د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي د خدماتو مرستیال ښالي نصیر احمد عرب، د مدیره پلاوي مالي رئیس ښاغلي شیرین آغا سخي، د مدیره پلاوي نړیوالو اړیکو رئیس ښاغلي انجنیر سید جاوید برهان، د عامل پلاوي سرپرست رئیس ښاغلي شفیق الله عطايي او د مدیره پلاوي غړیو هر یو ښاغلي ضیاءالدین اچکزي او احمد ضیاء عظیمي شینوزاده، یو شمیر سوداګرو، د خصوصي سکتور، مدنې ټولنې او غیر دولتي ادارو غړیو په کابل سټار هوټل کې د UNDP لخوا د "افغانستان راتلونکي" تر عنوان لاندی په جوړه شوې ناسته کې د ګډون ترڅنګ، د خصوصي سکتور نظرونه څرګند کړل.

 

دا ناسته په دریو اصلي موخو چې عبارت دي له (۱- د پراختیا لارې: د بیلابیلو حلونو په کارولو سره د افغانستان د پرمختګ په اړه بحث کول او د موجوده خطرونو او فرصتونو ارزونه او پدې پروسه کې د بهرنیو لوبغاړو رول؛۲- ټولنیز تړونونه: په افغانستان کې د تلپاتې سولې د تامین لپاره د دولت او خلکو ترمنځ د باور د زیاتولو لپاره څه کولای شو؟ نړیواله ټولنه د کورنیو هڅو په اړه څه کولی شي؟۳- د ځوانانو د رهبرۍ پراختیا: په ولایتونو کې د جنسیتي نابرابرۍ د له منځه وړلو څرنګوالی او په افغانستان کې د ځوانانو د رهبرۍ په وده کې څه ډول رول لوبولی شي؟) جوړه شوې وه.

 

ښاغلي مومند د UNDP له خوا د سترو اقتصادي پروژو د پیل هرکلی وکړ او د دغو پروژو په تطبیق کې یې د خصوصي سکتور رول مهم وباله او زیاته يي کړه، چې د افغانستان د سوداګرۍ او پانګونې اتاق په هېواد کې د خصوصي سکټور د ټولنې رښتینی استازی دی او د مهمو اقتصادي پروژو په تطبیق کې مهم او بنسټیز رول لوبولی شي.

 

نوموړي په اوسنيو شرايطو کې د افغانستان له بانکي سيسټم څخه ملاتړ، د عام المنفعه پروژو لکه د سړک جوړولو، د برېښنا د توليد او نورو بنسټيزو پروژو بيا پيلول مهم او بنسټيز وبلل او د دغو پروژو د عملي کیدو برخه کې يي د افغانستان د سوداګرۍ او پانګونې اتاق او د خصوصي سکټور همکاري مهمه وبلله.

 

ښاغلي خانجان الکوزي په تېرو وختونو کې د اقتصادي پروژو په تطبیق کې د هېواد د خصوصي سکټور رول ته په اشارې سره وویل "خصوصي سکتور د اقتصادي پروژو په تطبیق کې ښې تجربې لري او له ښو تجربو څخه باید په راتلونکو پروژو کې کار واخیستل شي.

 

نوموړي زیاته کړه "که د افغانستان له شته ظرفیتونو څخه د ترانزیت او سیمه ییز ټرانسپورټ، کرنې، صنعت، کانونو استخراج او نورو برخو کې کار واخیستل شي، اقتصادي وده ترلاسه کېدای شي."

په دی ناسته کې، د UNDP رسمي استازي ښاغلي عبدالله الدارداري، دUNDP ستر مدیر ښاغلي اچیم ستینر، د حرکت مؤسسې رئیس ښاغلي حجت الله فضلي او ځینو نورو ګډون کوونکو ویناوې وکړې.

د افغانستان د سوداګرۍ او پانګونې اتاق سوداګریز مرستیال ښاغلي خیرالدین مایل احمدي او د اتاق د ټرانسپورټ او ټرانزیټ تخصصي کمېټې مرستیال او د بامیانو ولایتي اتاق رئیس ښاغلي لطف الله امیني د وري په ۶مه او ۷مه نېټه، د ترمز په ښار کې د ازبیکستان، افغانستان او پاکستان ترمنځ په جوړه شوې دری اړخیزې ټرانسپورټي او ټرانزیټي ناسته کې د خصوصي سکتور په استازولۍ ګډون وکړ.

