د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي سوداګریز مرستیال ښاغلي خیرالدین مایل احمدي، د مدیره پلاوي د نړیوالو اړیکو رئیس ښاغلي انجنیر سید جاوید برهان، د مدیره پلاوي مالي رئیس ښاغلي شیرین آغا سخي او د مدیره پلاوي غړيو هر ښاغلي خان جان الکوزي او ضیاء الدین اچکزي، د افغان – پاک ګډ اتاق اجرائیوي رئیس ښاغلي نقیب الله صافي د په کابل کې میشت د پاکستان سوداګریزې آتشې ښاغلي ډاکټر کوثر علي زیدي سره د لیدنې په ترڅ کې، د سوداګرۍ پراختیا، د ټرانسپورټ او ټرانزیټ ستونزو، د ویزو د صدور برخه کې د لازمو آسانتیاوو رامنځته کولو او یو شمیر نور مسائلو په اړه خبرې اترې وکړې.

 

ښاغلي مهمند د پاکستان سوداګریزې آتشې ته د ښه راغلاست ویلو ترڅنګ، د افغانستان او پاکستان ترمنځ د سوداګرۍ پر پراختیا او ګډو پانګه اچونو او ټرانسپورټي او ټرانزیټي ستونزو په حل ټینګار وکړ. همدارنګه د سوداګرۍ په بهیر کې يې د لازمو آسانتیاوو رامنځته کولو غوښتنه وکړه.

 

ښاغلي مهمند د سوداګرۍ د بهیر د تسریع او په دی برخه کې د قوت او ضعف نقطو، شته فرصتونو او ننګونو پيژندلو په موخه، د افغانستان او پاکستان اتاقونو ترمنځ د منظمو ناستو ترسره کول اړین وبلل.

ښاغلي ډاکټر کوثر علي زیدي د دواړو هېوادونو ترمنځ د سوداګرۍ د پراختیا برخه کې د افغانستان د سوداګرۍ او پانګونې اتاق د فعالیتونو د ستایلو ترڅنګ، افغان سوداګرو ته د ویزو د صدور برخه کې د لازمو آسانتیاوو رامنځته کولو ډاډ ورکړ.

 

نوموړي زیاته کړه چې د دواړو هېوادونو ترمنځ سوداګري او پانګه اچونه د دواړو هېوادونو د ګټو پر بنسټ ترسره شي او په دی برخه کې باید هڅه وکړو چې خپلې سوداګریزې اړیکې لا پسې ښې کړو.

په دی ناسته کې ښاغلي خیرالدین مایل احمدي، انجنیر سید جاوید برهان، شیرین آغا سخي او د مدیره پلاوي غړيو هر ښاغلي خان جان الکوزي او ضیاء الدین اچکزي د سوداګریزو، ټرانسپورټي او ټرانزیټي ستونزو، د ویزو د صدور بهیر، د سپین بولدک – چمن د بندر بندیدلو او د سوداګرۍ برخه کې د لازمو آسانتیاوو رامنځته کولو په اړه خپل نظرونه څرګند کړل.

د افغانستان د سوداګرۍ او پانګونې د مدیره پلاوي لومړی مرستیال ښاغلی محمد یونس مهمند، په کابل کې د ترکیې له سفیر محترم جهاد ارګین آی، سره ولیدل او د سوداګریزو اړیکو ، د افغانستان په کانونو کې د پانګونې ، د ترکیې د شرکتونو د سوداګریزو موضوعاتو او ځینو نورو موضوعاتو په اړه خبرې اترې وکړي.

 

ښاغلی محمد یونس مهمند، د مسیاد په پروګرام کې د ګډون لپاره افغان سوداګرو ته د ویزې د خدمتونو د آسانتیاوو څخه مننه وکړه او د امام ابوحنیفه "رح" د ستر ملی او نړیوال نندارتون د جوړولو په اړه یې معلومات وړاندې کړل.

ښاغلی مهمند، پدی ننداتون کی د ترکیې د سوداګرو او صنعتکارانو په ګډون یې ټینګار وکړ وویل: دا نندارتون د افغانستان د تولیدی ، صنعتی او کانونو د ښه معرفی کولو لپاره په لاره اچول کیږی، چې د ترکیې سوداګراو پانګوال باید په کې ګډون وکړی.

