د افغانستان د سوداګرۍ او پانګونې اتاق د نفتو ټانکدارانو تخصصي کمیټې، د اتاق د مشرتابه پلاوي؛ ښاغلي محمد یونس مهمند د اتاق لومړی مرستیال، ښاغلي خان جان الکوزي د مدیره پلاوي غړی او د افغان-پاک ګډ اتاق رئیس، ښاغلي میرزمان پوپل د عامل پلاوي د مالي او اداري مرستیال سرپرست، او د یادې کمیټې د ګڼ شمېر غړو په شتون کې، د اتاق د کنفرانسونو په تالار کې غونډه وکړه او ښاغلی مسعود راحت یې د یادې کمیټې د نوي رئیس په توګه معرفي کړ.

ښاغلي مهمند، د هېواد د نفتو ټانکدارانو له لوري د ستونزمنو شرایطو سره سره د خدماتو له وړاندې کولو مننه وکړه، په ځانګړي ډول یې د پخواني رئیس ښاغلي ذبیح الله مهمند د خدمتونو قدرداني وکړه. نوموړي د باکیفیته تيلو د وارداتو لپاره د اړوندو حکومتي ادارو له خوا ټاکل شوي معیارونو په تعقیب ټینګار وکړ.

د اتاق لومړي مرستیال، د ټول هېواد امنیت، د کوکنارو د کرنې مخنیوی، او د ادارو د فساد پر ضد مبارزه، د باکیفیته نفتو د ترانسپورت، وارداتو او توزیع لپاره مهم عوامل وبلل، او د حکومتي مشرتابه له خوا د ټیټ کیفیت لرونکو موادو د وارداتو د مخنیوي پر حکم یې یادونه وکړه. نوموړي له ټولو ټانکدارانو، په ځانګړي ډول هغو چې د لویو لارو پر سر موقعیت لري، وغوښتل چې د معیاري ترڅنګ ، د موټر چلوونکو او مسافرو لپاره لازمې اسانتیاوې هم برابرې کړي.

ښاغلي مهمند، د سیمې او نړۍ له هېوادونو سره د تجارت پر زیاتوالي خبرې وکړې، او ژمنه یې وکړه چې د لمریزې برېښنا پروژو پلي کېدو او د قوش تپې لوی کانال څخه د استفادې له لارې، به ډېر ژر افغانستان د برېښنا تولید او کرنیزو محصولاتو برخه کې ځان‌بسیا شي.

ښاغلي الکوزي، د اتاق د تخصصي کمیټو د مسؤلیتونو او د خصوصي سکتور د ستونزو د حل په برخه کې د هغوی د رول په اړه خبرې وکړې، او له نفتو ټانکدارانو او واردوونکو څخه یې وغوښتل چې د ټاکل شوو معیارونو سره سم، خلکو او مصرفوونکو ته خپل خدمات وړاندې کړي.

ښاغلي پوپل، د تخصصي کمیټو د ټاکنې پروسې تشریح کړه، او د پخواني رئیس له خدمتونو مننه وکړه. نوموړي د کمیټو په مشرتابه کې بدلونونه یو عادي او اصولي کار وباله، او هیله‌مندي یې وښوده، چې له نوي رئیس سره به خدمات لا ښه او معیاري شي.

همدارنګه، د نفتو د ټانکدارانو یو شمېر سوداګرو او استازو هم د اړوندو موضوعاتو په اړه خبرې وکړې او ژمنه یې وکړه، چې باکیفیته نفتې مواد به عرضه کړي او مصرفوونکو ته به غوره خدمات وړاندې کړي.

 

 

 

 

 

ښاغلي محمد انور عارفي، د افغانستان د سوداګرۍ او پانګونې اتاق د پالیسۍ او تخنیکي مرستیال، له ښاغلي اندري روی مویچ، چې د افغانستان ـ روسیې د ګډ سوداګریز کمیټې رئیس دی، سره آنلاین لیدنه وکړه او د دواړو هېوادونو ترمنځ د سوداګریزو اړیکو د پیاوړتیا په اړه یې بحث او نظرونه تبادله کړل.

