د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي پانګه اچونې مرستیال ښاغلي سلطان محمد صافي، د سوداګرۍ او صنعت وزارت استازي، د ایران د سوداګریزې پراختیا سازمان عمومي رئیس او د وزیر مرستیال ښاغلي حمید زادبوم، په افغانستان کې د ایران میشت سفیر ښاغلي بهادر امینیان، په ایران کې د افغان میشت سفیر مرستیال ښاغلي عبدالقیوم سلیماني، د افغانستان د سوداګرۍ او پانګونې اتاق عامل پلاوي مالي او اداري مرسیتال ښاغلي میرویس هوتک او د هرات – مشهد سوداګریزو اتاقونو مدیره پلاوو د افغانستان او ایران ترمنځ د سوداګریزو اړیکو پراختیا په پار جوړه شوې آنلاین ناسته کې ګډون وکړ.

 

پدې آنلاین ناسته کې، دواړو لورو د دواړو هیوادونو تر منځ د اوږدمهاله سوداګریزو اړیکو، د سوداګرۍ پیاوړتیا او پراختیا، په افغانستان کې د ایراني پانګه اچوونکو پانګه اچونو او په ایران کې د افغان پانګوالو پروړاندې د شتو ستونزو په اړه خبرې اترې وکړی او په له منځه وړلو يې ټینګار وکړ.

 

ښاغلي مهمند د خصوصي سکتور په استازیتوب ګډون کوونکو ته د ښه راغلاست ویلو ترڅنګ، د ایراني پلاوي څخه ددی آنلاین ناستې جوړولو په پار مننه وکړه. او همدارنګه يې د دواړو هېوادونو ترمنځ د سوداګریزو، دیني، سیاسي، او اقتصادي اړیکو د ژورتیا په اړه خبرې وکړی او د سوداګریزو اړیکو په پراختیا يې ټینګار وکړ.

 

ښاغلي مهمند زیاته کړه "افغانستان په تیرو ۲۰ کلونو کې د ډیرو کړاوونو تجربه کولو وروسته، له نیکه مرغه د فرصتونو په ښار بدل شوی دی. د نړیوالو شمیرنو پر بنسټ افغانستان د ۳ تریلیونه ډالرو په ارزښت قیمتي ذخیرې لري. او د موقعت له نقطه نظره، د وریښمو له لارې افغانستان د مرکزي او جنوبي آسیا او آسیا او اروپا نښلونکی هېواد ګڼل کیږي. د سوداګریزو او پانګه ایزو ریفورمونو او لازمو آسانتیاوو رامنځته کولو په برخه کې په نړیواله کچه، لوړ ځای لري چې د بهرنۍ پانګه اچونې د جذب سبب ګرځیدلی دی."

 

ښاغلي مهمند د خپلو خبرو په اوږدو کې، دغه آنلاین ناسته د ګډو پانګه اچونو، د اقتصادي پیاوړتیا، د صادراتو او وارداتو کچې ډیروالي، د هوايې لارې بیا پرانستې او د دواړو هېوادونو ترمنځ د سوداګریزو سفرونو په برخه کې د لازمو آسانتیاوو رامنځته کولو لپاره یو ښه فرصت وباله او هیله يې څرګنده کړه چې دغه آنلاین ناسته به د ایراني او افغاني سوداګرو ترمنځ د سوداګریزو تړونونو سبب وګرځي.

د افغانستان د سوداګرۍ او پانګونې اتاق عامل پلاوي مالي او اداري مرستیال ښاغلي میرویس هوتک د هنګ له یو شمیر سوداګرو سره د لیدنې په ترڅ کې د هغوی د شتو ستونزو په اړه خبرې اترې وکړې.

 

په دی ناسته کې، د افغانستان د سوداګرۍ او پانګونې اتاق د صادراتو پراختیا مسؤل هم ګډون درلود. ښاغلي هوتک په هېواد کې د هنګ کیفیت تثبیتولو شرکتونو په کار ټینګار وکړ ترڅو سوداګر هندوستان ته د هنګ د صادراتو په برخه کې له ستونزو سره مخ نه شي.

