د افغانستان د سوداګرۍ او پانګونې اتاق عمومي ریس ښاغلي توکل احمدیار، د مدیره هیت د دار الانشا‌ء ریس ښاغلي خان محمد سرفراز باز، د مدیره هیت مالي ریس ښاغلي شیرین آغا سخي، د مدیره هیت د نړیوالو اړیکو ریس ښاغلي سید جاوید برهان، د مدیره هیت غړیو هر یو خان جان الکوزي، آذرخش حافظي، محمد داود یوسفزي، ذکریا بریالي، احمد فواد دوست، سید پرویز سادات هوفیاني، احمد ضیاء عظیمي شینوزاده، او د اتاق عامل ریس ښاغلي سید زمان هاشمي د سوداګرۍ او صنعت له ښاغلي وزیر نثار احمد فیضي غوریاني سره لیدنه کړه.

ښاغلي توکل احمدیار نثار احمد فیضي غوریاني ته د صنعت او سوداګرۍ د وزیر کیدو په مناسبت مبارکي وویله او هیله يې څرګنده کړه چې د سوداګرۍ او صنعت وزارت او د افغانستان د سوداګرۍ او پانګه اچوونې اتاق تر منځ همکاري لا زیاته شي او د هیواد د اقتصادي لوړتیا او په خصوصي سکتور کې د شتو ستونزو د له منځه تلو سبب شي.

ښاغلي نثار احمد فیضي د اتاق مشرتابه او ورسره پلاوي ته د ښه راغلاست ویلو تر څنګ، د خصوصي سکتور د شته ستونزو د له منځه وړلو، د هیواد اقتصادي لوړتیا او سوداګرو او پانګه اچوونکو ته د لازمو آسانتیاو برابرولو په برخه کې د خپلو هیڅ ډول همکاریو د نه سپمولو ژمنه وکړه.

د افغانستان د سوداګرۍ او پانګونې اتاق د مدیره هیت پانګونې مرستیال ښاغلي سلطان محمد صافي، د اتاق د مدیره هیت غړي ښاغلي خان جان الکوزي، د اتاقونو د فدراسیون مرستیال او د ننګرهار د صنایعو او معدنونو اتاق ریس ښاغلي تور ملنګ شګیوال، د سوداګرۍ او صنایع پخواني معین ښاغلي مزمل شینواري، د افغانستان د ښځو اتاق مرستیالې آغلې پرورش اوریاخیل، په اسلام آباد کې د افغانستان د سوداګرۍ استازې آغلې ثمینه ودیر، په اسلام آباد کې د افغان سفارت اقتصادي امورو مسؤل ښاغلي بهرام محمدي، او د هیواد یو شمیر سوداګرو په اسلام آباد کې د افغانستان – پاکستان ګډ اتاق جوړې شوې پنځمې کړه ایزې ناستې کې ګډون وکړ.

د پاکستان حکومت له خوا د وزارتونو سکتوري ریسانو، پاکستاني ګمرکونو مرکزي ادارې، د تورخم او کراچۍ بندرونو مسؤلینو، د پاکستاني پارلمان او مرکزي بانک استازي، او د پاکستان د سوداګرۍ او صنایعو او ښځو اتاقونو استازیو هم په پورته ناسته کې ګډون درلود.

په یاده غونډه کې، د افغانستان او پاکستان د خصوصي سکتورونو استازیو په تورخم او غلام خان بندرونو کې د شتو سوداګریزو او ټرانزیټي ستونزو او د (اپتا) په تړون کې د بدلونونو او همکاریو په اړه خبرې اترې وکړی. بر سیره پردې، په پاکستاني بانکونو کې د افغان سوداګرو بانکي ستونزو، د پیسو د انتقال ستونزو، په پورته نوموړو بندرونو کې د افغان مسافرو د تیریدو ستونزو، د پاکستان په خاوره کې د کرونا ویروس پر مهال د افغان سوداګرو د مالونو د توقف او دیمرج په اړه، پاکستان هیواد ته د افغان محصولاتو په صاداراتو کې ستونزو، په بندري امورو کې د مختلفو پاکستاني ادارو لاس وهنې، د ګډ اتاق په مدیره هیت کې د ښځو د اتاق د استازې ګمارنې، د دواړو هیوادونو د ښځو اتاقونو د اړیکو د لا ښه والي، او یو لړ نورو فني ستونزو په اړه خبرې وشوې.

