دغه لیدنه چې کابل کې د پاکستان په سفارت کې ترسره شوه، په کې د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د افغان-پاک ګډ اتاق رئیس ښاغلي خانجان الکوزی، د رخت سوداګرو ټولنې رئیس حاجي عبیدالله، د تازه میوو د ټولنې غړو او د خوست او ننګرهار یو شمېر سوداګرو ګډون کړی و.
په پیل کې ښاغلي محمد یونس مهمند د افغانستان د بهرنیو چارو وزارت د مسئولینو له توجه څخه مننه وکړه چې د خصوصي سکتور د مشرتابه پلاوي لپاره له بیلابیلو هیوادونو سره د ناستو زمینه برابروي او دغه ډول ناستې یې د دواړو خواوو د اړیکو په پراختیا کې مهم وبلل.
ورپسې، افغان سوداګرو په افغانستان کې د پاکستان سفیر سره بیلابیلې ستونزې او وړاندیزونه لکه: د سوداګریزو مالونو د بار وړونکو وسایطو لپاره د تګ راتګ سند په اړه، د پاکستان لخواه د افغانستان په تازه میوو او سبزیجاتو د لوړو ګمرکي تعرفو موضوع، په بندرونو کې د افغان سوداګرو د پیسو د انتقال په برخه کې ستونزې، په بندرونو کې د سوداګریزو اسنادو د پروسس لپاره د جلا غرفې جوړولو، او د ۲۱۲ ترانزیټي توکو په اړه چې په کراچۍ بندر کې پرې بندیز لګول شوۍ، مطرح کړل.
د پاکستان سفیر د ستونزو او وړاندیزونو د اورېدلو وروسته وویل چې د مطرح شویو موضوعاتو د حل لپاره باید د افغانستان د سوداګرۍ او پانګونې اتاق، ولایتي اتاقونو، افغان-پاک ګډ اتاق، په کابل کې د پاکستان سفارت او په ولایاتو کې د یاد سفارت قونسلګريو تر منځ همغږي رامنځته شي او د ستونزو د حل په برخه کې به هڅې دوام ولري.
سه شنبه، د زمری ۲۳ مه ١٤٠٣
