د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د اتاق د مدیره پلاوي د دارالانشاء رئیس ښاغلي خان محمد سرفراز باز، د مدیره پلاوي غړي او د نفتي موادو کمېټې رئیس ښاغلي جان آقا صادقي، د عامل پلاوي مالي او اداري مرستیال ښاغلي میرویس هوتک او د هېواد د مختلفو ولایتونو څخه د نفتي موادو ډیر شمیر سوداګرو په انسا اداره کې د حکومت د سکتوري ادارو مسؤلینو سره د لیدنې په ترڅ کې، د نفتي موادو واردوونکو ستونزو حل، سوداګریزو آسانتیاوو رامنځته کولو او پانګه اچونو راجلبولو په اړه خبرې اترې وکړې.

ښاغلي مهمند د سټنډرډ ملي ادارې له مسؤلینو سره د نفتي سکتور د ستونزو په ځانګړي ډول هغه ستونزې چې د نفتي توکو سوداګر یې په بندرونو کې د معیارونو د پلي کولو په برخه کې لري خبرې وکړې او دغه راز یو شمېر هغه نفتي مواد چې دوی له ایران څخه واردوي کوم چې د افغانستان له معیارونو سره توپیر لري په اړه يي د اړوندو دولتي ادارو له مسؤلینو سره خبرې وکړې.  

نوموړي وړانديز وکړ، چې د دې سکتور د ستونزو د حل په موخه دې د نفتي توکو د سوداګرو د استازو او د اړوندو ادارو د مسوولينو په ګډون يوه کمېټه جوړه شي، څو دغه کمېټه له يو بل سره په همغږۍ او همکارۍ سره د شته ستونزو او حل لارو په اړه بحث وکړي.

همدارنګه ښاغلي مهمند د یادو ادارو استازو ته سپارښتنه وکړه، د ژمي د ستراتیژیکو زېرمو د جوړولو په اړه جدي پریکړه وکړي څو ګران هېوادوال د ژمي په موسم کې د نفتي توکو د کمښت له ستونزې سره مخ نه شي.

د سټنډرډ ملي ادارې عمومي رئیس محترم مولوي فیض الله تمیم د شته ستونزو په اړه خبرې وکړې او ژمنه یې وکړه، چې د سټنډرډ ملي اداره د سوداګرو د ستونزو په حل کې هر ډول همکارۍ ته چمتو ده.

په دې ناسته کې د نفتي توکو د سوداګرو استازو هم د خپلو ولايتونو په استازيتوب خبرې وکړې او يو شمېر يې له ايران څخه د باکيفيته نفتي توکو د واردولو د اجازې غوښتنه وکړه، هغوى وويل چې د ايران د نفتي توکو بيې ارزانه او د خلکو او د دوی د وسایطو د ګټې اخیستنې لپاره مناسب دي.

په دې ناسته کې د ریاست الوزرا، د صنعت او سوداګرۍ وزارت، د بهرنیو چارو وزارت، د ریل پټلۍ ادارې، د ګمرکونو عمومي ریاست او د نفتو او ګازو دولتي شرکت محترمو استازو د معیارونو او د ستونزو د حل د څرنګوالي په اړه خپل نظرونه څرګند کړل او ژمنه یې وکړه د سوداګرۍ او پانګونې اتاق او د تیلو واردوونکو سره به د دوی د ستونزو حل برخه کې نه ستړې کیدونکې هلې ځلې وکړي.  

په پای کې پرېکړه وشوه چې، د نفتي توکو واردوونکي او د انساء ادارې مسؤلین به د تخنیکي ناستو په ترڅ کې یادو ستونزو ته د حل مناسبې لارې چارې لټوي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د اتاق عامل پلاوي مالي او اداري مرستیال ښاغلي میرویس هوتک په ملتیا د تیلو او ګازو واردوونکو اتحاديي رئیس او ددی سکتور یو شمیر سوداګرو سره د لیدنې په ترڅ کې، تیلو او ګازو ته د خلکو د اړتیا او د نورم او سټنډرډ ستونزو په اړه خبرې اترې وکړې.

