د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي غړیو هر یو ښاغلي داود یوسفزي او ضیاءالدین اچکزي د هېواد تازه میوو صادروونکو سره د لیدنې په ترڅ کې د دوی شته ستونزو او حل لارو په اړه خبرې اترې وکړې.

 

سوداګرو، د هېواد تازه میوو صادرولو په برخه کې، د اسلامي امارت هغه آسانتیاوې چې د افغانستان د سوداګرۍ اوپانګونې اتاق او د پاکستان سفارت سره د ګډې همکارۍ په پایله کې رامنځته کړي، ستایلو ترڅنګ، په کابل کې په ګمرکي تعرفو کې د کموالي راوستو له امله يې د پاکستان هېواد څخه مننه وکړه.

 

سوداګرو د دواړو هېوادونو اقتصادي او سوداګریزو ګټو ته پام سره، وړاندیز وکړ چې د ځینو توکو ګمرکي تعرفې باید صفر شي. لکه؛ افغانستان ته د کیلو، آم او ستروس واردولو او پاکستان ته د انګورو، انارو او پیازو صادرولو ګمرکي تعرفې باید صفر شي.

 

ښاغلي مهمند د سوداګور ستونزو او وړاندیزونو اوریدلو وروسته، ژمنه وکړه چې د افغانستان د سوداګرۍ او پانګونې اتاق د سوداګرو د هر ډول معقولو وړاندیزونو ملاتړ کوي، او هڅه کوي، چې د سوداګرۍ او صنعت وزارت چارواکو او د افغانستان اسلامي امارت اقتصادي کمیسیو مسؤلینو سره د تفاهم په پایله کې، د سوداګرو وړاندیزونه حل کړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي غړیو هر یو ښاغلي خان جان الکوزي، ضیاءالدین اچکزي او سید پرویز سادات هوفیاني او د عامل پلاوي مالي او اداري مرستیال ښاغلي میرویس هوتک د معدنونو، برښنايې وسایلو، درملو او جلغوزې سکتورونو له اتحادیو، سوداګرو او پانګوالو سره د جلا لیدنو په ترڅ کې د هغوی د شته ستونزو په اړه خبرې وکړې.

 

په پیل کې، د معدن سکتور سوداګرو او پانګوالو د تړونونو او کان کیندنې په برخه کې د دوی ستونزو په اړه، د مرمرو فابریکو تړل کیدل د مرمرو استخراج او پروسس څخه وروسته یې فابریکو ته د لیږد نشتوالي، د قیمتي او نیمه قیمتي ډبرو صادراتو برخه کې شتو ستونزو، او د پخوانۍ کړنلارې بشپړولو یادونه وکړه او د دوی د ستونزو په حل کې یې د افغانستان اسلامي امارت اړوندو ارګانونو د همکارۍ غوښتنه وکړه.

 

بیا د بریښنایی وسایلو سکتور سوداګرو او واردونکو، په ځانګړې توګه د ګرځنده تلیفونونو واردونکو، د پولې بل اړخ کې يې د سوداګریزو توکو بندیدلو، په ګمرکونو کې د وارد شوي توکو محصول ډولونو بدلونونو او د ځمکني کارګو له لارې د ترانسپورت ستونزو باندې بحث وکړ.

 

ورپسې، د درملو سکتور واردونکو له بهر څخه د درملو پیر په موخه د سوداګرو بریښنایی پیسو لیږد ستونزې جدي ګڼلو ترڅنګ، د یادې ستونزې حل غوښتنه وکړه.

د افغان جلغوزیو اتحادیې رئیس او غړیو د اتحادیې پر وړاندې د شتو ستونزو لکه: بهرنیو هېوادونو ته د جلغوزو نه صادریدل، په صادراتو کې کموالی رامنځته کیدل، د جلغوزو بیه راټیټیدل، د چین لخوا د ګمرکي تعرفو کمولو مسله او چینایي ویزو ته د لاسرسي نشتوالي ستونزې د اتاق له مشرتابه سره شریکې او د یادو ستونزو په له منځه وړلو کې يې د دوی د همکارۍ غوښتنه وکړه.

