د افغانستان د سوداګرۍ او پانګونې اتاق عامل پلاوي سرپرست ښاغلي میرویس هوتک په داسی حال کې چې د اتاق حقوقي سلاکار او د مختلفو ډيپارټمنټونو مسؤلینو هم حضور درلود، د لوګر، ارزګان او زابل ولایتي اتاقونو له مشرتابه سره آنلاین او حضوري ناسته ترسره او د کاري مسؤلیتونو په اړه يې خبرې اترې وکړې.  

ښاغلي هوتک، د زابل، لوګر او ارزګان ولایتي اتاقونو د جوړیدو په مناسبت د افغانستان د سوداګرۍ او پانګونې اتاق عمومي رئیس ښاغلي توکل احمدیار پیغام د مرکزي اتاق مشرتابه، ولایتي اتاقونو او د هېواد د خصوصي سکتور ټولنې غړو ته ولوست.

د مرکزي اتاق عمومي رئيس په خپل پيغام کې د نويو خونو د جوړېدو د مبارکۍ تر څنګ، د سوداګرۍ او پانګونې د ودې او په نورو ولايتونو کې د ولایتي اتاقونو د جوړېدو په برخه کې د مرکزي اتاق د مشرتابه د ملاتړ او همکارۍ ډاډ ورکړ.

ښاغلي هوتک د ارزګان، زابل او لوګر ولایتي اتاقونو مشرتابه پلاوو ټولو غړو ته د ښه راغلاست ترڅنګ، د افغانستان د سوداګرۍ او پانګونې اتاق د فعالیتونو او لاسته راوړنو په اړه معلومات وړاندې کړل او زیاته یې کړه " دا ناسته د زابل، لوګر او ارزګان ولایتي اتاقونو د مدیره او عامل پلاوو د کاري لارښوونو په اړه جوړه شوې ده."

ښاغلي هوتک د ولایتي اتاقونو له مشرتابه پلاوو وغوښتل چې خپل فعالیتونه د سوداګرۍ پراختیا، د هېواد د اقتصاد په وده، د پانګونې د جلبولو، د خصوصي سکتور د ټولو برخو د کنټرول او مدیریت په برخو کې متمرکز کړي او له دولتي چارواکو سره د دوستانه اړیکو ټینګولو ترڅنګ، د لویو پروژو د ترلاسه کولو او د هېواد د نورو سوداګریزو مسایلو په اړه معلومات ترلاسه کول.

په همدې موخه د حقوقي چارو سلاکار ښاغلي عبدالسلام کوهي او د اتاق نورو مسؤلینو د خپلو کاري مسایلو په اړه هر اړخیز معلومات وړاندې کړل.
په پای کې، د ولایتي اتاقونو مشرتابه پلاوو د خپلو ستونزو او سوداګریزو لاسته راوړنو یادونه وکړه او د دوی د ستونزو د حل په برخه کې یې د افغانستان د سوداګرۍ او پانګونې اتاق عامل پلاوي سرپرست د هر اړخیزې همکارۍ غوښتنه وکړه.

یکشنبه، غويي ۱۷مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د کندهار سوداګرۍ او پانګونې اتاق مدیره پلاوي رئیس ښاغلي محمد صدیق مهمند، د اتاق ستر سلاکار ښاغلي حاجي شرف الدین، سوداګرو او پانګوالو يې ملتیا کوله د افغانستان لپاره د جاپان سفارت سرپرست ښاغلي تاکاشي اوکادا سره لیدنه ترسره او د سوداګرۍ پراختیا، د دواړو هېوادونو ترمنځ ګډو پانګونو او افغان سوداګرو ته د لازمو آسانتیاوو برابرولو په اړه يې خبرې اترې وکړې.

ښاغلي محمد صدیق مهمند کندهار ولایت او په ځانګړې توګه د کندهار سوداګرۍ او پانګونې اتاق ته د ښاغلي تاکاشي اوکادا او ورسره پلاوي راتګ نیک ګام وباله او د سوداګرۍ پراختیا او افغان سوداګرو ته د لازمو آسانتیاوو برابرولو برخه کې يې د جاپان سفارت د همکارۍ غوښتنه وکړه.

