ښاغلي شیرین آغا سخی د اتاق مدیره پلاوي مالي رئیس او ښاغلي خانجان الکوزي د اتاق مدیره پلاوي غړي، د محترم محمد انور عارفي د عامل پلاوي پالیسي او تخنیکي مرستیال، ښاغلي میر زمان پوپل د عامل پلاوي مالي او اداري سرپرست مرستیال، عبدالله دشتي د هرات د سوداګرۍ او پانګونې اتاق خدماتی مرستیال او د هېواد یو شمیر سوداګرو او پانګوالو په شتون کې له ښاغلي ډاکټر سید محمد خوانساري د ایران هېواد د داروپخش ډلې د مدیره پلاوي غړي او د دوی له ټیم سره د اتاق په مرکزي دفتر کې ولیدل او د ګډو پانګونو په اړه یې بحث او خبرې وکړې.
ښاغلي خوانساري، د ایران په هېواد کې د درملو د تولید او صادراتو په برخه کې د خپلې پانګونې یادونه وکړه او د افغانستان سوداګرۍ او پانګونې اتاق مشرتابه څخه یې د همکارۍ غوښتنه وکړه.
ښاغلي خانجان الکوزي، د ښاغلي خوانساري او د هغه ټیم ته هرکلی ووایه، ایران یې د افغانستان پخوانی ملګری او د دواړو هېوادونو د دیني، فرهنګي، اقتصادي او سوداګریزو ګډو ارزښتونو لرونکی هېواد یاد کړ او د دواړو هېوادونو ترمنځ په بېلابېلو برخو کې په ځانګړې توګه د کانونو، کرنې او انرژۍ په سکتورونو کې د ګډو پانګونو پر زیاتوالي ټینګار وکړ.
ښاغلي الکوزي، د دواړو هېوادونو ترمنځ د سوداګرۍ پر توازن یې ټینګار وکړ او له ایراني سوداګرو څخه یې وغوښتل چې په نړیوالو معیارونو برابر لوړ کیفیت لرونکي درمل افغانستان ته صادر کړي.
ښاغلي میر زمان پوپل، ګډونوالو ته د افغانستان د سوداګرۍ او پانګونې اتاق د فعالیتونو او لاسته راوړنو په اړه معلومات وړاندې کړل او په افغانستان کې د ایران د داروپخش ډلې د سوداګرو د پانګونې په برخه کې یې د هر اړخیزې همکارۍ ډاډ ورکړ.
ښاغلي پوپل، ایراني سوداګرو ته د " امام ابو حنیفه (رح) دریم ملي او نړیوال نندارتون " په اړه معلومات وړاندې کړل، چې په نږدې راتلونکي کې به د افغانستان د سوداګرۍ او پانګونې اتاق له لوري ترسره شي، او په یاد نندارتون کې یې د هغوی ګډون د دارو پخش محصولاتو د معرفي کولو او بازار موندنې لپاره ښه فرصت وباله.