 

د اتاق د مشرتابه پلاوي غړو د ستونزو اوریدو وروسته، یادو ټولو سکتورونو سره سره ژمنه وکړه چې اتاق به د دوی ستونزې د اسلامي امارت سرپرست وزیرانو او اړوندو ادارو چارواکو سره شریکې او د له منځه وړلو په برخه کې به يې کوټلي ګامونه پورته کړي. هغه له ټولو پورته ذکر شویو سکتورونو څخه وغوښتل چې خپلې طرحې او وړاندیزونه په لیکلي ډول اتاق ته وسپاري ترڅو د دوی ستونزې له اړوندو ارګانونو سره پری د خبرو وروسته حل شي.

 

ښاغلي مهمند، د کان کیندنې او قراردادونو په برخه کې وویل: د اتاق مشرتابه پلاوي لا دمخه د اسلامي امارت د کانونو وزارت له سرپرست سره د لیدنې په ترڅ کې، په دی ټنګار درلود، چې کوچني او منځني تړونونه دی کورنیو شرکتونو ته ورکړل شي. او زیاته يې کړه چې دوی په هیواد کې د مرمرو او نیمه قیمتي ډبرو پروسس کولو پلوي دي.

 

ښاغلي مهمند د سوداګرۍ په ډګر کې د یوې لویې ننګونې په توګه د بریښنایی پیسو لیږد ستونزې ته اشاره وکړه او زیاته یې کړه: اتاق په دی برخه کې په مرکز او ولایاتو کې د مطبوعاتي کنفرانسونو په ترسره کولو سره، په نړیوالو غږ کړی چې د افغانانو کنګل شوې آزادې کړي. ښاغلي مهمند د برښنايې وسایلو واردونکو سوداګرو څخه د روڼتیا او وړاندیزونو غوښتنه وکړه.

 

ښاغلي مهمند، همدارنګه د ځمکې له لارې د افغان جلوزو لیږدولو، د چین لخوا د جلوزو تعرفو کمولو او د افغانستان اسلامي امارت بهرنیو چارو سرپرست وزیر او په کابل کې د چین سفارت په همکارۍ د ویزې صادرولو ستونزې حل کولو په برخه کې د اتاق د هڅو ډاډ ورکړ.

 

ښاغلي خان جان الکوزي په تیرو وختونو کې د کان کیندنې ستونزو او د بیروکراسۍ له امله رامینځته شویو ستونزو یادونه وکړه، او قراردادیاتو ته يې ډاډ ورکړ، چې دوی به د کانونو وزارت له سرپرست سره یوه ناسته ترسره کړي.

 

ښاغلي الکوزي د ځینو ځانګړو برښنایې وسایلو تعرفو کې شتو ستونزو یادولو ترڅنګ، د برښنایې وسایلو اتحاديې څخه د مبایلونو په برخه کې د یوې نوې طرحې وړاندی کولو غوښتنه وکړه.

نوموړي ټینګار وکړ چې چین او نورو هېوادونو ته د جلغوزو صادرولو په برخه کې باید د اوسنیو شرایطو او امکاناتو په رڼا کې قدم پورته کړی شي.

د افغانستان اسلامي امارت سوداګرۍ او صنعت سرپرست وزیر ښاغلی نورالدین عزیزي د افغانستان د سوداګرۍ او پانګونې اتاق مشرتابه، اسلامي امارت چارواکو او خصوصي سکتور غړو په حضور کې د يو لړ رسمي مراسمو په ترڅ کې معرفي شو.

 

د افغانستان اسلامي امارت رئیس الوزرا مرستیال ښاغلي عبدالسلام حنفي، د بهرنیو چارو سرپرست وزیر ښاغلي امیر خان متقي، د چارو ادارې رئیس ښاغلي احمد جان احمدي، د افغانستان د سوداګرۍ او پانګونې اتاق مدیره پلاوي لومړي مرستیال ښاغلي الحاج محمد یونس مهمند، د افغانستان د اتاقونو فدراسیون مرستیال او د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي، د اتاق د مدیره پلاوي غړیو هر یو ښاغلي ضیاءالدین اچکزي او سید پرویز سادات هوفیاني، د اتاق د عامل پلاوي مالي او اداري مرستیال ښاغلي میرویس هوتک، د کانونو او صنعت اتاق رئیس ښاغلي شیر باز کمین زاده، د اسلامي امارت لوړ پوړو چارواکو، د هېواد سوداګرو او پانګوالو د سوداګرۍ او صنعت وزارت په انګړ کې د یو لړ رسمي مراسمو په ترڅ کې ښاغلی نورالدین عزیزي د افغانستان اسلامي امارت د سوداګرۍ او صنعت وزارت لپاره د سرپرست وزیر په توګه معرفي کړ.