 

ښاغلي هوتک د خپلو خبرو په جریان کې وویل "اتاق به په نږدی راتلونکی کې د هنګ له نمونه ګیرۍ شرکتونو سره تفاهملیک لاسلیک کړي او سوداګر به له دی وروسته د هنګ د ځنډني آزمایښت سره مخ نشي."

د اتاق د صادراتو او پانګوونې پراختیا مسؤل ژمنه وکړه چې د هغه شرکتونو سره به د ګمرک او ترانسپورت برخو کې همکاري وکړي چې غواړي د نمونه ګیرۍ ماشینونو هېواد ته وارد کړي.

 

د هنګ شرکتونو مسؤلینو د افغانستان د سوداګرۍ او پانګونې اتاق د همیشنیو همکاریو ستاینه وکړه او وی ویل چې دوی به ډیر ژر د اتاق سره د نمونه ګیرۍ په برخه کې تفاهم لیک لاسلیک کړي او چمتو دي چې په ښه کیفیت سره په هیواد کې د افغان سوداګرو محصولات و ازمويي.

 

د غونډې په پای کې، هوکړه وشوه چې ډیر ژر به یو تفاهملیک لاسلیک شي چې پر بنسټ به يې د ازموینې قیمت ۲۰۰ ډالره وي.

د افغانستان د سوداګرۍ او پانګونې اتاق عامل پلاوي سرپرست رئیس ښاغلي شفیق الله عطايي په کابل کې د ایران سفارت له سوداګریزې آتشې (چاروال) ښاغلي ابراهیم حسیني سره د لیدنې په ترڅ کې، د دواړو هېوادونو سوداګریزو اړیکو پراختیا او د سوداګرو شتو ستونزو له منځه وړلو په اړه خبرې اترې وکړی.

 

ښاغلي عطایي په کابل کې د ایران سفارت نوې سوداګریزې آتشې ته د ښه راغلاست ویلو ترڅنګ، د دواړو هیوادونو ترمنځ د اوږدمهاله سوداګریزو اړیکو پراختیا او د سوداګرو شتو ستونزو ته د پای ټکي کیښودلو په برخه کې د ایران سفارت سوداګریزې آتشې همکاري له اتاق او خصوصي سکتور سره اړینه وبلله.

 

ښاغلي عطايي له مختلفو هیوادونو سره د افغانستان د سوداګرۍ پراختیا برخه کې د ایراني بندرونو رول ته د اشارې کولو ترڅنګ، ایران ته د افغاني توکو صادراتو کې اسانتیا، په ایران کې د افغان سوداګرو د سوداګریزو ستونزو حل، د چابهار بندر ظرفیت لوړولو په موخه د ښکیلو هېوادونو ژمنو عملي کولو، د ایراني سوداګرو سوداګریزو تجربو لیږد افغان سوداګرو او پانګه والو ته او د هیواد سوداګرو لپاره د ویزې اسانتیاو پر رامینځته کولو ټینګار وکړ.

 

ښاغلي حسیني د ایران په بیلابیلو ادارو کې د خپلو کاري تجربو په یادولو سره، په افغانستان کې د خپل کار له پیل او د اتاق د چارواکو په ځانګړې توګه د اتاق عامل پلاوي سرپرست رئیس ښاغلي عطايي سره د پیژندګلوۍ څخه خپله خوښي څرګنده او زیاته يې کړه چې په ایران کې د افغان سوداګرو ستونزو د له منځه وړلو په برخه کې بیلا بیل پروګرامونه تر لاس لاندی لري او هڅه کوي ترڅو دی ستونزو ته د سوداګریزو شخړو حل مرکز له لارې د حل لارې چارې ولټوي.

د افغانستان د سوداګرۍ او پانګونې اتاق عامل پلاوي سرپرست رئیس ښاغلي شفیق الله عطايې د هغو ۸۶ انجونو چې د هېواد د ۱۷ ولایاتو څخه دي، د امریکا ایګل اکاډمۍ څخه فراغت غونډه کې ګډون کولو ترڅنګ، د دوی د شتو وړتیاوو څخه په سوداګریزو شرکتونو کې د ګټې اخیستنې ژمنه وکړه.

