د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي نړیوالو اړیکو رئیس ښاغلي انجنیر سید جاوید برهان، د عامل پلاوي رئیس ښاغلي شفیق الله عطايي او د مدیره پلاوي غړي ښاغلي خان جان الکوزي په کابل کې میشت د ایران سفارت سوداګریزې آتشې ښاغلي دوکتور روستايي سره د لیدنې په ترڅ کې، د افغانستان او ایران ترمنځ په سوداګرۍ او پانګه اچونې او په دی برخه کې په شته فرصتونو او وړتیاوو خبرې اترې وکړې.

ښاغلي مهمند د سوداګریزې آتشې او ورسره پلاوي ته د ښه راغلاست په ترڅ کې د افغانستان او ایران ترمنځ د سوداګرۍ او پانګونې په اړه خبرې وکړې او وې ویل: د دواړو هېوادونو ترمنځ سوداګري او پانګونه د یوه واضح میکانیزم پر بنسټ نه ده، موږ باید هڅه وکړو چې د حل لاره پیدا کړو. چې افغان او ایراني سوداګر کولای شي په بېلابېلو برخو کې سوداګري او پانګونه وکړي. په همدې خاطر موږ غواړو چې په نږدې راتلونکي کې د افغانستان او ایران ترمنځ یوه ګډه خونه جوړه کړو.

ښاغلي عطايي د صادراتو او وارداتو په اړه خبرې وکړې او زیاته یې کړه: په تېرو پنځو کلونو کې له ایران سره صادرات او واردات له لوړوالي سره مخ دي. هغه زیاته کړه: افغانستان او ایران د سوداګرۍ په برخه کې یو پر بل متکي دي او د دواړو هېوادونو ترمنځ سوداګرۍ ته جدي اړتیا ده.

خانجان الکوزي د ایران او افغانستان د سوداګریزو اړیکو په اړه خبرې وکړې او ویې ویل: افغانستان تل له ایران سره سوداګرۍ ته لېواله دی او هڅه یې کړې چې د دواړو خواوو ترمنځ د سوداګرۍ بهیر ښه پرمخ ولاړ شي. هغه زیاته کړه، امنیت د سوداګرۍ او پانګونې د ودې لپاره اساسي اړتیا ګڼل کېږي، له نېکه مرغه نن افغانستان هر اړخیز امنیت لري او د پانګونې لپاره چاپېریال برابر شوی دی.

ښاغلي انجینر سید جاوید برهان د خپلو خبرو په ترڅ کې وویل: موږ له ایران سره د سوداګرۍ په برخه کې له ستونزو سره مخ یو، لکه د روښانه سوداګریزې کړنلارې نشتوالی، یو طرفه تجارت او یو شمېر نور. نوموړي د دغو ستونزو د حل غوښتنه وکړه.

ښاغلي روستايي د دواړو هېوادونو ترمنځ د سوداګریزو اړیکو د پراختیا په اړه خبرې وکړې او وې ویل: موږ هڅه کوو چې د افغان سوداګرو ستونزې هوارې کړو او لېواله یو چې له افغان سوداګرو سره د ټکنالوژۍ، طبي وسایلو، درملو او خوراکي توکو په برخو کې مرسته وکړو. هغه زیاته کړه، موږ ایراني شرکتونه هڅوو چې په تخنیکي برخه کې افغانستان ته فرصتونه برابر کړي، څو په دغه هېواد کې د ټکنالوژي بنسټیزه شي.

ښاغلي مهمند ژمنه وکړه چې د ایراني تولیداتو د نندارې لپاره به یو جلا صالون د ایراني چارواکو په واک کې ورکړو ترڅو د ایراني محصولاتو لپاره لازمه بازارموندنه ترسره شي.

د افغانستان د سوداګرۍ او پانګونې اتاق مدیره پلاوي پانګه ایز مرستیال ښاغلي سلطان محمد صافي، د مدیره پلاوي غړي ښاغلي ضیاءالدین اچکزي او د عامل پلاوي مالي او اداري مرستیال ښاغلي میرویس هوتک د لوګر ولایت سوداګرو او پانګه والو سره د مرکزي دفتر د ناستو په خونه کې لیده کاته وکړل.

د لوګر ولایت سوداګرو د سوداګرۍ او پانګونې په برخه کې د اتاق د مشرتابه له پرله پسې او نه ستړي کیدونکو هلو ځلو څخه د مننې ترڅنګ د سوداګرۍ او پانګونې په برخه کې د دغه ولایت ستونزې او ننګونې د اتاق له مشرتابه سره شریکې کړې. دوی په لوګر ولایت کې د افغانستان د سوداګرۍ او پانګونې اتاق د ولایتي څانګې د جوړېدو غوښتنه وکړه، څو په دغه ولایت کې د سوداګریزو خدمتونو اسانتیاوې برابرې شي.