 

ښاغلي عبدالسلام حنفي د سوداګرۍ او صنعت پراختیا په هکله وویل "د سوداګرۍ او صنعت پراختیا په موخه هر اړخیزه همکاري او ژمنتیا وجود لري او دی موخې ته د رسیدو لپاره به اسلامي امارت هر ډول قانوني او مشروع هڅې وکړي."

 

ښاغلي امیر خان متقي وویل "موږ د یو باثباته، پرمختللي افغانستان او د سیمې او نړۍ هېوادونو سره د سوداګریزو، سیاسي او اقتصادي اړیکو غښتلتیا او پراختیا په تکل کې یو."

 

ښاغلي مهمند ښاغلي نورالدین عزیزي ته د هغه د نوې دندې مبارکۍ ویلو ترڅنګ، هغه ته د افغانستان د سوداګرۍ او پانګونې اتاق د ملاتړ او همکارۍ ډاډ ورکړ.

 

ښاغلي مهمند هیله څرګنده کړه چې د سوداګرو او پانګوالو بانکي ستونزې به ژر تر ژره حل شي. او د افغانستان اسلامي امارت له مسؤلینو څخه یې د برمته کوونکو مخنیوي، د هېواد په لویو لارو کې د سوداګریزو توکو خوندیتوب او د ګمرکي ستونزو ته د پای ټکي کیښودو په تړاو مننه او کور ودانې وکړ.

 

ښاغلي مهمند د ښاغلي عبدالسلام حنفي څخه وغوښتل چې په چین کې د میشتو سوداګرو لپاره د ویزو اخیستو او چین ته د جلغوزو صادرولو په برخه کې همکاري وکړي.

 

ښاغلي الکوزي ښاغلي عزیزي ته د هغه د نوې دندې په پار مبارکۍ ویلو ترڅنګ، ټینګار وکړ چې د افغانستان د سوداګرۍ او پانګونې اتاق تل د افغانستان د سوداګرۍ او صنعت وزارت سره همکار او ملاتړی دی.

 

ښاغلي الکوزي د هېواد څخه بهر د سوداګرو پیسو نه انتقال یو جدي ستونزه وګڼله او د له منځه وړلو غوښتنه يې وکړه.

 

په پای کې، ښاغلي نورالدین عزیزي ډاډ ورکړ چې د هېواد د سوداګرۍ، صنعت او اقتصاد پراختیا برخه کې به کوټلي ګامونه پورته او د سیمې او نړۍ هېوادونو سره به دوستانه اړیکې رامنځته کړي ترڅو وکولی شي، اقتصادي او سوداګریزې پراختیا ته لار ومومي.

 

ښاغلي عزیزي ډاډ ورکړ چې د خصوصي سکتور سره د طرحو او مناسبو کړنلارو رامنځته کولو په برخه کې خپلې هیڅ ډول مرستې ونه سپموي.

پنج شنبه د سنبله میاشتی پر 25 نیټه یوه غونډه د سوداګری او پانګي اچونی خوني، ملی سوداګرو ،صرافانو، صنعت کارانو او اکثراً قومی مشرانو او ولس لخوا چی د کندهار په لرغونی او تاریخی ښار کی جوړه سوی وه د غونډی ټولو برخوالو په یوه صلاح هغه غونډه چی څو ورځی مخکی د سوداګری او پانګونی په خونی کی جوړه سوی وه تایید او ملاتر یی وکړ چی د نړیوالې ټولنې لخوا د افغانستان د ولس کنګل شوی پیسی باید خوشی سی.

 

په دی تړاو د مطبوعاتي کنفرانس له ترسره کیدو سره د سوداګرو او پانګوالو ددی دریځ څخه د ملاتړ وروسته په کندهار کې سوداګرو،صنعت کارانو او یو شمیر قومی مشرانو په یو رسنیز کنفرانس کې له نړیوالې ټولنې او نړیوال بانک غوښتنه وکړه چې په یاد بانک کې د افغانستان کنګل شوې پیسې بیرته په واک کې ورکړي.

