د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د بامیان ولایت د سوداګرو او پانګوالو د یوې ډلې په شتون کې د بامیان ولایت له والي ښاغلي عبدالله سرحدي سره وکتل او د دغه ولایت د سوداګرو ستونزې او ننګونې یې ورسره شریکې کړې.

د دې ولایت سیمه ییزو سوداګرو په بامیانو کې د سوداګرۍ او پانګونې د فرصتونو په اړه د خپلو ستونزو لکه: د کرنیزو محصولاتو د ذخیره کولو لپاره د سړو خونو د نشتوالي، د ترانسپورت او برېښنا د نشتوالي په اړه خبرې وکړې او د دغه ولایت له رهبرۍ او د خصوصي سکتور له مشرتابه يې وغوښتل چې یادو ستونزو ته د حل مناسبې لارې چارې ولټوي.  

ښاغلي مهمند د امام ابوحنیفه (رح) د دویم نندارتون او د هغه د لاسته راوړنو په اړه معلومات وړاندې کړل او په دغه نندارتون کې یې د بامیان ولایت د سوداګرو له ګډون څخه مننه وکړه. نوموړي په بهر کې د صادراتو د زیاتوالي یادونه وکړه او د صادراتو د لا زیاتوالي په برخه کې یې د خصوصي سکتور د هڅو ډاډ ورکړ.

د مدیره پلاوي لومړي مرستيال باميان يو له صنعتي، سياحتي، کرنيزو او پراخو طبيعي زېرمو لرونکی ولايت وباله او د هېواد په وده او پرمختګ کې يې د دغه ولايت رول مهم وباله.

ښاغلي مهمند په بامیان ولایت کې د سیمه ییزې ادارې په همکارۍ د پانګونې د کنفرانس جوړېدل اعلان کړل او په دغه ولایت کې یې د پانګونې د فرصتونو په پېژندلو کې د دغه ډول کنفرانس رول ارزښتناک وباله. نوموړي د باميانو ولايت له سوداګرو څخه وغوښتل چې لاسونه سره يو کړي او د کرنيزو توليداتو د پروسس د فابريکو په جوړولو سره د دغه ولايت په وده او پرمختګ کې خپل رول ولوبوي.

د بامیان ولایت والي د افغانستان د سوداګرۍ او پانګونې اتاق مدیره پلاوي لومړي مرستیال ته ښه د راغلاست ویلو په ترڅ کې، د کرنې، مالدارۍ او صنعت په برخو کې یې د ولایتي ادارې پلانونه تشریح کړل.
د باميانو ولايت امنيه قوماندان په دغه ولايت کې د امنيت ډاډ ورکړ او له ټولو سوداګرو او پانګوالو يې وغوښتل چې د شته فرصتونو په پام کې نيولو سره د دغه ولايت په وده او پرمختګ کې رول ولوبوي.

چهارشنبه، زمري ۴مه، ۱۴۰۲

د فرصتونو پیژندلو او د ایران – افغانستان ترمنځ د ګډو پانګونو ترلاسه کولو په موخه، د ننګرهار سوداګرۍ او پانګونې اتاق مشرتابه پلاوي د سیمه ایز حکومت مسؤلینو او مختلفو اتحادیو په همکارۍ سره په ننګرهار کې ناسته جوړه کړه چې په کې، د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د افغانستان لپاره د ایران سفیر او د ایران جمهور رئیس ځانګړي استازي ښاغلي حسن کاظم قمي، د ننګرهار ولایتي اتاق رئيس ښاغلي ډاکټر ګل مراد عرب، د ننګرهار ولایتي اتاق مدیره پلاوي غړي ښاغلي ډاکټر مخلص احمد، د ایران دیپلوماتانو او د مختلفو اتحادیو یو شمیر رئیسانو ګډون درلود.

ښاغلي ګل مراد عرب د ایران جمهور رئیس ځانګړي استازي او سفیر، د مرکزي اتاق مدیره پلاوي لومړي مرستیال، د ایران دیپلوماتانو او د هېواد یو شمیر سوداګرو او پانګوالو ته د ښه راغلاست ویلو ترڅنګ، په ننګرهار ولایت کې شته سوداګریز او پانګه ایز فرصتونه تشریح کړل.

ښاغلي ډاکټر مخلص احمد په کابل کې میشت د ایران سفیر څخه وغوښتل چې په ایراني بانکونو کې د افغان سوداګرو لپاره د حسابونو پرانستلو زمینه برابره او افغاني کرنیزو محصولاتو لپاره ترجیحي تعرفې تهیه کړي.

