د اتاق د نظارت پلاوي رئیس ښاغلي عبدالحامد حمیدي، د نظارت پلاوي منشي ښاغلي عبدالمتین قلندري، د نظارت پلاوي غړیو هر یو خالد احمدي او محمد ناصر صمیم د نظارت پلاوي په دفتر چې د کابل په شهرنو کې موقعت لري ناسته تر سره کړه.

په دی ناسته کې د افغانستان د سوداګرۍ او پانګونې اتاق د بنسټیزو موضوعګانو په اړه خبرې وشوې او په اړه يې لازمې پریکړې ونیول شوې.

د افغانستان د سوداګرۍ او پانګونې اتاق عامل رئیس ښاغلي سید زمان هاشمي، د افغانستان د بهرنیو چارو وزیر، د کابینې وزیرانو، د ولسې جرګې غړو، د افغانستان لپاره د ترکیې سفیر، د ملګرو هېوادونو ديپلوماتانو، او د ترکيې هېواد د بهرنیو چارو وزیر ښاغلي چاوش اوغلو په آنلاین ډول د افغانستان او ترکیې د دیپلوماتیکو اړیکو په تړاو په جوړه شوې لمانځ غونډه کې ګډون وکړ.

غونډه د دواړو هېوادونو د ملي سرودونو او د دواړو هېوادونو د جمهور رئیسانو په پیغامونو پیل شوه.
د بهرنیو چارو وزیر خپل ترکي سیال او او ټولو ګډونوالو ته د ښه راغلاست ویلو ترڅنک، د افغانستان او ترکیې تر منځ تاریخي اړیکو، دیني، فرهنګي، او عرفاني مشترکاتو او دافغانستان د سولې پروسې څخه د انقرې د ملاتړ په اړه خبرې وکړی.

ښاغلي اوغلو د افغانستان او ترکيې ترمنځ تاریخي اړیکو ته د اشارې کولو تر څنک، ډاډ ورکړ چې ترکیه به د افغانستان د سولې پروسې څخه ملاتړ کوي. او دا چې افغانستان لمړی هېواد و چې د ترکيې هېواد مجلس ملت کبیر يې په رسمیت وپیژانده.

د افغانستان د سوداګرۍ او پانګونې اتاق په تیرو سلو کلونو کې د سوداګریزو اړیکو پراختیا، د لاجوردو لارې جوړونې، هوايې دهلیزونو جوړولو، ګډو پانګه اچوونو، د ګډو نندارتونونو، سوداګریزو کنفرانسونو، په افغانستان کې د زدکړو مرکزنو جوړولو، او د ترکيې هېواد د مالي مرستو ستاینه وکړه او زیاته یې کړه چې دا ټولې اړیکې د دواړو هېوادونو د سوداګریزو او سیاسي اړیکو په پراختیا کې اړین رول لري.

د افغانستان د سوداګرۍ او پانګونې اتاق عامل رئیس ښاغلي سید زمان هاشمي د ټرانسپورټ له وزیر ښاغلي قدرت الله ذکي سره د لیدنې په ترڅ کې د ټرانسپورټ، ټرانزيټ، او د ایکو سازمان له لوري د تیر پارکونو جوړولو په اړه خبرې اترې وکړی.

ښاغلي هاشمي د ایکو سازمان په مالي مرسته د جوړیدونکو تیر پارکونو په اړه خپل وړاندیزونه په لاندی ډول مطرح کړل.

•    دوه تیر پارکونه یو په اسلام قلعه او بل په شیر خان بندر کې جوړ کړی شي.
•    د جاپاني ساساکي شرکت د کار د کیفیت په اړه د اتاق او ټرانسپورټ وزارت له خوا څیړنه وشي.
•    تیر پارکونه باید په نړیوال معیار جوړ کړی شي. ټولې اړینې زیربناوې لکه: فوموګیشن سنټر، ټریننګ سنټر، سکنر، تله، سړې خونې او تخنیکې ورکشاپونه دی پکې جوړ کړی شي.

ښاغلي هاشمي زیاته کړه "په افغانستان کي د نړیوال ټرانسپورټي سیستم یا تیر په پراخوالي، په افغانستان کې د ټرانسپورټ او ټرانزیټ سیستم برقي کولو، او د تیر په سیستم کې د شتو ننګونو او آسانتیاوو په اړه خبرې اتری وشي او په راتلونکي اونې کې د ټرانسپورټ وزیر تر ریاست لاندې د تیر ملي غونډه جوړه کړی شي."

نوموړي د ټرانسپورټ او ټرانزیټ د لا ښه والي په موخه ټینګار وکړ چې یوه غونډه باید د سوداګرۍ، ټرانسپورټ، بهرنیو چارو او ماليې وزارتونو وزیران او اتاق د IRU له سازمان سره جوړه کړي.

