د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي غړي ښاغلي خان جان الکوزي، د عامل پلاوي مالي او اداري مرستیال ښاغلي میرویس هوتک، د صنعت او کسبګرو اتاقونو مدیر پلاوو د خامو توکو یو شمیر واردوونکو سره د لیدنې په ترڅ کې د هغوی د شتو ستونزو په اړه خبرې اترې وکړې.

 

ښاغلي مهمند ګډونوالو ته د ښه راغلاست ویلو ترڅنګ، د بندرونو وضعیت په اړه اندیښنه څرګنده کړه او ویې ویل چې جګړه باید په هیواد کې د خامو توکو بیې لوړېدو لامل نه شي؛ ځکه چې د خامو موادو د قیمت په لوړېدو سره، د هیواد اوسیدونکي زیانموي.

 

نوموړي زیاته کړه چې افغان حکومت او طالبان باید د هیواد په بندرونو کې د خامو موادو سوداګرو لپاره ستونزې رامینځته نه کړي ترڅو د هیواد اوسیدونکي د خامو موادو لوړې او ننګونو سره مخ نشي.

 

ښاغلي مهمند هيله څرګنده کړه چې د افغانستان خلک به وکولاى شي د يووالي او خواخوږۍ سره شته ستونزې هوارې کړي.

 

ښاغلي الکوزي د خامو موادو صادروونکو ستونزو په اړه اندیښنه څرګنده کړه او ویې ویل چې د هېواد په بندرونو کې نا امنۍ په کتو حکومت باید د خامو موادو ګمرکي محصول د دری میاشتو لپاره معاف کړي.

 

ښاغلي الکوزي دا هم وویل چې د خامو موادو سوداګر باید ژمنه وکړي چې دوی به د خامو موادو لکه: اوړو، غوړیو، بورې، چای او یو شمیر نورو توکو بیې نه لوړوي.

 

هغه په دې ناسته کې پر شته سوداګرو هم غږ وکړ چې د کورنیو تولیداتو د زیاتوالي په برخه کې ګړندي ګامونه پورته کړي ترڅو د هیواد اوسیدونکي د خامو موادو د کمښت له ستونزو سره مخ نشي.

 

د کسبګرو او صنعت اتاقونو مسؤلینو او د خامو موادو واردوونکو د افغانستان د سوداګرۍ او پانګونې اتاق څخه د لازمو آسانتیاوو رامنځته کولو په برخه کې مننه وکړه او د دری میاشتو لپاره د ګمرکي محصول معاف کولو په برخه کې يې د اتاق د دریځ ملاتړ وکړ.

 

دوی په بندرونو کې د اوسني وضعیت او د دوی د سوداګریزو توکو د بندیدو په اړه اندیښنه څرګنده کړه او په ښکېلو خواو یې غږ وکړ چې هیواد ته د خامو موادو واردوونکو لپاره ستونزې رامینځته نکړي ترڅو د هیواد اوسیدونکي له کومې ستونزې سره مخ نشي.

 

د غونډې په پای کې، موافقه وشوه چې د یادو ستونزو د له منځه وړلو په موخه د مالیې وزارت او نورو اړونده ارګانونو سره همغږي وشي او د حل مناسبې لارې چارې ورته ولټول شي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي پانګه اچونې مرستیال ښاغلي سلطان محمد صافي، د سوداګرۍ او صنعت وزارت استازي، د ایران د سوداګریزې پراختیا سازمان عمومي رئیس او د وزیر مرستیال ښاغلي حمید زادبوم، په افغانستان کې د ایران میشت سفیر ښاغلي بهادر امینیان، په ایران کې د افغان میشت سفیر مرستیال ښاغلي عبدالقیوم سلیماني، د افغانستان د سوداګرۍ او پانګونې اتاق عامل پلاوي مالي او اداري مرسیتال ښاغلي میرویس هوتک او د هرات – مشهد سوداګریزو اتاقونو مدیره پلاوو د افغانستان او ایران ترمنځ د سوداګریزو اړیکو پراختیا په پار جوړه شوې آنلاین ناسته کې ګډون وکړ.

 

پدې آنلاین ناسته کې، دواړو لورو د دواړو هیوادونو تر منځ د اوږدمهاله سوداګریزو اړیکو، د سوداګرۍ پیاوړتیا او پراختیا، په افغانستان کې د ایراني پانګه اچوونکو پانګه اچونو او په ایران کې د افغان پانګوالو پروړاندې د شتو ستونزو په اړه خبرې اترې وکړی او په له منځه وړلو يې ټینګار وکړ.

