د افغانستان د سوداګرۍ او پانګونې اتاق د سوداګریزو اړیکو د پراختیا، د افغان سوداګرو لپاره د آسانتیاوو رامنځته کولو او په هېواد کې د پانګونې جلبولو په موخه، د جرمني لپاره د افغانستان له سفیر ښاغلي رولف رینارد سره ناسته د اتاق د مشرتابه په دفتر کې چې په شهرنو کې موقعیت لري، ترسره کړه.
په دې ناسته کې د اتاق د مشرتابه غړي، ښاغلو: توکل احمدیار، د اتاق عمومي رئیس؛ محمد یونس مهمند، لومړی مرستیال؛ خان محمد سرفراز باز، د مدیره پلاوي د دارالانشا رئیس؛ شیرین آغا سخي، د مدیره پلاوي مالي رئیس؛ انجینیر سید جاوید برهان، د مدیره پلاوي د نړیوالو اړیکو رئیس؛ خان جان الکوزی او ضیاءالدین اچکزی، د مدیره پلاوي غړي؛ میرزمان پوپل، د عامل پلاوي د مالي او اداري مرستیال سرپرست؛ محمد انور عارفي، د عامل پلاوي د پالیسۍ او تخنیکي مرستیال؛ عبدالمتین قلندري، د نظار هیات منشي او د غزني د سوداګرۍ او پانګونې اتاق رئیس؛همایون خواجه زاده دکابل ولايت اتاق تجارتی مرستیال، د تازه مېوې، قیمتي او نیمه قیمتي ډبرو د اتحادیو مشران؛ محمد صابر لطیفي، د افغانستان د نړیوالو نندارتونونو مرکز رئیس او د هېواد یو شمېر مخکښ سوداګر او پانګوال ګډون کړی و.
ښاغلي احمدیار، د جرمني سفیر او د ناستې ګډونوالو ته د ښه راغلاست ویلو ترڅنګ، د افغان خصوصي سکتور سره د جرمني د حکومت او سفارت د مرستو او همکاریو له امله د مننې څرګندونه وکړه. نوموړي، د خصوصي سکتور موجوده فرصتونه او ننګونې ښاغلي رینارد ته په تفصیل سره بیان کړې.
ښاغلي مهمند، جرمني د افغانانو لپاره یو ښه ملګری هېواد وباله او د دغه هېواد د خلکو او حکومت د اقتصادي عامه ګټو پروژو جوړولو په ځانګړي ډول د بلخ هوایي ډګر جوړولو او د کندز د لویې لارې بیا رغونې له امله مننه وکړه. نوموړي د اتاق د فعالیتونو، لاسته راوړنو او استازولیو په اړه جرمني سفیر ته معلومات وړاندې کړل او د دواړو هېوادونو ترمنځ د سوداګریزو او اقتصادي اړیکو پر پراختیا ټینګار وکړ.
د اتاق لومړي مرستیال د خپلې وروستۍ جرمني سفر په اړه معلومات وړاندې کړل او له سفیر څخه یې وغوښتل چې د افغان سوداګرو لپاره د ویزې صادرولو، د DMC او GIZ په څېر نړیوالو موسسو سره د خګ اتاق د اړیکو بیا پیل، او د جرمني د سوداګرۍ اتاق سره د اړیکو د لا ښه کولو په برخه کې لا زیاتې هڅې وکړي ترڅو د هغه په وینا، "د هوايي او ځمکنۍ لارې له لارې د دواړو هېوادونو ترمنځ صادرات او واردات پراخ کړو."
ښاغلي مهمند زیاته کړه: موږ له المان سره ښې اقتصادي اړیکې غواړو او د هېواد خصوصي سکتور په مونشن کې د افغان قونسلګرۍ د خدمتونو د وړاندې کولو هرکلی کوي او غواړي چې په بن او برلین کې هم د قونسلګرۍ خدمات فعال کړي.