ښاغلي مهمند د ګازو او تیلو واردوونکو اتحاديي رئیس او غړو ته د ښه راغلاست ویلو په ترڅ کې د هېواد په سختو شرايطو کې د خلکو د اړتیاوو په پوره کولو کې د دې اتحاديي د خدمتونو ستاینه وکړ او په مناسبه بيه د با کيفيته تېلو او ګازو پر واردولو او د بې کيفيته نفتي توکو واردولو پر مخنيوي ټينګار وکړ.

نوموړي د تیلو او ګازو له سوداګرو او واردونکو وغوښتل چې د سیمه ییزو معیارونو سره سم د کیفیت لرونکي موادو د واردولو او د ټیټ کیفیت د تېلو د واردولو د مخنیوي لپاره د یوه ښه میکانیزم په اړه بحث او مشورې وکړي او د نورم او سټنډرډ ادارې سره په همغږۍ دې خپل مشخص نظرونه څرګند کړي.

سوداګرو او د تیلو او ګازو واردونکو اتحادیې غړو د نفتي توکو د واردولو او د خلکو د اړتیاوو د پوره کولو او په ځانګړي ډول په راتلونکي ژمي کې د اړتیاوو د پوره کولو په اړه له هر اړخیزو نظریاتو او مفصلو بحثونو وروسته، ټولو موافقه وکړه چې د نورم او سټنډرډ ادارې سره په همغږۍ کې با کیفیته نفتي مواد وارد او د بی کیفیته نفتي موادو د ورود مخه ونیول شي.  

خو د دوى په وينا، د هېواد د نورم او سټنډرډ ادارې له خوا ټاکل شوي اوسني معيارونه د ګاونډيو او سيمه ييزو هېوادونو په پرتله لوړ دي او په اوسنيو حالاتو کې د نورم او سټنډرډ ادارې لخوا د ټاکل شویو معیارونو سره سم د تیلو برابرول ستونزمن او د خلکو د پېر له ځواک څخه بهر دي.

د افغانستان د سوداګرۍ او پانګونې اتاق د مشرتابه پلاوي د دوو تېرو ناستو په دوام کې د سوداګرو او د نفتو او ګازو واردونکو اتحادیې او همدارنګه د دولتي سکتوري ادارو له رئیسانو او مسوولینو سره د نفتو او ګازو په برخه کې د خلکو د اړتیاوو د پوره کولو او د نورم او سټنډرډ ادارې شرایطو برابر او د باکیفیته تیلو واردولو په اړه د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د اتاق د مدیره پلاوي غړي ښاغلي محمد داود یوسفزي او د اتاق د عامل پلاوي مالي او اداري مرستیال ښاغلي میرویس هوتک او د تیلو او ګازو ډیر شمیر سوداګرو ناستې ترسره کړې.

ښاغلي مهمند د دې غونډې د جوړیدو موخه د انساء ادارې د تخنیکي ټیم په ناسته کې د ولایتي استازو ټاکل او د نورم سټنډرډ د ستونزو د حل په ګوته کړه. دوی به په راتلونکو ناستو کې له اړوندو څانګو سره د مشخصو موضوعاتو په اړه خبرې اترې وکړي او د نفتي توکو د واردولو او د نورمونو او ستندردونو د پلي کولو په برخه کې د شته ستونزو د حل په موخه به خپل نظرونه څرګند کړي.

د نفتو سکتور برخه اخیستونکو سوداګرو او د نفتو او ګازو واردونکو اتحادیې مشرتابه خپل استازي چې په ټولیز ډول ۲۲ تنه وو د ټول هیواد څخه غوره کړل او د سوداګرۍ او پانګونې اتاق مشرتابه به يي د نورم او سټنډرډ او نورو اړوندو ادارو ته وروپیژني.

ټاکل شوي استازي به وروسته د انساء ادارې او د اړوندو ادارو او اړوندو څانګو د تخنیکي ټیم په غونډو کې ګډون وکړي، په پورتنیو موضوعاتو خبرې وکړي او د نفتي توکو د واردولو او د نفتي توکو د نورمونو او معیارونو د تطبیق د تخنیکي ستونزو د حل په برخه کې خپل مسلکي او ګټور نظرونه څرګند کړي.