ښاغلي هاشمي وړاندیز وکړ چې د تیر برقي سیستم لمړنۍ آزمایښتي محموله دی په راتلونکې میاشت کې د افغانستان، ایران او هندوستان تر منځ تر سره شي. نوموړي زیاته کړه چې د افغانستان د سوداګرۍ او پانګونې اتاق د دولت څخه غواړي چې په افغانستان کې د تیر نړیوال سیستم ملاتړ وکړي تر څو د اسلام قلعه ګمرک په څیر د زړه بوګنوونکو پیښو مخه ونیول شي.

ښاغلي قدرت الله ذکي د افغانستان د سوداګرۍ او پانګونې اتاق له خوا د ترتیب شوي پروپوزل منلو تر څنګ د اتاق څخه غوښتنه وکړه چې د ټرانسپورټ وزارت سره دی د ټرانسپورټ په برخه کې هر اړخیزې مرستې وکړي.

د یو لړ مراسمو په ترڅ کې، چې د افغانستان د سوداګرۍ او پانګونې اتاق د مدیره پلاوي غړیو هر خان جان الکوزي او احمد شکیب احمدیار، د عامل پلاوي رئیس ښاغلي سید زمان هاشمي، د اتاق د نظارت پلاوي رئیس ښاغلي عبدالمتین قلندري، د غزني ولایتي اتاق رئیس، د عامل پلاوي د تخنیک او پالیسۍ مرستیال ښاغلي شفیق الله عطايې، د څانګو آمرینو او د اتاق کارمندانو پکې ګډون درلود، د مدیره پلاوي غړیو ښاغلی میرویس هوتک د اتاق د مالي او اداري مرستیال په توګه معرفي او رسما يې په خپل کار پیل وکړ.

ښاغلي هاشمي په خپلو خبرو کې هیله څرګنده کړه، چې د ښاغلي هوتک ګمارنه به  هغه تشه چې د تیر یو کال راهیسې يې شتون درلود ډکه کړي. او دا چې نوموړی به د ریاست او د تخنیک او پالیسۍ معاونیت سره په همغږۍ خپلو دندو او هڅو ته دوام ورکړي.

ښاغلي خان جان الکوزي میرویس هوتک ته ددی بریا په تړاو د مبارکۍ ویلو تر څنک، له نوموړي څخه وغوښتل چې د ریاست او معاونیت سره په همغږۍ کې د اتاق د پراختیا او لاښه والي په موخه خپلو هڅو ته دوام ورکړي.

ښاغلي قلندري وویل چې دا ډیر اړین بست دی او د ښاغلي هوتک څخه يې وغوښتل چې د مرکزي او ولایتي اتاقونو د وړتیا لوړونې او د اصلاحاتو راوستلو په برخه کې لازم ګامونه پورته کړي.

ښاغلي هوتک د اتاق د مالي او اداري چارو د ښه پرمخ بیولو په تړاو د خپلې هر اړخیزې تیارۍ یادولو تر څنګ د عامل پلاوي د همکارۍ غوښتونکی شو.

ښاغلی هوتک د لوړو زدکړو او ۱۲ کاله تجربې لرونکی شخصیت دی. نوموړي په ازموینه کې عالي نمری ترلاسه او د اتاق د اجرائیه کمیټې د تایید څخه وروسته معرفي او په خپل کار يې پیل وکړ.

د افغانستان د سوداګرۍ او پانګونې اتاق سوداګریز مرستیال ښاغلي خیرالدین مایل احمدي او د هېواد یو شمیر سوداګرو په حیرتان بندر کې د سوداګریزو مالونو د تراکم په اړه د ماليې وزارت له سرپرست وزیر ښاغلي محمد خالد پاینده سره د لیدنې په ترڅ کې په حیرتان بندر کې د شتو ستونزو په اړه خبرې اترې وکړی.

دغه ناسته د سه شنبه په ورځ د بلخ ولایت په مقام کې د والي، مرستیال والي، زیات شمیر سوداګرو او د حیرتان بندر مسؤلینو په کې ګډون درلود؛ د افغانستان د سوداګرۍ او پانګونې اتاق سوداګریز مرستیال ښاغلي خیرالدین مایل احمدي د اوسپنې له لارې حیرتان بندر ته د وارداتي اقلامو په وخت نه رارسیدو ستونزو په اړه خبرې وکړی او د ماليې وزارت څخه يې د یادو ستونزو د له منځه وړلو غوښتنه وکړه.

ښاغلي محمد خالد پاینده ژمنه وکړه چې د سوداګریزې ټولنې په لاره کې د شتو ستونزو د له منځه وړلو او د لازمو آسانتیاوو رامنځته کولو په برخه کې به خپلې هیڅ ډول مرستې ونه سپموي.

د غونډې په پای کې، ښاغلي خیرالدین مایل احمدي د خصوصي سکتور او د افغانستان د سوداګرۍ او پانګونې اتاق په استازولۍ د ماليې وزارت له سرپرست وزیر او ورسره پلاوي څخه بلخ ولایت ته د شتو ستونزو په تړاو د سفر کولو ستاینه او مننه وکړه.