ښاغلي عارفي د دواړو هېوادونو سوداګریزې او اقتصادي اړیکې په ښه کېدو وبللې او لاندې موضوعات یې د سوداګرۍ پراختیا لپاره مهم وګڼل: افغان سوداګرو ته د ویزې د صدور آسانتیا، د بانکي ستونزو حل، د افغان صادراتي توکو لپاره د ترجیحی تعرفو تطبیق، د ګډو نندارتونونو او سوداګریزو غونډو جوړول، د خصوصي سکتور ترمنځ د تجارتي تفاهم‌لیکونو لاسلیک، د روسیې د صادراتو د بسته بندۍ معیارونو افغان سوداګرو ته معرفي کول، او د دواړو هېوادونو د سوداګرۍ اتاقونو ترمنځ آنلاین ناستې.

هغه وویل افغانستان د سرو زرو، سپینو زرو، نفرایت، مسو، لاجورد، کرومایټ او ډبرو سکرو غني کانونه لري، او له ښاغلي اندري څخه یې وغوښتل چې روسي سوداګر دې د افغانستان د کانونو او انرژۍ د تولید په سکتورونو کې پانګونې ته وهڅوي.

ښاغلي اندري د روسي سوداګرو د علاقې یادونه وکړه چې غواړي د سرو زرو، زمردو، نفتو کانونه واکاږي او په افغانستان کې د شیشې د تولید فابریکه جوړه کړي.

نوموړي ډاډ ورکړ چې د سوداګریزو ناستو، د دواړو هېوادونو د سوداګرۍ اتاقونو ترمنځ د آنلاین ناستې او د روسي پانګوالو د هڅونې په برخه کې به همکاري وکړي.

 

 

 

 

 

 

د افغانستان د سوداګرۍ او پانګونې اتاق مشرتابه پلاوي، ښاغليو: محمد یونس مهمند د اتاق لومړی مرستیال، ښاغلي خان محمد سرفراز باز د مدیره پلاوي د دارالانشاء رئیس، ښاغلي خان جان الکوزی د مدیره پلاوي غړی او د افغان-پاک ګډ اتاق رئیس،ښاغلي جان آقا صادقی داتاق دنفتی توکو دکميتی رئیس، ښاغلي میرزمان پوپل د عامل پلاوي د مالي او اداري مرستیال سرپرست، د یو شمېر ولایتي اتاقونو او سکتوري اتحادیو له رئیسانو او غړو سره یو ځای، د ریاست‌الوزرا د اقتصادي معاونیت په مرمرین ماڼۍ کې، له ښاغلي مولوي عبدالله عزام، د ریاست‌الوزرا اقتصادی مرستیال د دفتر له رئیس، ښاغلي حاجي ابراهیم د اقتصادي معاونیت له مشاور، او ښاغلي مولوي عبدالمتین سعید د مالیې وزارت د عوایدو او ګمرکاتو له مرستیال سره ولیدل او د خصوصي سکتور روانې ستونزې یې له دوی سره شریکې کړې.

سوداګرو او صنعتکارانو، خپلې ستونزې د تولیدي فابریکو لپاره د برېښنا سخت کمښت، د صنعتي پارکونو کې د ځمکو نه‌شتوالی، د ترانسپورتي کرایو لوړوالی، د بارولو پېچلې پروسه، د ګمرک او فومیګیشن وخت نیونکې کړنلارې، د کورنیو تولیداتو لپاره د بهرنیو بازارونو نه‌شتوالی، د جوازونو د تمدید او سوداګریزو ویزو د اخیستو ځنډ، د معیاري سړکونو کمښت، او د محصولاتو د کیفیت د ساتنې لپاره د سړو خونو او صنعتي زیربناوو نشتون یاد کړل، او د ریاست‌الوزرا د مرستیال د دفتر رئیس او د مالیې وزارت د عوایدو او ګمرکاتو له مرستیال څخه یې وغوښتل، چې دا ستونزې د حکومت له مشرانو سره شریکې کړي.

