ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، د «خصوصي سکتور او د تخنیکي او مسلکي زده کړو ادارې تر منځ د ستراتیژیکې همغږۍ او همکارۍ د پیاوړتیا» په اړه دوهم کنفرانس کې ګډون او وینا وکړه. دغه کنفرانس د حکومتي مقاماتو، د خصوصي سکتور غړو، د تخنیکي او مسلکي زده کړو ادارو مسوولینو او استادانو په ګډون د کابل په انټرکانټیننټل هوټل کې ترسره شو.

ښاغلي مهمند، د دې مهم کنفرانس د جوړیدو له امله خپله خوښي څرګنده کړه او زیاته یې کړه چې افغانستان له څلور لسیزو جګړو وروسته درې کاله کیږي چې نوی فصل پیل کړی او اوس اړتیا ده چې د رامنځته شوو فرصتونو څخه په ګټې اخیستو د هېواد په ابادۍ کې هڅې وکړو.

نوموړي، د افغانستان د تخنیکي او مسلکي زده کړو ادارو سره د نړیوالو ادارو د مرستو ستاینه وکړه او د افغانستان د سوداګرۍ او پانګونې اتاق د یوه ملي بنسټ په توګه د دې ادارو سره د همکارۍ ډاډ ورکړ. هغه، د تخنیکي او مسلکي زده کړو ادارو رول د کرنې او صنعت په ودې او پرمختګ کې ډېر مهم وباله.

ښاغلي مهمند، زیاته کړه چې په وروستیو کلونو کې افغانستان د ترانزیټ په برخه کې ښه پرمختګ کړی او اړتیا ده چې مسلکي روزل شوي موټرچلوونکي ولرو ترڅو د دې برخې اړتیاوې پوره کړي. نوموړي د افغانستان د سوداګرۍ او پانګونې اتاق او د تخنیکي او مسلکي زده کړو ادارو تر منځ د موټرچلوونکو د مسلکي او معیاري روزنې لپاره د یوې ګډې اکاډمۍ جوړول یې ضروري وګاڼه.

همدارنګه، نوموړي په هېواد کې د تخنیکي ښوونځیو او مسلکي ادارو جوړیدل د کرنې، تولیدي فابریکو، روغتونونو کې د تخنیکي وسایلو کارونې او نورو برخو لپاره د مسلکي کادرونو روزنې په موخه مهم وبلل او د افغانستان د سوداګرۍ او پانګونې اتاق د هر ډول همکارۍ ژمنه وکړه.

 

 

 

 

 

 

 

د افغانستان د سوداګرۍ او پانګونې اتاق مشرتابه پلاوي، ښاغلي محمد یونس مهمند، د اتاق لومړی مرستیال، او عصمت الله وردګ، د پانګونې مرستیال، د خان سټیل د سیخ ګول فابریکې مشر ښاغلي خان محمد وردګ، د حکومتي چارواکو، سوداګرو، او د رسنیو ګڼ شمېر استازو هم حضور درلود، د وارداتی ګول سیخونو او د خان سټیل سیخ ګول د کیفیت د څېړنو د پایلو خپرولو کنفرانس کې ګډون وکړ. دا کنفرانس د آریانا د لوړو زده کړو موسسې استادانو لخوا د خان سټیل سیخ ګول او وارداتي سیخ ګول د کیفیت پرتله کولو لپاره ترسره شوی و.

ښاغلي مهمند، د دولتي پوهنتونونو او لوړو زده کړو موسسو استادانو او ښوونکو له خدمتونو څخه د ستاینې څرګندونه وکړه او د آریانا لوړو زده کړو موسسې له مسؤولینو څخه د دوی د څېړنو لپاره چې د تولیدي فابریکو د پانګه‌ والو هڅولو په ځانګړي ډول د خان سټیل د سیخ ګول لپاره ترسره شوې وې، مننه وکړه.هغه، د تولیدي فابریکو رول د خلکو د اړتیاوو پوره کولو، اقتصادي ودې، د ناخالص ملي تولید زیاتولو، صادراتو زیاتولو، د بهرني تجارت تقویه کولو، او د صنعتي او تولیدي زیربناوو پرمختګ لپاره خورا مهم وګاڼه.

