د افغانستان د سوداګرۍ او پانګوې اتاق مدیره پلاوي لومړي مرستیال ښاغلي محمد یونس مهمند د مدیره پلاوي غړي ښاغلي محمد ګردیزي په ملتیا په کابل کې د یوناما دفتر د اقتصادي پروګرامونو له مسؤلې آغلې دینای بوګاس سره د لیدنې په ترڅ کې، د پانګه ایزو فرصتونو، د کرکیلې ارزښت، کانونو استخراج او د نړیوالې ټولنې لخوا د افغانستان د خلکو د پیسو د کنګل کیدو له امله د رامنځته شویو ستونزو په اړه خبرې اترې وکړې.
ښاغلي مهمند د افغانستان خلکو سره د یوناما دفتر دهمیشنیو همکاریو ستاینې کولو ترڅنګ، د کرکیلې میکانیزه کیدو، د پښتې پروسس فابریکو جوړولو او د سوداګریزو موخو لپاره د هېواد څخه دباندی د پیسو لیږد برخه کې د یوناما دفتر د همکاریو غوښتنه وکړه.
ښاغلي مهمند په هېواد کې د پانګه اچونې او سوداګرۍ لپاره د بشپړ امنیت ډاډ ورکړ او د یو شمیر پرمختګونو لکه: د هوايي دهلیزونو بیا پرانستل، د هېواد د صادراتو په کچه کې زیاتوالی رامنځته کیدل، د کوکنارو د کرکیلې منع کیدل چې د نورو کرنیزو محصولاتو د کرنې لپاره يې لاره هواره کړیده او یو شمیر نورو لاسته راوړنو په اړه خبرې وکړې.
ښاغلي مهمند د ملګرو ملتونو لخوا د افغانستان په رسمیت نه پیژندل د سوداګرۍ پراختیا، اقتصادي ودې او د نړۍ سره د اړیکو په برخه کې ستره ننګونه وبلله.
آغلې دینای بوګاس د افغانستان د اقتصادي ودې لپاره د سوداګرۍ او پانګه اچونې کچې زیاتوالی اړین وباله او زیاته يې کړه: موږ هوډ کړی چې، د افغانستان خلکو سره د بشردوستانه مرستو کولو ترڅنګ، د بیخ بنسټیزه پروژو تطبیق، کاري فرصتونو رامنځته کولو او د انرژۍ تولید برخه کې همکاري وکړو.