د ننګرهار کانال رئیس د ننګرهار ولایت کرنیزو محصولاتو په ځانګړې توګه ستروس په اړه خبرې وکړې او د سیمې هېوادونو ته يې د ننګرهار ولایت کرنیزو محصولاتو د صادرولو بهیر په چټکتیا ټینګار وکړ.

ښاغلي مهمند ایران د دوست او ورور هېواد په توګه یاد کړ او زیاته يې کړه چې موږ د ایران سره ډیر ژبنیز او دیني ګډ ارزښتونه لرو. ښاغلي مهمند د ایران د همیشنیو همکاریو په ځانګړې توګه په ننګرهار ولایت کې د شکرې ناروغۍ درملنې په موخه د روغتون جوړول د قدر وړ وبلل. نوموړي د دواړو هېوادونو ترمنځ د سوداګرۍ او پانګونې بهیر مثبت و ارزوه او له ښاغلي قمي څخه يې وغوښتل چې د افغانستان کرنیزو توکو لپاره د ترجیحي تعرفې په نظر کې نیولو سره، ایران ته د افغانستان د صادراتو کچه لوړه کړي.
سربیره پردی، ښاغلي مهمند د کانونو استخراج او روغتیايي خدماتو معیاري کولو برخه کې د ګډو پانګونو په ترسره کولو او د سیمې هېوادونو سره د اړیکو په غښتلتیا د ټینګار کولو ترڅنګ، افغان سوداګرو ته ویزو ویش برخه کې يې په کابل کې میشت د ایران سفارت له بی سارو همکاریو او خدماتو ستاینه وکړه.

ښاغلي حسن کاظم قمي وویل "افغانستان او ایران د ګډو دیني او کلتوري ارزښتونو لرلو سربیره، ایران تل د یوه پرمختللي او با ثباته افغانستان ملاتړ کوي."
نوموړي په مختلفو برخو لکه: کرنې، روغتیا، تعلیم او تربيې، صنعت، د سترو ملي پروژو تطبیق او د ټکنالوجۍ او تولید برخه کې د ایران حکومت د همکاریو ډاډ ورکولو ترڅنګ، ایران ته يې د افغانستان د صادراتو په زیاتوالي ټینګار وکړ.

ښاغلي قمي د اورګاډي پټلۍ برخه کې د وروستیو پرمختګونو په اړه معلومات وړاندی او په دی برخه کې يې د راتلونکو پروګرامونو د تطبیق ډاډ ورکړ.

چهارشنبه، غبرګولي ۳۱مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند بامیان ولایت ته د خپل کاري سفر په ترڅ کې، په داسی حال کې چې د اتاق عامل پلاوي د صادراتو پراختیا او اداري څانګو مسؤلینو يې ملتیا کوله، د بامیانو ولایت د سوداګرۍ او پانګونې اتاق څخه لیدنه ترسره او د سوداګرۍ او پانګونې، کرنې، مالدارۍ او توریزم برخه کې يې د شته ستونزو او ننګونو په اړه خبرې اترې وکړې.
 
د بامیان ولایت د سوداګرۍ او پانګونې اتاق مرستیالې آغلې مېرمن مهتاب رحیمي د افغانستان د سوداګرۍ او پانګونې اتاق مدیره پلاوي لومړي مرستیال ته د ښه راغلاست ترڅنګ د بامیانو د سوداګرۍ اتاق د فعالیتونو، شته ستونزو، او اړتیاوو لکه  د یاد اتاق ودانولو او په یاد ولایت کې د شته توریستي او کرنیزو فرصتونو په اړه مفصل معلومات وړاندی کړل او د اقتصادي وضعیت د ښه والي او د پانګونې د جلبولو په برخه کې یې د مرکزي اتاق له مشرتابه څخه د هر اړخیزې همکارۍ غوښتنه وکړه.

د بامیان ولایت مطرح سوداګر ګل میر امیني د برېښنا نشتوالی، د مواصلاتي لارو نه شتون او یو شمېر نورې ستونزې د بامیان ولایت له عمده ستونزو څخه وبللې او د حکومت او د هېواد د خصوصي سکتور د مشرتابه د جدي پاملرنې غوښتنه یې وکړه.

ښاغلي یونس مهمند د بامیان ولایت د خلکو له میلمه پالنې څخه د مننې په ترڅ کې دغه ولایت د هیواد یو له تاریخي، سیاحتي او پراخو طبیعي او کرنیزو زیرمو څخه برخمن وباله او په یادو برخو کې یې له شته فرصتونو څخه ګټه پورته کول اړین وبلل.

