د ایکو ادارې ښاغلي ریس، د ایکو د غړو هیوادونو د سوداګرۍ او پانګونې اتاقونو ریسانو او مرستیالانو په شتون کې د دوشنبه په ورځ د تلې د میاشتې په ۲۸مه نیټه د ایکو ادارې ۲۷مه اجرایوي او ۱۸مه عمومي غونډه د ویډیو کنفرانس له لاری ترسره شوه چې په ترڅ کې يې د ایکو ادارې د سوداګرۍ او صنایعو ریاست د افغانستان څخه ایران ته انتقال شو.

په دی غونډه کې ښاغلي آذرخش حافظي د سوداګرۍ او صنایعو اتاق ریس، سید جاوید برهان د مدیره هیت د نړیوالو اړیکو آمر او د ایکو د ادارې د عمومي اسامبلۍ غړې، نصیر احمد عرب د اتاق د مدیره هیت تخنیکي مرستیال، احمد ضیاء عظیمي شینوزاده د مدیره هیت غړی، لطف الله امیني د بامیانو د اتاق د مدیره هیت ریس، حمیرا کهزاد د ښځینه سوداګرو د کمیټې غړی، محمد احسان سخي د توریزم د کمیټې غړی، او امید غفورزي د اتاق د نړیوالو اړیکو آمر ګډون درلود.

په دی غونډه کې ښاغلي آذرخش حافظي د غونډې ګډونوالو ته د ښه راغلاست ویلو تر څنګ په سیمه ایزه کچه د خصوصي سکتور د ریسانو تر منځ د همغږۍ په ارزښت خبری وکړی او زیاته يې کړه چې د ویزې د صدور په برخه کې لازمې اسانتیاوې رامنځته کول کولای شي چې د سیمه ایزې اقتصادي پراختیا سبب شي. او موږ ټول باید د سیمه ایزی همغږۍ د پیاوړتیا په موخه هڅې وکړو.

ښاغلي سید جاوید برهان د سیمه ایزې همغږۍ او همکارۍ رول په خصوصي سکتور او د سوداګرۍ په لوړتیا کې اړین وباله او زیاته يې کړه، چې سیمه ایزه همغږي او همکاري د زیربناوو په جوړولو، د سوداګریزو توکو په سریع انتقال، په سیمه ایزه کچه د خصوصي سکتور ملاتړ، او د ویزې په صادرونه کې لازمې اسانتیاوې رامنځته کولی شي.

وروسته له دی، د ایکو غړو هیوادونو د ښاغلي سید جاوید برهان دوه کلنې هڅې وستایلې او ټولو ګډونوالو د سوداګریزو اسانتیاو، ټرانسپورټ، ښځینه تشبث، سوداګریز حکمیت، توریزم کوچنیو تشبثاتو، او ۲۰۱۸ او ۲۰۱۹ کلونو تر منځ د ایکو د ادارې په فعالیتونو خبری وکړی.

د لومړي ځل لپاره د ښاغلي سید جاوید برهان تر ریاست لاندی د ایکو اتاق ملي تخصصي کمیټې جوړی شوې.

د غونډې په پای کې، د ایکو ادارې د سوداګرۍ او صنایعو اتاق ریاست ښاغلي غلام حسین شافعي د اتاق د سوداګرۍ او صنایعو، معدن او کښت ریس ته انتقال شو او د ایکو د اتاق عمومي معاونیت د آذربایجان د سوداګرۍ او صنایعو اتاق ته وسپارل شو.

ښاغلي توکل احمدیار د اتاق عمومي ريس، محمد یونس مهمند د مدیره هیت لومړي مرستیال، محمد ګردیزي او احمد ضیاء عضیمي شینوزاده د مدیره هیت غړيو، سید زمان هاشمي د اتاق عامل ریس، د هیواد د سویل ختیځ سوداګرو او پانګه اچوونکو، د خصوصي پوهنتونونو، صنعت او ساخمتانۍ سکتور استازیو، د سوداګرۍ او صنعت، کورنیو چارو او مالیي وزارتونو معینانو د شنبه په ورځ د تلې د میاشتې په ۲۶ نیټه د افغانستان د جمهوري ریاست د لومړي مرستیال امرالله صالح سره لیدنه وکړه او په خصوصي سکتور کې يې د شتو ننګونو او ستونزو په اړه خپل نظریات تبادله کړل.

