د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک په داسی حال کې چې د اتاق مدیره پلاوي غړي ښاغلي احمد ضیاء عظیمي شینوزاده هم حضور درلود د میدان وردګ ولایتي اتاق له مشرتابه او د یاد ولایت له مطرح سوداګرو سره لیدنه وکړه.

د میدان وردګو ولایتي اتاق مشرتابه او سوداګرو په یاد ولایت کې د شته سوداګریزو او پانګه ایزو فرصتونو په اړه خبرې وکړې او د مرکزي اتاق له مشرتابه څخه يې وغوښتل چې د یاد ولایت سوداګرو او پانګوالو ته د لازمو آسانتیاوو رامنځته کولو برخه کې همکاري وکړي.

ښاغلي شینوزاده د میدان وردګو ولایت د هېواد په کچه یو له کرنیزو ولایتونو څخه وباله او په یاد ولایت کې په جوړیدونکي نندارتون کې يې د سوداګرو او پانګوالو له چمتووالي خبر ورکړ.
ښاغلي شینوزاده د یاد ستر نندارتون جوړولو برخه کې د مرکزي اتاق هر اړخیزه همکاري اړینه وبلله.

ښاغلي هوتک د میدان وردګو ولایتي اتاق مشرتابه او سوداګرو ته په مرکزي اتاق کې ښه راغلاست ویلو ترڅنګ، د دوی ستونزې واوریدې.
نوموړي د میدان وردګو ولایت سوداګرو او پانګه والو ستونزو حل او په یاد ولایت کې د نندارتون جوړیدو برخه کې د مرکزي اتاق د هر اړخیزې همکارۍ ډاډ ورکړ.

چهارشنبه، زمري ‍۱۱مه، ۱۴۰۲

د افغانستان لپاره د اروپايي اتحاديې شارژدافیر آغلې رفیلا لودیس په داسې حال کې چې د افغانستان د سوداګرۍ او پانګونې اتاق عمومي رئیس ښاغلي توکل احمدیار او د عامل پلاوي سرپرست رئیس ښاغلي میرویس هوتک يې ملتیا کوله، له دویم ملي او بین المللي نندارتون څخه لیدنه ترسره او د افغانستان د سوداګرۍ او پانګونې اتاق څخه يې د دغه ډول ستر نندارتون د جوړولو مننه وکړه.

ښاغلي توکل احمدیار د اروپایی اتحادیې شارژدافیر ته د امام ابوحنیفه (رح) د نندارتون بیلابیلې برخې تشریح کړې او د موضوع په اړه یې مفصل معلومات وړاندې کړل او له میرمن لودیس څخه یې دغه نندارتون ته د راتګ له امله مننه وکړه.
د افغانستان د سوداګرۍ او پانګونې اتاق عمومي رئیس په افغانستان کې د سوداګریزو اړیکو پر ښه والي او د ګډې پانګونې پر رامنځته کولو ټینګار وکړ او له مېرمن لودیس څخه یې وغوښتل چې د اړیکو د ټینګښت لپاره د سیمې او نړۍ د هېوادونو د هڅونې په برخه کې همکاري وکړي.

مېرمن رفېلا لوديس په دغه نندارتون کې له بېلابېلو څانګو او سکټورونو څخه د ليدنې پر مهال له يو شمېر نندارچيانو او د بېلابېلو سکټورونو له استازو سره خبرې وکړې او دا ډول نندارتونونه يې د کورنيو توليداتو د ودې، د سوداګرۍ د ودې او د کار موندنې په برخه کې مهم وبلل.

پنجشنبه، چنګاښ ۲۵مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د عامل پلاوي سرپرست رئیس ښاغلي میرویس هوتک په حضور کې، د هنګ له یو شمیر سوداګرو سره لیدنه ترسره او د دوی د ستونزو په اړه يې خبرې اترې وکړې.

ښاغلي ظفرالله عصمت د هنګ سوداګرو په استازولۍ د هنګ کرکیلې ستونزو او د صادراتو څرنګوالي په اړه د معلوماتو ورکولو په ترڅ کې وویل "د کرنې او مالدارۍ وزارت د یو رسمي مکتوب په ترڅ کې د هنګ سوداګرو څخه د تکتانې غوښتنه کړې ده چې دغې موضوع د هنګ سوداګرو ته ډیر شمیر ستونزې راولاړې کړي دي."
نوموړي د اتاق له مشرتابه وغوښتل چې یاده موضوع د کرنې او مالدارۍ وزارت سره د همغږې کولو ترڅنګ، د حل مناسبه لاره چاره ورته ولټوي.

ښاغلي مهمند د هنګ سوداګرو له وینا اوریدو وروسته، د هنګ سوداګرو ته د هنګ صادراتو برخه کې د لازمو آسانتیاوو په رامنځته کولو او د رامنځته شوې ستونزې حل برخه کې د خپلو هڅو ډاډ ورکړ.

یکشنبه، زمري ۸مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسې حال کې چې د اتاق د صادراتو د پراختیا او عامه اړیکو ډیپارټمنټونو مسؤلینو هم حضور درلود، د کابل د تازه مېوې له مارکېټ څخه لیدنه ترسره او د میوو د اتحاديې له غړو سره يې خبرې اترې وکړې.

د ميوو د اتحاديې غړو دغه مارکېټ ته د سوداګرۍ او پانګونې اتاق مدیره پلاوي لومړي مرستيال ته ښه راغلاست ووايه او د خپلو سوداګرو د ستونزو او ننګونو په اړه يې معلومات ورکړل. دوی د معیاري سړو خونو نشتوالی، د کافي اوبو او برېښنا نشتوالی، لوړه مالیه، د دغه مارکېټ د پلورونکو لوړه کرایه او یو شمېر نورې ستونزې خپلې عمده ستونزې وبللې او د افغانستان د سوداګرۍ او پانګونې اتاق له مشرتابه یې وغوښتل، چې د یادو ستونزو حل په موخه د تازه میوو سوداګرو او اړوندو دولتي ادارو ترمنځ همغږي رامنځته کړي څو شته ستونزې هوارې شي.  

ښاغلي مهمند د تازه مېوو د اتحادیې د غړو د خبرو اورېدو وروسته د هغوی ستونزې تائید کړې او د ستونزو د حل په موخه يې د تازه میوو سوداګرو او اړوندو دولتي ادارو تر منځ د همغږۍ د رامنځته کولو يې ډاډ ورکړ.  

د اتاق لومړي مرستیال د مېوو اتحادیې له رهبرۍ وغوښتل چې خپلې ټولې ستونزې په لیکلې بڼه د سوداګرۍ او پانګونې اتاق ته وړاندې کړي، څو د حل لپاره یې عملي ګامونه پورته شي.  وشي. نوموړي د شته ننګونو د حل په موخه د تازه مېوې د مارکېټ له ټولو څانګو څخه د پنځو کسانو د کمېټې پر جوړېدو ټینګار وکړ.

یکشنبه، زمري ۸مه، ۱۴۰۲