 

په دغې دوه ورځنۍ ناسته کې چې د سوداګرۍ پراختیا او د ازبیکستان، افغانستان او پاکستان ترمنځ د ټرانسپورټي او ټرانزیټي ستونزو حل په موخه جوړه شوې وه، مختلفو لوریو ټرانسپورټي او ټرانزیټي ستونزې مطرح او افغاني پلاوي د یادو ستونزو د له منځه وړلو په موخه ځانګړي وړاندیزونه او حل لارې وړاندې کړې، چې ازبیکستان او پاکستان هم په دی برخه کې خپل چمتووالی څرګند کړ.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د عامل پلاوي سرپرست رئیس ښاغلي شفیق الله عطايي، د مدیره پلاوي غړي ښاغلي خان جان الکوزي، د صادراتو او پانګه اچونې پراختیا ډیپارټمنټ مسؤل ښاغلي میرزمان پوپل د غالیو اتحاديي رئیس ښاغلي نور احمد نوري، د یادې اتحاديي مرستیال ښاغلي قربان علي جمشیدزاده، ښاغلي فرید کریم زاده او د غالیو اتحاديي مشرتابه پلاوي ځینو غړیو سره د لیدنې په ترڅ کې، د غالیو سکتور شتو ستونزو په اړه خبرې اترې وکړې.

 

په دی ناسته کې، د غالیو اتحاديي مشرتابه پلاوي د افغانستان د سوداګرۍ او پانګونې اتاق مشرتابه پلاوي سره پاکستان ته د غالیو د ټرانزیټ، صادرولو او انتقال برخه کې شته ستونزې شریکې کړې او شتو ستونزو ته د پای ټکي کیښود برخه کې يي د اتاق د همکارۍ غوښتنه وکړه.

 

ښاغلي مهمند د غالیو اتحاديي مشرتابه پلاوي ته د ښه راغلاست ویلو او د دوی د ستونزو اوریدو وورسته ژمنه وکړه، چې د دوی ستونزې به د اسلامي امارت اړوندو ادارو سره شریکې او د له منځه وړلو برخه کې به يي خپلې هیڅ ډول مرستې ونه سپموي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي د دارالانشاء رئیس ښاغلي خان محمد سرفراز باز، د مدیره پلاوي مالي رئیس ښاغلي شیرین آغا سخي، د مدیره پلاوي غړيو هر ښاغلي ذکریا بریالي او ضیاءالدین اچکزي، د اتاق د عامل پلاوي مالي او اداري مرستیال ښاغلي میرویس هوتک، د کابل ولایتي اتاق مدیره پلاوي لومړي مرستیال ښاغلي احمد شاه حکیمي، د کندهار ولایتي اتاق لومړي مرستیال ښاغلي حاجي محمد داود، د صرافانو اتحاديي مشرتابه او د هېواد یو شمیر سوداګرو د کابل امنیه قوماندانۍ لومړي مرستیال ښاغلي مولوي محمد ابراهیم او د کابل ولایت یو شمیر امنیتي مسؤلینو سره د لیدنې په ترڅ کې، د شتو ستونزو په اړه خبرې وکړې.

 

یاده ناسته کې چې د افغانستان د سوداګرۍ او پانګونې اتاق کنفرانسونو تالار کې ترسره شوه، ښاغلي مهمند د کابل امنیه قوماندان مرستیال او امنیتي مسوولینو ته د ښه راغلاست ترڅنګ د سوداګرۍ او پانګونې اتاق سره د دوی د دوامدارې او ښې همکارۍ ستاینه وکړه او د افغانستان اسلامي امارت امنیتي مسؤلینو په ځانګړې توګه د کابل امنیه قومندانۍ ته يي د سوداګرو او پانګوالو د ښه امنیت د تامین او د اتاق او د کابل امنیه قوماندانۍ ترمنځ د لاډیرې همکارۍ او همغږۍ په موخه یو شمیر وړاندیزونه مطرح کړل.

 

ښاغلي مهمند سوداګرو ته د وسلو د جوازونو د بیا وېش چې پخوا د امنیه قومندانۍ له خوا وېشل کیدل او د سوداګرو د ستونزو هواري په موخه د کابل امنیه قومندانۍ او د افغانستان د سوداګرۍ او پانګونې اتاق د مشرتابه تر منځ د منظمو اونیزو غونډو په جوړولو ټینګار وکړ.

