د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند قطر ته د خپل رسمي سفر په جریان کې، په داسی حال کې چې ورسره ټیم يې ملتیا کوله د افغانستان لپاره د امریکا سفارت اقتصادي څانګې له رئیس ښاغلي هنري بیکر سره د لیدنې په ترڅ کې، په هېواد کې د سوداګرۍ او پانګونې اړوند مسایلو، په دی برخه کې شته ننګونو او د افغانستان د سوداګرۍ او پانګونې اتاق هڅو په اړه خبرې اترې وکړې.

ښاغلي مهمند د افغانستان ولس سره د امریکا متحده ایالاتو بشردوستانه مرستو ستایلو او په هېواد کې د سوداګرۍ او پانګونې په اړه د معلوماتو ورکولو ترڅنګ زیاته کړه "د نوي نظام تر حاکم کیدو وروسته، د هېواد سوداګرۍ او پانګونې برخه کې مثبت بدلونونه رامنځته شوي او د تیر کال په پرتله د صادراتو په کچه کې زیاتوالی راغلی دی. سربیره پردی، هیله لرو چې، راتلونکی کال د صادراتو په کچه کې ۷۰ سلنه زیاتوالی نور هم رامنځته شي."

ښاغلي مهمند په هېواد کې د ټولیز امنیت او سولې شتون، د اداري فساد او کوکنارو کښت نه شتون، د ټرانزیټ، ټرانسپورټ او کانونو استخراج برخه کې د لازمو آسانتیاوو شتون د هېواد د سوداګرۍ او پانګونې بهیر تسریع لپاره ښه فرصتونه وبلل او د ښاغلي بیکر څخه يې وغوښتل چې ستر امریکايي شرکتونه په افغانستان کې د کانونو استخرج برخه کې پانګونې ته وهڅوي.

د اتاق د مدیره پلاوي لومړي مرستیال په هېواد کې د سوداګرو ستونزې له ښاغلي بیکر سره شریکې او زیاته يې کړه "د افغانستان د خلکو د شتمنیو کنګل کیدل، سوداګرو ته د ویزو د صدور خدماتو نه شتون او د پیسو د انتقال لپاره د حوالې سیستم څخه ګټه پورته کول هغه موضوعګانې دي چې سوداګرو ته يې ډیر شمیر ستونزې رامنځته کړي دي."
نوموړي د پورته یادو ستونزو حل برخه کې د امریکا متحده ایالاتو د مرستې او همکارۍ غوښتنه وکړه.

ښاغلي هنري بیکر د افغان سوداګرو شته ستونزو تائیدولو ترڅنګ، د افغانستان لپاره د امریکا متحده ایالاتو راتلونکو اقتصادي پلانونو، بشردوستانه مرستو او د هېواد د کانونو د اسخراج په موخه د سترو امریکايي شرکتونو د هڅولو څخه ډاډ ورکړ.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د قطر لپاره د افغانستان سفارت سرپرست ښاغلي محمد نعیم وردګ سره د لیدنې په ترڅ کې، د سوداګرۍ پراختیا او پانګونو جلب په اړه خبرې اترې وکړې.

ښاغلي مهمند د افغان سوداګرو او قطر ترمنځ د سوداګریزو اړیکو د پراختیا او په افغانستان کې د پانګونې د فرصتونو په اړه خبرې وکړې او په دې برخه کې یې په قطر کې د افغانستان د سفارت همکاري مهمه وبلله.
نوموړي په قطر کې د افغانستان د سفارت له سرپرست څخه وغوښتل چې د قطر د بهرنیو چارو له وزارت سره په همغږۍ دې د افغان سوداګرو لپاره د ویزې د ورکړې اسانتیاوې رامنځته کړي، څو هغه سوداګر چې قطر ته د سوداګرۍ او تګ راتګ لېوالتیا لري وکولای شي دغه هېواد ته سفر وکړي او همدارنګه قطري سوداګر او پانګوال په افغانستان کې ګډې پانګونې ته وهڅوي.

ښاغلي نعیم وردګ قطر ته د افغانستان د سوداګرۍ او پانګونې اتاق د مشرتابه سفر له دغه هېواد سره د سوداګریزو اړیکو د پراختیا او د پانګونې د جلبولو لپاره مهم وباله.
نوموړي په قطر کې د افغاني محصولاتو د نندارتون جوړول مهم وبلل او په قطر کې یې د افغاني محصولاتو د نندارتونونو د تنظیم په برخه کې د دغه سفارت د هر اړخیزې همکارۍ ژمنه وکړه. دغه راز په قطر کې د افغانستان د سفارت سرپرست د دواړو هېوادونو د سوداګرو ترمنځ د سوداګريزو پلاويو تبادله د سوداګرۍ او ګډو پانګونو د پراختيا لپاره اړینه وبلله.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند قطر ته د خپل رسمي سفر په جریان کې د افغان سوداګرو سره لیده کاته وکړل او په هېواد کې د پانګونې شته فرصتونو او سوداګرۍ پراختیا خبرې اترې وکړې.

ښاغلي مهمند وویل چې هېواد کې د ټولیز امنیت شتون، د اداري فساد او کوکنارو کښت نه شتون د پانګونې لپاره زمینه برابره کړې ده او په قطر کې له میشت افغان سوداګرو يې وغوښتل چې هېواد ته بیرته راستانه او په مختلفو سکتورونو کې پانګونه وکړي.
سربیره پردی، ښاغلي مهمند په قطر کې میشت افغان سوداګرو څخه وغوښتل چې په قطر کې د سوداګرو شورا جوړه کړي څو په یاد هېواد کې د سوداګرو له ګټو د ملاتړ کولو ترڅنګ، د دوی شته ستونزې حل کړي.

