د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي دارالانشاء رئیس ښاغلي خان محمد سرفراز باز، د مدیره پلاوي غړیو هر یو خان جان الکوزي، ضیاءالدین اچکزي او محمد داود یوسفزی، د کابل ولایتي اتاق د مدیره پلاوي ځینو غړیو، د اتحادیو رئیسانو او یو شمیر سوداګرو د افغانستان اسلامي امارت د شکایتونو اوریدو کمیسیون له رئیس او سوداګرۍ او صنعت پخواني وزیر ښاغلي مولوي نورالدین ترابي سره د لیدنې په ترڅ کې د خصوصي سکتور په شتو ستونزو خبرې اترې وکړې.

 

ښاغلي مهمند ښاغلي مولوي نورالدین ترابي، ورسره مل پلاوي او د هېواد سوداګرو ته د ښه راغلاست ویلو ترڅنګ، د اتاق د اقتصادي او سوداګریزو فعالیتونو اوږد تاریخ په اړه مالومات وړاندی کړل او د هېواد لویو لارو په اوږدو او ګمرکونو کې د اسلامي امارت له خوا د رامنځته شوي امنیت او آسانتیاوو په تړاو يې خپله خوښی څرګنده کړه.

 

ښاغلي مهمند د اسلامي امارت د امنیتي او اقتصادي چارواکو له همکارۍ مننه وکړه او د هېواد په بازارونو کې يې د خامو موادو د بیو کمیدو ډاډ ورکړ.

ښاغلي خان جان الکوزي د سوداګرۍ په ډګر کې د سمدستي او اوږدمهاله ستونزو، د کورنیو تولیداتو او صادراتو په ځان بسیا کیدو او د امنیتي ستونزو حل په اړه د خبرو کولو ترڅنګ، په ګمرکونو او دفترونو کې يې د فساد له منځه وړل، د بانکدارۍ ستونزو حل کول او د مناسبو تعرفو وضع کول يې په بیو خورا اغیزمن وبلل.

 

ښاغلي خان محمد سرفراز باز د غیر مسؤله اشخاصو لخوا صرافانو ته د متوجه امنیتي ګواښونو، د دوی د امنیت په تضمین کې د اسلامي امارت همکارۍ، په اقتصاد او سوداګرۍ کې د صرافانو اړین رول او په بانکونو کې د صرافانو خپلو پیسو ته د نه لاسرسي ستونزو په اړه خبرې وکړې او ددی ستونزو د له منځه وړلو غوښتنه يې وکړه.

 

ښاغلي داود یوسفزي دتیلو او ګازو واردولو، ترکمنستان ته د پیسو لیږدولو او په ټاکلي وخت کې د نفتي توکو واردولو په برخه کې د شتو ستونزو په اړه خبرې وکړې.

د صنعتکارانو انجمن رئیس ښاغلي عبدالجبار صافي د صنعت کارانو ستونزو، د فابریکو لرونکو لپاره د خامو موادو اړتیا، د وارداتي توکو قاچاق او په کورني تولید يې اغیزو، د برښنا رسولو او د پانګونې راجلبولو په اړه خبرې وکړې.

 

د صرافانو اتحادیو رئیسانو د تازوه میوو، سبزیجاتو، خوراکي توکو، وچو میوو، غالیو، د پیسو په لیږد کې ستونزو، د تازه میوو او سبزیجاتو فصل رارسیدو، د تورخم او سپین بولدک په لارو کې يې بندوالی، د قزاقستان څخه د خوراکي توکو په ځانګړی توګه د اوړو پیرود، د وچو میوو په صادرولو کې شتو ستونزو، چین او عربي هېوادونو ته د غالیو او جلغوزو په صادرولو کې ستونزو او له چین څخه افغانستان ته د قزاقستان او ازبکستان له لارو د ټرانزیټ ستونزو په اړه خبرې وکړې او د اسلامي امارت له چارواکو يې وغوښتل چې یادو ستونزو ته پای ټکي کیښودو په برخه کې کوټلي ګامونه پورته کړي.

 

ښاغلي ترابي او د اسلامي امارت شکایتونو اوریدو کیمیسیون رئیس د خصوصي سکتور ستونزو او د افغانستان د سوداګرۍ او پانګونې اتاق مدیره پلاوي وړاندیزونو اوریدو وروسته د ستونزو په حل کې د خپلې بشپړې همکارۍ ژمنه وکړه. او د خصوصي سکتور نورو برخو څخه يې وغوښتل چې خپلې ستونزې او وړاندیزونه په منظم او لیکلی بڼه د افغانستان د سوداګرۍ او پانګونې اتاق له لارې د اسلامي امارت شکایتونو اوریدلو کیمیسیون ته وسپاري ترڅو د اړوندو ادارو له لارې يې د حل په برخه کې لازم ګامونه پورته کړی شي.

د افغانستان د سوداګرۍ او پانګونې اتاق مدیره پلاوي دریمې دورې دولسمه ناسته د افغانستان د سوداګرۍ او پانګونې اتاق عمومي رئیس ښاغلي توکل احمدیار تر ریاست لاندی او د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي سوداګريز مرستیال ښاغلي خیرالدین مایل احمدي، د مدیره پلاوي پانګه اچونې مرستیال ښاغلي سلطان محمد صافي، د مدیره پلاوي دارالانشاء رئیس ښاغلي خان محمد سرفراز باز، د مدیره پلاوي مالي رئیس ښاغلي شیرین آغا سخي، د مدیره پلاوي نړیوالو اړیکو رئیس ښاغلي انجنیر سید جاوید برهان، د عامل پلاوي سرپرست رئیس ښاغلي شفیق الله عطايي، د مدیره پلاوي غړیو هر یو خان جان الکوزي، ذکریا بریالي، احمد ضیاء عظیمي شینوزاده، ضیاءالدین اچکزي او بهادر خیر خواه، د عامل پلاوي مالي او اداري مرستیال ښاغلي میرویس هوتک په ګډون د اتاق په مرکزي دفتر کې ترسره شوه.