ښاغلي زکریا بریالي د سوداګرو او پانګوالو د امنیت د تامین په برخه کې د اسلامي امارت د امنیتي ځواکونو د همکارۍ د ستایلو ترڅنګ، د امنیتي ځواکونو په ځانګړي یونیفورم او د کورنیو چارو له وزارت څخه د پولیسو قومندانۍ ته د وسلو د جواز په انتقال ټینګار وکړ.

 

ښاغلي ضیاء الدین اچکزي او ښاغلي غلام نبي عیدي زاده د سوداګرو ځانګړې ستونزې په ګوته کړې او د حل غوښتنه یې وکړه.

ښاغلي احمدشاه حکیمي د کابل شهزاده سرای او د صنایعو زرغون ښارګوټي مسئولینو ته د اشارې کولو ترڅنګ، د هغوی د ستونزو د حل په موخه یې د امنیتي مسوولینو او امنیه قومندان پام راجلب کړ.

د صرافانو د اتحادیې غړي ښاغلي عبدالرحمن ځیرک او یو شمېر صرافانو هم د بانکونو په برخه کې د خپلو ستونزو او امنیتي ننګونو په اړه خبرې وکړې.

 

د کابل ولایت د امنیه قومندانۍ لومړي مرستیال ښاغلي مولوي محمد ابراهیمي د هېواد په اقتصادي وده کې د سوداګرو رول او اهمیت ته اشاره وکړه او د غلو او سړي تښتونکو په ځانګړي ډول د انسان تښتوونکو په نیولو کې یې د امنیه قوماندان د قاطعانه کړنو او ۲۰۸۸ کسانو نیولو خبر ورکړ. نوموړي زياته کړه "امنيه قومانداني به د سوداګرو او صرافانو د امنيتي ستونزو هواري ته لومړيتوب ورکړي او د سوداګرو د بانکي ستونزو په هواري کې به تر خپل وس او توان سره همکاري وکړي."

 

ښاغلي خان محمد سرفراز باز د ناستې په نچوړ کې وویل "د اسلامي امارت امنیتي مسؤلینو په لنډه موده کې د سوداګرو او پانګوالو د امنیت په برخه کې ډېر کارونه کړي دي."

ښاغلي باز د امنیتي وضعیت د ښه والي په برخه کې د سوداګرو رغنده وړاندیزونه مهم او اغېزمن وبلل او په امنیتي چارو کې یې د ځینو ارګانونو پر لاسوهنې نیوکه وکړه او د امنیتي ځواکونو لپاره یې د یونیفورم کارول مهم او اړین وباله.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د یومتیس ګروپ عمومي رئیس ښاغلي اسمعیل هالدین سره د اتاق په مرکزي دفتر کې د لیدنې په ترڅ کې، په افغانستان کې د یاد شرکت پانګه اچونو او ګډو همکاریو په اړه خبرې اترې وکړې.

 

ښاغلي هالدین ښاغلي مهمند ته په مختلفو هېوادونو کې د یومتیس ګروپ فعالیتونو په ځانګړی توګه ودانیز سکتور برخه کې د یاد شرکت د پانګه اچونو په اړه مالومات ورکړل.

ښاغلي هالدین په هرات ولایت کې د یوې ودانیزې پروژې د کار پیل خبر ورکولو ترڅنګ، د هېواد په نورو ولایتونو کې د ښار ګوټو او کورونو ودانولو په برخه کې خپله لیوالتیا څرګنده او د افغانستان د سوداګرۍ او پانګونې اتاق څخه يي په دی برخه کې د همکارۍ غوښتنه وکړه.

 

ښاغلي مهمند ښاغلي اسماعیل هالدین ته د ښه راغلاست ویلو ترڅنګ، په افغانستان کې د یاد شرکت د فعالیتونو هر کلی وکړ او ښاغلي هالدین ته يي هېواد کې د پانګه اچونو شتو فرصتونو په اړه مالوماتو وړاندی کولو ترڅنګ، د یومتیس شرکت سره د ګډو پانګه اچونو په برخه کې د هر ډول همکاریو ژمنه وکړه.