د افغانستان د سوداګرۍ او پانګونې اتاق عامل پلاوي رئیس ښاغلي شفیق الله عطايي د اتاق د نړیوالو اړیکو ډیپارټمنټ مسؤل ښاغلي امید غفورزي او د افغان – پاک ګډ اتاق اجرائیوي رئیس ښاغلي نقیب الله صافي په ملتیا د پاکستان د اتاقونو فدارسیون له استازي ښاغلي مولانا امان الله حقاني سره د لیدنې په ترڅ کې، په خیبر پښتونخوا ایالت کې د ګډو نندارتونو د په لاره اچولو او سوداګرۍ پراختیا په اړه خبرې وکړې.

 

په دی ناسته کې د نندارتون د په لاره اچولو او د پاکستان د اتاقونو فدارسیون او د افغانستان د سوداګرۍ او پانګونې اتاق ترمنځ د ګډو تخنیکي همکاریو او دا چې یاد نندارتون له هر پلوه ډیر ښه او د دواړو هېوادونو د سوداګرو په پراخ ګډون سره ترسره شي خبرې وشوې او په ګډو همکاریو ټینګار وشو.

 

همدارنګه، په یاده ناسته کې، د سوداګرۍ او پانګه اچونې پراختیا، د دواړو هېوادونو سوداګریزو ستونزو حل، سوداګریزو ناستو او کنفرانسونو جوړولو او د دواړو هېوادونو د سوداګرۍ او پانګه اچونې په لاره کې د شتو ستونزو په حل ټینګار وشو.

د افغانستان د سوداګرۍ او پانګونې اتاق مشرتابه پلاوي په پکتیا، پکتیکا او خوست ولایتونو کې د وروستۍ زلزلې ځپلو سره د مرستو په موخه د دولت د اضطرار کمېټې ته ټولټال ۳۰ میلیونه افغانۍ چې ۱۳ میلیونه د مرکزي اتاق د مشرتابه پلاوي، لس میلیونه د کندهار اتاق مشرتابه پلاوي او پاتی برخه يې د بلخ، هرات، کندز او نورو ولایتونو لخوا وقف شوې وه، د رسنیو او سوداګرو په حضور کې د دولت د اضطرار کمېټې ته وسپارل شوې.

 

د سپارښتې په دی مراسمو کې د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د اضطرار کمېټې رئیس ښاغلي مولوي شرف الدین مسلم، د افغانستان د سوداګرۍ او پانګونې اتاق پانګه ایز مرستیال ښاغلي سلطان محمد صافي، د اتاق د مدیره پلاوي مالي رئیس شیرین آغا سخي، د عامل پلاوي رئیس ښاغلي شفیق الله عطايي، د ګمرکونو عمومي رئیس ښاغلي عبدالمتین سعید، د ریاست الوزرا اقتصادي معاونیت استازي ښاغلي خاورین، د اتاق د مدیره پلاوي غړیو هر یو ښاغلي خان جان الکوزي، ذکریا بریالي او جان آقا صادقي، د کندهار اتاق مدیره پلاوي سرپرست رئیس ښاغلي مسعود راحت، د اتحادیو رئیسانو، سوداګرو او رسنیو ګډون درلود.

 

ښاغلي مهمند زلزله ځپلو ته د دعا او ملمنو ته د ښه راغلاست ویلو ترڅنګ، وویل "د افغانستان د سوداګرۍ او پانګونې اتاق د پېښې په لومړۍ ورځ د پکتیکا، خوست او پکتیا ولایتونو له زلزله ځپلو سره خپلې مرستې اعلان کړې. هغه زياته کړه، چې د مرستو په راټولولو او رسولو کې د مرکزي اتاق او نورو ولايتي اتاقونو پر مشرتابه سربېره يو شمېر خصوصي شرکتونو، بېلابېلو اتحاديو او سوداګرو هم برخه اخيستې ده."

 

ښاغلي مهمند وویل "اتاق د مرستو د لیږد په او انسجام په موخه پریکړه وکړه چې راټولې شوې پیسې دې اضطرار کمیټې ته ورکړي چې د زیانمنو د بیړنیو اړتیاوو په پام کې نیولو سره یې وویشي. نوموړي د سوداګرو د ستونزو د حل په برخه کې د بېلابېلو ادارو له همکارۍ څخه د مننې ترڅنګ د ګمرکونو له عمومي رياست څخه وغوښتل، چې د سوداګرو د ګمرکي ستونزو په حل کې د لا زياتو اسانتياوو په رامنځته کولو سره همکاري وکړي.

 

ښاغلي سلطان محمد صافي وویل "هرکله چې زموږ ولس له ستونزو او طبيعي پېښو سره مخ شوی، اتاق او سوداګرو د خپلو هېوادوالو مرستې ته مټې رابډ وهلي. د وروستۍ زلزلې په اړه له بېړنۍ غونډې او د مرستو د چمتووالي له اعلان وروسته د اتاق مشرتابه پلاوي زیانمنو سیمو ته سفرونه وکړل او د زلزله ځپلو سیمو له ارزونې وروسته دې پایلې ته ورسېدل چې له زیانمنو او اړمنو سره به خپلې مرستې د اضطرار کمېټې له لارې ترسره کوي.