ښاغلي سلطان محمد صافي د لوګر ولایت سوداګرو ته د ښه راغلاست پرمهال او د یادو سوداګرو د ستونزو له اورېدو وروسته د افغانستان د سوداګرۍ او پانګونې اتاق د هېواد د سوداګرو او پانګوالو ګډ کور وباله او د اتاق په استازولۍ يي په لوګر ولایت کې د ولایتي اتاق د جوړیدو په هکله وویل "د لوګر ولايتي اتاق تاسیس برخه کې موږ لازمې همکارۍ ته چمتو یو او ژمنه کوو چې چې دغه موضوع به ژر تر ژره د افغانستان د سوداګرۍ او پانګونې اتاق له مشرتابه سره شريکه کړي او په اړه به يې لازم تصميم ونيسي."

ښاغلي میرویس هوتک ژمنه وکړه چې د یاد اتاق د طرزالعمل، د اتاق د تشکيلاتي جوړښت، د مدیره  پلاوي د غړو د معرفي کولو او یو شمېر نورو مسایلو په اړه به لازمې لارښوونې له نوموړي سره شریکې کړي او هر ډول لازمې همکارۍ ته چمتو او ژمن دی.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي پانګه ایز مرستیال ښاغلي سلطان محمد صافي، د مدیره پلاوي د دارالانشاء رئیس ښاغلي خان محمد سرفراز باز، د مدیره پلاوي مالي رئیس ښاغلي شیرین آغا سخي، او د مدیره پلاوي غړيو هر یو ښاغلي خان جان الکوزي او احمد ضیاء عظیمي شینوزاده، د کابل سوداګرۍ او پانګونې اتاق لومړي مرستیال ښاغلي احمد شاه حکیمي د غالیو او جلغوزیو اتحادیو د مسؤلینو او د کام ایر او بشیر نوید ګروپ استازو په حضور کې په کابل کې د یوناما دفتر د پروګرامونو همغږۍ کوونکي ښاغلي آتول ګوپتا، د سیاسي کمېټې مدیرې آغلې داني بوګس او د یوناما دفتر د پروګرامونو چارو تنظیمولو مدیرې آغلې جولیني لینکي سره په کابل سرینا هوټل کې لیدنه وکړه او د ګډو همکاریو او د افغانستان خصوصي سکتور کې شته ننګونو په اړه خبرې اترې وکړې.

په دې کتنه کې د سوداګرۍ او پانګونې پر ستونزو او ننګونو، د کانونو په برخه کې د پانګونې د جلبولو، د افغانستان د منجمدو پیسو د خلاصون، د زیربناوو په جوړولو کې د مرستې ترلاسه کولو، د خصوصي سکتور د ملاتړ او په دې برخه کې د لازمو همکاریو په اړه خبرې وشوې.

ښاغلي مهمند د یوناما دفتر مسؤلینو ته د ښه راغلاست او د دغه دفتر د بشردوستانه مرستو د قدردانۍ په ترڅ کې په افغانستان کې د پانګونې د فرصتونو په ځانګړې توګه د کانونو په برخه کې یادونه وکړه.
نوموړي زیاته کړه "د ډبرو سکرو کانونه باید په معیاري ډول استخراج شي او د انرژي تولید لپاره وکارول شي او په دې برخه کې ستاسو تخنیکي مرستې ته اړتیا لرو. هغه زیاته کړه: د بشردوستانه مرستو ترڅنګ د صنعت د ودې لپاره د زیربناوو په جوړولو، د انرژۍ د تولید په برخه کې ستاسو مرستې ته اړتیا لرو، ترڅو افغانستان له یوه وارداتي هېواد څخه په صادراتي هېواد بدل کړو."

ښاغلي خانجان الکوزي په دې کتنه کې د خصوصي سکتور د ستونزو، د افغانستان بانکي ستونزو او د سوداګرو د پیسو د انتقال، د نړیوالې ټولنې له خوا د افغانانو د پیسو د بندیدو او افغان سوداګرو ته د ویزو د ورکړې په برخه کې د شته ننګونو په اړه خبرې وکړې. او د یوناما دفتر همکاري یې د حل په برخه کې مهمه وبلله.

ښاغلي خان محمد سرفراز باز د افغاني صرافانو د ستونزو یادونه وکړه او زیاته یې کړه: نن ورځ په سلو کې له ۹۰ څخه زیاتې پولي او سوداګریزې راکړې ورکړې د صرافانو د پیسو د خدمتونو له لارې ترسره کیږي. هغه د یوناما له مسؤلینو وغوښتل چې د صرافانو د ستونزو په حل کې همکاري وکړي.

ښاغلي آتول ګوپتا او ورسره ملګري ټیم د افغانستان خلکو ته د اقتصادي مسایلو او بشري مرستو پر اهمیت ټینګار وکړ او ویې ویل: د افغانستان اقتصادي مسایل تل زموږ لپاره لومړیتوب لري. موږ یواځی په بشردوستانه مرستو اکتفا نه کوو بلکې موږ د زیربنایي فعالیتونو د زیاتولو هڅه هم کوو.

