یاده ناسته چې د بندرونو د بیا پرانیستلو، د تخنیکي کمېټې د جوړولو او د دواړو هېوادونو ترمنځ د سوداګریزو ستونزو د حل په موخه په انلاین بڼه جوړه شوه، د افغانستان د سوداګرۍ او پانګونې خونې عمومي رئیس، ښاغلي الحاج سید کریم هاشمي، د بندرونو تړل کېدل د افغانستان او پاکستان د سوداګرۍ او اقتصاد په زيان وبلل او د دواړو هېوادونو د سوداګریزو خونو په همکارۍ یې د بندرونو پر بیا پرانیستلو ټینګار وکړ.
نوموړي وویل: "که د پاکستان حکومت د بندرونو د پرانیستلو صلاحیت د پاکستان د سوداګرۍ او صنایعو خونې ته سپارلی وي، نو د افغانستان لوری هم د بندرونو د بیا پرانیستلو لپاره بشپړ چمتو دی."
ښاغلي هاشمي د ۱۲ کسیزې ګډې کمېټې د جوړولو وړاندیز ومانه، کوم چې د پاکستان د سوداګرۍ او صنایعو خونې له لوري د ستونزو د حل، د بند پاتې توکو د لېږد د بیا پیل او په راتلونکي کې د ورته پېښو د مخنیوي لپاره وړاندیز شوی و او ده زیاته کړه چې په دې اړه به له خپل حکومت سره خبرې وکړي څو دغه پرېکړې عملي شي.
د پاکستان د سوداګرۍ او صنایعو خونو د فدراسیون رئیس، ښاغلي عاطف اکرم شیخ، د دواړو هېوادونو ترمنځ د بندرونو تړل کېدل د سوداګرۍ، په ځانګړي ډول د پاکستان د صادراتو لپاره په زیان وبلل او ویې ویل چې په لومړي پړاو کې به هغو کانټینرونو ته د داخلېدو اجازه ورکړل شي چې د پولې هغې غاړې ته بند پاتې دي او د افغانستان سوداګریز توکي لېږدوي.
همدارنګه، د افغانستان د سوداګرۍ او پانګونې خونې وړاندیز وکړ چې راتلونکې ګډه ناسته، چې شپږ تنه استازي د پاکستان له خونې او شپږ تنه د افغانستان له خونې څخه په کې ګډون ولري، راتلونکې اونۍ د جلالآباد په ښار کې ترسره شي څو بندرونه بېرته پرانیستل شي. دا وړاندیز د پاکستان د سوداګرۍ او صنایعو خونو له لوري ومنل شو.
په دې ناسته کې د افغانستان د سوداګرۍ او پانګونې خونې له لوري د خونې عمومي رئیس، یو شمېر مرستیالانو، د مدیره پلاوي غړو، د ولایتي خونو مشرانو او یو شمېر مخکښو سوداګرو ګډون درلود.
له پاکستان څخه د سوداګرۍ او صنایعو خونو د فدراسیون رئیس او د خیبر پښتونخوا، کویټې، شمالي وزیرستان او کورمې د سوداګرۍ او صنایعو خونو مشرانو هم ګډون کړی و.
یکشنبه، مرغومي ۱۴مه، ۱۴۰۴
