د افغانستان د سوداګرۍ او پانګونې اتاق عمومي ریس ښاغلي توکل احمدیار، د مدیره هیت لومړي مرستیال ښاغلي حاجي محمد یونس مهمند، د سوداګرۍ او صنعت وزیر ښاغلي نثار احمد فیضي غوریاني، د اندونیزیا لپاره د افغانستان سفیر ښاغلي فیض الله ذکي، او د مختلفو اتاقونو ریسانو د اندونیزیا د جمهور ریس له پخواني مرستیال او د اندونیزیا د سوداګریز پلاوي مشر ډاکټر یوسف کلا سره په ارګ کې د لیدنې په ترڅ کې د دواړو هیوادونو سوداګریزو اړیکو پراختیا په اړه خپل نظرونه سره تبادله کړل.

ښاغلي توکل احمدیار د دواړو هیوادونو د سوداګریزو او پانګه اچوونې ښو فرصتونو او د دواړ هیوادونو د ښو سوداګریزو اړیکو په اړه د خبرو کولو تر څنګ، هیله څرګنده کړه چې د اندونیزیا هیواد سره به په راتلونکي کې پراخې سوداګریزې اړیکي ولرو.

ښاغلي محمد یونس مهمند د افغانستان او اندونیزیا تر منځ د ښو سوداګریزو اړیکو په اړه د خبرو کولو تر څنګ، د دواړو هیوادونو تر منځ په سوداګرۍ کې د ۳۵ میلیونه امریکايې ډالرو د کموالي یادونه وکړه. ښاغلي مهمند زیاته کړه چې افغانستان د اندونیزیا څخه درمل او روغتیايې توکي واردوي په داسې حال کې چې صادرات يې نوموړي هیواد ته د نشت سره برابر دي. نوموړي د هوايې دهلیزونو له لارې د صادراتو توقف او د افغان سوداګرو لپاره د ویزې اخستنې په برخه کې د لازمو آسانتیاوو نه شتون د دواړو هیوادونو د سوداګرۍ په وړاندې ستر خنډونه وبلل.

د سوداګرۍ او صنعت وزیر په مختلفو برخو کې د پانګه اچوونې فرصتونو په اړه د خبرو کولو تر څنګ زیاته کړه، چې د افغانستان دولت په دې برخه کې لازمو آسانتیاو برابرولو ته ژمن دی.

د اندونیزیا هیواد ملي سوداګرو هم ددواړو هیوادونو تر منځ د سوداګرۍ د ښو اړیکو په اړه د خبرو کولو تر څنګ ټینګار وکړ، چې په افغانستان کې به د پانګه اچوونې او سوداګریزو اړیکو د پراختیا په برخه کې کوټلي ګامونه پورته کوي.       

د خصوصي سکتور په ځانګړې توګه د اوبلن ګاز واردوونکو د شکایتونو پر بنسټ، د افغانستان د سوداګرۍ او پانګونې اتاق د اوبلن ګاز سنجولو په موخه د نورم او سټنډرډ ملي ادارې او د TCRC شرکت ترمنځ تړون وغنده او او د لغو کولو غوښتنه يې وکړه.

د افغانستان د سوداګرۍ او پانګونې اتاق د مدیره هیت غړي او د افغان پټرول ګروپ شرکت ریس ښاغلي محمد داود یوسفزي د حکومت دا کړنه چې د اوبلن ګاز د سنجولو تړون يې د TCRC شرکت سره کړی دی، د اوبلن ګاز د واردوونکو ترمنځ د ناسالمې سیالۍ د رامنځته کیدو سبب وګاڼه او زیاته يې کړه چې د ځینو شرکتونو له خوا د بې کیفیته تیلو واردول د هیواد په زیان تمامیږي.

د افغانستان د سوداګرۍ او پانګونې اتاق د عامه اړیکو ریس ښاغلي امین بابک د اوبلن ګاز واردوونکو د کتبي شکایتونو او نورو اسنادو ښودلو تر څنګ وویل "د افغانستان جمهور ریس محمد اشرف غني تیر کال د TCRC شرکت د غولونې او د لازمو امکاناتو نه لرلو له امله څارنوالۍ ته معرفي کړی وه، خو له بده مرغه نن د هیواد په بندرونو کې د اوبلن کاز ټسټ او سنجول د همدې شرکت په واسطه سرته رسیږي چې سوداګر او خصوصي سکتور يې د ډیرو ننګونو سره مخ کړی دی.

