د افغانستان د سوداګری او پانګونی اتاق عمومي ریس ښاغلي توکل احمدیار، د مدیره هیت لومړي مرستیال حاجي محمد یونس مهمند، د مدیره هیت د دارالانشاء ریس خان محمد سرفراز باز، د مدیره هیت د نړیوالو اړیکو ریس سید جاوید برهان، د مدیره هیت مالي ریس ښاغلي شیرین آغا سخي، د مدیره هیت غړيو هر یو خان جان الکوزي، آذرخش حافظي، عصمت الله وردک، ذکریا بریالي، محمد داود یوسفزي او حاجي محمد ګردیزي، او سید زمان هاشمي د اتاق عامل ریس د سه شنبه په ورځ د تلې د میاشتې په ۲۹ نیټه د اوکراین جمهوریت سوداګریز هیت، د نوموړي هیواد د سوداګرۍ اتاق، د اوکراین د اوبلن ګاز کمیټې استازي، او د نوموړي هیواد یو ستر پانګه اچوونکي سره د اتاق د کنفرانسونو تالار کې لیدنه وکړه او د دوه اړخیزو سوداګریزو او پانګه ایزو اړیکو په اړه يې خبری وکړی.

ښاغلي توکل احمدیار د اوکراین جمهوریت سوداګریز هیت ته د ښه راغلاست ویلو ترڅنګ؛ په افغانستان کې د پانګه اچوونې فرصتونو ته په اشاری سره وویل: "َښو سوداګریزو فرصتونو ته په کتو سره هیله لرم، چې د دواړو هیوادونو اتاقونه به وکولی شي، چې د ښو سوداګریزو اړیکو د ټیګښت په موخه هڅې وکړي."

د اوکراین سوداګریز هیت په افغانستان کې د پولټرۍ، د افغانستان د وچو او تازه میوو پروسس او اوکراین ته يې په صادرونه، افغانستان ته د اوکراین د درملو او فولادي صنایعو د واردونې په اړه، او د دواړو هیوادونو تر منځ د ګډ سوداګریز اتاق د جوړولو په هکله خپله لیوالتیا څرګنده کړه.

د افغانستان د سوداګری او پانګونی اتاق مشرتابه د افغانستان او اوکراین تر منځ د سوداګریزو اړیکو د ټینګښت په موخه د ګډ سوداګریز اتاق جوړیدل اړین وبلل او د هغه هوکړه لیک یادونه يې وکړه، چې په همدې موخه مخکی لاسلیک شوی وه. د همدی هوکړه لیک په اساس به ګډ سوداګریز اتاق پرانستل شي. ددی ګډ سوداګریز اتاق د جوړیدو وروسته به د دواړو هیوادونو سوداګریز هیتونه یو د بل هیوادونو ته سفر وکړي او د افغانستان او اوکراین په بازارونو کی به د شتو سوداګریزو فرصتونو نه په ګټې اخستنې سره د سوداګریزو اړیکو د لا پراختیا هڅې وکړي.