په واګه بندر کې د افغان سوداګرو د ستونزو د له منځه وړلو او لازمو آسانتیاو رامنځته کولو په موخه د افغانستان د سوداګرۍ او پانګونې اتاق مشرتابه د افغان-پاک ګډ اتاق له مشرتابه سره د لیندۍ په پنځمه لیدنه وکړه.

په دی غونډه کې د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د دارالانشاء ریس ښاغلي خان محمد سرفراز باز، د مدیره هیت غړيو هر یو خان جان الکوزي او آذرخش حافظي او د اتاق عامل ریس ښاغلي سید زمان هاشمي ګډون او خبری وکړی.

ښاغلي مهمند وویل "په وروستیو څو کلونو کې په سوداګریز ډګر کې د افغان-پاک ګډ اتاق هڅې د ستایلو وړ دي. او ددواړو هیوادونو د سیاسي مشرانو سفرونه د داوړو هیوادونو د وګړیو ترمنځ د لازیات باور او په سوداګریز ډګر کې د لازیاتو آسانتیاو د رامنځته کیدا سبب شوي دي."

ښاغلي خان جان الکوزي وویل"د تیرو کلونو په نسبت پاکستان ته د صادراتو او وارداتو کچه زیاته شوی ده خو بیا هم افغان سوداګر د یو لړ ستونزو او مشکلاتو سره لاس او ګریوان دي."

ښاغلي آذرخش حافظي د دواړو هیوادونو د سوداګرۍ د لاپیاوړتیا لپاره د پانګه اچوونې د یوې ګډې کمیټې د جوړیدا غوښتنه وکړه او زیاته يې کړه چې افغانستان د طبیعي سرچینو له پلوه یو غني هیواد دی او باید چې پاملرنه ورته وشي.

ښاغلي هاشمي دا ډول ناستې د سوداګریزو راکړو ورکړو او په دی لاره کې د شتو ننګونو د له منځه وړلو لپاره اړینې وبللې.

د افغان-پاک ګډ اتاق عمومي ریس ښاغلي زبیرمتی والا وویل"په افغانستان کې د امنیت نه شتون، د عدم پانګه اچوونې اصلي لامل دی. د سولې او امنیت په راتلو سره به افغانستان د بهرنیو پانګه اچوونکو کور جوړ شي او د افغانانو په ژوند کې به مثبت بدلونونه رامنځته شي."

نوموړي د سیمه ایزې سواداګرۍ د لاپیاوړتیا لپاره د افغانستان رول ډیر اړین وباله او زیاته يې کړه چی د افغانستان تازه میوې د نړۍ په بازارونو کې سیال نه لري او باید بهر ته د صادرولو زمینه ورته برابره شي.   

د مدني ټولنې مشرتابه د افغانستان سوداګرۍ او پانګونې اتاق کې د ښاغلي خان محمد سرفراز باز سره د لیدنې په ترڅ کې د هغه د ډیرو کلونو د هلو ځلو ستاینه وکړه.

په دی لیدنه کې د مدني ټولنې ریس ښاغلي فرید فضلي ژمنه وکړه، چې د دوه کلونو لپاره ۵۰ هغو اشخاصو ته د زدکړو زمینه برابروي، چې په هیواد کې دننه د زدکړو مالي توانایي نه لري.

ښاغلي باز هم د مدني ټولنې د ښو کړنو او د ولس غږ رسونې څخه د یادونې تر څنګ ژمنه وکړه، چې د د مدني ټولنې څخه به خپلې هیڅ ډول مرستې ونه سپموي او د اوونیزې خپرونې د پراختیا په موخه به هر اړخیزه همکاري کوي.   

د افغانستان د سوداګرۍ او پانګونې اتاق عامل ریس ښاغلي سید زمان هاشمي د سیاحتي شرکتونو له استازیو سره د لیدنې په ترڅ کې د ننګونو د له منځه وړلو او کاري فرصتونو رامنځته کولو په اړه خبری وکړی.

ددی غونډې ګډونوالو د زرګونه سیاحتي شرکتونو په استازولۍ خبری کولې او د اتاق د غړیتوب غوښتنه يې وکړه تر څو له دی لاری وکولی شي خپلو ستونزو ته د پای ټکې کیږدي.

ښاغلي هاشمي د سیاحتي شرکتونو له استازیو څخه وغوښتل چې د اتاق غړیتوب ترلاسه او سیاحتي نندارتونونه جوړ کړي تر څو خلک وکولی شي د دوی د خدماتو په اړه مالومات تر لاسه کړي.

په دغه غونډه کې د افغانستان د سوداګرۍ او صنعت وزارت سرپرست ښاغلي نثار احمد غوریاني، د پاکستان د سوداګرۍ وزیر رزاق داوود، د افغانستان د سوداګرۍ او پانګونې اتاق لومړي مرستیال ښاغلي یونس مهمند، د هیت مدیره غړي خان جان الکوزي، د ولسي جرګې غړو او د خصوصي سکتور فعالینو ګډون درلود.

ښاغلي رزاق داوود وویل "پاکستان د افغانستان سره د ښو سوداګریزو او ټرانزیټو اړیکو غوښتونکې دی، او په اسلام آباد او کابل کې زموږ لیدنو سوداګریزو راکړو ورکړو ته لار هوار کړی ده."

په پای کې داوړو لوریو د دوه اړخیزو بانکي، ګمرکي، ټرانزیټي او سوداګریزو ستونزو په اړه خبری وکړی او پریکړه وشوه، چې د توافق او همغږۍ اتمه غونډه به په اسلام آباد کې جوړه او دا توافق به نهایي کیږي.

د افغانستان د سوداګرۍ او پانګونې اتاق د تخنیک او پالیسۍ مرستیال ښاغلي شفیق الله عطايي په هغه غونډه کې چې د افغان ملي بیمې شرکت له خوا د بیموي خدماتو د معرفي کولو په موخه جوړه شوی وه، داسې وویل "بیموي خدمتونه د اقتصاد په وده او نمو کې مثبت رول لري." نوموړي د افغان سوداګرو په ځانګړي توګه د هغو شرکتونو څخه چې د اتاق غړیتوب لري، وغوښتل چې په هیواد کې د شته بیموي خدمتونو څخه ګټه پورته کړي، تر څو له یوې خوا د هیواد اقتصاد پیاوړې او له بلې خوا د دوی فعالیتونه د زیات باور څخه برخمن شي.

د افغان ملي بیمې شرکت استازي ښاغلي شاه محمد احمدزي د افغانستان د سوداګرۍ او پانګونې اتاق څخه د مننې تر څنګ وویل "د افغان ملي بیمې شرکت اساسي موخه د هیواد سوداګریزو شرکتونو او سوداګرو ته د بیموي خدماتو وړاندی کول دي. ښاغلي احمدزي زیاته کړه د افغان ملي بیمې شرکت ۱۷ ډوله مختلف بیموي خدمتونه چې روغتیايي، سفري او زیربنايي پکې شامل دي، وړاندی کوي."