د افغانستان لپاره د کار نړیوال سازمان رئیس ښاغلي رامین بهزاد په داسی حال کې چې، د افغانستان د سوداګرۍ او پانګونې اتاق عامل پلاوي رئیس ښاغلي شفیق الله عطايي يې ملتیا کوله د هغو غرفو چې (ILO) يې مالي ملاتړ کړی وه او د نندارتون د نورو غرفو څخه لیدنه وکړه.

ښاغلي عطايي د کار نړیوال سازمان رئيس ته د ښه راغلاست ویلو ترڅنګ، د امام ابو حنیفه (رح) نندارتون، سوداګریز پیوستون کنفرانس، ګډون کوونکو سکتورونو او کورنیو تولیداتو په اړه معلومات ورکړل.

ښاغلي رامین بهزاد د نندارتون څخه د لیدنې په ترڅ کې، د اتاق د مدیره پلاوي سوداګریز مرستیال ښاغلي خیرالدین مایل احمدي سره جلا ناسته درلوده. ښاغلي مایل د اقتصادي موضوعاتو په اړه د خبرو کولو ترڅنګ زیاته کړه: ترڅو چې د افغانستان اقتصادي ودې او رغښت ته پام ونشي د خلکو ستونزې نه حل کیږي.
ښاغلي مایل احمدي د اقتصادي ودې، بیوزلۍ او بی روزګارۍ راکمولو برخه کې د نړیوالې ټولنې ملاتړ اړین وباله.

ښاغلي رامین بهزاد د اتاق د مشرتابه پلاوي څخه د ورته نندارتونونو د په لاره اچولو په پار مننه او ستاینه وکړه او ورته نندارتونونه يې د کورنیو تولیداتو پیژندګلوۍ، د هېواد اقتصادي پراختیا، د بهرنیو پانګوالو په افغانستان کې پانګه اچونې ته د هڅولو او کار موندنې برخه کې اړین وبلل.