د ښځو د سوداګرۍ او صنایعو اتاق سره  په جوړه شوې غونډه کې د افغانستان د سوداګرۍ او پانګونې اتاق عمومي رئیس ښاغلي توکل احمدیار د ښځو د سوداګرۍ په لاره کې د پرتو ستونزو او دواړو اتاقونو د ګډو همکاریو په اړه خبرې وکړی.

ښاغلي توکل احمدیار د ښځو د سوداګریزو او اقتصادي فعالیتونو په برخه کې شتو خنډونو او ستونزو ته د اشارې کولو تر څنګ ددی اتاق سره د افغانستان د سوداګرۍ او پانګونې اتاق د سالمې اړیکې او همیشنیو همکاریو یادونه وکړه.

نوموړي د ښځو د سوداګریزو او پانګه ایزو فعالیتونو د لاښه والي په برخه کې د افغانستان د سوداګرۍ او پانګونې اتاق د اوسني مشرتابه د هر اړخیزه همکاریو ډاډ ورکړ.

د افغانستان د ښځو د سوداګرۍ او صنایعو اتاق مشرتابه د اتاق د همیشنیو همکاریو په ځانګړې توګه د اوسنۍ مشرۍ د بی سیاله همکاریو ستاینه وکړه.

د افغانستان د ښځو د سوداګرۍ او صنایعو اتاق مشرتابه د اتاق عمومي رئیس ښاغلي توکل احمدیار ته د خدیجة الکبری مجسمې په وړاندی کولو سره د نوموړي هڅې چې د ښځو د سوداګرۍ او صنایعو اتاق سره يې کړي دي، وستایلې.    

د افغانستان جمهور رئیس، د افغانستان د سوداګرۍ او پانګونې اتاق د مدیره هیت لومړي مرستیال ښاغلي حاجي محمد یونس مهمند، د مدیره هیت سوداګریز مرستیال ښاغلي سلطان محمد صافي، د مدیره هیت د دارالانشاء ریس ښاغلي خان محمد سرفراز باز، د مدیره هیت مالي ریس ښاغلي شیرین آغا سخي، د مدیره هیت غړي احمد ضیاء عظیمي شینوزاده، د جلغوزو فابریکې رئیس ښاغلي محب الله ګردیزي، د کابینې وزیرانو، او د پکتیا، پکتیکا او خوست ولایتونو والیانو د سه شنبه په ورځ د یو لړ مراسمو په ترڅ کې په انلاین ډول د ارګ په چهارچنار ماڼۍ کې د جلغوزو پروسس فابریکه په رسمي ډول پرانسته.  

جلالتمآب جمهور رئیس وویل"موږ رحیم ګردیزي ګروپ ته ددی سترې لاسته راوړنې مبارکي وایو او د لا ښه ستایلو په موخه يې ورته یو مډال هم وړاندی کوو. د هر ولایت پانګه اچوونکې باید په خپل ولایت کې همدا ډول پانګه اچوونه وکړي، ځکه چې دا کار د ثبات، یووالي او اقتصادي پراختیا سبب ګرځي.

جمهور رئیس زیاته کړه "ګردیز د جلغوزو پروسس فابریکې په پرانستلو سره د تاریخي ارزښت لرلو تر څنګ خپل اقتصادي ارزښت هم څرګند کړ. او بله دا چې موږ د پکتیا، پکتیکا او خوست ولایتونو خلکو څخه د جلغوزو ځنګلونو ساتلو په تړاو مننه کوو."

جمهور رئیس د ځنګلونو په ساتلو کې د خلکو رول اړین وباله او زیاته يې کړه چې په دی برخه کې به بنسټیزې پانګه اچوونې ته لار هواره کړي.

ښاغلي حاجي محمد یونس مهمند د جمهور رئیس څخه د مننې کولو تر څنګ وویل"موږ غواړو چې د جلغوزو په څیر د افغانستان ټول زراعتي محصولات تولید، پروسس او ورته بازارموندنه وکړو. موږ د حکومت سره د عوایدو په راټولولو کې مرسته کوو خو حکومت باید خلکو ته د کار زمینه برابره کړي."

ښاغلي مهمند پانګه اچوونکي په هیواد کې دننه پانګه اچوونې ته وهڅول او د جمهور رئیس څخه وغوښتل چې هغه پانګه اچوونکي چې په هیواد کې دننه پانګه اچوونه کوي، د جمهوري ریاست له خوا باید د مډالونو او ستاینلیکونو په ورکولو سره وهڅول شي.

ښاغلي محبوب ګردیزي وویل"ددی لويې او معیاري فابریکي تأسیس د پکتیا خلکو ته د ښې راتلونکي هیله ورکوي او موږ جمهور رئیس ته ددی فابریکې د پرانستې په تړاو مبارکي وایو."

