د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د مدیره پلاوي غړيو هر یو ښاغلي خان جان الکوزي او ذکریا بریالي، د عامل پلاوي سرپرست رئیس ښاغلي میرویس هوتک، د کابل سوداګرۍ او پانګونې اتاق مدیره پلاوي سرپرست رئیس ښاغلي احمد شاه حکیمي او د ۷۷ ترکي شرکت رئیس ښاغلي براق انسال یې ملتیا کوله په کابل کې میشت د ترکيې سفارت له مرستیال ښاغلي امره ماناو او د یاد سفارت سوداګریزې آتشې ښاغلي امره انال سره لیدنه ترسره او د سوداګریزو اړیکو غښتلتیا او ګډو پانګونو په اړه خبرې اترې وکړې.
 
ښاغلي مهمند په افغانستان کې د ټولیز امنیت او سولې تامین، په دولتي ادارو کې د فساد نه شتون، د کوکنارو د کښت بندیدل او د ټرانسپورټ او ټرانزیټ په برخو کې د لا زیاتو اسانتیاوو رامنځته کیدل او همدارنګه د کانونو په برخه کې د تړونونو لاسلیک کول د دواړو هېوادونو د سوداګرۍ او پانګونې بهیر د چټکتیا په برخه کې د اوسنيو ښو فرصتونو په توګه یاد کړل.

نوموړي په کابل ښار کې د امام ابوحنيفه (رح) د دويم ملي او نړيوال نندارتون د جوړيدو په اړه د معلوماتو ورکولو په ترڅ کې د سفير له مرستيال څخه وغوښتل چې په دغه نندارتون کې د ترکيې لوي توليدي او ودانیز شرکتونه او د ترکيې  بېلابېل سکتورونه په دی نندارتون کې ګډون ته وهڅوي.

ښاغلي امره ماناو له افغانستان سره د دغه هېواد د راتلونکو اقتصادي پلانونو، بشري مرستو او د خصوصي سکتور په بیلابیلو برخو کې د پانګونې لپاره د سترو ترکي شرکتونو د هڅولو په اړه خبرې وکړې او ژمنه یې وکړه چې ترکي شرکتونه به وهڅوي چې د امام ابو حنیفه (رح) په دویم ملي او نړیوال نندارتون کې ګډون وکړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د ۷۷ ترکي شرکت رئیس براق انسال يې ملتیا کوله د کانونو او پټرولیم وزارت له سرپرست ښاغلي شهاب الدین دلاور سره لیدنه ترسره او د یاد وزارت سره يې د اتاق د همکارۍ په اړه خبرې اترې وکړې.

ښاغلي مهمند د جبل سراج بند جوړولو، د سمنټو فابریکو جوړولو او په لویو پروژو کې د پانګونې په موخه د سترو کورنیو او بهرنیو شرکتونو د معرفي کولو برخه کې د کانونو او پټرولیم وزارت سرپرست ته د اتاق د چمتووالي او هر اړخیزې همکارۍ ډاډ ورکړ او په دی برخه کې يې د سترو پروژو په لاره اچولو غوښتنه وکړه.  

ښاغلي شهاب الدین دلاور ښاغلي مومند ته د ښه راغلاست په ترڅ کې د افغانستان د سوداګرۍ او پانګونې اتاق د سوداګرو او پانګوالو ملاتړې اداره وبلله او د کانونو د استخراج، د اوبو د بندونو د بیارغونې او نورو سترو پروژو قراردادونو د ترلاسه کولو په برخه کې یې د دغه ډول لویو شرکتونو په معرفي کولو کې د اتاق د لا زیاتې همکارۍ غوښتنه وکړه.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د "نچرل سټون" مرمر ډبرو فابریکې له مختلفو برخو څخه د لیدنې ترڅنګ، د یادې فابریکې رئیس ښاغلي محمد آصف ستانکزي او کارکوونکو سره يې د مرمر ډبرو د استخراج، پروسس او تولید په اړه خبرې اترې وکړې.

