د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د ننګرهار سوداګرۍ او پانګونې اتاق مشرتابه پلاوي او د هېواد یو شمیر سوداګرو د ننګرهار والي ښاغلي مولوي محمد نعیم آخند، د یاد ولایت ښاروال او د ګمرک رئیس سره د لیدنې په ترڅ کې، د سوداګرو هغو ستونزو چې دوی ورسره د هېواد په ګمرکونو کې لاس او ګریوان دي، خبرې اترې وکړې. 
ښاغلي مهمند د سوداګرو د ستونزو د حل او د اسانتیاوو په رامنځته کولو کې د ولایت مقام له ښې همکارۍ څخه د مننې ترڅنګ د تورخم لارې او د دغه ولایت د ګمرک په برخه کې د سوداګرو د یو لړ نورو شته ستونزو په اړه خبرې وکړې. نوموړي د وارداتي سمنټو د موټرو د بندولو او د سمنټو کیفیت آزموینې اوږدمهاله په اړه خبرې وکړې او د سوداګرو د ستونزو په حل کې يې د ولايت مقام او ګمرک مسوولينو د همکارۍ غوښتنه وکړه.
د ننګرهار والي ښاغلي مهمند او د ننګرهار ولایتي اتاق مشرتابه پلاوي ته د ښه راغلاست او د دوی د خبرو اوریدو وروسته، ژمنه وکړه چې ټولې هغه ستونزې چې په یاد ولایت پوری اړه لري، د له منځه وړلو برخه کې به يې ګړندۍ هڅې وکړي.
نوموړي زياته کړه، چې يو شمېر لويې ستونزې به د هېواد له اقتصادي شورا سره شريکې کړي او د حل لپاره به يې هڅې وکړي.
د تازه میوو او سبزیجاتو د اتحادیې رئیس ښاغلي احمدي د تورخم په لاره کې د خپلو هغو ستونزو په اړه چې پاکستان ته د ډبرو سکرو د صادرونکو موټرو د ګڼې ګوڼې له امله د تازه میوو او سبزیجاتو د لیږدونکو لاریو د بندیدو او د میوو او سبزیجاتو د خوسا کیدو سبب شوي په اړه يې ښاغلي مهمند ته د معلوماتو ورکولو ترڅنګ، وویل، د افغانستان د تازه میوو او سبزیجاتو د صادراتو په موسم کې چې زیاتره یې د تورخم له لارې صادریږي، باید د دغو محصولاتو صادراتو ته لومړیتوب ورکړل شي او د ډبرو سکرو صادرات باید له نورو لارو ترسره شي، تر څو د هېواد تازه میوو او سبزیجاتو محصولاتو ته زیان ونه رسېږي.
ښاغلي سلطان محمد صافي د ټرانسپورټ او کارګو د اتحادیې رئیسانو او مسوولینو ته د ښه راغلاست ترڅنګ په هېواد کې د وروستیو بدلونونو په ځانګړي ډول د امنیت د ښه والي او د ټرانسپورټ او کارګو د کار او خدماتو د ښه والي په برخه کې یادونه وکړه او په سختو حالاتو کې یې د ټرانسپورټي او کارګو شرکتونو خدماتو ستاینه وکړه.