 

ښاغلي عطايي وویل "د پورتنیو مالي مرستو سربیره، د هیواد له ګوټ ګوټ څخه خصوصي شرکتونو، بنسټونو او د اتاق د غړو اتحادیو لسګونه میلیونه افغانۍ راټولې کړِي او زیانمنو سیمو ته یې انتقال کړې دي."

نوموړي د اضطرار له کمېټې وغوښتل، چې د خلکو د اړتياوو له مخې دې مرستو ته لومړيتوب ورکړي او ورته يې ورسوي.

 

ښاغلي خان جان الکوزي د اتاق، خصوصي سکتور د بېلابېلو شرکتونو، بنسټونو او د اتاق غړو اتحادیو له لارې د مرستو په اړه معلومات ورکړل او هیله یې څرګنده کړه، چې دغه مرستې به تر ټولو اړمنو کسانو ته ورسېږي.

محترم مولوي شرف الدین مسلم د دې غونډې له تنظیمولو او د پکتیکا، خوست او پکتیا ولایتونو د وروستیو زلزله ځپلو کورنیو لپاره د مرستو د راټولولو له امله مننه او قدرداني وکړه او ویې ویل "په داسې حالاتو کې د خصوصي سکتور مرستې خورا مهمې او ارزښتناکې او د قدر وړ دي. او موږ هڅه کوو چې دا مرستې په ښه توګه اړو کسانو ته ورسوو."

 

دغه راز په دغه کنفرانس کې محترم خاورین او عبدالمتین سعید د اتاق له مرستو مننه وکړه او ډاډ یې ورکړ چې د سوداګرو ستونزې به په ځانګړې توګه د هېواد په ګمرکونو کې حل شي.

ښاغلي مسعود راحت د کندهار ولایتي اتاق د مشرتابه پلاوي او سوداګرو د مرستو یادونه وکړه او د اضطرار کمېټې رئیس ته یې د څه دپاسه لس میلیونه افغانیو نغدي چک ډالۍ کړل.

 

د دغه کنفرانس په پای کې د څه باندې دیارلس میلیونه افغانیو نغدي چک د اتاق عامل پلاوي رئیس ښاغلي شفیق الله عطايي له خوا لاسلیک او د اضطرار کمېټې رئیس ښاغلي مولوي شرف الدین مسلم ته وسپارل شو.

د افغانستان د سوداګرۍ او پانګونې اتاق مدیره پلاوي نړیوالو اړیکو رئیس ښاغلي انجنیر سید برهان او د عامل پلاوي رئیس ښاغلي شفیق الله عطايي د یوناما دفتر له سلاکار ښاغلي اسکاټ اسمیت سره په مرکزي دفتر کې د لیدنې په ترڅ کې، د خصوصي سکتور ننګونو او ګډو همکاریو په اړه خبرې اترې وکړې.

 

په یاده ناسته کې، د سوداګرۍ او پانګه اچونې په لاره کې د پرتو خنډونو او د خصوصي سکتور د ودې او ملاتړ په اړه خبرې وشوې.

 

ښاغلي برهان ښاغلي اسمیټ ته د ښه راغلاست ویلو ترڅنګ، د سوداګرۍ او پانګه اچونې برخه کې شتو ستونزو ته اشاره وکړه او د خصوصي سکتور له فعالیتونو څخه يې د نړیوالۍ ټولنې ملاتړ اړین وباله.

ښاغلي عطايي د اتاق د فعالیتونو په اړه د مالوماتو وړاندی کولو ترڅنګ، د خصوصي سکتور د فعالیتونو په وړاندی د ځینو خنډونو یادونه وکړه او په هېواد کې د ښه امنیتي وضعیت، اداري فساد نه شتون، صادراتو ودې، د کان ویستنې او خصوصي سکتور لاسته راوړنو په اړه خبرې وکړې.

 

نوموړي د بیخ بنسټیزه پروژو تطبیق، خصوصي سکتور ودې او ګډو همکاریو برخه کې د نړیوالې ټولنې همکاري اړینه وبلله. همدارنګه ښاغلي عطايي د کنګل شویو پیسو خلاصون، د هېواد څخه دباندی د پیسو لیږد ستونزو حل، خصوصي بانکونو غښتلتیا او د کوچنیو او منځنیو تشبثاتو څخه د ملاتړ غوښتنه وکړه.

 

ښاغلي اسمیټ او ورسره ټیم یې د اتاق د مشرتابه پلاوي د وړاندیزونو او نظرونو اوریدو وروسته، ژمنه وکړه چې دی ډول ناستو به دوام ورکوي او د اتاق په همکارۍ سره به شتو ستونزو ته د حل مناسبې لارې چارې پیدا، سوداګرۍ ودې او د خصوصي سکتور ملاتړ برخه کې همکاري وکړي.

