د افغانستان د سوداګرۍ او پانګونې اتاق څارنې پلاوي ۱۲مه ناسته د څارنې پلاوي رئيس ښاغلي عبدالحامد حمیدي تر مشرۍ لاندی او د یاد پلاوي منشي ښاغلي عبدالمتین قلندري او غړي ښاغلي محمد ناصر صمیم په ګډون په یاد دفتر کې ترسره شوه.

په آجنډا کې شته موضوعګانې د ښاغلي عبدالمتین قلندري لخوا د ناستې ګډونوالو ته وړاندی او د امام ابو حنیفه (رح) دویم ملي او نړیوال نندارتون، مالي، تشکیلاتي او یو شمیر نورو مسایلو په اړه مفصلې خبرې وشوې او په اړه يې لازمې پریکړې ونیول شوې.

چهارشنبه، وږي ۸ مه، ۱۴۰۲

د افغانستان د سوداګرۍ او پانګونې اتاق مدیره پلاوي سوداګریزو چارو مرستیال ښاغلي خیرالدین مایل احمدي، د عامه اړیکو، صادراتو پراختیا او نړیوالو اړیکو ډیپارټمنټونو مسؤلینو د افغانستان لپاره د ازبکستان له سفیر ښاغلي یادګار خواجه یوف اکه او د یاد هېواد له یو شمیر سوداګرو سره د لیدنې په ترڅ کې، د سوداګریزو همکاریو او د پانګونې له فرصتونو څخه د استفادې په اړه خبرې وکړې.

ښاغلي مایل احمدي په افغانستان کې د ازبکستان سفیر او د دغه هېواد سوداګرو ته د ښه راغلاست په ترڅ کې ازبکستان یو دوست، ورور او د ګډو کلتوري او دیني ارزښتونو لرلو هېواد وباله او د سوداګرۍ او پانګونې برخه کې يې د دواړو هېوادونو ترمنځ د هوکړه لیکونو په لاسلیک او عملي کیدو ټینګار وکړ.  

ښاغلي مایل د ازبکستان له سوداګرو او پانګوالو وغوښتل چې د سوداګرۍ، ټرانزیټ، کرنې او کانونو په برخو کې شته فرصتونو ته په پام سره په افغانستان کې پانګونه وکړي.

ښاغلي یادګار خواجه یوف اکه د سوداګرۍ اتاق د مرستیال د خبرو له اورېدو وروسته په تېرو دوو کلونو کې د اقتصادي وضعیت د ښه والي په برخه کې د افغانستان د خصوصي سکتور د غړو هڅې وستایلې او د دواړو هېوادونو ترمنځ د ګډو پانګونو او په دې برخه کې د عملي ګامونو پر اخیستلو يې ټینګار وکړ.

شنبه، وږي ۴ مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د کابل سون توکو او اوبلن ګاز اتحاديې له مشرتابه ښاغلي نجیب الله جلالزي سره لیدنه ترسره او د هېواد لویو لارو، مالیاتو او نورم او سټنډرډ برخو کې د سون توکو او اوبلن ګاز واردوونکو ستونزو په اړه يې خبرې اترې وکړې.

ښاغلي جلالزي د هېواد په لویو لارو کې د لوړ تناژ تلو زیاتوالی، د سون توکو په وارداتو د مالیاتو لوړوالی، د سالنګ لويې لارې مناسب بدیل لټول، د نورم او سټنډرډ ادارې لخوا د سون توکو په څو ځلي کنترول او یو شمیر نور مسایل يې خپلې بنسټیزې ستونزې یادې کړې او د حل په برخه کې يې د اتاق د مدیره پلاوي د لومړي مرستیال د همکارۍ غوښتنه وکړه.
سربیره پردی، ښاغلي جلالزي له حکومت څخه وغوښتل چې په متعددو ځایونو کې د لوړ تناژ تلې حذف او په هر ولایت کې یوه پایه د لوړ تناژ تله نصب کړي.

ښاغلي مهمند د سون توکو او اوبلن ګاز واردوونکو له خبرو اوریدو وروسته، د دوی دوه کلنې هڅې وستایلې او د هېواد په بندرونو کې د لازمو آسانتیاوو رامنځته کیدو، د ماليې وزارت لخوا د مالیې په کموالي او په واحد ډول د ماليې په ورکړه ټینکار وکړ.