د اتاق لومړي مرستیال د خان سټیل د تولیدي فابریکې له مسؤلینو څخه د نړیوالو معیارونو سره سم د دوی د تولید لپاره مننه وکړه او د تولیداتو د لا ښه کولو ټینګار یې وکړ. نوموړي له پوهنتونونو او لوړو زده کړو موسسو څخه غوښتنه وکړه چې د اقتصادي ودې څرنګوالي، د سوداګرو هڅولو، او د ملت او حکومت ترمنځ د اړیکو ټینګولو لپاره لا زیاتې څېړنې ترسره کړي.

ښاغلي مهمند، د هغو ټولو سوداګرو څخه چې په مختلفو سکتورونو کې یې پانګونه کړې، مننه وکړه او د هېواد له ټولو سوداګرو او پانګه‌والو څخه یې غوښتنه وکړه چې په ګډه په روغتیا، کانونو، زراعت او مالدارۍ برخو کې پانګونه وکړي ترڅو د ده په وینا "د یادو سکتورونو ستونزې حل شي."هغه، د حکومت له سکتوري ادارو سره د همکارۍ په چوکاټ کې د سوداګرو او پانګه‌والو لپاره د آسانتیاوو په برابرولو کې د اتاق د هر اړخیزې همکارۍ ډاډ ورکړ.

 

 

 

 

د افغانستان د سوداګرۍ نړیوال سازمان (WTO) غړیتوب په اړه د خصوصي سکتور د سوداګرو او پانګوالو د پوهاوي برنامه، د صنعت او سوداګرۍ وزارت د سوداګرۍ نړیوال سازمان د چارو ریاست له لوري او د افغانستان د سوداګرۍ او پانګونې اتاق په همکارۍ، د اتاق په کنفرانسونو تالار کې جوړه شوه. په دې غونډه کې د افغانستان د سوداګرۍ او پانګونې اتاق د مالي او اداري مرستیالۍ سرپرست ښاغلي میرزمان پوپل، د صنعت او سوداګرۍ وزارت د سوداګرۍ نړیوال سازمان د چارو رئیس ښاغلي عبدالوکیل مسلم، د بېلابېلو سوداګریزو اتحادیو مشران او استازي، د اتاق د ځینو څانګو مسوولین، سوداګرو او پانګوالو ګډون درلود.

ښاغلي میرزمان پوپل، د غونډې ګډونوالو ته د ښه راغلاست ویلو ترڅنګ، د افغانستان د سوداګرۍ او پانګونې اتاق او د صنعت او سوداګرۍ وزارت له لوري د افغانستان د سوداګرۍ نړیوال سازمان غړیتوب په برخه کې د هڅو په اړه خبرې وکړې. نوموړي د دې پوهاوي برنامه اهمیت، د دې سازمان د غړیتوب ګټې او اړتیاوې روښانه کړې او له ګډونوالو څخه یې وغوښتل چې د خپلو نظریاتو او رغنده وړاندیزونو په وړاندې کولو سره په دې پروسه کې ونډه واخلي.

ښاغلي عبدالوکیل مسلم، د دې غونډې په جوړولو کې د افغانستان د سوداګرۍ او پانګونې اتاق له همکارۍ مننه وکړه. نوموړي د دې برنامې موخه د خصوصي سکتور د غړو پوهاوی وباله او د سوداګرۍ نړیوال سازمان غړیتوب ګټې یې په ګوته کړې. نوموړي د دې ګټو له جملې څخه د سوداګرۍ د ستونزو مخنیوی، د صنعت وده، نړیوالو بازارونو ته لاسرسی، پانګونې جذب، د سوداګریزو شخړو حل، د صادراتو زیاتوالی، د ښځینه سوداګرو لپاره د صنعتي شبکو پراختیا او نور موارد یاد کړل.

