د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د هېواد سویل لویدیځې حوزې تیلو او ګازو واردوونکو هر یو ښاغلي عبدالمنان فراهي او محمد جانان فراهي او د دی سکتور یو شمیر سوداګرو سره په مرکزي اتاق کې د لیدنې په ترڅ کې، د تیلو او ګازو واردولو برخه کې ستونزو، د نورم او سټنډرډ ستونزو او د هېواد په بندرونو کې د تیلو او ګازو ټانکرونو د توقف ستونزو په اړه خبرې اترې وکړې.

ښاغلي عبدالمنان فراهي د هېواد په بندرونو کې د تیلو او ګازو ټانکرونو د توقف په اړه خبرې وکړې او وی ویل: د هېواد د تیلو او ګازو واردوونکو سوداګرو یو شمیر ټانکرونه د هېواد په ګمرکونو کې له شپږ میاشتو راهیسي بند پاتی دي چې دا چاره د یادو موادو د سوځیدو، وخت ضایع کیدو او سوداګرو ته اضافي لګښت رامنځته کیدو سبب ګرځي.
نوموړي له دولتي چارواکو څخه وغوښتل چې دې برخې ته د جدي پاملرنې کولو ترڅنګ، ټانکرونو ته د ورود اجازه ورکړي.

ښاغلي مهمند د ستونزو اوریدو او د ټانکرونو په خلاصیدو د ټینګار کولو وروسته وویل: زموږ د سوداګرو د ټانکرونو توقف زیانمنونکی دی او موږ غواړو چې په دی برخه کې لازم ګامونه پورته کړی شي.

ښاغلي مهمند د تیلو او ګازو په لوړ کیفیت د ټینګار کولو ترڅنګ، ددی سکتور له سوداګرو وغوښتل چې تیل او ګاز د نړیوالو او د هېواد د نورم او سټنډرډ ادارې د معیارونو مطابق وارد کړي.

د اتاق لومړي مرستیال د هېواد اقتصادي کمیسیون له مسؤلینو سره د تیلیفوني اړیکې په ترڅ کې، د یادې موضوع په حل کې د اتاق له همکارۍ ډاډ ورکړ او ژمنه يې وکړه چې د تیلو او ګازو سوداګرو او اړوندو حکومتي ادارو ترمنځ د همغږۍ رامنځته کولو برخه کې به خپلې هیڅ ډول مرستې ونه سپموي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د مدیره پلاوي سوداګریز مرستیال ښاغلي خیرالدین مایل احمدي د ایران سفارت له سوداګریزې آتشې ښاغلي دوکتور روستايي سره د لیدنې په ترڅ کې، د سوداګرۍ او پانګه اچونې او په دی برخه کې د شته فرصتونو او ننګونو په اړه خبرې اترې وکړې.

ښاغلي مهمند ایران ته د افغان صادارتو د ګمرکي تعرفو د بیو د لوړوالي په اړه خبرې وکړې او وی ویل: افغان سوداګر ایران د صادراتو برخه کې د ګمرکي تعرفو د بیو له لوړوالي شکایت کوي او موږ غواړو چې د ګمرکي تعرفو بیې په مناسب ډول راکمې او د افغانستان او ایران ترمنځ ښې سوداګریزې اړیکې رامنځته شي.

ښاغلي مهمند د ایران سوداګریزې آتشې سره د «امام ابو حنیفه (رح) ملي او نړیوال نندارتون) په اړه معلومات شریک کړل او غوښته يې وکړه چې په یاد نندارتون کې ایراني شرکتونه ګډون وکړي.

ښاغلي مایل احمدي د ایران سره د ښو سوداګریزو اړیکو ستاینه وکړه او په لا ډیرو همکاریو او همغږیو د ټینګار ترڅنګ يې ډاډ ورکړ چې د افغانستان د سوداګرۍ او پانګونې اتاق مشرتابه پلاوی تل هڅه کوي چې د ایران سره سوداګریزو اړیکو ښه والي برخه کې لازمې آسانتیاوې رامنځته کړي.

ښاغلي روستايي د افغانستان او ایران ترمنځ د سوداګریزو اړیکو په غښتلتیا د ټینګار کولو ترڅنګ، وویل: د دواړو هېوادونو ترمنځ سوداګري او پانګه اچونه د دواړو هېوادونو د ګټو په نظر کې نیولو سره ترسره کیږي.
نوموړي د دواړو هېوادونو ترمنځ د سوداګرۍ د لا ښه والي برخه کې د خپلو هڅو یادونه وکړه او ژمنه يې وکړه چې دوی به په دی برخه کې خپلې هیڅ ډول مرستې ونه سپموي.