ښاغلي مهمند د سون توکو او اوبلن ګاز له واردونکو وغوښتل چې خپلې ستونزې په لیکلې بڼه اتاق ته وسپاري څو د حل په موخه د اړوندو دولتي ادارو سره شریکې کړې شي.
ښاغلي مهمند د ماليې وزارت ګمرکونو له معین سره د ټیلیفوني اړیکې له لارې د سون توکو او اوبلن ګاز واردوونکو ستونزې شریکې او د حل غوښته يې وکړه.

د ګمرکونو معین د هېواد په ګمرکونو او ماليې برخه کې د شته ستونزو حل ژمنه وکړه.

سه شنبه، وږي ۷مه، ۱۴۰۲

د افغانستان د خصوصي سکتور غړو او د ازبکستان سوداګرو او پانګوالو ترمنځ سوداګریز پیوستون ناسته د افغانستان د سوداګرۍ او پانګونې اتاق مدیره پلاوي سوداګریزو چارو مرستیال ښاغلي خیرالدین مایل احمدي، د ازبکستان د سوداګرۍ وزارت معین، د اتاق د مدیره پلاوي غړي ښاغلي عصمت الله وردګ، د څارنې پلاوي رئیس ښاغلي عبدالحامد حمیدي، د ننګرهار ولایتي اتاق رئیس ښاغلي ګل مراد عرب، د صنایعو او کانونو، کرنې او ښځو اتاقونو مشرتابه پلاوي غړو او د هېواد پیژندل شویو سوداګرو او پانګوالو په حضور کې ترسره شو.

ښاغلي دوران د سوداګریز پیوستون ناسته د دواړو هېوادونو ترمنځ د سوداګرۍ د وضعیت د ښه والي لپاره مهمه وبلله او ژمنه یې وکړه چې په افغانستان او ازبکستان کې د ګډې پانګونې لپاره به عملي ګامونه پورته کړي.

ښاغلي خیرالدین مایل احمدي ټولو افغان او ازبک سوداګرو او پانګوالو ته د ښه راغلاست ویلو په ترڅ کې د سوداګریز پیوستون کنفرانس د جوړیدو موخه د دواړو هېوادونو د سوداګرو یو بل پېژندل، د سوداګریزو شریکانو موندل او په بېلابېلو برخو کې د ګډو پانګونو ترسره کول ونومول او د دواړو هېوادونو ترمنځ په ښو سوداګریزو اړیکو يې ټینګار وکړ.

په دې کنفرانس کې د دواړو لورو سوداګرو او پانګوالو په ګروپي شکل د سوداګرۍ او پانګونې پر فرصتونو او همدارنګه د راتلونکو پلانونو په اړه خبرې وکړې.

یکشنبه، وږي ۵ مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په افغانستان کې د بریتانیا د سفارت له شارژدافیر ښاغلي روبیرت چترت دیکسن سره وکتل او د تېرو دوو کلونو په ترڅ کې يې د اقتصاد په برخه کې د بنسټیزو بدلونونو، سوداګرۍ، پانګونې، مالي او بانکي سکتورونو او د افغانستان پر روان وضعیت په اړه خبرې وکړې.

ښاغلي احمديار په هېواد کې د خصوصي سکتور د پياوړتيا او د بهرنۍ پانګونې د جلبولو په موخه د افغانستان د سوداګرۍ او پانګونې اتاق د فعاليتونو په اړه مفصل معلومات وړاندې کړل او عمومي شرايط يې د سوداګرۍ او پانګونې د بهير د ګړندي کولو لپاره مناسب وبلل.
 نوموړي د خصوصي سکتور د ځینو ستونزو په ځانګړي ډول د سوداګرو د پیسو د لېږد او د ویزو د ورکړې د ټرانزیټ، کانونو استخراج او انرژۍ تولید په برخو کې د شته فرصتونو یادونه وکړه او د بهرنیو هېوادونو پر همکاریو یې ټینګار وکړ.

ښاغلي ډیکسن د افغانستان د سوداګرۍ او پانګونې اتاق عمومي رئیس د خبرو له اورېدو وروسته، د افغانستان خصوصي سکتور غړو د هڅو ستاینه وکړه او د افغانستان خلکو سره د مرستو، افغان خصوصي سکتور ته د لازمو آسانتیاوو برابرولو او د هېواد اقتصادي رغښت لپاره يې د خپلو مرستو او همکاریو ژمنه وکړه.

دوشنبه، وږي ۶مه، ۱۴۰۲