دوی ستونزو ته عملي حل لارې ولټوي.
ښاغلي مهمند، سوداګرو ته په مالیاتو کې د ستونزو د حل په موخه د مالیې وزارت او د حکومت لوړپوړو چارواکو ته د اتاق په همکارۍ وړاندې شویو غوښتنو په اړه معلومات وړاندې کړل. هغه د هېواد په اقتصادي ځان بسیاینې او د عام المنفعه پروژو جوړولو کې د مالیاتو اهمیت یاد کړ او له حکومتي ادارو یې وغوښتل چې د مالیاتو اخیستو برخه کې سوداګرو ته په ګمرکونو کې د واحدې مالیې ورکولو اسانتیاوې برابرې کړي.
د اتاق لومړي مرستیال د هېواد د کرنیزو او مالدارۍ محصولاتو د فرصتونو د کارولو په اړه خبرې وکړې او د تولیدي محصولاتو د کیفیت او ظرفیت لوړول یې د وارداتو، د اجناسو د قیمت کمولو او د هېواد د اقتصاد د ودې په برخه کې مهم وبلل. هغه د حکومت له خوا هغو سوداګرو ته چې غواړي په هېواد کې پانګونه وکړي، د ځمکې د وېش په اړه هم ګډونوالو ته معلومات وړاندې کړل او د شمال ختیځ ولایتونو له ټولو سوداګرو یې وغوښتل چې د زراعتي فارمونو په ځانګړي ډول د کبانو د فارمونو د جوړولو لپاره خپل وړاندیزونه په لیکلي ډول اتاق ته وسپاري.
ښاغلي سلطان محمد صافي د کندز د اتاق مشرتابه څخه مننه وکړه چې دا ناسته یې ترتیب کړه او ډاډ یې ورکړ چې د افغانستان د سوداګرۍ او پانګونې اتاق به د شمال ختیځ زون د سوداګرو د ستونزو په حل کې هر اړخیز ملاتړ وکړي.