 

د افغانستان د سوداګرۍ او پانګوني خونې د مدیره هیت لومړی مرستیال ښاغلی محمد یونس مهمند وویل: دا پیسی د افغانستان د ملی سوداګرو او د افغان ولس پیسی دی چی د نړیوالې ټولنې لخوا د افغانانو د پیسو کنګل کول او سوداګریزو فعالیتونو ته د کورنیو بانکونو محدودیت د سوداګرۍ او خلکو لپاره لویه ستونزه رامینځته کړې ده.

 

ښاغلی مهمند پر نړیوال بانک او نړیوال سازمان ږغ وکړ چی د افغانستان د ولس او سوداګرو ستونزو ته په کتو سره خپله پوره همکاری تر سره کړی او افغانستان دی د یو ستر ناورین څخه وژغوری.

ښاغلی مهمند یادونه وکړه چی د افغانستان سوداګریزه ټولنه د نړۍ شاوخوا هیوادونو ته د پیسو په لیږد کې له یوې لویې ستونزې سره مخ ده، او د دې وضعیت دوام د هیواد په سوداګرۍ او اقتصادي فعالیتونو منفي اغیزه کولی شي.

 

د افغانستان د صنعت کارانو ټولنې مشر وویل: که فابریکو ته خام مواد پروخت ونه رسیږې فابریکې به په ټپه ودریږې او زیاته بیکاری به دی ولس ته ور په مخه شی.

 

که د نړیوالې ټولنې له خوا د افغانانو کنګل شوې پانګه خوشې نه شي ، په هیواد کې به د بیکارۍ کچه لوړه شي او افغانستان به د یو نه کنټرولیدونکي اقتصادي بحران سره مخ شي.یوشمیر سوداګرو او پانګوالو خپلې اندیښنې یادې کړې او وې ویل چې دامهال له ګڼو ستونزو سره مخ دي.

 

په کنفرانس کې یو شمیر سوداګرو او پانګوالو هم د اوسني وضعیت په اړه اندیښنه څرګنده کړه، او وی ویل چې دا مهال له دی اړخه، د ډیر شمیر ستونزو سره مخ دي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي غړیو هر یو ښاغلي خان جان الکوزي او ضیاءالدین اچکزي د هېواد لویدیځ حوزې خوراکي توکو سوداګرو او واردوونکو سره د لیدنې په ترڅ کې د دوی د شتو ستونزو او حل لارو په اړه خبرې اترې وکړې.

 

یادو سوداګرو په اسلام قلعه ګمرک کې د ځینو خوراکي توکو تعرفو لوړوالي، په اسکیوا سیستم کې د نرخونو ثبتول چې د پولې دواړ خواو ته د د دوه زره لارۍ ګانو د ځنډ سبب ګرځیدلی او په هېواد کې دننه د قیمتونو د لوړوالي یادونه وکړه او د اتاق د مشرتابه پلاوي څخه يې وغوښتل چې د اسلامي امارت اړونده ادارو سره د همغږۍ په پایله کې د دوی ستونزو ته د حل لارې چارې ولټوي.

 

د افغانستان د سوداګرۍ او پانګونې اتاق مشرتابه پلاوي د سودګرو ستونزو له اوریدو وروسته، د هغوی څخه وغوښتل چې خپل وړاندیزونه په لیکلې بڼه اتاق سره شریک کړي، او ژمنه يې وکړه چې اتاق به يې د اسلامي امارت له اړونده ادارو سره شریک او د له منځه وړلو په برخه کې به یې کوټلي ګامونه پوته کړي.

 

ښاغلي مهمند د هېواد لویدیځ حوزې سوداګرو ته د ښه راغلاست ویلو ترڅنګ، وویل "د افغانستان د سوداګرۍ او پانګونې اتاق د کورنیو تولیداتو زیاتوالي او قانوني سوداګرۍ ملاتړ کوونکې اداره ده."

 

ښاغلي مهمند سوداګر او پانګه اچوونکي په هېواد کې دننه پانګه اچونې ته وهڅول، ترڅو هېواد د ځان بساینې او اقتصادي پراختیا په لور ګام پورته کړي.