ښاغلیو عزام او سعید، د خصوصي سکتور ستونزې واورېدلې او ژمنه یې وکړه، چې یادې ستونزې به د اړوندو حکومتي ادارو سره شریکې کړي. دوی له ټولو ګډون‌والو سوداګرو څخه وغوښتل، چې خپلې ستونزې، وړاندیزونه او حل لارې په لیکلي ډول د ریاست‌الوزرا د اقتصادي معاونیت دفتر او د مالیې وزارت د عوایدو او ګمرکاتو معینیت ته وسپاري.

 

 

 

 

 

 

د افغانستان د سوداګرۍ او پانګونې اتاق، د خصوصي سکتور د نظریاتو او وړاندیزونو د شریکولو په موخه د اسلامي امارت له لوړپوړو چارواکو سره او د دوی د ستونزو د حل په موخه، د مرکزي اتاق و ولایتی اتاقونو د رئیسانو او د مشرتابه پلاوي سراسري غونډه د اتاق د لومړي مرستیال ښاغلي محمد یونس مهمند، د اتاق د تجارتي مرستیال ښاغلي خیرالدین مایل احمدي، د مدیره پلاوي د دارالانشاء رئیس ښاغلي خان محمد سرفراز باز، د مدیره پلاوي غړي او د افغان-پاک ګډ اتاق رئیس ښاغلي خانجان الکوزي، او د مدیره پلاوي نورو غړو ښاغلو محمد گردیزی، سید پرویز سادات هوفیانی، ذکریا بریالی او ضیاالدین اچکزي، د اتاق د مالي او اداري مرستیال سرپرست ښاغلي میرزمان پوپل، او د ولایتونو د اتاقونو د رئیسانو په ګډون د کابل په انټرکانټیننټل هوټل کې ترسره کړه.

ښاغلي سرفراز باز، ګډونوالو ته د ښه راغلاست ویلو ترڅنګ، د دې غونډې اساسي موخه د مرکز او ولایتي اتاقونو د تیرو شپږو کلونو لاسته راوړنو، ستونزو، نظریاتو او وړاندیزونو راټولول یاد کړل، چې ټاکل شوې دا مطالب به په بله جلا ناسته کې له لوړپوړو حکومتي چارواکو سره شریک شي، او د خصوصي سکتور د شته ستونزو د حل لپاره به اقدامات وشي. هغه، له ټولو رئیسانو او د ولایتي د اتاقونو د مشرتابه پلاوي غړو غوښتنه وکړه چې د خپلو ولایتونو د خصوصي سکتور نظریات، طرحې او ستونزې دې په دې ناسته کې شریکې کړي.

ښاغلي مهمند، د خصوصي سکتور د ټولو غړو څخه له حکومت او ولس سره د همکارۍ له امله مننه وکړه. نوموړي د اتاق د تېرو ۹۴ کلونو فعالیتونو په اړه معلومات ورکړل، او د سوداګرو یوه لویه ستونزه چې د کلونو راهیسې د مالیاتو ارزونه ده، یاده کړه. هغه له ټولو ګډونوالو وغوښتل چې د مالیاتو د تادیې په اړه خپلې واحدې طرحې د ګمرکونو لپاره له حکومتي هیئت سره شریکې کړي.

ښاغلي مهمند، وویل چې د افغانستان د سوداګرۍ او پانګونې اتاق په بېلابېلو سکتورونو کې د پانګونې د جلب، او د افغانانو لپاره د کاري فرصتونو د رامنځته کولو په برخه کې فعاله ونډه اخیستې ده. هغه زیاته کړه، اتاق د افغان سوداګرو وارداتي توکو د کراچۍ له بندره د خوشې کېدو او د تورخم لارې د بیا پرانیستلو په برخه کې له حکومت سره ګډ ګامونه اخیستي دي.

د اتاق لومړي مرستیال وویل چې له سیمې، په ځانګړي ډول له ګاونډیو هېوادونو سره د افغانستان سوداګریز روابط د ښه والي پر لور روان دي، او ژر به د چابهار بندر له لارې هندوستان ته د بارونو لېږد بیا پیل شي. نوموړي ډاډ ورکړ چې د ولایتونو د خصوصي سکتور ستونزې به له اړوندو حکومتي چارواکو سره په بشپړه توګه شریکې کړي.