په دی غونډه کې امرالله صالح وویل چې دا څلورمه غونډه ده چې موږ يې د هیواد د مختلفو برخو سوداګرو او پانګه اچوونکو سره کوو او له سوداګرو يې وغوښتل چې خپلې ستونزی د جمهوري ریاست له لومړي معاونیت سره شریکې کړي، تر څو دوی ورته د حل لاری ولټوي.

ښاغلي توکل احمدیار د پرله پسې غونډو او د خصوصي سکتور ستونزو د له منځه وړلو په اړه د جمهوري ریاست له لومړي مرستیال څخه مننه وکړه او هیله يې څرګنده کړه چې ارګ به د سوداګرو او پانګه اچوونکو د ستونزو په له منځه وړلو کې بشپړه همکاري وکړي.

د هیواد د سویل ختیځ سوداګرو او پانګه اچوونکو په خپل وار سره د ولایتونو په صنعتي پارکونو کې، د لوړو زدکړو، بانکدارۍ، د ښځینه تشبث، امنیتي ننګونو، په غلام خان او دند پتان بندرونو کې د شتو ستونزو په اړه خبری وکړې او د جمهوري ریاست د لومړي مرستیال څخه يې ددی ستونزو د له منځه وړلو غوښتنه وکړه.

ښاغلي امرالله صالح د هیواد د سویل ختیځ سوداګرو او پانګه اچوونکو د ستونزو له اوریدو وروسته د هغو کړنو یادونه وکړه چې تر دی مهاله په دی ډګر کې ترسره شوي دي او ژمنه يې وکړه چې د سوداګرو او پانګه اچوونکو هر ډول ستونزو د له منځه وړلو په موخه به لازم اقدامات وکړي او په هیواد کې به خلک پانګه اچوونې ته وهڅوي.     

د افغانستان د سوداګرۍ او پانګونې اتاق ښاغلي سید زمان هاشمي، د ټرانسپورټ سرپرست وزیر قدرت الله ذکي، د جمهور ریس سلاکار اعتبار خان ځدران، د مدیره هیت غړی ښاغلي احمد ضیاء عظیمي شینوزاده، د بامیان اتاق ریس ښاغلی لطف الله امیني، د اتاق د ټرانسپورټ کمیټې مرستیال، د ولسې جرګې د مخابراتو د کمیسیون ریس، د اتاقونو فدارسیون، لیږدوونکي ټرانسپورټي شرکتونو، او د خصوصي سکتور یو شمیر غړو د شنبه په ورځ د تلې د میاشتې په ۲۶ نیټه په کابل سټار هوټل کې د ترانزیت او ټرانسپورټ ملي ورځ ولمانځله.

ښاغلي سید زمان هاشمي د ترانزیت او ټرانسپورټ په برخه کې شتو ننګونو ته په اشاری سره هیله څرګنده کړه، چې په راتلونکي کنفرانس کې چې په ارګ کې به جوړیږي، ددی ننګونو د له منځه وړلو په موخه به بنسټیزی پریکړی وشي. هغه د لاجوردو، چابهار بندر او په سیمه کې د ټرانسپورټ په برخه کې د شتو ستونزو د له منځه وړلو په موخه، د دوه اړخیزو، دری اړخیزو او څلور اړخیزو هوکړه لیکونو لاسلیکول اړین وبلل.

ښاغلي هاشمي د ګاونډیو او سیمې هیوادونو سره د کارنت تیر سیستم نه ګټه پورته کول یو امیتاز وباله خو زیاته يې کړه چې په تیرو اتو کلونو کې افغانستان ۱۷۶ کارنت تیرونه صادر کړي دي خو په هغه کچه نه چې ورته اړتیا وه او ددی اصلي لامل يې د ماليي وزارت د ګمرکونو د همکارۍ نشتوالې وباله.