 

د ښځو د سوداګرۍ او صنایعو اتاق ددی پیښې کوربه توب وکړ او د ایګل آنلاین اکاډمۍ ټیم غړو او د متحده ایالاتو میلمنو په آنلاین ډول په دی مراسمو کې برخه اخیستې وه. په کابل کې د برنامې ځانګړي میلمانه د افغانستان د سوداګرۍ او پانګونې اتاق عامل پلاوي سرپرست رئیس ښاغلي عطایي او د تخنیکي او مسلکي زده کړو د څانګې مشرې، آغلې ندیمه سحر ګډون درلود.

 

ښاغلي عطایي د افغانستان د سوداګرۍ او پانګونې اتاق د میرمنو اتاق د ستراتیژیک ملګري په توګه یاد کړل او ژمنه یې وکړه چې د هغو میرمنو لپاره به کاري فرصتونو په برابرولو کې همکاري وکړي چې په دې کورسونو کې یې برخه اخیستې ده، او زیاته يې کړه چې "د هغو میرمنو لپاره چې سوداګرۍ سره علاقه لري، اتاق کولی شي دوی روزنې مهارتونو سره په مرکز او والیتونو کې خپلو غړو ته معرفي کړي ، ترڅو دوی وکولی شي د نوي فارغ شوي کدر مسلکي مهارتونه وکاروي."

 

د یادونې وړ ده، چې د امریکا ایګل آنلاین اکاډمي د تشبث مدیریت، د پروژې مدیریت، سایبر سیکیورټي، معلوماتي ټکنالوجۍ، Cloud Management ، Software Management، او انګلیسي ژبه کې څانګې لري. هر زده کونکی په اکاډمۍ کې د یو کال غړیتوب ترلاسه کوي او کولی شي د یو کال په جریان کې اکاډمۍ کې د موجودو ۲۰۰ کورسونو څخه یو بشپړ کړي.

د افغانستان د سوداګرۍ او پانګونې اتاق عامل پلاوي سرپرست رئیس ښاغلي شفیق الله عطايي، د سوداګرۍ او صنعت وزارت استازي، د کابل سوداګریز مرکز رئیس ښاغلي عبدالقدیر بهمن او د اتاق د نړیوالو اړیکو او صادراتو پراختیا ډیپارټمنټونو مسؤلینو د هندوستان لپاره افغان جنرال قونسلې آغلې ذکیه وردک سره یو آنلاین کنفرانس چې ۴۰ هندي شرکتونو هم پکې ګډون درلود تر سره کړ.

 

ښاغلي عطايې وویل "د هندوستان سره د افغانستان د صادراتو کچه ترټولو زیاته ده. د وچو او تازه میوو سکتور کې د پراختیا او لازمو آسانتیاوو رامنځته کولو لپاره باید د افغان – هند ګډ سوداګریز اتاق تأسیس کړی شي."

ښاغلي عطايې زیاته کړه "د افغانستان او هندوستان ترمنځ د سوداګرۍ کچه ۷ سوه میلیونه ډالره ده او دا چې هندوستان د افغاني محصولاتو لپاره یو ښه بازار دی، نو د لازمو آسانتیاوو او امکاناتو منځته راتګ سره دا عدد لا هم زیاتیدی شي."

 

ښاغلي عطايې هیله څرګنده کړه چې که چیرې د چابهار بندر کې لازمې آسانتیاوې رامنځته کړی شي، نو د دواړو هېوادونو ترمنځ سوداګرۍ کې به د پام وړ زیاتوالې راشي.

 

آغلې وردک وویل "هڅه کوو چې، د وچو او تازه میوو سوداګرو ستونزو ته د حل لارې پیدا او هندوستان ته يې د صادرولو په برخه کې لازمې آسانتیاوې رامنځته کړو."

 

د کنفرانس په پای کې، د دواړو هېوادونو سوداګرو د ښو سوداګریزو اړیکو غښتلتیا او لازمو آسانتیاوو رامنځته کولو په اړه خبرې اترې وکړی او زیاته یې کړه چې دواړه هېوادونه یو د بل محصولاتو لپاره ښه بازارونه دي.