ښاغلی محمد یونس مهمند، د افغانستان د سوداګرۍ او پانګونې اتاق لومړی مرستیال، لغمان ولایت ته د خپل کاري سفر په ترڅ کې، د لغمان ولایت له والي ښاغلي شیخ شیر احمد حقاني سره ولیدل. په دې لیدنه کې د لغمان د سوداګرۍ او پانګونې اتاق رئیس ښاغلی اباسین صافی، د دارالانشاء رئیس حاجي فدا محمد، د ننګرهار د سوداګرۍ اتاق د مشرتابه پلاوي غړی ډاکټر مخلص احمد، او د اتاق لوړپوړی سلاکار حاجي مجیب مراد هم شتون درلود.
په دې لیدنه کې د لغمان ولایت د سوداګرو د ستونزو په اړه خبرې وشوې. ښاغلي مهمند، د لغمان والي څخه د خصوصي سکتور ملاتړ، په ځانګړې توګه د سوداګرو د امنیت د ټینګښت له امله مننه وکړه او د لغمان د سوداګرو ستونزې یې ورسره شریکې کړې. هغه غوښتنه وکړه چې د لغمان سیند په څنډه کې د کبانو د روزنې لپاره د ځمکې وېش او د سوداګرو ستونزو ته جدي پاملرنه وشي. نوموړي، د لغمان د سوداګرو او د لغمان ولایت د مشرتابه ترمنځ د ګڼ شمېر غونډو پر جوړېدو ټینګار وکړ.
محترم حقاني، ښاغلي مهمند او د هغه ملګرو ته د ښه راغلاست ویلو ترڅنګ، په هېواد کې د دندو د رامنځته کولو او د اقتصاد د ودې په برخه کې د خصوصي سکتور مهم رول یاد کړ او د ځمکې وېش او د خصوصي سکتور د ستونزو د حل په برخه کې یې د خپل بشپړ ملاتړ ډاډ ورکړ. هغه له لومړي مرستیال څخه غوښتنه وکړه چې سوداګر د دې ولایت په بېلابېلو برخو کې پانګونې ته وهڅوي.
د دې سفر په څنډه کې، د اتاق لومړي مرستيال د لغمان د سوداګرۍ اتاق د مشرتابه پلاوي او پیژندل شوي سوداګرو سره په جلا ډول هم ولیدل او د هغوی ستونزې یې واورېدې.
د لغمان د سوداګرۍ اتاق رئیس ښاغلي اباسین صافی، د اتاق لومړي مرستیال ته هرکلی وکړ او د قرغیو په ولسوالی کې د صنعتي پارک نشتون او د اتاق د ودانۍ د جوړېدو په برخه کې یې خپلې ستونزې ورسره شریکې کړې. هغه له ښاغلي مهمند څخه غوښتنه وکړه چې د دې ستونزو د حل لپاره جدي ګامونه پورته کړي.
ښاغلي مهمند د لغمان د سوداګرۍ اتاق د مشرتابه پلاوي څخه د خصوصي سکتور د ملاتړ او د ستونزو د هواري له امله مننه وکړه او لغمان یې یو له هغو ولایتونو څخه یاد کړ چې د طبیعي زېرمو، زراعت، صنعت، ترانسپورت او مالدارۍ په برخو کې ځانګړی اهمیت لري. هغه د سراسري امنیت ټینګښت، د اداري فساد له منځه وړل او د کوکنارو کر د مخنیوي بریاوې د حکومت ستر لاسته راوړنې وګڼلې، چې د هېواد په کچه د پانګونې او سوداګرۍ د ودې لپاره ښه زمینې برابرولی شي.
د سوداګرۍ اتاق لومړي مرستیال د حکومت اساسي دنده د هغو سوداګرو لپاره د سوداګریزو اسانتیاوو رامنځته کول یاد کړل چې غواړي په هېواد کې پانګونه وکړي. نوموړي له ټولو سوداګرو وغوښتل چې له موجودو فرصتونو څخه ګټه واخلي او د کبانو د روزنې او مالدارۍ په برخو کې پانګونه وکړي. هغه د دې ولایت د سوداګرو ستونزو په حل کې د افغانستان د سوداګرۍ او پانګونې اتاق د بشپړې همکارۍ ډاډ ورکړ.