 

ښاغلی مهمند، د دواړو هېوادونو ترمنځ د سوداګریزو اړیکو د زیاتوالی په اړه خوشبینی څرګنده کړه او د افغان سوداګرو لپاره یې د ویزې د ورکړې د پروسې د آسانتیا غوښتنه وکړه څو سوداګر په اسانۍ سره سفر وکړی.

ښاغلی جهاد ارګین آی، په دغه نندارتون کې د ګډون لپاره د ترکیې سوداګرو او پانګه اچونکو د هڅونې ډاډ ورکړ او د دواړو هېوادونو ترمنځ د سوداګریزو او پانګه اچونې د اړیکو پر ځواکمنتیا یې ټینګار وکړ. ښاغلی سفیر د دواړو هېوادونو ترمنځ د سوداګرۍ او پانګونې د ګډې خونه په جوړولو ټینګار وکړ او په دې برخه کې یې د آنلاین غونډو جوړول مهم وګڼل.

د افغانستان د سوداګرۍ او پانګونې اتاق عامل پلاوي رئیس ښاغلي شفیق الله عطايي د نړیوال بانک له مسؤلینوسره د یوې آنلاین ناستې په ترڅ کې، د سوداګریزو ننګونو، شته فرصتونو او د سوداګریزو فعالیتونو د بیا پیل په برخه کې د کړنلارو پیژندنې په اړه خبرې اترې وکړې.

 

په دی ناسته کې چې د اتاق د عامل پلاوي د نړیوالو اړیکو ډیپارټمنټ مسؤل ښاغلي امید غفورزي هم ګډون درلود، ښاغلي عطايي د نوي نظام له منځته راتګ څخه وروسته د افغانستان د سوداګرۍ او پانګونې اتاق د فعالیتونو په اړه د معلوماتو وړاندی کولو ترڅنګ، وویل: د افغانستان د سوداګرۍ او پانګونې اتاق تل د خصوصي سکتور د ملاتړي په توګه تل هڅه کړې چې د سوداګرۍ او پانګونې بهیر فعال وساتي.

 

ښاغلي عطايي په تیر یو کال کې د اتاق د فعالیتونو لکه: حکومت او نړیوالو ادارو ته د خصوصي سکتور د پیشنهادي کڅوړې ترتیب او تنظیم، د کال د تر ټولو ښو صادروونکو د پيژندنې په موخه د کنفرانس جوړولو، د هوايي دهلیز له لارې د هېواد د صادراتو بیا پیل او د امام ابو حنیفه (رح) ملي او نړیوال نندارتون په لاره اچولو په اړه خبرې وکړې او زیاته يې کړه چې یادې کړنې يې د هېواد د سوداګرو او پانګه والو د ملاتړ په موخه ترسره کړي دي.

 

سربیره پردی، ښاغلي عطايي د سوداګریزو فعالیتونو د بیا پیل په موخه د اړوندو حکومتي ادارو، د افغانستان د سوداګرۍ او پانګونې اتاق او نړیوالو بسپنه ورکوونکو د همغږۍ په پایله کې د پالیسۍ په رامنځته کولو ټینګار وکړ.

د نړیوال بانک مسؤلینو د افغانستان د سوداګرۍ او پانګونې اتاق د راپورونو له اوریدلو وروسته، د سوداګرۍ او پانګه اچونې فعالیتونو په تیزوالي د ټینګار ترڅنګ، په دی برخه کې د نړیوال بانک د همکاریو څخه ډاډ ورکړ.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د اتاق د مدیره پلاوي غړي ښاغلي خان جان الکوزي په ملتیا په کابل کې د ایران سفارت له سوداګریزې آتشې ښاغلي دوکتور حسین روستايي او د ایران سوداګر او صنعت کار ښاغلي شهیدي سره د لیدنې په ترڅ کې، د هېواد په بندرونو کې د وړتیا لوړونې او د ایران څخه د وارداتي محصولاتو د کیفیت کنټرول په اړه خبرې اترې وکړې.