ښاغلي مهمند د جاپان سره د افغانستان د دوستانه، اقتصادي او سوداګریزو اړیکو یادونه وکړه او افغان سوداګرو ته د ویزې صدور برخه کې يې د جاپان سفارت د هر اړخیزې همکارۍ غوښتنه وکړه.

ښاغلي مهمند په افغانستان کې د ټولیز امنیت او سولې ټینګښت، په دولتي ادارو کې د اداري فساد له منځه تلل، د کوکنارو کښت نه شتون او بهرنیو سوداګرو ته شته آسانتیاوې په افغانستان کې د پانګونې لپاره ښه فرصتونه وبلل او د افغانستان او جاپان ترمنځ يې د اقتصادي او سوداګریزو اړیکو د غښتلتیا او پراختیا غوښتنه وکړه.

ښاغلي تاکاشي د افغانستان د سوداګرۍ او پانګونې اتاق مشرتابه پلاوي، د کندهار اتاق مشرتابه پلاوي او په ناسته کې د موجودو ویناوالو له ویناوو اوریدو وروسته، افغان سوداګرو ته د ویزې صدور، افغانستان سره د سوداګریز بهیر ساده کولو او د سوداګرۍ پراختیا برخه کې د جاپان سفارت د هر اړخیزې همکارۍ ډاډ ورکړ.

دوشنبه، غويي ۱۱مه، ۱۴۰۲

د افغانستان د سوداګرۍ او پانګونې اتاق اجرائیه کمېټې دوه ویشتمه ناسته د افغانستان د سوداګرۍ او پانګونې اتاق د مدیره پلاوي لومړي مرستیال ښاغلي محمد یونس مهمند تر ریاست لاندی او د اتاق مدیره پلاوي خدماتي مرستیال ښاغلي نصیر احمد عرب، د دارلانشاء رئیس ښاغلي خان محمد سرفراز باز،  مالي رئیس ښاغلي شیرین آغا سخي، نړیوالو اړیکو رئیس ښاغلي انجنیر سید جاوید برهان او د عامل پلاوي سرپرست ښاغلي میرویس هوتک په ګډون د کابل شهرنو مدیره پلاوي دفتر کې ترسره شوه.

په پیل کې د دارلانشاء رئیس ښاغلي خان محمد سرفراز باز په اجنډا کې شاملې موضوعګانې د ناستې ګډونوالو سره شریکې کړې.

ورپسی د عامل پلاوي سرپرست ښاغلي میرویس هوتک د عامل پلاوي راپورونه وړاند کړل او د اجرائیه کمېټې او عامل پلاوي په وړاندیزونو تر هر اړخیز بحث وروسته، لازمې پریکړې وشوې.

پنجشنبه، غويي ۱۴مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د کندهار سوداګرۍ او پانګونې اتاق مدیره پلاوي رئیس ښاغلي محمد صدیق مهمند، د کندهار ولایت مقام استازي ښاغلي قاري عبدالسلام، د کندهار ګمرک رئیس ښاغلي مولوي عبدالشکور، ملي سوداګرو، د یاسر باسر نړیوال شرکت رئیس ښاغلي روزي خان او د بولدک ولسوالۍ د سوداګرۍ او پانګونې اتاق مسؤلینو د یو لړ مراسمو په ترڅ کې، د ترکمنستان څخه پاکستان ته د افغانستان له لارې، د یاسر باسر نړیوال شرکت په واسطه د ګازو ټرانزیټ لړۍ پرانیسته

ښاغلي مهمند سوداګري، ټرانزیټ او صنعت د هېواد د اقتصادي ودې او سوداګریزې پراختیا اصلي عوامل او افغانستان يې د پاکستان، منځنۍ آسیا او سیمې هېوادونو لپاره لنډه، خوندي، اقتصادي او ټرانزیټي لاره وبلله.
ښاغلي مهمند د ترکمنستان څخه پاکستان ته د افغانستان له لارې د ګازو د ټرانزیټ برخه کې د اړوندو حکومتي ادارو هڅې او همکارۍ وستایلې او د ماليې او نورو اړوندو وزارتونو څخه يې غوښتنه وکړه چې د هېواد سوداګرو ته لازمې آسانتیاوې رامنځته کړي څو اقتصادي ځان بسیاینې ته لار هواره شي.