ښاغلي مهمند، د واخان دهلیز یې د یوه ستر اقتصادي ترانزیټي مسیر په توګه یاد کړ، چې د چین هېواد سره د سوداګریزو تبادلو د نښلولو ټکی بلل کېږي، او ټینګار یې وکړ چې دواړو هېوادونو باید په عملي اقداماتو تمرکز وکړي.

ښاغلي مایل، د خصوصي سکتور د تیرو کلونو لاسته راوړنې او خدمتونه ارزښتناک وبلل او زیاته یې کړه چې خصوصي سکتور تل د حکومت او خلکو ترڅنګ ولاړ دی. نوموړي له ټولو هېوادوالو څخه چې له ګاونډیو هېوادونو څخه شړل شوي، د هغوی لپاره د مالي مرستو او د کار زمینه برابرولو له امله له سوداګرو مننه وکړه، او له رئیسانو یې وغوښتل چې خپلې ستونزې په روښانه ډول شریکې کړي.

ښاغلي الکوزي، د افغانستان د سوداګرۍ او پانګونې اتاق له نوي حکومت سره د درې کلونو راهیسې مالي مرستې او همکاریو ته اشاره وکړه، او د ځینو ولایتونو د اتاقونو رول یې په دغو مرستو کې مهم وباله. هغه د صادراتو وده د مالیاتي اسانتیاوو او د ترانسپورتي نوبت د تنظیم له پیاوړتیا سره تړلې وبلله، او ژمنه یې وکړه چې اتاق به د اړوندو حکومتي ادارو سره د خصوصي سکتور د ستونزو د حل لپاره بشپړه همکاري کوي.

د ولایتي اتاقونو رئیسانو – هرات، کندهار، بلخ، کندز، خوست، فاریاب، فراه، اندخوی، پکتیکا، کاپیسا، لوګر، زابل، میدان وردګ، هلمند، پکتیا، نیمروز، سپین بولدک، او بدخشان – هر یو په خپله برخه کې د خپلو ولایتونو د خصوصي سکتور د لاسته راوړنو، فعالیتونو او ستونزو په اړه ګډونوالو ته معلومات وړاندې کړل، او د اتاق له مرکزي مشرتابه یې وغوښتل چې د ولایتونو د سوداګرو غږ دې اړوندو حکومتي مقاماتو ته ورسوي.

 

 

 

 

 

 

یاده ناسته د ۱۴۰۴ کال د زمري په ۱ نېټه د ارګ په سلام‌خانې ماڼۍ کې د افغانستان د سوداګرۍ او پانګونې اتاق د مشرتابه پلاوي په ګډون جوړه شوې وه. په دې ناسته کې ښاغلي محمد یونس مهمند د اتاق لومړي مرستیال، ښاغلی خیرالدین مایل احمدي د سوداګریزو چارو مرستیال، ښاغلی خان محمد سرفراز باز د مدیره پلاوي د دارالانشاء رئیس، ښاغلی میرزمان پوپل د مالي او اداري چارو سرپرست، د ولایتي اتاقونو مشران او د هېواد له ۴۰۰ څخه زیاتو سوداګرو او صنعتکارانو ګډون کړی و.

په دې ناسته کې له ښاغلي مولوي عبدالله عزام، د ریاست‌الوزرا د اقتصادي مرستیال د دفتر رئیس، او د مالیې وزارت له استازو سره د وارداتي شرکتونو څخه د ثابتې مالیې د راټولولو په اړه بحث وشو.

سوداګرو او صنعتکارانو په ګډه دا غوښتنه وکړه، چې له وارداتي تجارتي شرکتونو او د صنعتکارانو د خامو موادو لپاره دې یو ځل او په ثابت ډول مالیه یوازې په ګمرکونو کې راټوله شي. دوی باور درلود، که دا وړاندیز عملي شي، د دوی سوداګریز فعالیتونه به څو چنده زیات شي او ټول شرکتونه به له اوږدو مالیاتي ارزونو او ستړیاوونکو پروسیجرونو خلاص شي.

دا وړاندیز به لومړی اقتصادي کمیسیون ته او د هغوۍ له لارې به د مشرتابه دفتر درانه مقام ته د وروستۍ پرېکړې لپاره وړاندې شي.