د افغانستان د سوداګرۍ او پانګونې اتاق د مدیره پلاوي لومړي مرستیال ښاغلي محمد یونس مهمند د افغانستان لپاره د چک جمهوریت د سفیر له مرستیال ښاغلي اشتیپان کونوپاسک سره د لیدنې په ترڅ کې د سوداګریز اړیکو پراختیا او ګډو همکاریو په اړه خبرې اترې وکړی.

ښاغلي مهمند په داسې حال کې چې د چک سفارت له مرستیال څخه يې د بلنې مننه وکړه، د سوداګریزو اړیکو پراختیا، د دواړو هیوادونو ترمنځ د ګډې اتاق رامنځته کولو، او د بریښنایی بسونو د فعالولو په اړه خبرې وکړې او په دی برخه کې يې د چک سفارت د همکارۍ غوښتنه وکړه.

هغه د دواړو هیوادونو د دولتي او خصوصي سکتور په ګډون د ګډ سوداګریز کنفرانس د جوړیدو یادونه وکړه ، چې سږکال به د چک په جمهوریت کې جوړېږي د چک له مرستیال سفیر څخه یې وغوښتل چې د دغه کنفرانس په تر سره کولو کې لازمه همکاري وکړه.

په کابل کې د چک جمهوریت مرستیال سفیر ښاغلي اشتیپان کونوپاسک د افغانستان سره د سوداګرۍ او اقتصادي اړیکود پراختیا، د ګډ اتاق رامنځته کولو، ګډو پانګه اچوونو او سوداګریزو کنفرانسونو د په لاره اچولو په برخه کې د افغانستان لپاره د چک جمهوریت د سفارت د هرډول همکاریو ژمنه وکړه.

د کابل د سوداګرۍ او پانګونې اتاق د مدیره پلاوي رئیس ښاغلي سید جمیل سادات تر ریاست لاندی د نوموړي اتاق د اجرائیه کمېټې اوومه ناسته ترسره شوه.

په دی ناسته کې ښاغلو مرستیالانو، او د نوموړي اتاق د ماليې او دارلانشاء رئیسانو ګډون کړی وو، او د نوموړي اتاق د پراختیا، د سوداګرو ستونزو ته د پای ټکي کیښودلو، د نوموړي اتاق د کاري پروسو د لاښه والي، د خصوصي سکتور د لاښه والي په موخه اغیزناکو برنامو د په لاره اچولو او د کابل ولایتي اتاق د مالي او اداري مدیر ګمارلو په اړه يې خبرې اترې وکړې.  

ښاغلي غلام سخي محمدي د کابل ولایتي اتاق د اجرائیه کمېټې د اکثریت رایو په ګټلو سره د نوموړي اتاق د مالي او اداري مدیر په توګه وګمارل شو.

د لومړي ځل لپاره، د یوه چینایي پانګه وال لخوا په کابل کې د چینايي محصولاتو نندارتون په لاره واچول شو. په دې نندارتون کې یو شمیر چینایي او د چیني او افغاني ګډو شرکتونو خپل محصولات نندارې ته وړاندې کړل.

د افغانستان د سوداګرۍ او پانګونې اتاق د مدیره پلاوي لومړي مرستیال ښاغلي محمد یونس مهمند ددی نندارتون د پرانستې په مراسمو کې په افغانستان کې د چینايې سوداګرو د پانګه اچوونې لپاره لیوالتیا ته د اشارې کولو ترڅنګ، زیاته کړه چې د چین دولت له خوا افغان سوداګرو ته د ویزو صادرونه یوه ستره ستونزه ده او د چین دولت څخه يې په دی برخه کې د لازمو آسانتیاوو د رامنځته کولو غوښتنه وکړه.

ددی نندارتون د په لاره اچوونکي ښاغلي یومینګ هوی د افغانستان د سوداګرۍ او پانګونې اتاق د هڅونو په پایله کې یو شمیر چینايې پانګه وال افغانستان ته د پانګه اچوونې لپاره راوستي دي.

چینايي سوداګرو او پانګوالو چې په دې نندارتون کې يې برخه اخیستې وه وویل چې که چیرې د پانګه اچونې لازمې آسانتیاوې ورته برابرې کړی شي، دوی د صنعت په ځانګړی توګه، د تعمیراتو رنګونو،  بریښنا کیبلونو او پلاسټیک په برخه کې پانګه اچونه وکړي.