د افغانستان د سوداګرۍ او پانګونې خونې عمومي رئیس، ښاغلي الحاج سید کریم هاشمي د اقتصادي همکاریو د پراختیا، د سوداګریزو نظرونو او تجربو د تبادلې او د دواړو هېوادونو د سوداګرو ترمنځ د ګډو پانګونو د جلب په موخه، د روسیې د سوداګرۍ او صنایعو خونې د سوداګریزې کمېټې شورا رئیس، ښاغلي دیمیتري انتونوف او د یادې خونې د پانګونې او صنعت د برخې له لوړپوړي استازي، ښاغلي الکساندر سره انلاین غونډه وکړه.
ښاغلي هاشمي د افغانستان او د روسیې فدراسیون ترمنځ د سوداګریزو اړیکو د اوسني وضعیت، د پانګونې فرصتونو، د صادراتو او وارداتو د بهیر د اسانتیا، د خصوصي سکتور ترمنځ د ګډو همکاریو د رامنځته کولو او د دواړو هېوادونو د اقتصادي اړیکو په پراختیا کې د سوداګرۍ خونو د رول په اړه خبرې وکړې.
نوموړي د روسیې د سوداګرۍ او صنایعو خونې له مسوولانو څخه د تېلو د چاڼخونو جوړولو لپاره د تخصصي سترو نفتي شرکتونو معرفي کولو، افغان سوداګرو ته د روسیې د لویو نفتي فابریکو ورپېژلو او په مسکو کې د افغان او روسي سوداګرو ترمنځ د وچې مېوې د یوه ستر ګډ سهامي شرکت جوړولو برخه کې د هر اړخیزې همکارۍ غوښتنه وکړه.
هغه د سوداګریزو راکړو ورکړو د زیاتوالي او د دواړو هېوادونو د خصوصي سکتور ترمنځ د نندارتونونو او سوداګریزو ناستو د تنظیم برخه کې د خونې د بشپړې همکارۍ ډاډ ورکړ.
ښاغلیو دیمیتري او الکساندر د افغانستان سره د اقتصادي اړیکو د پراختیا هرکلی وکړ او د بېلابېلو سکتورونو، په ځانګړې توګه کرنه، د کیمیاوي سرو تولید او د نفتو سکتور کې د پانګونې لپاره خپل چمتووالی څرګند کړ. هغوی همدارنګه پر دوه اړخیزو همکاریو، د سوداګریزو پلاویو پر تبادله، د ګډو نندارتونونو پر جوړولو او د دواړو هېوادونو د سوداګرو ترمنځ د مستقیمو اړیکو پر رامنځته کولو ټینګار وکړ.
په دې ناسته کې همدارنګه د افغانستان د سوداګرۍ خونې د پالیسۍ مرستیال، میراجان سلیمانخېل، د خونې عامل پلاوي رئیس، محمد ولي امیني او د روسیې سفارت اقتصادي مسوول نیکولای هم ګډون درلود.
سهشنبه، مرغومې ۳۰مه، ۱۴۰۴