د افغانستان د سوداګرۍ او پانګونې اتاق عامل پلاوي رئیس ښاغلي شفیق الله عطايي، د عامل پلاوي مالي او اداري مرستیال ښاغلي میرویس هوتک، د نړیوالو اړیکو، سوداګرۍ او پالیسۍ خدماتو او عامه اړیکو ډیپارټمنټونو مسؤلینو د سپارک سازمان له رئیس ښاغلي دیپوت سره د لیدنې په ترڅ کې، د ګډو همکاریو په اړه خبرې وکړې.

 

ښاغلي دیپوت د سپارک سازمان د فعالیتونو په اړه چې د ۱۴ جنګ ځپلو هېوادونو د ځوانانو د حرفوي زده کړو، وړیتا لوړونې او د کوچنیو تشبثاتو د ملاتړ پروژې تطبیق برخه کې یو ملاتړی بنسټ دی، معلوماتو وړاندې کولو ترڅنګ، وویل "که چیري اتاق هم د ورته پروژو تطبیق په پام کې لري، د سپارک سازمان چمتو دی چې د اتاق سره د یادو پروژو تطبیق او مالي ملاتړ برخه کې همکاري وکړي.

 

ښاغلي عطايي ښاغلي دیپوت ته د ښه راغلاست ویلو ترڅنګ، د اتاق د فعالیتونو په اړه معلومات وړاندی کړل او د یاد سازمان د پروګرامونو هرکلی يې وکړ.

 

ښاغلي عطايي زیاته کړه "که چیرې د سپارک سازمان د وړتیا لوړونې، کوچنیو تشبثاتو زدکړې، بازار موندنې او نړیوالو مارکیټونو ته د لاسرسي برخه کې د اتاق ملاتړ وکړي، اتاق هم همکارۍ ته چمتو دی."

 

په یاده ناسته کې داسی موافقه وشوه چې، اتاق به خپلې د لاس لاندی ټولې پروژې او پروګرامونه د سپارک سازمان ته وړاندی کوي او نوموړی سازمان به د لومړیتوبونو په نظره کې نیولو سره د پروژو د تطبیق برخه کې همکاري کوي.

د افغانستان د سوداګرۍ او پانګونې اتاق مدیره پلاوي سوداګریز مرستیال ښاغلي خیرالدین مایل احمدي، د مدیره پلاوي غړیو هر یو محمد داود یوسفزی، محمد ګردیزي، سید پرویز سادات هوفیاني او احمد ضیاء عظیمي شینوزاده د سوداګرۍ او صنعت وزارت سرپرست وزیر ښاغلي نورالدین عزیزي په مشرۍ او د رئیس الوزرا لومړي معاونیت ځانګړي استازي، د اقتصاد وزارت معین، د ترانسپورټ وزارت استازي، د غزني د سوداګرۍ او پانګونې اتاق رئیس او د مرکزي اتاق د څارنې پلاوي منشي ښاغلي عبدالمتین قلندري، د بلخ اتاق رئیس ښاغلي آرش یونسی، د نیمروز اتاق رئیس ښاغلي عبیدالله نورزي، د اندخوی اتاق رئیس ښاغلي عبدالمجید نیازی، د میدان وردگ اتاق رئیس ښاغلي نورآغا ابراهیمی او د یو شمیر سوداګرو په ملتیا ازبکستان هېواد ته د یوه سوداګریز سفر په ترڅ کې، د سوداګرۍ پراختیا او ټرانسپورټي او ټرانزیټي ستونزو حل په اړه نظرونه تبادله کړل.

 

د دغه سفر په ترڅ کې د افغانستان لوړ پوړي سوداګریز پلاوي او د سوداګرۍ او پانګونې اتاق مشرتابه د ازبکستان د بېلابېلو سکتورونو له مسوولینو سره په څو جلا ناستو کې د افغان سوداګرو د ستونزو د حل په اړه خبرې وکړې.

 

ښاغلي خیرالدین مایل په دې کتنه کې چې د ازبکستان د بهرنیو چارو وزارت له استازي سره په ارګ کې جوړه شوې وه، د افغان سوداګرو په ځانګړې توګه د ازبکستان ویزو ته د افغان سوداګرو د لاسرسي په برخه کې د ستونزو یادونه وکړه او په دې برخه کې یې د لا زیاتو اسانتیاوو غوښتنه وکړه.

 

په بله ناسته کې د افغان پلاوي او په ازبکستان کې د مېشتو افغان سوداګرو ترمنځ د سوداګرۍ پر ستونزو خبرې وشوې. ښاغلي خیرالدین مایل د دغه سفر په چمتووالي او د سوداګریزو ناستو په ترسره کولو کې د صنعت او سوداګرۍ وزارت له همغږۍ خوښي څرګنده کړه او دغه ناسته یې د منځنۍ اسیا له هېوادونو په ځانګړې توګه له ازبکستان سره د افغانستان د سوداګرۍ د پراختیا په برخه کې مهمه وبلله.

 

د دې ناستې په پای کې د سوداګرو ستونزې، نظرونه او وړاندیزونه د ښاغلي نورالدین عزیزي او لوړ پوړي افغان پلاوي له خوا واورېدل شول او ژمنه وشوه چې د ستونزو ته د مناسبو حل لارو پیداکولو کې به خپلې هیڅ ډول مرستې او همکارۍ ونه سپموي.