د افغانستان د سوداګرۍ او پانګونې اتاق مدیره پلاوي دارلانشاء رئيس ښاغلي خان محمد سرفراز باز، د عامل پلاوي پالیسۍ او تخنیکي مرستیال ښاغلي محمد انور عارفي، د عامل پلاوي مالي او اداري مرستیال ښاغلي میرزمان پوپل، د عامل پلاوي حقوقي سلاکار ښاغلي عبدالسلام کوهي، د عامل پلاوي مالي مفتش ښاغلي امانت خان ذمه وار او د اړوندو ډيپارټمنټونو مسؤلینو سره ناسته ترسره او د خصوصي سکتور لپاره د لا زیاتو خدماتو وړاندې کولو په اړه یې خبرې او د نظر تبادله ترسره کړه.

ښاغلي سرفراز باز، د خصوصي سکتور غړو ته د ښو خدماتو وړاندې کولو، د سوداګرو ستونزو حل او د اتاق د اساس نامې په رڼا کې د اتاق د عامل پلاوي د کار، ژمنتیا، رښتینولۍ او نورو اړونده کړنو ستاینه وکړه؛ او له مسئولینو یې وغوښتل چې په اتحاد او اتفاق خپلې سپارل شوې چارې پر مخ بوځي او خصوصي سکتور ته ښه خدمات وړاندې کړي.

ښاغلي محمد انور عارفي، د سوداګرو لپاره د خدماتو وړاندې کولو او اسانتیاوو رامنځته کولو په برخه کې د اتاق کاري برنامې په تفصیل سره تشریح کړې او د ورځنیو چارو په ترسره کولو کې د اصولو پابندۍ او پلي کېدو ته خپل تعهد د دارالانشاء رئیس ته ډاډ ورکړ.

ښاغلي میرزمان پوپل، د عوایدو د لوړولو، نندارتونونو د تنظیمولو او له نړیوالو موسسو سره د کاري اړیکو د ښه کولو په برخه کې د مالي او اداري معاونیت اړوند کاري راپور وړاندې کړ او په دی برخه کې یې د اتاق د مشرتابه پلاوي د هر اړخیزو همکاریو غوښتنه وکړه.

همدارنګه، حقوقي سلاکار، مالي مفتش او د اتاق د دیپارتمنټونو نورو آمرینو، د خپلو کاري موضوعاتو په اړه خبرې وکړې او د خصوصي سکتور ته د ښه خدماتو وړاندې کولو او د اساس نامې په رڼا کې یې د خپلو ورځنیو چارو د ترسره کولو څخه ډاډ ورکړ.

سه‌ شنبه، چنګاښ ۱۲مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، له محترم انجنیر ویس‌الله صدیقي، د رسالت ذهن موسسې رئیس او د دوی همکارانو سره ولیدل او د دوی د کاري طرحو او برنامو په اړه یې خبرې واورېدې.

ښاغلي صدیقي، د "ماهر کارګر ډیر امتیاز" په نامه د یادې موسسې طرحې په اړه معلومات وړاندې کړل، ویې ویل: د کارموندنې رامنځته کولو او د زده‌ کوونکو او د تعلیمي بنسټونو محصلینو مسلکي مهارتونو لوړولو په موخه، د رسالت ذهن موسسې یوه طرحه جوړه کړې چې له مخې یې محصلین او ځوانان د تخنیکي او مسلکي درسونو په زده‌ کولو سره کولای شي چې د کورنیو فابریکو او صنعتونو په حرفوي کارونو کې برخه واخلي.

ښاغلي مهمند، د یادې طرحې اړوند خبرو او معلوماتو تر اورېدو وروسته، په دې برخه کې د ښکېلو ځوانانو د هڅو ستاینه او قدرداني وکړه او دا برنامه یې د افغانستان د خلکو لپاره په کورني صنعت سکتور کې د اړینو تخصصونو او مهارتونو د لوړولو په برخه کې یو بنسټیزه اړتیا وبلله.

نوموړي، د پورته ذکر شوې طرحې د پلي کېدو او د سکتوري ادارو د همکارۍ ټینګار تر څنګ، د افغانستان د سوداګرۍ او پانګونې اتاق د ملاتړ ډاډ هم ورکړ.