 

ښاغلي مهمند د خصوصي سکتور په استازیتوب ګډون کوونکو ته د ښه راغلاست ویلو ترڅنګ، د ایراني پلاوي څخه ددی آنلاین ناستې جوړولو په پار مننه وکړه. او همدارنګه يې د دواړو هېوادونو ترمنځ د سوداګریزو، دیني، سیاسي، او اقتصادي اړیکو د ژورتیا په اړه خبرې وکړی او د سوداګریزو اړیکو په پراختیا يې ټینګار وکړ.

 

ښاغلي مهمند زیاته کړه "افغانستان په تیرو ۲۰ کلونو کې د ډیرو کړاوونو تجربه کولو وروسته، له نیکه مرغه د فرصتونو په ښار بدل شوی دی. د نړیوالو شمیرنو پر بنسټ افغانستان د ۳ تریلیونه ډالرو په ارزښت قیمتي ذخیرې لري. او د موقعت له نقطه نظره، د وریښمو له لارې افغانستان د مرکزي او جنوبي آسیا او آسیا او اروپا نښلونکی هېواد ګڼل کیږي. د سوداګریزو او پانګه ایزو ریفورمونو او لازمو آسانتیاوو رامنځته کولو په برخه کې په نړیواله کچه، لوړ ځای لري چې د بهرنۍ پانګه اچونې د جذب سبب ګرځیدلی دی."

 

ښاغلي مهمند د خپلو خبرو په اوږدو کې، دغه آنلاین ناسته د ګډو پانګه اچونو، د اقتصادي پیاوړتیا، د صادراتو او وارداتو کچې ډیروالي، د هوايې لارې بیا پرانستې او د دواړو هېوادونو ترمنځ د سوداګریزو سفرونو په برخه کې د لازمو آسانتیاوو رامنځته کولو لپاره یو ښه فرصت وباله او هیله يې څرګنده کړه چې دغه آنلاین ناسته به د ایراني او افغاني سوداګرو ترمنځ د سوداګریزو تړونونو سبب وګرځي.

د افغانستان د سوداګرۍ او پانګونې اتاق مدیره پلاوي نړیوالو اړیکو رئیس ښاغلي انجنیر سید جاوید برهان، د مدیره پلاوي مالي رئیس ښاغلي شیرین آغا سخي او د نړیوالو او عامه اړیکو ډیپارټمنټونو مسؤلینو په چک جمهوریت کې د افغان سوداګریز اتاق مرستیال ښاغلي فواد نادري سره د لیدنې په ترڅ کې د شتو پانګه ایزو فرصتونو او ګډو همکاریو په اړه خبرې وکړی او د دواړو اتاقونو ترمنځ تفاهملیک یې لاسلیک کړ.

 

ښاغلي برهان ښاغلي نادري ته د ښه راغلاست ویلو ترڅنګ، په افغانستان کې د شتو پانګه ایزو فرصتونو په اړه خبرې وکړی او د چک خصوصي سکتور او د دوی له لارې يې په افغانستان کې د اروپایي پانګه اچونو غوښتنه وکړه. سربیره پردی، يې د هېواد د خصوصي سکتور څخه د زیربنايې پروژو په تطبیق کې د مرستې او همکارۍ غوښتنه وکړه.

 

ښاغلي نادري د چک جمهوریت شتو امکاناتو او وړتیاوو په ځانګړې توګه د تخنیکي توکو، کرنیزو ماشین آلاتو، درملو او په دی برخه کې د نوموړي هېواد د تجربو په اړه د خبرو کولو ترڅنګ، ډاډ ورکړ، چې د پانګو د جلب او د دواړو اتاقونو اړیکو د غښتلتیا په برخه کې به خپلې هیڅ ډول مرستې ونه سپموي.

 

د ناستې په ترڅ کې دواړو لوریو موافقه وکړه، چې د همکارۍ تفاهملیک پر بنسټ به سوداګریز تواصل کنفرانسونه، په چک جمهوریت کې د افغاني محصولاتو نندارتون او په افغانستان کې د چک جمهوریت تولیداتو نندارتونونه په لاره واچول شي او همکارۍ تفاهملیک د ښاغلي برهان او ښاغلي نادري له لوري لاسلیک کړی شو.

 

دواړو لوریو د افغان – چک او افغان - اروپا ګډو سوداګریزو اتاقونو رامنځته کیدو، سوداګریزو ناستو او په افغانستان کې د بهرنیو پانګه اچونو په جلب ټینګار وکړ.