 

د ناستې په پیل کې، اجنډا د دارالانشاء رئیس ښاغلي خان محمد سرفراز باز له خوا د ناستې ګډونوالو ته وړاندې شوه او د عامل پلاوي سرپرست رئیس ښاغلي شفیق الله عطايي وروستیو سیاسي بدلونونو په نظر کې نیولو سره د مرکز او ولایتي دفترونو کاري راپورونه او وړاندیزونه وړاندی کړل.

 

ښاغلي توکل احمدیار د افغانستان اسلامي امارت له چارواکو سره په همغږۍ او همکارۍ کې د شهزاده سرای او خصوصي سکتور شتمنیو په خوندي ساتلو کې د مدیره پلاوي لومړي مرستیال او مدیره پلاوي نورو غړیو هڅو څخه مننه څرګنده کړه.

 

ورپسې ښاغلي مهمند په خصوصي سکتور کې شتو ننګونو ته د اشارې کولو ترڅنګ، د هغو هڅو یادونه وکړه چې د افغانستان د سوداګرۍ او پانګونې اتاق مدیره پلاوي د سوداګرۍ او صنعت وزارت، د ماليي وزارت، د افغانستان بانک او اسلامي امارت اقتصادي کمیسیون سره د ګډې همکارۍ او همغږۍ په پایله کې ترسره کړي دي.

 

همدارنګه، د اجرائیه کمېټې د ۱۵مې او ۱۶مې ناستو پریکړو په اړه بحث وشو او د مدیره پلاوي نورو غړیو د نورو یادو موضوعګانو په اړه خبرې اترې وکړې.

د ناستې په پای کې، د مدیره او عامل پلاوو وړاندیزونو په اړه بحث وشو او مدیره پلاوي يې په اړه لازمې پریکړې وکړې.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د مدیره پلاوي غړي ښاغلي خان جان الکوزي د اتاق په مرکزي دفتر کې د کابل ښار قوای مرکز سیمې سوداګرو او هټۍ والو سره د لیدنې په ترڅ کې د هغوی د شتو ستونزو په اړه خبرې اترې وکړې.

 

د کابل ښار قوای مرکز سیمې سوداګرو او هټۍ والو په کراچۍ بندر کې د پیسو د لیږد او یو لړ نورې امنیتي ستونزې د افغانستان د سوداګرۍ او پانګونې اتاق مشرتابه پلاوي سره شریکې کړې او د له منځه وړلو په برخه کې يې د اتاق د همکارۍ غوښتنه وکړه.

 

ښاغلي مهمند سوداګرو ته د ښه راغلاست ویلو او د پیسو لیږد په اړه د خبرو کولو ترڅنګ، وویل "د پیسو لیږد د ټولو سوداګرو عمومي ستونزه ده او په اړه يې د مرکزي بانک سره خبرې شوي دي او مرکزي بانک هم په دی برخه کې د همکارۍ ژمنه کړې ده."

 

ښاغلي مهمند د امنیتي حالت ښه کیدو او هغو ناستو په اړه چې نوموړي د افغانستان اسلامي امارت له مسؤلینو سره کړي دي د مالوماتو ورکولو ترڅنګ، ډاډ ورکړ چې ددی سوداګرو ستونزې به له اړوندو مسؤلینو سره شریکې او د حل لارې چارې به ورته ولټوي.

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق عامل پلاوي مالي او اداري مرستیال ښاغلي میرویس هوتک د افغانستان نوین ساختماني شرکتونو اتحاديي له رئیس ښاغلي سید جواد حیدري سره د لیدنې په ترڅ کې د دوی د شتو ستونزو په اړه خبرې اترې وکړې.

 

ښاغلي حیدري د اتاق د همیشنیو همکاریو په تړاو د اتاق څخه د مننې کولو ترڅنګ، خپلو اوسنیو ستونزو ته داسې اشاره وکړه "د افغانستان نوین شرکتونو په پخواني ماليي وزارت او نورو وزارتونو کې د ساختمانۍ کارونه ترسره کړي دي، خو له بده مرغه، چې پخواني حکومت موږ ته زموږ پیسې نه دي تادیه کړي. ځکه نو موږ د افغانستان د سوداګرۍ او پانګونې اتاق له مشرتابه څخه په خورا درنښت هیله کوو، چې زموږ دې ستونزې ته د پای ټکي کیښودو په برخه کې له موږ سره مرسته او همکاري وکړي."

 

ښاغلي مهمند د ساختمانۍ شرکتونه د هېواد په بیارغونه کې بنسټیزې ستنې وبللې او ژمنه يې وکړه، چې اتاق مشرتابه به یاده ستونزه د افغانستان اسلامي امارت د سوداګرۍ او صنعت له ښاغلي وزیر او د اسلامي امارت اقتصادي کمیسیون سره شریکه او د حل لارې چارې به ورته ولټوي.