د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د مدیره پلاوي پانګه ایز مرستیال ښاغلي سلطان محمد صافي او د مدیره پلاوي غړي ښاغلي خان جان الکوزي يې ملتیا کوله د آلماني شیر انسټیټوټ لخوا په جوړ شوي آنلاین کنفرانس کې د ګډون ترڅنګ، د هېواد د اوبو مدیریت، برښنا تولید، کرنې، روغتیا سیستم او د هېواد په اقتصادي پراختیا کې د خصوصي سکتور رول په اړه خبرې وکړې.

ښاغلي مهمند د دغه کنفرانس د جوړولو په پار د شیلر انسټیټیوټ څخه د مننې په ترڅ کې د هیواد د اقتصاد په وده او پرمختګ کې د انرژۍ د تولید د اهمیت په اړه معلومات وړاندې کړل او ویې ویل: د هېواد د اقتصادي ځان بسیاینې بنسټیز معیار د هېواد د اوبو او ډبرو سکرو څخه د برښنا تولیدول دي.

ښاغلي مهمند د تېر حکومت د نیمه بشپړو شویو پروژو پر تطبیق او د دغو پروژو د تطبیق لپاره د افغانانو د پیسو په ورکړې ټینګار وکړ او په دې برخه کې یې د نړیوالو بنسټونو د همکارۍ غوښتنه وکړه.

د شیلر انسټیټیوټ رئیسې مېرمن هیلګاه زیپ لیروچي د شیلر انسټیټیوټ د فعالیتونو په اړه د معلوماتو ورکولو پرمهال د افغانستان د طبیعي بډایه زیرمو یادونه وکړه او ویې ویل: د اوسني اقتصادي وضعیت د ښه والي لپاره د طبیعي زیرمو استخراج او ګټه اخیستنه اړینه ده  او باید په دې برخه کې کوټلي ګامونه پورته کړی شي.

آغلې هیلګا د قوش تپې کانال د کار د پيل د ستاينې ترڅنګ د هېواد د کرنې پر ميکانيزه کیدو او د معياري سړو خونو پر جوړولو ټينګار وکړ.

ښاغلو وحیدالله امین، کریم وطنوال، فاروق اعظم، داوود عظیمي او د شیلر انسټیټیوټ یو شمېر مسوولینو هم د پورتنیو موضوعاتو په اړه خبرې وکړې او خپل نظریات او وړاندیزونه یې څرګند کړل.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د مدیره پلاوي خدماتي مرستیال ښاغلي نصیر احمد عرب، د مدیره پلاوي نړیوالو اړیکو رئیس ښاغلي انجنیر سید جاوید برهان، د مدیره پلاوي غړیو هر یو ښاغلي خان جان الکوزي، ضیاءالدین اچکزي او عصمت الله وردګ، د غزني ولایتي اتاق رئیس او د مرکزي اتاق د څارنې پلاوي منشي ښاغلي عبدالمتین قلندري، د ننګرهار ولایتي اتاق رئیس ښاغلي ګل مراد عرب او د یاد اتاق مرستیال ښاغلي حضرت ولي هډه وال په ملتیا د افغانستان لپاره د ایران پخواني سفیر ښاغلي بهادر امینیان سره د اتاق په مرکزي دفتر کې لیدنه ترسره کړه.

دغه الوداع غونډه چې د افغانستان لپاره د ایران پخواني سفیر د کړنو د ستاینې په موخه جوړه شوې وه، ښاغلي مهمند د افغانستان د سوداګرۍ او پانګونې اتاق سره د دواړو هېوادونو ترمنځ د سوداګرۍ پراختیا، افغان سوداګرو لپاره د ویزو صدور برخه کې د لازمو آسانتیاوو رامنځته کولو او د ایران او افغانستان ترمنځ د دوستانه اړیکو غښتلتیا برخه کې د ښاغلي امینیان بې سارې هلې ځلې وستایلې.

ښاغلي مهمند په دوام کې د افغانستان او ایران ترمنځ د سوداګرۍ او پانګونې د اړیکو پر لا پراختیا، د زیربنایي سکتورونو په ځانګړي ډول د برېښنا تولید، د هېواد د کانونو استخراج، د ریل پټلۍ په جوړولو او کرنې کې د سوداګرۍ او پانګونې د بهیر پر چټکتیا ټینګار وکړ.

ښاغلي بهادر امینیان په خپلو خبرو کې د افغانستان د سوداګرۍ او پانګونې له خونې څخه د دغې غونډې د ترسره کولو له امله د مننې په څرګندولو سره، د دواړو هېوادونو ترمنځ د دوستانه اړیکو د ټینګښت او د لا ښه قونسلګرۍ د برابرولو په برخه کې د ایران د سفارت د همکاریو د دوام ډاډ ورکړ.
هغه زیاته کړه: په تیرو کلونو کې مو تل هڅه کړې چې د ایران د سفارت دروازې د افغانستان د ټولو خلکو پر مخ خلاصې وساتو او د افغانستان خلکو ته ورته خدمتونه وړاندې کړو. هغه ډاډ ورکړ چې ایران په راتلونکي کې له افغانستان سره د سوداګرۍ او پانګونې د پراختیا لېواله دی.

همدارنګه په دې کتنه کې محترم نصیر احمد عرب، انجنیر سید جاوید برهان، خانجان الکوزي او عبدالمتین قلندري د ښاغلي سفیر د دندو د قدردانۍ په ترڅ کې د دواړو هېوادونو ترمنځ د سوداګرۍ او ګډې پانګونې پر پراختیا ټینګار وکړ.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د عامل پلاوي مالي او اداري مرستیال ښاغلي میرویس هوتک يې ملتیا کوله د افغانستان د موبل و فرنیچر اتحاديې له رئیس ښاغلي محمد نعیم رحیمي او د یادې اتحاديې له یو شمیر غړیو سره د لیدنې په ترڅ کې د دوی د مالیاتي ستونزو په اړه خبرې اترې وکړې.

ښاغلي رحیمي د موبل و فرنیچر شرکتونو د مالیاتي چارو تصفیوي ستونزو په ځانګړې توګه د شرکتونو له آدرس څخه دوه ډوله ماليې ورکړې او همدارنګه د صنفي مالیو تر عنوان لاندی د ماليې ورکړې په اړه معلومات ورکړل او د افغانستان د سوداګرۍ او پانګونې اتاق څخه يې وغوښتل چې د یادو شرکتونو ستونزو حل برخه کې خپلی هیڅ ډول مرستې ونه سپموي.

ښاغلي مهمند د موبل و فرنیچر اتحاديې د رئیس او غړیو ستونزو اوریدو وروسته، د کورنیو با کیفیته موبل و فرنیچر تولیداتو یادونه وکړه او ژمنه يې وکړه چې د یادو شرکتونو ستونزې به د اړونده حکومتي ادارو سره شریکې او د حل لارو په پیداکولو کې به يې لازمه همکاري وکړي.

ښاغلي مهمند د یادو شرکتونو څخه وغوښتل چې د موبل و فرنیچر په جوړولو کې د کورنیو خامو موادو په ځانګړې توګه د کنړ ولایت له لرګي څخه ګټه پورته کړي.