د خصوصی سکټور اوچت غږ

سې‌شنبه، د تلې ۷مه، ۱۴۰۵

د افغانستان د سوداګرۍ او پانګونې خونې د ټرانسپورټ او ټرانزېټ د تخصصي کمېټې ناسته د دې کمېټې د رئیس ښاغلي الحاج ګلمیر امیني په مشرۍ ترسره شوه.

په دې ناسته کې د ټرانسپورټ او ټرانزیټ د تخصصي کمېټې مرستیال ښاغلي غلام‌فاروق نبي‌زاده او د افغانستان د ټرانسپورټي شرکتونو د اتحادیې او د بارچلونکو شرکتونو د اتحادیې یو شمېر مسؤلینو او غړو ګډون کړی و.

ګډونوالو په دې ناسته کې د ټرانسپورټ، ټرانزېټ او بارچلونې له سکټورونو سره د اړوندو ۳۸ موضوعاتو او اجنډاوو په اړه بحث او د نظرونو تبادله وکړه او په دې برخو کې د وضعیت د ښه‌والي او د شته ستونزو د حل په موخه یې مشخص وړاندیزونه وکړل.

د ټرانسپورټي شرکتونو او نقلیه وسایطو معیاري کول، د باروړونکو وسایطو د مالکانو او چلوونکو د ظرفیت لوړول او هغوی ته د مسلکي او نوې روزنې فرصت برابرول په ځانګړي ډول د درنو وسایطو چلوونکو لپاره، د هېواد په سوداګریزو بندرونو او سرحدي دروازو کې د شته ستونزو او محدودیتونو حل، د ځمکني ټرانسپورټ او لوجسټیکي سکټور پیاوړتیا او د رېل‌پټلۍ د ټرانسپورټي خدمتونو پراختیا د دې ناستې له مهمو بحث شوو موضوعاتو څخه وو.

همدارنګه د مسافر وړونکو ټرمینلونو معیاري کول، د افغانستان د نړیوالو ټرانسپورټي ستونزو حل، د بارچلونې په شبکو کې د ظرفیت لوړول، د لوجستیکي خدمتونو او مسافر وړونکي ټرانسپورټ پراختیا او له معتبرو او معیاري نړیوالو شبکو سره د دغو شبکو د نښلولو زمینه برابرول د ګډونوالو د بحث نور مهم موضوعات وو.

د ناستې په دوام کې د همغږۍ پیاوړتیا، د فعالیتونو لا ښه تنظیم او د ګډو همکاریو د پراختیا په موخه د افغانستان د ټرانسپورټي شرکتونو سراسري اتحادیې او د ټرانزیټ او بارچلونې شرکتونو اتحادیې (افکو) ترمنځ د همکارۍ هوکړه‌لیک لاسلیک شو.

د افغانستان د سوداګرۍ او پانګونې خونې د ټرانسپورټ او ټرانزیټ د تخصصي کمېټې مسؤلینو هیله څرګنده کړه، چې د دغه هوکړه‌لیک لاسلیک به د اړوندو اتحادیو ترمنځ د لا زیاتې همغږۍ او همکارۍ، د شته ستونزو د اغېزناکې حل‌لارې موندنې او د هېواد د ټرانسپورټ، ټرانزیټ او لوجستیک په برخو کې د معیاري او منظم خدمتونو د وړاندې کولو زمینه برابره کړي.