ښاغلي ګردیزي زیاته کړه چې که چیرې دوی ته لازمې آسانتیاوې برابرې کړې شي، نو دوی به د بریښنا په برخه کې هم پانګه اچوونه وکړي چې د لا زیاتو کاري فرصتونو د جوړیدو او غربت کچې د راټیټیدو سبب کیدای شي.

د زراعت، مالدارۍ، او اوبو ورکونې وزیر ښاغلي ډاکټر انورالحق احدي وویل"دغه فابریکه د جمهور رئیس د نوښت او هڅونې په پایله کې رامنځته شوې ده چې د عواید د زیاتوالي او د جلغوزو د ډیروالي سبب کیدای شي. د رحیم ګردیزي شرکت د فولادو په پرخه کې یو نوموتې شرکت دي او هیله لرو چې د جلغوزو په برخه کې هم ښه وځلیږي."

نوموړي د رحیم ګردیزي ګروپ څخه په هیواد کې دننه پانګه اچوونې په تړاو مننه وکړه، او زیاته يې کړه چې افغانستان هر کال ۲۴ زره ټنه د جلغوزو حاصلات لري او د حکومت د پاملرنې په پایله کې د لسو څخه تر دولسو فیصدو پورې زیاتوالې پکې راغلې دی. برسیره پردې په زرګونه هیوادوالو ته يې د کار زمینه برابره کړې ده.

د رحیم ګردیزي ګروپ د جلغوزو پروسس فابریکه د شپږمیلیونه او پنځه سوه زره امریکايې ‌ډالرو په ارزښت جوړه شوې چې ۱۰۰۰ تنه به په مستقیم ډول او ۱۰۰۰۰ تنه به په غیر مستقیم ډول پکې په کار بوخت شي.   

 د افغانستان د سوداګرۍ او پانګونې اتاق د تخنیک او پالیسۍ مرستیال ښاغلي شفیق الله عطايې د مرغومې په ۱۸مه د اقتصادي همکاریو سازمان (ایکو) د آزادو اقتصادي سمیو مشرانو په لمړۍ غونډه کې چې د افغانستان او غړیو هیوادونو د سوداګرۍ د پراختیا او لا ښه والي په موخه د آزادو اقتصادي زونونو جوړولو په تړاو په جوړه شوې غونډه کې خبرې وکړی او د ایکو غړیو هیوادونو د سوداګریزې پراختیا په موخه يې دا ناسته اړینه وبلله.

ښاغلي عطايې د افغانستان د سوداګرۍ او پانګونې اتاق په استازولۍ د ایران د اسلامي جمهوریت څخه ددی کیمسیون د جوړولو او د لمړۍ غونډې د کوربه توب کولو په تړاو مننه وکړه او د ایکو غړیو هیوادونو څخه يې وغوښتل چې د آزادو سوداګریزو سیمو د جوړولو په برخه کې بشپړه همکاري وکړي.

نوموړي ټینګار وکړ چې د ایکو هر غړې هیواد باید د آزادو اقتصادي سیمو جوړولو په برخه کې چې د آزادو صادراتو د لا ښه والي لامل دی هڅانده ګامونه پورته کړي.

په دې آنلاین غونډه کې چې ایران يې کوربه توب کاوه، په دی خبرې وشوې چې د اړونده چارواکو څخه دی یوه دایمي کمیټه جوړه کړی شي تر څو د غړیو هیوادونو سوداګرو او پانګه اچوونکو ته د کار ښه زمینه برابره کړی شي.

په دی غونډه کې د ایکو د آزادو اقتصادي سیمو کمیسیون رئیس ښاغلي ډاکټر جمالي، د ایکو سازمان مرستیال ښاغلي سید یحی اخلاقي، د ایکو د سوداګرۍ او صنایعو اتاق سکرتر ښاغلي آدم کیولا، د افغانستان د اسلامي جمهوریت د چارو د ادارې استازې آغلې فروزان فقیري او د ایکو غړیو هیوادونو استازیو ګډون درلود. دوی د آزادو اقتصادي سیمو جوړولو په ارزښت باندی د خبرو کولو تر څنګ په آزادو اقتصادي سمیو کې د ټوریزم، استخراج او لوژیستیک برخو په ارزښت خبرې وکړی.

د غونډې په پای کې د سوداګرۍ او صنعت، اقتصاد، او ماليې وزارتونو او د ایکو سازمان غړیو هیوادونو څخه غوښتنه وشوه چې د اقتصادي ویزو اخستلو، د سوداګرۍ د لا ښه والي، د خنډونو د کموالي، د غړیو هیوادونو د سوداګریزو راکړو ورکړو او د سیمه ایزو بنسټیزو کارونو په اړه د منظمو کاري پلانونو او کړنلارو جوړولو په برخه کې بشپړه همکاري وکړي.   