د اتاق د مدیره پلاوي لومړي مرستیال د پانګونې د جلبولو او د مرکزي اتاق له خوا د اړوندو څانګو په همکارۍ د بامیان ولایت لپاره د سوداګرۍ د فرصتونو د پیژندلو په موخه د کنفرانس په پیلیدو ټینګار وکړ.

ښاغلي مهمند ژمنه وکړه، چې د بامیان ولایتي اتاق د ترمیم او په بېلابېلو برخو کې د کورنیو او بهرنیو پانګونو د جلبولو په موخه به موضوع د نړیوالو ادارو او اړوندو دولتي ادارو سره شریکه کړي.

چهارشنبه، زمري ۴مه، ۱۴۰۲

د افغانستان اسلامي امارت سوداګرۍ او صنعت وزارت سرپرست ښاغلي نورالدین عزیزي او د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د کندهار سوداګرۍ او پانګونې اتاق رئیس ښاغلي محمد صدیق مهمند، د هلمند سوداګرۍ او پانګونې اتاق مشرتابه پلاوي غړو او د هلمند ولایت سوداګرو او پانګوالو یې ملتیا کوله، د هلمند ولایت د صنعتي فابریکو او تاسیساتو څخه يې لیدنه ترسره او د یاد ولایت د خصوصي سکتور ستونزې يې واوریدې.

ښاغلي مهمند هلمند ولایت د هېواد یو له اقتصادي ولایتونو څخه وباله او د دغه ولایت له سوداګرو یې وغوښتل چې د باکیفیته توکو تولید ته جدي پاملرنه وکړي. نوموړي د صنعت او سوداګرۍ وزارت له مشرتابه وغوښتل، چې د سوداګرو او پانګوالو لپاره په ځانګړي ډول هلمند ولایت کې د اسانتیاوو په رامنځته کولو کې هر اړخیزه همکاري وکړي.

د هلمند ولايت سوداګرو د معیاري صنعتي پارک نه شتون، د برېښنا دوامداره نشتوالى، د فابريکو لپاره د ځمکو عدم ویش، د معیاري ماليې سيسټم نه شتون او نورې اړوندې ستونزې په ګوته کړې او غوښتنه يې وکړه چې په دې برخه کې د دوى ستونزې هوارې کړی شي.

ښاغلي عزیزي د دغه ولایت د سوداګرو او پانګوالو د ستونزو له اوریدو وروسته د دولت او خصوصي سکتور ترمنځ پر ګډې همکارۍ ټینګار وکړ او د دغه ولایت د خصوصي سکتور د ستونزو په حل کې یې د هر اړخیزې همکارۍ ژمنه وکړه.

یکشنبه، غبرګولي ۲۱مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند ننګرهار ولایت ته د خپل کاري سفر په ترڅ کې، د یاد ولایت مقام کفیل سره لیدنه ترسره او د سوداګرۍ، پانګونې، صنعت، او کرنې برخه کې شته ننګونو، فرصتونو او ستونزو په اړه يې خبرې اترې وکړې.
 
د اتاق مدیره پلاوي لومړي مرستیال ننګرهار ولایت د جغرافیایي موقعیت او کرنیزو تولیداتو له پلوه د هېواد یو له ستراتیژیکو ولایتونو څخه وباله او په دغه ولایت کې یې د کرنې په میکانیزه کیدو او د ټرانزیټي خدمتونو پر معیاري کولو ټینګار وکړ.

ښاغلي مهمند د هېواد سوداګرو او پانګوالو ته د لازمو اسانتیاوو د برابرولو په برخه کې د حکومت د رهبرۍ هڅې وستایلې او د دغه ولایت د سیمه ییزو ارګانونو له مشرتابه یې وغوښتل چې د سوداګرۍ او پانګونې په برخه کې لا ډېرې اسانتیاوې برابرې کړي.

د ننګرهار ولایت مقام کفیل د اتاق مدیره پلاوي لومړي مرستیال د شتون هرکلی وکړ او د سوداګرۍ د ودې او د کورنیو او بهرنیو پانګونو د هڅونې په برخه کې یې د افغانستان د سوداګرۍ او پانګونې اتاق د مشرتابه هڅې وستایلې. نوموړي ژمنه وکړه چې، د هېواد له خصوصي سکټور څخه د ملاتړ او د لازمو خدمتونو د وړاندې کولو په برخه کې به همکاري کوي.

پنجشنبه، چنګاښ ۱، ۱۴۰۲