آغلې داني بوګس او مېرمن جولیني لینکي په خپلو خبرو کې وویل: موږ د نړیوالې ټولنې په توګه تل هڅه کوو چې د افغانستان په مسئله کې له ښکېلو خواوو سره خبرې وکړو. تر څو يادو شويو ستونزو ته د حل ښې لارې چارې ولټوو.

د افغانستان د سوداګرۍ او پانګونې اتاق د هڅو او د صنایعو او سوداګرۍ وزارت د همکارۍ په پایله کې، له څو میاشتو ځنډ وروسته د کام ایر هوايي شرکت له لارې د جلغوزیو لومړۍ جوپه د لوړ پوړو دولتي چارواکو، د سوداګرۍ او پانګونې اتاق د مشرتابه، د جلغوزیو صادرونکو او د خصوصي سکټور د غړو په شتون کې د یوې خبري ناستې په ترڅ کې ولیږدول شوه.  

په دې اړه د کابل په نړيوال هوايي ډګر کې په جوړه شوې خبري غونډه کې، د ریاست الوزرا اقتصادي مرستیال ښاغلي ملا عبدالغني برادر، د سوداګرۍ او صنعت وزارت معین ښاغلي قدرات الله جمال، د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي پانګه ایز مرستیال ښاغلي سلطان محمد صافي، د مدیره پلاوي دارلانشاء رئیس ښاغلي خان محمد سرفراز باز، د مدیره پلاوي غړیو هر یو ښاغلي خان جان الکوزي، ضیاءالدین اچکزي او احمد ضیاء عظیمي شینوزاده، د عامل پلاوي مالي او اداري مرستیال ښاغلي میرویس هوتک، سوداګرو او د خصوصي سکتور غړیو ګډون درلود.

ښاغلي مهمند په دغه کنفرانس کې مېلمنو او اورېدونکو ته د ښه راغلاست په ترڅ کې د هوايی دهلیز له لارې چین ته د جلغوزیو د صادراتو له پیل څخه خوښي څرګنده او په دی برخه کې یې د صنعت او سوداګرۍ وزارت او اړوندو دولتي ارګانونو د همکارۍ او همغږۍ څخه مننه وکړه.  

ښاغلي مهمند د هوايي دهلېز له لارې صادرات د افغانستان د صادراتو د ودې په برخه کې یو مهم ګام وباله او زیاته يي کړه "اتاق هڅه کوي چې د سوداګرو او اړوندو دولتي ادارو په همغږۍ په روان کال کې د جلغوزو صادرات لس زره ټنو ته لوړ کړي."
هغه د صادراتو زیاتوالی د افغانۍ د ارزښت د ثبات لپاره مهم وباله او زیاته یې کړه "اتاق هڅه کوي چې د دولتي ادارو په همکارۍ بهر ته د جلغوزیو د قاچاق مخه ونیسي او د دې ترڅنګ د هوايي دهلېز سربیره د چین او د نړۍ نورو هېوادونو ته د ځمکې له لارې د جلغوزیو صادراتو ته لاره هواره کړي."

د اتاق لومړي مرستيال د خپلو خبرو په جریان کې زیاته کړه "له ښه امنيتي فرصت څخه په استفادې او په هېواد کې د فساد نه شتون صورت کې بايد هڅه وشي چې هېواد له ناسم اقتصاد څخه د باثباته او واقعي اقتصاد پر لور سوق کړی شي."
ملا عبدالغني برادر چین ته د جلغوزیو د صادراتو د بیا پیل هرکلی وکړ او د هوايي دهلیز له لارې یې د دغه بهیر دوام له چین سره د سوداګریزو اړیکو او د هېواد د اقتصادي ودې په برخه کې مهم وباله.
هغه وویل: د حکومت عالي اقتصادي شورا تل د باعزته سوداګرو او پانګوالو په خدمت کې ده او موږ ډاډ ورکوو چې د خصوصي سکتور رښتیني ملاتړي به یو.

ښاغلي برادر له چین سره د ازبکستان له لارې د افغانستان د سوداګریزې لارې د نښلولو په ځانګړي ډول د هوايي دهلېز د اهمیت یادونه وکړه او ویې ویل: هڅه کوو چې په نږدې راتلونکي کې له نورو هېوادونو سره هم هوايي دهلېزونه پرانیزو. هغه د سوداګرۍ او پانګونې لپاره د سترې اقتصادي شورا د مرستیال په توګه هم خپل کلک ملاتړ څرګند کړ.

ښاغلي قدرت الله جمال د افغانستان د سوداګرۍ او پانګونې اتاق له ګټورو هڅو او په دې برخه کې د کام ایر له همکاریو څخه مننه وکړه او د سوداګرۍ د ودې په برخه کې یې د دغه وزارت د همکاریو ژمنه وکړه او زیاته يې کړه چې، موږ غواړو چې د جلغوزيو صادرات د چين تر څنګ نورو هېوادونو ته هم زيات کړو.