ښاغلي مهمند، په افغانستان کې د ټولیز امنیت تأمین، د کوکنارو کر کیله منع کول او د اداري فساد د پام وړ کمښت د حکومت د تېرو درېیو کلونو مهمې لاسته راوړنې وګڼلې او د جرمني د پرمختللې تکنالوژۍ رول د افغانستان د لویو عامه پروژو په پرمختګ کې اړین وباله. هغه له جرمني سفیر څخه وغوښتل چې د افغانستان په معادن، د کرنې په میکانیزه کولو او د بانکي سیستم په عصري کولو کې د پانګونې لپاره د جرمني سوداګر وهڅوي.
د اتاق لومړي مرستیال د دې ډول ناستو اهمیت د سوداګریزو او اقتصادي اړیکو د ټینګښت او د دواړو هېوادونو د خصوصي سکتور د فرصتونو او ننګونو د شریکولو په برخه کې مهم وباله او د خصوصي سکتور او د جرمني سفارت ترمنځ د نورو ناستو پر ترسره کولو ټینګار وکړ. هغه په دې برخه کې د اتاق د هر اړخیزې همکارۍ ډاډ ورکړ.
ښاغلي سرفراز باز، د خصوصي سکتور د غړو او د جرمني سفارت د مشرتابه ترمنځ د نورو ناستو پر ترسره کولو ټینګار وکړ او له جرمني سفیر څخه یې وغوښتل چې د افغانستان او اروپايي هېوادونو په ځانګړې توګه جرمني ترمنځ د سوداګریزو او اقتصادي اړیکو د پراختیا په برخه کې لا زیاتې هڅې وکړي.
ښاغلي الکوزي د کارموندنې، اقتصادي ودې او د هېوادونو ترمنځ د اړیکو په ټینګښت کې د خصوصي سکتور رول اړین وباله او له جرمني سفیر څخه یې وغوښتل چې د افغانستان خصوصي سکتور سره د لا زیاتو مرستو ترڅنګ، د انساني ځواک د تېښتې د مخنیوي او د کارموندنې د زیاتوالي لپاره مرسته وکړي. هغه، د پاکستان له خوا د افغان صادراتي او وارداتي توکو پر وړاندې ستونزې د نړیوالو سوداګریزو قوانینو خلاف وګڼلې او له ښاغلي رولف یې وغوښتل چې د پاکستان سره په خپلو اړیکو کې له افغان سوداګرو سره د ستونزو په حل کې عملي ګامونه واخلي.
ښاغلی اڅکزی، د افغانستان او المان ترمنځ د سوداګریزو اړیکو پر پراختیا ټینګار وکړ او د المان له سفیر څخه یې وغوښتل چې د دواړو هېوادونو ترمنځ د خصوصی سکټور د اړیکو په پیاوړتیا او افغان سوداګرو ته د ویزو په ورکولو کې لا زیاته همکاری وکړی.
ښاغلي میرزمان پوپل، د افغانستان او جرمني ترمنځ د صادراتو او وارداتو په اړه معلومات وړاندې کړل او زیاته یې کړه چې د جرمني له خوا د افغان سوداګرو لپاره د ویزې نه ورکول د دواړو هېوادونو د سوداګریزو معاملو په کچه کې د پام وړ کموالی راوستی دی. هغه له جرمني سفیر څخه وغوښتل چې د افغان سوداګرو لپاره د ویزې په برخه کې لا زیاتې همکارۍ وکړي.
ښاغلي رولف، د خصوصي سکتور د ستونزو او ننګونو د شریکولو لپاره د اتاق له مشرتابه څخه مننه وکړه او ډاډ یې ورکړ چې د خصوصي سکتور سره به د سوداګریزو اړیکو د ښه کولو، د افغان متوسطو او کوچنیو متشبثینو د ملاتړ لپاره د لویو موسسو د هڅولو او د بې وزلو افغانانو سره د جرمني حکومت د مرستو د دوام په برخه کې به هڅې وکړي. هغه د افغانستان د خصوصي سکتور سره د جرمني د حکومت د ژمنتیا یادونه وکړه او د دواړو هېوادونو ترمنځ د اړیکو د پراختیا په اړه یې خبرې وکړې.