همدارنګه، د سوداګرۍ نړیوال سازمان کارپوه ښاغلي عبدالوهاب نظري له خوا ترتیب شوې معلوماتي پریزنټیشن ګډونوالو ته وړاندې شو. په دې غونډه کې ګډونوالو د یادو موضوعاتو په اړه پوښتنې وکړې او خپل نظریات او وړاندیزونه یې هم وړاندې کړل.

 

 

 

 

 

ښاغلی محمد یونس مهمند، د افغانستان د سوداګرۍ او پانګونې اتاق لومړی مرستیال او ښاغلي عصمت الله وردګ، د اتاق د پانګونې مرستیال، د ځمکني مسافرو وړونکو اتحادیو او شرکتونو له مشرانو سره په مرکزي دفتر کې وکتل او د هغوی ستونزې یې وڅیړلې.

د ځمکني مسافرو وړونکو شرکتونو مسؤلینو په لویو لارو کې د لویو ترافیکي ستونزو، د ترافیکو د نشتوالي، او د ترافیکي پېښو په ځانګړي ډول د وروستیو دوه خونړیو پېښو په اړه خبرې وکړې. دغه پېښې څو ورځې وړاندې د کابل - کندهار لویې لارې په غزني ولایت کې د مسافر وړونکو بسونو او بار وړونکو لاريو ترمنځ شوې وې چې په پایله کې یې زموږ لسګونه هېوادوال شهیدان او ټپیان شول. په دې پېښو کې د سویل او لویدیځ زونونو د مسافر وړونکو شرکتونو مسؤلین د حکومت له خوا نیول شوي وو. هغوی د دې ستونزو د حل لپاره د افغانستان د سوداګرۍ او پانګونې اتاق د همکارۍ غوښتنه وکړه.

ښاغلی محمد یونس مهمند، د ځمکني مسافرو وړونکو شرکتونو مسؤلینو ته د ښه راغلاست ویلو ترڅنګ، د کابل-کندهار په لویه لار کې د وروستیو پېښو د شهیدانو لپاره د دعا او ټپیانو ته د عاجلې شفاء هیله وکړه. نوموړي د معیاري ټرانسپورټ، معیاري سړکونو، د لویو لارو د ترافیک پولیسو، او د مسلکي او تخنیکي چلوونکو استخدام د ترافیکي پېښو په کمولو کې مهم وبلل. هغه زیاته کړه چې د افغانستان د سوداګرۍ او پانګونې اتاق به د یادو پېښو په تړاو د هېواد د ترافیکي قانون او مقرراتو سره سم مرسته وکړي.

ښاغلي مهمند، د اړوندو حکومتي ارګانونو (د کورنیو چارو، ټرانسپورټ او عامې روغتیا وزارتونو، او د ترافیک ریاست) او د ځمکني مسافرو وړونکو او بار وړونکو شرکتونو ترمنځ همغږي، او د سوداګرۍ او پانګونې اتاق تخصصي کمیټې رول د پېښو په کمولو کې ډېر مهم وباله. هغه د چلوونکو لپاره د ټرافیکي او ټرانسپورټي قوانینو د زده کړو انسټیټوټ د جوړولو غوښتنه وکړه چې د حکومت له خوا د خصوصي سکتور په همکارۍ رامنځته شي.

د اتاق لومړي مرستيال، د سوداګرۍ او پانګونې اتاق او د ځمکني مسافرو وړونکو او بار وړونکو شرکتونو ترمنځ نږدې همکاري مهمه وبلله. نوموړي د دې ستونزو د حل لپاره د یوې تخصصي کمیټې د جوړېدو غوښتنه وکړه، چې د ځمکني مسافرو وړونکو او بار وړونکو شرکتونو له استازو جوړه او د اتاق تر مشرتابه لاندې فعالیت وکړي. دغه کمیټه به په لویو لارو کې شته ستونزې په هر اړخیز ډول وڅیړي او د حکومتي ارګانونو په همکارۍ به تلپاتې حل لارې ومومي، تر څو د هېواد په لویو لارو کې د پېښو شمېر راکم شي.