د افغانستان د خصوصي سکتور مشرتابه د پاکستان حکومت او خصوصي سکتور له مشرتابه سره د پرله پسې بحثونو وروسته، د پاکستان حکومتي ادارو مسؤلینو ژمنه وکړه، چې یادې ستونزې به د حکومت له مشرتابه سره شریکې کړي او د افغانستان – پاکستان ګډ اتاق ته به د خپل حکومت د عملي کړنو مالومات ورکړي.     

د افغانستان د سوداګرۍ او پانګونې اتاق د مدیره هیت لومړي مرستیال ښاغلي حاجي محمد یونس مهمند، د نوموړي اتاق د مدیره هیت مالي ریس ښاغلي شیرین آغا سخي، د مدیره هیت د نړیوالو اړیکو ریس ښاغلي سید جاوید برهان، د مدیره هیت د خدماتو مرستیال ښاغلي نصیر احمد عرب، د مدیره هیت د دارلانشاء ریس ښاغلي خان محمد سرفراز باز، د مدیره هیت غړیو هر یو محمد داود یوسفزي، احمد ضیاء عظیمي شینو‌‌زاده، احمد فواد دوست، او د هرات ولایتي اتاق د مدیره هیت غړي سید مسعود سادات د افغان – استرالیا سوداګرۍ او پانګه اچوونې ګډ اتاق د مدیره هیت په لومړنیو ټاکنو کې حضور درلود.

دغه ټاکنې د ۱۳ غړیو او د خصوصي سکتور یو شمیر استازیو په حضور کې د اتاق په کوربه توب په شفاف ډول تر سره شوی. ښاغلې اجمل حمید عبد الرحیمزی د افغان – استرالیا سوداګرۍ او پانګه اچوونې ګډ اتاق د ریس په توګه وټاکل شو. ددی اتاق دری غړي د څارنې کمیټې د غړیو په توګه وګمارل شول. دغه اتاق به په نزدی راتلونکي کې د استرالیا سره د سوداګریزو اړیکو د پراختیا په موخه په کار پیل وکړي.

ښاغلي یونس مهمند د افغان – استرالیا ګډ اتاق مشرتابه څخه وغوښتل چې د هیواد د ملي ګټو په نظر کې نیولو سره د سوداګریزي پراختیا په لوري ګام پورته کړي او خصوصي سکتور ته د لا ډیرو آسانتیاوو د برابرولو په تکل کې واوسي. نوموړي د افغان – استرالیا ګډ اتاق رامنځته کیدل د سوداګریزو اړیکو د پراختیا لپاره ګټور وباله.

ښاغلي مهمند د پاکستان او نورو هیوادونو سره ګډو اتاقونو جوړولو ته د اشارې کولو تر څنګ وویل چې دغه اتاقونه د خصوصي سکتور د ډیرو ستونزو د له منځه تلو سبب شوي دي او هیله يې څرګنده کړه، چې د افغان – استرالیا سوداګرۍ او پانګونې ګډ اتاق به وکولې شي چې د هیواد په اقتصادي لوړتیا او استرالیا ته د افغانستان سوداګریزو توکو د انتقال په برخه کې اړین رول ولوبوي.

په دی غونډه کې د مدیره هیت د نړیوالو اړیکو ریس ښاغلي سید جاوید برهان خپل نظر په دی ډول څرګند کړ "د افغان – امریکا ګډ اتاق رامنځته کیدل د دواړو هیوادونو د سوداګریزو اړیکو په پراختیا او استرالیا ته د افغانستان سوداګریزو توکو د انتقال په برخه کې مهم رول لوبولې شي."

نوموړي هیله څرګنده کړه چې د افغان – استرالیا ګډ اتاق رامنځته کیدل به د هیواد خصوصي سکتور په دی توانا کړي، چې شتو ستونزو ته د پای ټکې کیږدي.