د افغانستان د سوداګرۍ او پانګونې اتاق عامل پلاوي سرپرست رئیس ښاغلي شفیق الله عطايي په کابل کې د ایران سفارت له سوداګریزې آتشې (چاروال) ښاغلي ابراهیم حسیني سره د لیدنې په ترڅ کې، د دواړو هېوادونو سوداګریزو اړیکو پراختیا او د سوداګرو شتو ستونزو له منځه وړلو په اړه خبرې اترې وکړی.

 

ښاغلي عطایي په کابل کې د ایران سفارت نوې سوداګریزې آتشې ته د ښه راغلاست ویلو ترڅنګ، د دواړو هیوادونو ترمنځ د اوږدمهاله سوداګریزو اړیکو پراختیا او د سوداګرو شتو ستونزو ته د پای ټکي کیښودلو په برخه کې د ایران سفارت سوداګریزې آتشې همکاري له اتاق او خصوصي سکتور سره اړینه وبلله.

 

ښاغلي عطايي له مختلفو هیوادونو سره د افغانستان د سوداګرۍ پراختیا برخه کې د ایراني بندرونو رول ته د اشارې کولو ترڅنګ، ایران ته د افغاني توکو صادراتو کې اسانتیا، په ایران کې د افغان سوداګرو د سوداګریزو ستونزو حل، د چابهار بندر ظرفیت لوړولو په موخه د ښکیلو هېوادونو ژمنو عملي کولو، د ایراني سوداګرو سوداګریزو تجربو لیږد افغان سوداګرو او پانګه والو ته او د هیواد سوداګرو لپاره د ویزې اسانتیاو پر رامینځته کولو ټینګار وکړ.

 

ښاغلي حسیني د ایران په بیلابیلو ادارو کې د خپلو کاري تجربو په یادولو سره، په افغانستان کې د خپل کار له پیل او د اتاق د چارواکو په ځانګړې توګه د اتاق عامل پلاوي سرپرست رئیس ښاغلي عطايي سره د پیژندګلوۍ څخه خپله خوښي څرګنده او زیاته يې کړه چې په ایران کې د افغان سوداګرو ستونزو د له منځه وړلو په برخه کې بیلا بیل پروګرامونه تر لاس لاندی لري او هڅه کوي ترڅو دی ستونزو ته د سوداګریزو شخړو حل مرکز له لارې د حل لارې چارې ولټوي.

د افغانستان د سوداګرۍ او پانګونې اتاق عامل پلاوي سرپرست رئیس ښاغلي شفیق الله عطايي، د عامل پلاوي مالي او اداري مرستیال ښاغلي میرویس هوتک او د اتاق د صادراتو پراخوالي مسؤل د پوهنې او تغذیې نړیوالې مؤسسې ((NEI له رئیس ښاغلي ولید روشن او د هنګ له یو شمیر سوداګرو سره د لیدنې په ترڅ کې د دوی په کاروبار کې د لازمو آسانتیاوو په اړه خبرې اترې وکړی.

 

ښاغلي عطايي ګډون کوونکو ته د ښه راغلاست ویلو ترڅنګ، وویل "د افغانستان د سوداګرۍ او پانګونې اتاق تل هڅه کړی، چې د هنګ صادروونکو ته په هېواد کې دننه د هنګ محصولاتو ازمایشت زمینه برابره کړي."

 

ښاغلي عطايي هیله څرګنده کړه، چې د ازمایښتي مرکز جوړول به ټولې هغه ستونزې چې د هنګ صادروونکي یې هندوستان سره لري له منځه ویسي او همدارنګه په نږدی راتلونکی کې به اتاق د سوداګرۍ او صنعت وزارت د پوهنې او تغذيې نړیوالې مؤسسې سره یو دری اړخیر تفاهملیک لاسلیک کړي.

 

ښاغلي هوتک ډاډ ورکړ چې نوموړی تفاهملیک به د ارزونې او د سوداګرۍ او صنعت وزارت سره د شریکولو څخه وروسته د لوی اختر په څلورمه د نوموړي شرکت سره لاسلیک شي.

 

ښاغلي روشن په هېواد کې دننه د هنګ ازمایښتي مرکز جوړولو په اړه د خوښۍ څرګندولو ترڅنګ، ډاډ ورکړ چې د هنګ ازمویولو قیمت کمولو په برخه کې به هم کوټلي ګاموته پورته کړي.

 

ښاغلي روشن زیاته کړه چې د افغانستان مؤسسه به هڅه وکړي چې د هنګ صادروونکو لپاره لازمې آسانتیاوې رامنځته کړي، ترڅو هندوستان ته د هنګ صادرولو په برخه کې د ستونزو سره مخ نشي.