ښاغلي هاشمي وویل چې موږ د لاجوردو او چابهار بندر نه د سالمې ګټې اخستنې په موخه، جمهوري ریاست او د کارونو ادارې ته خپل وړاندیزونه کړي دي چې د ترانزیت او ټرانسپورټ په راتلونکي کنفرانس کې به پری خبرې وشي. ښاغلي هاشمي زیاته کړه چې د ټرانسپورټ په قانون کې ځینې مادې ستونزی جوړونکې دي، او د خصوصي سکتور سره په مشوره باید تعدیل په کې راشي.

د ټرانسپورټ سرپرست وزیر ښاغلي قدرت الله ذکي، د ټرانسپورټ سکتور په اقتصادي او ټولنیزه پراختیا کې خورا اړین وباله او په ملي او نړیواله کچه د ترانزیت او ټرانسپورټ سکتور د پراختیا، د ځمکنیو او هوايې دهلیزونو په جوړولو کې يې د نوموړي وزارت د کړنو یادونه وکړه.

په دی غونډه کې د اتاق د ټرانسپورټ کمیټې مرستیال، د ولسې جرګې د مخابراتو د کمیسیون ریس، د اتاقونو فدارسیون، لیږدوونکي ټرانسپورټي شرکتونو، او د خصوصي سکتور یو شمیر غړو په خپل وار سره د ترانزیت او ټرانسپورټ په ارزښت او په دی برخه کې د شته ستونزو په اړه خبری وکړی.  

د افغانستان د سوداګرۍ او پانګونې اتاق د تېلو او اوبلن ګاز ټانک لرونکو  تخصصي کمېټه، د یو لړ مراسمو په ترڅ کې د اتاق د عمومي رئیس ښاغلي توکل احمدیار لخوا د اتاق د مدیره پلاوي غړو ښاغلو خانجان الکوزي او داود یوسفزي، د اتاق د عامل پلاوي ریاست سرپرست ښاغلي شفیق الله عطایي، د تېلو او مایع ګاز د اتحادیې د رئیس او غړو په حضور کې پرانستل شوه.

ښاغلي احمدیار، د تېلو او اوبلن ګاز ټانک لرونکو  تخصصي کمېټې پرانستل د دغه سکتور د شته ستونزو حل او همدا راز د ښه خدمتونو عرضه کولو لپاره مهم وبلل. هغه د سوداګرۍ او پانګونې اتاق د هېواد د سوداګرو، پانګه والو او خصوصي سکتور د غړو ګډ کور وباله او ژمنه یې وکړه، چې د اتاق رهبري به د دغه سکتور د ستونزو هواري په موخه له اړوند حکومتي ادارو او د تېلو او اوبلن ګاز ټانک لرونکو  تخصصي کمېټې ترمنځ لازمه همغږي او همکاري رامنځته کړي ترڅو، هېواد کې د تېلو او ګاز ټانک لرونکو ننګونې راکمې او د خدمتونو عرضه کې ښه والی راشي.

ښاغلي خانجان الکوزي، د تېلو او مایع ګاز ټانک لرونکو له لوري د ښه او کیفیت لرونکو خدمتونو په ځانګړې توګه د هېواد لویو لارو کې د مسافرو او خلکو لپاره د تېلو او ګازو د عرضه کولو خدمتونو یادونه وکړه زیاته یې کړه: " د تېلو او اوبلن ګاز ټانک لرونکي د خصوصي سکتور عمده برخه تشکیلوي، چې  د دغه سکتور د خدماتو له عرضه کولو پرته د نورو سکتورنو فعالیت دوام ناممکن دی. "‏