ښاغلي عصمت الله وردګ د شرکتونو له خوا د ترافیکي قوانینو پلي کول، د مسلکي چلوونکو استخدام، او د لویو لارو په اوږدو کې د درنو ترافیکي شرایطو په نظر کې نیولو سره د چلوونکو له خوا احتیاط کول د پېښو په کمولو کې مهم وبلل. هغه غوښتنه وکړه چې د پېښو د مخنیوي او کمښت لپاره باید د حکومتي ارګانونو له خوا د شرکتونو مسؤلینو او تخنیکي برخو لپاره لنډ مهاله مسلکي او تخنیکي سیمینارونه جوړ شي. نوموړي ډاډ ورکړ چې د افغانستان د سوداګرۍ او پانګونې اتاق به په دې برخه کې د دغو سیمینارونو جوړولو او شته ستونزو د حل په برخه کې هر اړخیزه همکاري وکړي.

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، د ترکیې د پوهنې بنسټ له عمومي رئیس احمد توکو او مل پلاوي سره د اتاق په مرکزي دفتر کې وکتل. په دې کتنه کې د یاد بنسټ د فعالیتونو د پراختیا او د اتاق د همکاریو په اړه خبرې اترې وشوې.

احمد توکو د پوهنې بنسټ د فعالیتونو او لاسته راوړنو په اړه مفصل معلومات وړاندې کړل او زیاته یې کړه چې دغه بنسټ د افغانستان په ګډون په څو آسیایي هېوادونو کې د تعلیم او تربیې د کچې د لوړولو په برخه کې فعالیت کوي. د نوموړي په وینا، په تېرو کلونو کې دغه بنسټ لسګونه افغان محصلین د وړیا بورسونو له لارې ترکیې ته د زده کړو لپاره لېږلي دي. هغه وویل چې په نږدې راتلونکي کې به یاد بنسټ په خوست او تخار ولایتونو کې ښوونځي پرانیزي او د افغانستان د سوداګرۍ او پانګونې اتاق مشرتابه یې وغوښتل چې د دې ښوونځیو د پرانیستې په برخه کې ورسره همکاري وکړي.

ښاغلي مهمند، ښاغلي احمد توکو او د ورسره مل پلاوي ته د ښه راغلاست ویلو ترڅنګ، په یوه ټولنه کې د علمي کدرونو شتون د اقتصادي او ټولنیز پرمختګ لپاره اړین وګاڼه. هغه د لارښوونې، د اخلاقو او ارزښتونو د ترویج، د راتلونکو نسلونو د زده کړې او روزنې، اقتصادي او ټکنالوژیک پرمختګ، نړیوالې همغږۍ، د اقتصادي فکر د ودې، او د کاري فرصتونو د رامنځته کولو په برخو کې د علم ارزښت بیان کړ.

ښاغلي مهمند، د ترکیې د سفارت له لوري د افغانستان له خصوصي سکتور سره د همکارۍ مننه وکړه او په خوست او تخار کې د افغان-ترک ښوونځیو منظورولو هرکلی وکړ، او په بامیانو کې د سوداګرو غوښتنه چه دبنسټ له لوري د یوه ښوونځي جوړولوده ټینګار وکړ. نوموړي ډاډ ورکړ چې د افغانستان د سوداګرۍ او پانګونې اتاق به د پوهنې وزارت د تعلیمي برنامو په رڼا کې د هېواد د بچیانو د علمي کچې د لوړولو په برخه کې له یاد بنسټ سره هر اړخیزه همکاري وکړي.