په قطر کې میشت افغان سوداګرو په یاده برخه کې د خپل ملاتړ ډاډ ورکړ او د اتاق له مشرتابه يې وغوښتل د افغانستان له حکومت سره د همغږۍ په ترسره کولو سره، سوداګرو ته د ویزو د صدور، ځمکې توزیع او ګمرکي تعرفو برخه کې لازمې آسانتیاوې رامنځته کړي.
په قطر کې میشت افغان سوداګرو ژمنه وکړه چې که چیرې پورته یادو برخو کې لازمې آسانتیاوې رامنځته شي دوی تیار دي چې هېواد ته راستانه شي او د بیخبنسټونو، د کرنې میکانیزه کولو او نورو برخو کې پانګونه وکړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د قطر سوداګرۍ اتاق له سرپرست ښاغلي محمد بین توار قواري سره د لیدنې په ترڅ کې، د سوداګریزو اړیکو پراختیا او ګډو همکاریو په اړه خبرې اترې وکړې.

ښاغلي مهمند په تیرو ۹۰ کلونو کې د افغانستان د سوداګرۍ او پانګونې اتاق د سوداګریزو او اقتصادي فعالیتونو چې د هغه لست څخه د نړۍ مختلفو هېوادونو سره د سوداګریزو اړیکو پراختیا، د هوکړه لیکونو لاسلیکولو او د ګډو سوداګریزو شورا ګانو رامنځته دي، په اړه معلومات وړاندی کړل.  

ښاغلي مهمند د قطر هېواد سوداګرو او پانګوالو ته د افغانستان اقتصادي وضعیت او د پانګونې فرصتونو په اړه د معلوماتو وړاندی کولو ترڅنګ زیاته کړه " په افغانستان کې په ټولیزه توګه امنیت تامین شوی، په دولتي ادارو کې اداري فساد له منځه تللی او د کوکنارو کښت مخه نیول شوې ده."
نوموړي په ځانګړي ډول د قطر سوداګرۍ اتاق له سرپرست څخه وغوښتل چې افغانستان ته سفر وکړي او په افغانستان کې بهرنیو سوداګرو او پانګوالو ته د لازمو آسانتیاوو په نظر کې نیولو سره، د قطر هېواد سوداګرو او پانګوال په افغانستان کې د کانونو استخراج برخه کې پانګونې ته وهڅوي.  

ښاغلي مهمند د همکارۍ هوکړه لیکونو لاسلیک او د ګډ اتاق رامنځته کول د دواړو هېوادونو د سوداګریزو اړیکو پراختیا لپاره اړین وبلل او د قطر سوداګرۍ اتاق له مشرتابه يې وغوښتل چې افغان سوداګرو ته لازمې آسانتیاوې لکه د بانکي حسابونو جوړول او دوی سره د جواز صدور برخه کې همکاري وکړي.  

ښاغلي محمد بین توار قواري ښاغلي مهمند ته د ښه راغلاست ویلو ترڅنګ، افغانستان ته د سفر بلنې په پار مننه وکړه او په افغانستان کې د پانګونې په موخه د قطر هېواد سوداګرو او پانګوالو هڅولو او د دواړو هېوادونو د سوداګریزو اړیکو پراختیا برخه کې يې د خپلې هر ډول همکارۍ ډاډ ورکړ.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په قطر کې د خپلو لیدنو په ترڅ کې، دا ځل د قطر هېواد یو له سترو سوداګرو ښاغلي یوسف احمد الکواري سره لیدنه وکړه او په افغانستان کې د پانګونې شته فرصتونو او یو شمیر نورو مسایلو په اړه يې ورسره خبرې اترې وکړې.

ښاغلي مهمند ښاغلي الکواري ته د هېواد اقتصادي وضعیت تشریح کړ او ویې ویل: په افغانستان کې د نوي نظام په راتګ سره په ټولیزه توګه امنیت تامین شوی، په دولتي ادارو کې اداري فساد له منځه تللی او د کوکنارو کښت مخه نیول شوې ده.
نوموړي له ښاغلي الکواري څخه وغوښتل چې په افغانستان کې له شته فرصتونو څخه په استفادې سره د کانونو، نفتو او ګازو د استخراج، روغتیا سکتور، د انرژۍ په تولید او ساختماني سکتور کې پانګونه وکړي او په یادو برخو کې یې د اتاق د همکارۍ ډاډ ورکړ.

ښاغلي مهمند د روغتیا سکتور په ځانګړي ډول د سرطان ناروغۍ د درملنې په اړه خبرې وکړې او له ښاغلي الکواري څخه یې وغوښتل چې په خوست ولایت کې د سرطاني ناروغیو د معیاري روغتون په جوړولو کې د پام وړ رول ولوبوي.

ښاغلي الکواري ښاغلي مومند ته د ښه راغلاست په ترڅ کې ژمنه وکړه چې د خپل خیریه بنسټ له لارې به د افغانستان له خلکو سره مرسته وکړي او د کانونو په استخراج او نورو برخو کې پانګونې ته یې لېوالتیا څرګنده کړه. هغه ژمنه وکړه چې قطري سوداګر به وهڅوي چې په افغانستان کې پانګونه وکړي.