نوموړي زیاته کړه چې د TCRC شرکت له خوا د في ټن اوبلن ګاز ټسټ کولو بیه کې ۳ امریکايې ډالره زیاتوالې راغلې دی، چې له امله يې هره ورځ ۲ میلیونه امریکايې ډالره د TCRC شرکت شخصي جیب ته ورځې او په عین وخت کې د اوبلن ګاز د بیو د لوړیدا سبب ګرځیدو تر څنګ خلک د بې شمیره ستونزو سره مخامخ کوي.

ښاغلي بابک زیاته کړه "د تیلو او اوبلن ګاز د ټسټ کولو له لارې لاسته راتلونکي عایدات باید د هیواد خزانې ته اضافه کړی شي چې تر ټولو ښه لاره يې د نورم او سټنډرډ ادارې له خوا د اوبلن ګاز ټسټ کول دي او دا کړنه به له بل پلوه د ناسالمو سیالیو د مخنیوې سبب هم شي."

نوموړي د خپلو خبرو په اوږدو کې وویل "د اوبلن ګاز ټسټ کول د داسې کسانو له خوا تر سره کیږي چې د TCRC شرکت شریکان او د اوبلن ګاز واردوونکي دي. برسیره پردې، سوداګر او د اوبلن ګاز واردوونکي وايې چې که چیرې حکومت د TCRC شرکت سره دا تړون لغو نه کړي، دوی به د اوبلن ګاز واردول بند کړي."

په دی خبري غونډه کې، سوداګرو او د اوبلن ګاز واردوونکو د رامنځته شوې پدیدې په اړه خپلې اندیښنې څرګندې او زیاته يې کړه چې د TCRC شرکت د کم ظرفیت او غیر مسلکي کارکوونکو لرونکې دی چې د ټسټ په برخه کې د زیاتو تیروتنو او د هیواد څخه د پانګې د وتو سبب ګرځي.  

د افغانستان د سوداګرۍ او پانګونې اتاق عمومي ریس ښاغلي توکل احمدیار تر ریاست لاندې د مدیره هیت د دریمې دورې نهمه ناسته، د مدیره هیت لومړي مرستیال ښاغلي حاجي محمد یونس مهمند، د مدیره هیت د پانګه اچوونې مرستیال ښاغلي سلطان محمد صافي، د دارالانشاء ریس ښاغلي خان محمد سرفراز باز، د مدیره هیت مالي ریس ښاغلي شیرین آغا سخي، د مدیره هیت د نړیوالو اړیکو ریس ښاغلي سید جاوید برهان، د مدیره هیت غړيو هر یو محمد ګردیزي، احمد ضیاء عظیمي شینوزاده، آذرخش حافظي، محمد داود یوسفزي، ذکریا بریالي، سید پرویز سادات هوفیاني، جان آقا صادقي، او احمد شکیب احمدیار، او د اتاق عامل ریس ښاغلي سید زمان هاشمي په ګډون ترسره شوه.

د مدیره هیت د دارلانشاء ریس ښاغلي خان محمد سرفراز باز د غونډې اجنډا ګډونوالو ته وړاندې کړه او د تاق عامل ریس ښاغلي سید زمان هاشمي خپل کاري راپور او د عامل پلاوي وړاندیزونه مطرح کړل.

د مدیره پلاوي د کاري راپور او وړاندیزونو اوریدلو وروسته، ښاغلي توکل احمدیار په هیواد کې د کاروبار، د افغانستان د سوداګرۍ او پانګونې اتاق سفر هرات ولایت ته او ددی سفر د لاسته راوړنو په اړه د خبرو کولو تر څنګ، د ولایتي اتاقونو د فعالیت د لاښه والي په موخه عامل پلاوي ته لازمې لارښوونې وکړې.

د مدیره هیت لومړي مرستیال ښاغلي حاجي محمد یونس مهمند او د مدیره هیت د پانګه اچوونې مرستیال ښاغلي سلطان محمد صافي د مرکزي اتاق د مالي او اداري چارو، په هیواد کې د پانګه اچوونې او د ولایتي اتاقونو د چارو د سمون او لاښه والي په برخه کې خبرې وکړی.