محترم شفیق الله عطایي، د افغانستان د سوداګرۍ او پانګونې اتاق د تخصصي کمېټو د نقش په تړاو خبرې وکړې وې ویل:"د اتاق تخصصي کمېټې په دې موخه جوړې شوې، چې د خصوصي سکتور له بېلابېلو قشرونو او صنفونو تشکیل شوي او کولای شي د هغوی اړوند ټولې ستونزې او وړاندیزونه د اتاق د مشرتابه پلاوي پوسیله له اړوند حکومتي مسوولینو سره شریکې ، د حل او همدا راز د خدمتونو په عرضه کې ښه والي په موخه یې هڅې وکړي. "
‏
د تېلو او اوبلن ګاز ټانک لرونکو ټولنې رئیس ښاغلي ذبیح الله، د اتاق د تخصصي کمېټو په ټولګه کې  د تېلو او اوبلن ګاز ټانک لرونکو  تخصصي کمېټې شاملولو کې د اتاق د مشرتابه پلاوي له همکارۍ مننه او ستاینه وکړه، هیله مند شو، چې له اتاق سره همکارۍ او همغږۍ کې وکولای شي،د خپلو کارونو په وړاندې موجوده ستونزې حل کړي.

په پای کې، د دې کمېټې د ټاکنو ترسره کېدو پورې، ښاغلي،حاجي ذبیح الله د تېلو او اوبلن ګاز ټانک لرونکو  تخصصي کمېټې د مؤقت رئیس،حاجي مومن، حاجي مسعود او حاجي شاه رباني د مرستیالانو او الله محمد احمدزی د منشي په حیث وټاکل شول.

د افغانستان د سوداګرۍ او پانګونې اتاق او (دک هامز) مبلایل د یو لړ مراسمو په ترڅ کې د ښاغلي توکل احمدیار د افغانستان د سوداګرۍ او پانګونې اتاق عمومي ریس، محمد یونس مهمند د مدیره هیت لومړی مرستیال، خان محمد سرفراز باز د مدیره هیت د دارالانساء ریس، شیرین آغا سخی د مدیره هیت مالي ریس، خان جان الکوزی، آذرخش حافظی او ذکریا بریالی د مدیره هیت غړي، سید زمان هاشمی د اتاق عامل ریس، مایل آغا خیر خواه د نړیوال اتاق د مدیره هیت ریس، یو شمیر سوداګرو او پانګه اچوونکو په شتون کې د شنبه ورځ د تلې د میاشتې په ۲۶ نیټه د کابل سټار هوټل کې د فوټبال د غوره سیالیو ګټونکي او نایب ګټونکي ټیمونه په نقدي او غیر نقدي مرستو ونازول.

ښاغلي توکل احمدیار د افغانستان د ورزش سره د مرستې ډاډ ورکړ او وی ویل "موږ د افغانستان د ورزش ملاتړ کوو." برسیره پردی هغه یادونه وکړه چې راتلونکې کال به د افغانستان د ورزش سره لا ډیرې مرستی کوي.

ښاغلي سید زمان هاشمي په ورزش باندی د خصوصي سکتور مثتب رول ته په اشاری سره وویل "د کرونا ویروس له امله نږدی وه چې د افغانستان د فوټبال غوره سیالئ ترسره نه شي خو له نیکه مرغه، د خصوصي سکتور په ملاتړ د افغانستان د فوټبال د غوره سیالیو لړۍ په کامیابۍ سره پای ته ورسیده."

ښاغلي آذرخش حافظي د ورزش په ارزښت او د ورزش په مختلفو برخو کې د خصوصي سکتور د رول په اړه خبری وکړی او د خصوصي سکتور څخه يې وغوښتل چې په دی برخه کې پانګه اچوونه وکړي.

ښاغلي خان جان الکوزي ورزش سره د خلکو او ځوانانو لیوالتیا ته اشاره کولو ترڅنګ تاکید وکړ چې د خصوصي سکتور ملاتړ کولی شي چې د هیواد ورزش ته ملي او نړیواله کچه لوړتیا ورپه برخه کړي.

د یادولو وړ ده چې د افغانستان د سوداګرۍ او پانګونې اتاق سږ کال د "سیمرغ البرز" ټیم سپانسر کړ او دغه ټیم وکولی شول چې وروستیو پای لوبو ته لار پیداکړي او د ۱۳۹۹ کال د فوټبال د غوره سیالیو نایب ګټونکې شي.

په دی مراسمو کې، احمدیار ګروپ ۵۰۰ زره افغانۍ ګټونکي او ۵۰۰ زره افغانۍ نایب ګټونکي ټیم ته ډالۍ کړي.