ښاغلي مهمند زیاته کړه "د افغانستان د خصوصي سکتور په استازیتوب، موږ د سیمې او نړۍ هېوادونو سره د دوستانه، سوداګریزو او اقتصادي اړیکو غښتلتیا ته ژمن یو او د هېواد سوداګرو او پانګوالو څخه مو غوښتنه داده چې خپلو سوداګریزو او پانګه ایزو فعالیتونو ته لا وده او پراختیا ورکړي."

د یاسر باسر نړیوال شرکت رئیس ښاغلي روزي خان د دغه شرکت په واسطه، پاکستان ته د ترکمنستان د ګازو ټرانزیټ برخه کې د کندهار سوداګرۍ او پانګونې اتاق مشرتابه پلاوي هڅې او همکارۍ وستایلې او زیاته يې کړه چې د پخوا په پرتله يې اوس په سوداګرۍ کې لازمې آسانتیاوې رامنځته شوي دي.

ښاغلي قاري عبدالسلام وویل "د کندهار ولایت مقام د هېواد اقتصادي ودې او سوداګریزې پراختیا ته ژمن دی او په دی برخه کې خپلې هیڅ ډول مرستې او همکارۍ نه سپموي."

همدارنګه، ښاغلي مولوي عبدالشکور د اسلام مقدس دین له نظره د سوداګرۍ او کاروبار په اړه تفصیلي معلوماتو وړاندی کولو ترڅنګ، د سوداګرۍ پراختیا، اقتصادي ودې او صنعت پراختیا برخه کې د لازمو همکاریو ډاډ ورکړ.

یکشنبه، غويي ۱۰مه، ۱۴۰۲

د کار نړیوال سازمان (ILO) په کاري چاپیریال کې د خوندیتوب او روغتیا او د کارګر نړیواله ورځ د یو لړ مراسمو په ترڅ کې ونمانځله. په دی نمانځغونډه کې د کار نړیوال سازمان مسؤلینو، د کار او ټولنیزو چارو وزارت لوړ پوړو چارواکو او د افغانستان د سوداګرۍ او پانګونې اتاق عامل پلاوي سرپرست رئيس ګډون درلود.

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک د خوندیتوب او روغتیا او کارګر نړیوالې ورځې په مناسبت مبارکي وویله او د یادو ورځو د ارزښت په اړه يي وویل "په کاري چاپیریال کې د روغتیا او خوندیتوب ډاډمنول د کار نړیوال سازمان له بنسټیزو او ستراتیژیکو اصولو څخه یو اصل دی او دی ډول غونډو کې ګډون کول د علم او تجربې شریکولو، د ارتباطي شبکو جوړولو او په کاري چاپیریال کې د خوندیتوب او روغتیا اړوند مسایلو تحلیلولو لپاره یو ښه فرصت دی."
سربیره پردی، ښاغلي هوتک په کاري چاپیریال کې د خوندیتوب او روغتیا فرهنګ ترویجولو باندی ټینګار وکړ.

د اتاق عامل پلاوي سرپرست، کوچنیو تشبثاتو ته د لازمو سلا مشورو ورکولو، په کاري چاپیریال کې د روغتیا او خوندیتوب روزنیزو پراګرامونو په لاره اچولو او د کسب او کار پراختیا په موخه د بیخبنسټونو جوړولو په اړه د اتاق د لاس لاندی پروګرامونو په اړه معلومات وړاندی او د کارګرو اتحاديې او کار نړیوال سازمان د کلیدي شریک او کار ګمارونکي په توګه يې په کاري چاپیریال کې د روغتیا او خوندیتوب فرهنګ ترویجولو ډاډ ورکړ.

دوشنبه، غويي ۱۱مه، ۱۴۰۲