د افغانستان د سوداګرۍ او پانګونې اتاق د افغان سوداګرو لپاره د لا زیاتو اسانتیاوو رامنځته کولو او د پانګونې د جلبولو په موخه د افغانستان لپاره د ازبیکستان له نوي سفیر ښاغلي اویبک عثمانوف سره په کابل ستار هوټل کې تعارفي غونډه ترسره کړه.
په دې غونډه کې د بهرنیو چارو وزارت سیاسي مرستیال ښاغلی شیر محمد عباس ستانکزی، د اتاق مشرتابه پلاوی، ښاغلو: محمد یونس مهمند د اتاق لومړی مرستیال، خان محمد سرفراز باز د مدیره پلاوي د دارالانشا رئیس، سید جاوید برهان د مدیره پلاوي د نړیوالو اړیکو رئیس، خان جان الکوزی، محمد داود یوسفزی، ذکریا بریالی، او ضیاالدین اچکزی د مدیره پلاوي غړي، میرزمان پوپل د اتاق مالي او اداري مرستیال سرپرست، یوسف مهمند د کندهار اتاق مشاور، عبدالقاسم امرخیل د وچو میوو اتحادیې رئیس، محمد صابر لطیفي د افغانستان د نندارتونونو مرکز رئیس او د هېواد یو شمېر سوداګر او پانګوالو ګډون کړی وو.
ښاغلي مهمند، د ازبیکستان د نوي سفیر او غونډې ګډونوالو ته ښه راغلاست ووایه. هغه د ازبیکستان د اوسني ولسمشر او مخکیني سفیر څخه د افغانستان د وارداتي او صادراتي مالونو د ترانزیتي اسانتیاوو او ویزې د اجرا په برخه کې د همکارۍ لپاره مننه وکړه او غوښتنه یې وکړه چې نوی سفیر دې د افغانستان او ازبیکستان ترمنځ په اقتصادي، فرهنګي، او ټولنیزو اړیکو کې د لا زیات پرمختګ لپاره هڅې وکړي، څو لویې اقتصادي پروژې په شریکه د افغان او ازبیک حکومتونو او خصوصي سکتور تر مشرۍ لاندې پر مخ یوړل شي.
د اتاق لومړي مرستیال، افغانستان او ازبیکستان د جنوبي اسیا او مرکزي اسیا ترمنځ د سوداګرۍ او ترانزیت د وصل نقطه وبلله او د دواړو هېوادونو ترمنځ د سوداګرۍ د لا زیاتو اسانتیاوو پر رامنځته کولو ټینګار وکړ. هغه د تېرو درې کلونو په ترڅ کې د دواړو هېوادونو د سوداګریزو توکو د تبادلې معلومات تشریح کړل او د ښاغلي عثمانوف څخه یې غوښتنه وکړه چې د دواړو هېوادونو د سوداګرۍ اتاقونو په ګډون یوه ګډه تجارتي کمیټه جوړه کړي، ترڅو د سوداګرو ستونزې حل او شخړې هوارې کړي.
ښاغلي مهمند، د خصوصي سکتور ستونزې د ویزې په صادرولو کې د چټکټیا نشتون، د ویزې صادرول د لنډې مودې لپاره، او د ازبیکستان خاورې ته د افغان نقلیه وسایطو د ننوتلو لپاره د زیات انتظار یادونه وکړه. هغه، افغانستان د سړکونو د ترانسپورت سازمان غړی یاد کړ او له ښاغلي عثمانوف څخه یې وغوښتل چې د افغان موټرچلوونکو لپاره اوږدمهاله ویزې، د افغان صادراتي مالونو لپاره په تم ځایونو، ګمرکونو، او رېل خطونو کې لا زیاتې اسانتیاوې برابرې کړي، ترڅو افغان صادراتي مالونه په چټکۍ سره چین، روسیې او قزاقستان ته انتقال شي.
د اتاق لومړي مرستیال، د دواړو هېوادونو ترمنځ په زونونو کې د ګډو نندارتونونو د جوړولو یادونه وکړه او دا یې د اقتصادي اړیکو په پراختیا کې مهم وباله. هغه د افغانستان او ټولې سیمې هېوادونو ترمنځ د اقتصادي او سوداګریزو اړیکو د پراختیا پر اړتیا ټینګار وکړ.
د بهرنیو چارو وزارت سیاسي مرستیال د ښاغلي عثمانوف د افغانستان لپاره د نوي سفیر په توګه د ټاکل کېدو مبارکي وویله او د دواړو هېوادونو ترمنځ د سوداګریزو، اقتصادي، ترانزیتي او سیاسي اړیکو د لا زیاتې پراختیا غوښتنه وکړه. هغه د افغانستان د بهرني سیاست تګلاره اقتصاد محوره وبلله او افغانستان یې د جنوبي اسیا او مرکزي اسیا ترمنځ د ترانزیت مرکز یاد کړ. هغه د بهرنیو چارو وزارت له لوري د ازبیکستان له نوي سفیر سره د هر اړخیزې همکارۍ ډاډ ورکړ.\
ښاغلي عثمانوف، افغانستان د ازبیکستان نږدې دوست او ورور هېواد یاد کړ او د اوسنیو فرصتونو په ګټه اخیستنې د دواړو هېوادونو ترمنځ د اقتصادي ودې، د سوداګریزو توکو د تبادلې د زیاتوالي، ګډو پانګونو، او د سوداګریزو اړیکو د پراختیا په برخه کې د خپلو هڅو ډاډ ورکړ. هغه ژمنه وکړه چې د انرژۍ د تولید، زیربنایی پروژو، په ځانګړي ډول د رېل پټلۍ، د ګازو د استخراج او نورو سکتوري برخو کې د افغان سوداګرو سره د ګډو پانګونو لپاره به هر اړخیزې اسانتیاوې برابرې کړي.