د غونډې په پای کې، د افغان – استرالیا سوداګرۍ او پانګه اچوونې ګډ اتاق ریس ښاغلي عبد الرحیمزي ژمنه وکړه چې ددی اتاق په رامنځته کیدو سره د افغانستان او استرالیا په سوداګریزو اړیکو کې مثبت بدلون راتلو تر څنګ افغانستان وکولې شي استرالیا ته د قالینو د صادرولو په برخه کې د پام وړ پرمختګ وکړي.   

د افغانستان د سوداګرۍ او پانګونې اتاق د یوې غونډې په ترڅ کې د هیواد د سوداګرو او پانګه اچوونکو اتحاديې سره د همکارۍ تفاهملیک لاسلیک کړ.

ددی تفاهملیک پر بنسټ، د افغانستان د سوداګرۍ او پانګونې اتاق د اتحاديې سره یو ځای د سوداګرۍ د پراختیا په موخه؛ ګډو سوداګریزو نندارتونونو جوړولو تر څنګ کورني او بهرني پانګه اچوونکي په هیواد کې پانګه اچوونې ته هڅولې شي.

د افغانستان د سوداګرۍ او  پانګونې اتاق د پالیسۍ او تخنیک مرستیال ښاغلي شفیق الله عطايې او د هیواد د سوداګرۍ او پانګه اچوونې اتحاديې ریس ښاغلي حزب الله الفت دغه تفاهملیک لاسلیک کړ.

د افغانستان د سوداګرۍ او پانګونې اتاق د مدیره هیت مالي ریس ښاغلي شیرین آغا سخي، ، د اتاق عامل ریس ښاغلي سید زمان هاشمي او ورسره پلاوي د پنجشنبه په ورځ د لیندۍ په ۲۰مه د ننګرهار او لغمان ولایتي اتاقونو مسؤلینو سره کاري غونډې وکړی.

د مرکزي اتاق پلاوي د لغمان ولایتي اتاق د مشرتابه سره د لیدنې په ترڅ کې ددی اتاق د کارونو د ښه والي او شتو ستونزو په اړه خبری وکړی.

د لغمان ولایتي اتاق د مدیره هیت ریس ښاغلي قدرت الله رحیم مرکزي اتاق ته د ښه راغلاست ویلو تر څنګ، روان کال کې د لغمان ولایتي اتاق د فعالیتونو په اړه په تفصیلي ډول خبری وکړی.

د نوموړي اتاق عامل مدیر ښاغلي خان محمد نیک بین د لغمان ولایتي اتاق د هرې برخې کاري وړتیاو په اړه په مفصل ډول خبری وکړی.

د مرکزي اتاق عامل ریس ښاغلي سید زمان هاشمي په ډیره لنډه موده کې د لغمان ولایتي اتاق د فعالیتونو او لاسته راوړنو ستایلو تر څنګ، د ولایتي اتاقونو د وړتیا لوړونې په موخه د هر ډول همکاریو مرسته وکړه.

د مرکزي اتاق پلاوي د ننګرهار ولایتي اتاق څخه د لیدنې تر څنګ، د نوموړي اتاق کړنې او لاسته راوړنې و ارزولې او د مسؤلینو د وړاندیزونو په پوره کولو په برخه کې يې د هر ډول همکاریو ژمنه وکړه.

ښاغلي هاشمي د ولایتي اتاقونو د وړتیا لوړونې په موخه د افغانستان د سوداګرۍ او پانګونې اتاق د ځینو پراختیايې پروژو د یادولو تر څنګ وویل چې د کرونا ویروس له امله ددی پروژو په تطبیق کې د ځنډ رامنځته شوی، خو مرکزي اتاق په پام کې لري چې په دی برخه کې ژر تر ژره عملي ګامونه پورته کړي.

د ننګرهار ولایتي اتاق د مالي امورو آمر ښاغلي محمد اسماعیل رودوال او د نوموړي اتاق د اجرایوي آمریت سرپرست ددی اتاق د لا ښه والي په موخه خپل وړاندیزونه د مرکزي اتاق محترم پلاوي ته وړاندی کړل او د مرکزي اتاق پلاوي هم د دوی د ستونزو د له منځه وړلو او وړاندیزونو د پوره کولو په برخه کې د هر ډول همکاریو ژمنه وکړه.