دوشنبه، چنګاښ ۱۱مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق خدماتي مرستیال ښاغلي نصیر احمد عرب، د اتاق دارلانشاء رئیس ښاغلي خان محمد سرفراز باز، د اتاق نړیوالو اړیکو رئیس ښاغلي انجنیر سید جاوید برهان، د اتاق مدیره پلاوي غړي ښاغلي خان جان الکوزي، د کابل سوداګرۍ اتاق لومړي مرستیال ښاغلي احمد شاه حکیمي او د مرکزي اتاق عامل پلاوي پالیسۍ او تخنیکي مرستیال ښاغلي محمد انور عارفي د افغانستان لپاره د ایران سفارت سوداګریز چاروال ښاغلي حسین روستايي سره لیدنه ترسره او د خصوصي سکتور سره یې د دوی د همکاریو ستاینه وکړه.

ښاغلي مهمند ښاغلي روستايي ته د ښه راغلاست ویلو ترڅنګ، ایران هیواد د افغانستان یو زوړ دوست او ديني، کلتوري او همدارنګه ښې تجارتي - اقتصادي او ترانزیټي اړیکې لرونکی بولي او د دوی د کاري مودې په جریان کې له افغانستان د خصوصي سکتور سره د همکارۍ په ځانګړې توګه د دواړو هیوادونو ترمنځ د تجارت پراختیا، ګډو نندارتونونو د جوړولو او تجارتي ستونزو د حل په برخه کې د دوی د همکاریو ستاینه کوي او د افغانستان د ملي ګټو په ساتلو سره له سیمه ایزو او نړیوالو هیوادونو په ځانګړې توګه له ګاونډیو هیوادونو سره د ښو تجارتي - اقتصادي اړیکو د پیاوړتیا غوښتنه کوي.

د اتاق لومړي مرستیال، د افغانستان د صادراتي توکو په وړاندې د ایران هیواد لخوا د ترجیحي تعرفو پر وضع کولو ټینګار وکړ او د ښاغلي روستایي څخه یې د دواړو هیوادونو ترمنځ د صادراتو او وارداتو بیلانس په برخه کې د همکارۍ غوښتنه وکړه.

محترم نصیر احمد عرب، خان محمد سرفراز باز، سید جاوید برهان او خانجان الکوزی، هم د افغان - ایران تاجران ترمنځ د تجارتي راکړې ورکړې د پراختیا په برخه کې د ایران سفارت له همکاریو او د افغانستان د خصوصي سکتور لپاره د ویزې په برخه کې د آسانتیاوو د رامنځته کولو له کبله مننه وکړه او د دواړو هیوادونو ترمنځ د تجارتي او اقتصادي اړیکو د لا زیاتې پراختیا لپاره یې پر همکاریو ټینګار وکړ.

ښاغلي روستایي، د افغانستان د سوداګرۍ او پانګونې خونې د رهبرۍ هیئت د ملاتړ او هڅونې په اړه د همکارۍ له کبله مننه وکړه او د دواړو هیوادونو د سوداګرو ترمنځ د تجارتي اړیکو د پیاوړتیا او د نندارتونونو د جوړولو په برخه کې یې ټینګار وکړ.

دوشنبه، چنګاښ ۴مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د ښاغلي پاینده محمد، چې په هرات ولایت کې د خیمو تولیدي شرکتونو استازی دی ملاقات وکړ او د دوی د ګمرکي ستونزو په اړه یې خبرې وکړې.

ښاغلي پاینده محمد د خپلو عمده ستونزو په اړه خبرې وکړې چې د خامو موادو د وارداتو په ګمرکي محصولاتو کې زیاتوالی دی، کوم چې د خیمو په تولید کې کارول کیږي او داخلي شرکتونه د دې په تولید کې د کافي مقدار توان نه لري. هغه له لومړي مرستیال څخه وغوښتل چې د دې ستونزو په حل کې ورسره مرسته وکړي.

ښاغلي مهمند، د خیمو تولیدي شرکتونو استازو ته د ښه راغلاست په ویلو سره، د افغانستان د سوداګرۍ او پانګونې اتاق د ټولو سوداګرو او پانګوالو ګډ کور وبللو او د اتاق له هر اړخیزې همکارۍ څخه یې ډاډ ورکړ. هغه د ګمرکي مقاماتو سره په تلیفوني خبرو کې د دوی ستونزې مطرح کړې او د خیمو تولیدي شرکتونو د خامو موادو د وارداتو ستونزو په حل کې یې د هغوی د همکارۍ غوښتنه وکړه.

یکشنبه، چنګاښ ۱۱مه، ۱۴۰۳