د افغانستان د سوداګرۍ او پانګونې اتاق د مدیره پلاوي محترمو غړو خان جان "الکوزي" ، شیرین آغا "سخي" ، احمد ضیاء "عظیمي شینوزاده" ، د افغانستان د درملو د خدماتو ټولنې مسوولینو او غړو د روان کال د زمري مېاشت په 20مه نېټه د دوشنبې ورځ د مالیې وزارت د عوایدو عمومي مشر ښاغلي میروېس "بهیج" او د هغه وزارت له یو شمېر رییسانو سره ولېدل او د درملو د خدمتونو وړاندې کوونکو اتحادیې په شته ستونزو او حل لارو یې خبرې وکړې.

دغه ناسته کې د افغانستان د سوداګرۍ او پانګونې اتاق د مدیره پلاوي محترمو غړو د مالیې وزارت د عوایدو عمومي رییس او د هغه وزارت له مسوولینو سره د بیلانسونو او مالیاتي تصفیې برخو کې د یادې اتحادیې ستونزې شریکې او د حل برخه کې یې د مالیې وزارت د همکاریو غوښتنه وکړه.
 
د عوایدو عمومي رییس ښاغلي "بهیج" د افغانستان د سوداګرۍ او پانګونې اتاق د مدیره پلاوي غړو او د درملو د خدمتونو اتحادیې مسوولینو له لوري د مطرح شویو ستونزو له اورېدو وروسته ژمنه وکړه چې د سوداګرۍ او پانګونې اتاق سره په همکارۍ به یادې شوې ستونزې حل کړي.
 
نوموړي ټینګار وکړ چې ډېر ژر د خصوصي سکتور د ستونزو د حل په موخه د سوداګرۍ او پانګونې اتاق په غړیتوب یو تخصصي کمېټه جوړوي‌ ترڅو، د خصوصي سکتور ستونزې په همغږۍ او همکارۍ سره حل کړي.
 
سه شنبه، 21 زمري 1399‏

د افغانستان د سوداګری او پانګونی اتاق او د صاحبي د مالي خدمتونو شرکت (SFS) د مالي خدمتونو،د مالیاتي قوانینو تحلیل،د دولتي مالیاتي پالیسيو، پر خصوصي سکتور د دولت د مالیاتي پالیسیو اغیزو او مالیاتي شخړو د حل خدمتونو په موخه د همکاریو هوکړه لیک لاسلیک کړ.

د افغانستان د سوداګرۍ او پانګونې اتاق د عامل پلاوي رییس ښاغلي سید زمان "هاشمي" کابل کې د امریکا د متحده ‏ایالتونو د سفارت له مرستیالې مېرمن کرن"دیکر" او د دغه سفارت له اقتصادي کونسل ښاغلي الکس "هواکس"، د ملي ‏تدارکاتو ادارې مشر ښاغلي الهام عمر "هوتکي" د عامې روغتیا وزارت مرستیال او د نړیوال اتاق او د ښځو د سوداګرۍ ‏اتاق رییسانو سره د ملي تدارکاتو ادارې له لوري له خصوصي سکتور سره د چارچوبي تړونونو په اړه د ویډیو کنفرانس ‏له لارې خبرې وکړې‎.

په دغه ویدیو کنفرانس کې د خبرو ډیره برخه له خصوصي سکتور او اتاقونو سره د ملي تدارکاتو ادارې د چارچوبي ‏تړونونو د طرحې او ترتیب په اړه وه،چې د ملي تدارکاتو اداره په پام کې لري له دې وروسته د حکومتي ادارو د ‏ضرورت وړ تړونونه په ځانګړې ډول د عامې روغتیا وزارت د درملو،روغتیایي توکو، ضد غفوني او میکروب پاکوونکو ‏توکو تړونونه له هغو شمېر معتبر داخلي واجد شرایط شرکتونو سره لاسلیک کړي چې د اتاقونو د تاېید وړ هم وي‎.
 
ښاغلي "هاشمي" د حکومت د دې نوښت هر کلی وکړ او دا کار یې د خصوصي سکتور او اتاقونو د ملاتړ لپاره مهم ‏ګام وباله. هغه په شرایطو برابر تولیدي شرکتونو او حکومتي ادارو سره د اتاقونو د ښې همغږۍ مورد کې خپل مشخص ‏وړاندیزونه هم بیان کړل‎.
 
د اتاق د عامل پلاوي مشر ښاغلي"هاشمي" د خصوصي او عامه سکتور ترمنځ ښې همکارۍ او شراکت په موخه د ‏اړوندو ادارو له لوري د یوې عمومي او رڼې کړنلارې د رامنځته کولو ټینګار هم وکړ‎.‎
 
کابل کې د امریکا د متحدو ایالتونو د سفارت مرستیالې د حکومت له دغې طرح خوښي وښوده او زیاته یې کړه: هره ‏طرحه چې د افغانستان د خصوصي سکتور د ملاتړ او تقویت لامل کیږي، د امریکا سفارت یې د یو ښه شریک او همکار ‏په توګه ملاتړ کوي.‏
 
پنجشنبه د زمري 23 مه 1399‏