د غونډې په پای کې، د عامل او مدیره پلاوو د وړاندیزونو په اړه لازمې پریکړې وشوې.  

د سوداګرۍ او صنعت وزیر ښاغلي نثار احمد فیضي غوریاني، د افغانستان د سوداګرۍ او پانګونې اتاق عمومي ریس ښاغلي توکل احمدیار، د مدیره هیت سوداګریز مرستیال ښاغلي خیرالدین مایل احمدي، د مدیره هیت مالي ریس ښاغلي شیرین آغا سخي، د مدیره هیت د نړیوالو اړیکو ریس ښاغلي سید جاوید برهان، د مدیره هیت غړیو هر یو آذرخش حافظي او خان جان الکوزي، د اتاق عامل ریس ښاغلي سید زمان هاشمي، د هرات اتاق د مدیره هیت ریس ښاغلي یونس قاضي زاده، د هرات ولایت د ښځو اتاق مشرتابه او د  خصوصي سکتور یو شمیر غړیو د لیندۍ په ۲۷مه د هرات ولایت د ښځو اتاق پرانسته.

ښاغلي نثار احمد فیضي غوریاني وویل "د سوداګرۍ او صنعت وزارت د سوداګرو او متشبثو ښځو وړتیا لوړونې او په پنځو اقتصادي زونونو کې د ښځینه نندارتونونو جوړولو ته ژمن دی."

د افغانستان د سوداګرۍ او پانګونې اتاق مشرتابه د ښځو اتاق د لا ښه والي او د هرات ولایت د سوداګرو ښځو څخه د هر اړخیز ملاتړ ژمنه وکړه.

د ښځو سوداګرۍ اتاق د لاښه والي په موخه ددې اتاق مشرتابه د سوداګرۍ او صنعت وزارت او د افغانستان د سوداګرۍ او پانګونې اتاق ملاتړ اړین وباله او غوښتنه یې وکړه.     

د سوداګرۍ او صنعت وزیر ښاغلي نثار احمد فیضي غوریاني، د افغانستان د سوداګرۍ او پانګونې اتاق عمومي ریس ښاغلي توکل احمدیار، د مدیره هیت د سوداګرۍ مرستیال ښاغلي خیرالدین مایل احمدي، د مدیره هیت مالي ریس ښاغلي شیرین آغا سخي، د مدیره هیت د نړیوالو اړیکو ریس ښاغلي سید جاوید برهان، د اتاق عامل ریس ښاغلي سید زمان هاشمي، د هرات ولایت د سوداګرۍ او پانګونې اتاق ریس ښاغلي یونس قاضي زاده، او د مدیره هیت غړیو هر یو خان جان الکوزي او آذرخش حافظي د جمعې په ورځ د هرات والي ښاغلي سید عبدالوحید قتالي سره لیدنه وکړه او ورڅخه يې د کورنیو تولیداتو د ملاتړ غوښتنه وکړه.

د هرات والي د سوداګرۍ او صنعت وزیر، د اتاق عمومي ریس او ورسره پلاوي ته د ښه راغلاست ویل تر څنګ وویل "ّپه هرات ولایت کې له نیکه مرغه سوداګریزې او اقتصادي وړتیاوې شتون لري او د نوو هوايې دهلیزونو جوړول به د هیواد په صادراتو کې د پام وړ زیاتوالې راولي.

نوموړي هیله څرګنده کړه، چې د سوداګرۍ او صنعت وزارت د همکارۍ او ملاتړ په پایله کې به د هرات ولایت زعفران د سیمې او نړۍ بازارونو ته لار پیداکړي.

ښاغلي توکل احمدیار د شتو سوداګریزو فرصتونو یادولو تر څنګ زیاته کړه چې که چیرې حکومت سوداګرو او پانګه اچوونکو ته لازمې آسانتیاوې برابرې کړي او ستونزو ته يې د پای ټکې کیږدي، نو سوداګر او پانګه اچوونکي به په هیواد کې پانګه اچوونه وکړي.

ښاغلي نثار احمد فیضي غوریاني د ځینو هیوادونو سره د تفاهملیکونو لاسلیکول، په نږدې راتلونکې کې د سوداګریزو چارو د پراختیا سبب وباله او شته اداري فساد سره د جدي مبارزې او د هیواد په ګمرکونو کې د عوایدو او محصول د له لاسه ورکونې د مخنیوې غوښتنه يې وکړه.