 

ښاغلي مهمند د افغانستان او ایران ترمنځ د سوداګریزو فرصتونو رامنځته کولو برخه کې د اتاق د هلو ځلو یادونه وکړه او وی ویل: موږ هڅه کوو چې د سوداګرۍ او پانګه اچونې زیاتوالي برخه کې ګړندي ګامونه پورته او د دواړو هېوادونو ملي ګټې او په دی برخه کې متعددې ناستې اړینې بولو.

 

نوموړي د امام ابو حنیفه (رح) ملي او نړیوال نندارتون په اړه معلومات وړاندی او د ایراني شرکتونو څخه يې وغوښتل چې په یاد نندارتون کې خپل محصولات نندارې ته کیږدي.

ښاغلي الکوزي د برښنايي سیستمونو د ارزښت په اړه خبرې وکړې او وی ویل: د افغانستان او ایران ترمنځ په ګډو بندرونو کې باید وړتیا لوړونه رامنځته کړی شي څو د وارداتي توکو د کیفیت او کمیت څخه ډاډ ترلاسه او دا چې الکترونیکي سیستمونه په بندرونو کې د کیفیت د کنترول برخه کې اړین رول لوبوي.

 

ښاغلي روستايي په بندرونو کې د الکترونیکي سیستمونو رامنځته کولو او په دی برخه کې يې د خپلو هلو ځلو په اړه د خبرو کولو وروسته وویل: اوس تر بل هر وخته د دواړو هېوادونو ترمنځ د سوداګرۍ پراختیا او پانګه اچونې زیاتوالي فرصت او زمینه برابره ده او موږ هڅه کوو چې د سوداګرۍ او پانګه اچونې بهیر لا پسې ګړندی کړو.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د اتاق د مدیره پلاوي غړي ښاغلي خان جان الکوزي په ملتیا د کورنیو چارو وزارت له سیاسي معین ښاغلي شیر محمد عباس ستانکزي سره د لیدنې په ترڅ کې، د امام ابو حنیفه (رح) نندارتون د په لاره اچولو، د سفارتونو په بلنه کې د یاد وزارت همکارۍ، د بهرنیو ديپلوماتانو لپاره د تشریفاتي مسائلو تنظیم، سفارتونو ته د نندارتون په اړه د معلوماتو او همغږۍ په پار د ناستې جوړولو او یو شمیر نورو مسائلو باندی بحث او خبرې وکړې.

 

ښاغلي مهمند افغان سوداګرو ته د چین ویزې ترلاسه کولو برخه کې د بهرنیو چارو وزارت د همکارۍ او لازمو آسانتیاوو رامنځته کول، د بهرنیو هېوادونو اتاقونو لکه سارک، ایکو او د اسلامي نړۍ هېوادونو اتاقونو ته د خبر رسونې برخه کې د بهرنیو چارو وزارت رول اړین وباله او بهرنیو ملمنو ته د ویزې آسانتیاوو برابرولو باندی د ټینګار کولو ترڅنګ، وویل: د کورنیو محصولاتو د لا ښې پیژندې په موخه په نندارتون کې د بهرنیو ادارو او سفارتونو ګډون مهم دی.

 

نوموړي د کورنیو چارو له وزارت څخه د بهرنیو سفارتونو او ادارو د نومونو لست وغوښت څو په بنسټ يې بلنلیکونه ترتیب او تنظیم کړي.

ښاغلي شیر محمد عباس ستانکزي د امام ابو حنیفه (رح) نندارتون په اړه بهرنیو ادارو او اتاقونو ته د خبر رسونې په پار د یاد وزارت له همکارۍ ډاډ ورکړ او د ورته نندارتونونو په لاره اچول يې د هېواد د کورنیو محصولاتو د لا ښې پیژندنې په برخه کې اړین وبلل.

نوموړي ژمنه وکړه چې ټولو هغو بهرنیو ملمنو ته چې په نندارتون کې د ګډون په نیت راځي، د ویزې لازمې آسانتیاوې رامنځته کړي.