د امام ابو حنیفه (رح) څلورم ملي او نړيوال نندارتون د شاندارو مراسمو په ترڅ کې، د اسلامي امارت د محترمو وزیرانو، لوړپوړو حکومتي چارواکو، د افغانستان د سوداګرۍ او پانګونې اتاق عمومي رئیس، مرستیالانو او د مشرتابه پلاوي غړو، د ګاونډیو او ملګرو هېوادونو د سفیرانو او دیپلوماتانو، د نړیوالو ادارو د استازو او د خصوصي سکتور د غړو په حضور کې، د افغانستان په نړيوال نندارتون مرکز – کابل ښار کې پرانستل شو.
ښاغلي الحاج سیدکریم هاشمي، د افغانستان د سوداګرۍ او پانګونې اتاق عمومي رئیس، د پرانېستې مراسمو ټولو مېلمنو او ګډونوالو ته ښه راغلاست ووایه او زیاته یې کړه: “دا د فخر ځای دی چې په دا شان یو لوی او پرتمینه نندارتون د هېواد په داخل کې ترسره کېږي.” نوموړي د اسلامي امارت له مرستو او اسانتیاوو څخه چې د هېواد سوداګرو او پانګوالو ته یې ترسره کړي ستاینه او مننه وکړه او وویل چې د ټولنې او هېواد اقتصادي وده د عامه او خصوصي سکتور ګډې همکارۍ پرته ناممکنه ده. هغه له حکومته وغوښتل چې لا زیات تمرکز وکړي څو خصوصي سکتور د کورنیو تولیداتو د ودې، سیالۍ وړ صادراتو، د کار فرصتونو رامنځته کولو او د فقر د کمولو په برخه کې خپل اغېزمن رول ولوبولی شي.
ښاغلي الحاج نورالدین عزیزي، د صنعت او سوداګرۍ وزیر، د دې نندارتون د جوړېدو له امله د خوښۍ تر څنګ، د پاکستان د ناسم تجارتي سیاستونو له امله د افغان تاجرانـو د ۱۲ زره کانتینرونو په درېدو اندېښنه څرګنده کړه. نوموړي په خپلو خبرو کې د سوداګرۍ د پراختیا او د نورو بدیلو ترانزیټي لارو د کارولو په اړه ښه زېری هم ورکړ.
ښاغلي عطاالله عمري، د کرنې، اوبولګولو او مالدارۍ وزیر، د وزارت ځانګړې پاملرنې ته په اشارې وویل چې کرنې ته وده ورکړل شي، عصري شنې خونې او د اوبو رسولو سیستمونه زیات شي، او له خصوصي سکتور څخه یې غوښتنه وکړه چې پر کورنیو تولیداتو او د صادراتو پر زیاتوالي لا ډېر تمرکز وکړي.
ښاغلي اکه دوران وهابوف، د ازبکستان د سوداګرۍ او صنایعو خونې رئیس، د دې ډول نندارتونونو رول د افغانستان او ازبکستان ترمنځ د تجارتي اړیکو د پیاوړتیا، اقتصادي ودې او فرهنګي همکارۍ لپاره خورا مهم وباله. هغه د دواړو هېوادونو سوداګر وهڅول چې په ترانزیت، لوژستیک، زراعت، فارمسي او نورو برخو کې ګډې پانګونې وکړي.
ښاغلي عبداللطیف نظري، د اقتصاد وزارت معین، د دې نندارتون جوړېدل د کورنیو تولیداتو د معرفي کولو، د کار د فرصتونو د رامنځته کولو، د خوړو د تولیداتو د پیاوړتیا او د کورنیو عوایدو د زیاتوالي لپاره مهم فرصت وباله.
ښاغلي علي رضا بیکدلي، د ایران اسلامي جمهوریت سفیر په افغانستان کې، په خپلو خبرو کې د افغانستان د اقتصاد د ودې، د ریل پټلۍ د پراختیا، لوژستیک او ترانزیټ په برخه کې د ایران د ښه رول یادونه وکړه او پر دوامداره همکاریو یې ټینګار وکړ.
ښاغلي الحاج محمد رفیع عظیمي، د صنایع او کانونو خونې مرستیال، د افغانستان د سوداګرۍ او پانګونې خونې له لوري د دې نندارتون له جوړېدو ملاتړ څرګند کړ او د دواړو اتاقونو د ګډو همکاریو ډاډ یې ورکړ.
د نندارتون د پرانستې له مراسمو وروسته، د کابینې وزیرانو، عمومي رئیس، د خونې د مشرتابه غړو، سفیرانو او د نړیوالو ادارو استازو د ګډون کوونکو غرفو او هغه تولیداتو څخه لیدنه وکړه چې په نندارتون کې یې نندارې ته وړاندې شوي وو.
دوشنبه، د لړم ٢٦مه، ۱۴۰۴
