ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال او ښاغلي انجینر سید جاوید برهان، د اتاق د نړیوالو اړیکو رئیس، روسیې هېواد ته د خپل رسمي سفر په ترڅ کې، د محترم حاجي شرفالدین، د اتاق ارشد سلاکار، او د هېواد سوداګرو او پانګهوالو په ملتیا، د کراسنودار د سوداګرۍ او صنایعو اتاق د مشرتابه پلاوي سره ناسته وکړه.
یاده ناسته د دواړو اتاقونو د مشرتابه پلاوو ترمنځ د اقتصادي او سوداګریزو همکاریو د پیاوړتیا لپاره ترسره شوه. په ناسته کې د پانګونې د فرصتونو، دوه اړخیزې سوداګرۍ پراختیا، او د دواړو هېوادونو د سوداګرو ترمنځ د اړیکو د اسانتیا په اړه خبرې وشوې.
په دې ناسته کې دواړو خواوو په مهمو موضوعاتو لکه د افغانستان د کرنیزو محصولاتو د صادراتو زیاتوالی، د صنعتي تجهیزاتو د وارداتو اسانتیا، او د سوداګریزو اړیکو د پراختیا لپاره د دوامدارو اړیکو جوړولو په اړه بحث وکړ.
ښاغلي محمد یونس مهمند د افغانستان او روسیې ترمنځ د ستراتیژیکو اړیکو پر اهمیت ټینګار وکړ او څرګنده یې کړه چې د افغانستان د سوداګرۍ او پانګونې اتاق د دواړو هېوادونو د سوداګرو او پانګهوالو د ملاتړ ژمنه لري.
د اتاق لومړي مرستیال، په وروستیو درې کلونو کې د ټولو سیمو د امنیت تأمین، د کوکنارو د کر د مخنیوي، او په اداري فساد کې د پام وړ کموالي په برخه کې د مهمو لاسته راوړنو یادونه وکړه او دا یې د لویو پانګونو لپاره زمینه برابروونکې وبلله.
نوموړي د دواړو هېوادونو د سوداګرو ترمنځ د سوداګریزو اړیکو د زیاتوالي او د زیربنایي پروژو په ګډو پانګونو ټینګار وکړ او د کراسنودار د سوداګرۍ او صنایعو اتاق له مشرتابه یې وغوښتل چې په دې برخه کې همکاري وکړي.
ښاغلي مهمند، زیاته کړه چې اوسمهال افغانستان له نړۍ سره سوداګریزې اړیکې لري او له یو شمېر هېوادونو سره د هوايي دهلېزونو چارې فعالې دي. نوموړي غوښتنه وکړه چې دواړه هېوادونه دې په لوژستیک، ترانسپورت، د تازه او وچو مېوو صادراتو او وارداتو او همدارنګه د نفتو او ګازو په برخو کې یو بل سره همکاري وکړي.
ښاغلي انجینر سید جاوید برهان هم د دواړو هېوادونو ترمنځ د اقتصادي اړیکو د پراختیا پر اهمیت ټینګار وکړ او د ګډو پانګونو د زیاتوالي په برخه کې د افغانستان د سوداګرۍ او پانګونې اتاق د هر اړخیزې همکارۍ ډاډ ورکړ.
یاده ناسته د افغانستان او روسیې ترمنځ د اقتصادي او سوداګریزو همکاریو د پراختیا لپاره د متقابلې ژمنتیا څرګندوی وه او راتلونکو توافقاتو ته به زمینه برابره کړي.
پنجشنبه، د ۱۴۰۳ کال د لیندۍ ۲۲مه