په کابل پوهنتون کې د ګمارونکو تربیوي مرکز جوړولو په موخه په جوړه شوې مشورتي ناسته کې د کابل پوهنتون رئيس پوهاند دوکتور محمد عثمان بابري، د لوړو زدکړو وزارت علمي مرستیال ښاغلي عبدالتواب بالاکرزي، دولتي چارواکو، د کابل پوهنتون استادانو او محصلینو او د افغانستان د سوداګرۍ او پانګه اچوونې اتاق د پالیسۍ او تخنیک مرستیال ښاغلي شفیق الله عطايې ګډون درلود.

د کابل پوهنتون رئيس پوهاند دوکتور محمد عثمان بابري ګډون کوونکو ته د ښه راغلاست ویلو تر څنګ، د ګمارونکو د وړتیا لوړونې او کار موندنې په برخه کې د خصوصي سکتور، اړونده حکومتي او علمي ادارو رول اړین وباله.

ښاغلي عبدالتواب بالاکرزي د کار موندنې په برخه کې د علمي ادارو رول او طرحې اړینې وبللې او د ولایتونو په کچه ددی ډول نوښتونو غوښتونکې شو.

ښاغلي شفیق الله عطايې د ګمارونکو تربیوي مرکز جوړولو په ارزښت باندې د خبرو کولو ترڅنګ، ددی ډول مرکزونو رول د کاروبار او کوچنیو تشبثاتو په وړتیا، سوداګریزو او پانګه ایزو طرحو ته مالي ملاتړ او لازمو آسانتیاوو برابرولو په برخه کې اړین وباله او زیاته يې کړه چې ددی ډول مرکزونو جوړول د محصلینو په فکري وړتیا لوړونې او په هغوی کې د اغیزمنو اقتصادي مفکورو پیداکولو په برخه کې ارزښتمن رول لري.

ښاغلي عطايې وویل "د افغانستان د سوداګرۍ او پانګونې اتاق ددی ډول مرکزونو جوړولو څخه ملاتړ کوي او دا چې د ګمارونکو تربیوي مرکز د لاښه والي په موخه باید د اتاق او ددی مرکز ترمنځ تفاهملیک لاسلیک شي."        

د افغانستان د سوداګرۍ او پانګونې اتاق د مدیره پلاوي لمړي مرستیال ښاغلي حاجي محمد یونس مهمند، د مدیره پلاوي د پانګه اچونې مرستیال ښاغلي سلطان محمد صافي، د مدیره پلاوي د خدماتو مرستیال ښاغلي نصیر احمد عرب، او د مدیره پلاوي غړي ښاغلي خان جان الکوزي د ځمکني ټرانسپورټ اتحاديې ر‌‌ئیس ښاغلي طلا محمد اتمانزي او د عبید امین شرکت رئیس او د چایو واردوونکو استازي ښاغلي حاجي عبیدالله سره په دوو جلا ناستو کې د شتو ستونزو په اړه خبرې اترې وکړی.

په دی دوه جلا ناستو کې د ځمکني ټرانسپورټي اتحاديې غړیو خپلې ستونزې د افغانستان د سوداګرۍ او پانګونې اتاق مشرتابه ته وړاندې او د له منځه وړلو په برخه کې يې د اتاق د همکاریو غوښتنه وکړه.

په همدې ډول د چایو واردوونکو سوداګرو هم خپلې ګمرکي ستونزې د افغانستان د سوداګرۍ او پانګونې اتاق مشرتابه سره شریکې او د له منځه وړلو په موخه يې د اتاق له مشرتابه څخه غوښتنه وکړه چې د ګمرکي چارواکو سره لیدنه وکړي.

ښاغلي حاجي محمد یونس مهمند، ښاغلي سلطان محمد صافي، ښاغلي نصیر احمد عرب، او ښاغلي خان جان الکوزي د ځمکني ټرانسپورټ اتحاديې غړیو او د چایو واردوونکو څخه وغوښتل چې خپلې ستونزې په کتبي ډول اتاق ته وسپاري تر څو د له منځه وړلو په برخه کې يې لازم ګاموته پورته کړی شي. دوی ژمنه وکړه چې د ځمکني ټرانسپورټ اتحاديې غړیو او د چایو واردوونکو ستونزې به د ګمرک مسؤولینو او اړونده حکومتي ادارو سره شریکې او د له منځه وړلو په برخه کې به يې لازمه همکاري وکړي.