ښاغلي ستانکزي ښاغلي مهمند ته د ښه راغلاست په ترڅ کې د مرمر ډبرو د استخراج څخه تر وروستي تولید پورې د پروسې د پړاوونو، د تولید د ډبرو ډولونه او د دغو فابریکو د تولید ظرفیت، د کار متخصص ځواک او موجوده ماشینرۍ په اړه مفصل معلومات وړاندې کړل.

ښاغلي ستانکزي د مرمر ډبرو له کانونو څخه د دغې فابریکې د استخراج او بهرنیو هېوادونو ته د پروسس شویو ډبرو د صادراتو په اړه خبرې وکړې او زیاته یې کړه: د نچرل سټون فابریکه د میدان وردګو، کنړ او ننګرهار ولایتونو کې د مرمرو د کانونو د استخراج په برخه کې لوړ ظرفیت او عصري ماشینونو لرلو سره فعالیت کوي او خام مواد له استخراج وروسته د پروسس لپاره فابریکو ته لیږدوي.
د دغو فابریکو تولیدات  کورنیو بازارونو ته د عرضې ترڅنګ د سیمې هېوادونو په ځانګړې توګه قزاقستان، اذربایجان او متحده عربي اماراتو ته هم صادرېږي.

ښاغلي مهمند د نچرل سټون مرمرو فابریکې هڅې او لاسته راوړنې وستایلې او د هېواد مرمر يې د نورو هېوادونو د مرمر ډبرو په پرتله یو له غوره ډبرو څخه وګاڼه.
نوموړي په هېواد کې د کورنيو ودانيو په جوړولو کې د دغې ډبرې د کارونې او د سيمې او نړۍ هېوادونو ته د مرمرو د صادراتو پر زياتوالي ټينګار وکړ.

ښاغلي مهمند د نچرل سټون فابریکې د محصولاتو لپاره د نړیوالې بازار موندنې او د صادراتو د ودې په برخه کې يې د همکارۍ ډاډ ورکړ.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د مدیره پلاوي غړي ښاغلي خان جان الکوزي په داسی حال کې چې، د ریاست الوزرا اقتصادي مرستیال ښاغلي ملا عبدالغني برادر، د ګلبهار ګروپ رئیس ښاغلي زړګي حبیبي او د هېواد یو شمیر سوداګرو او پانګوالو يې ملتیا کوله د ګلبهار سوداګریز کمپلکس بیاجوړونې پرانیست غونډه کې ګډون وکړ.

ښاغلي ملا عبدالغني برادر د حکومت د پالیسۍ په اړه د معلوماتو ورکولو ترڅنګ وویل "افغانستان د ټولو افغانانو ګډ کور دی او افغانانو ته د کاري فرصتونو رامنځته کول د حکومت او سوداګرو ګډ مسؤلیت دی.
نوموړي د هېواد ټول پانګوال په هېواد کې پانګونې ته وهڅول او په دی برخه کې يې د حکومت د هر اړخیزې همکارۍ ژمنه وکړه.

ښاغلي مهمند د ښاغلي حبیبي څخه د مننې کولو ترڅنګ، د ګلبهار کمپلکس په څیر د پروژو تطبیق، په هېواد کې د غربت کچې په راکمولو کې اړین وباله او زیاته يې کړه چې د هېواد پرمختګ په بیخبنسټیزو پروژو پوری تړلی دی.
نوموړي د حکومت څخه وغوښتل چې سوداګرو ته د ودانیزو پروژو تطبیق برخه کې لازمې آسانتیاوې رامنځته کړي څو سوداګر وکولی شي په یادو پروژو کې په روڼ ډول برخه واخلي.

ښاغلي حبیبي میلمنو ته د ښه راغلاست ویلو او د ګلبهار کمپلکس بیاجوړولو په اړه د معلوماتو ورکولو ترڅنګ وویل "د ګلبهار سوداګریز کمپلکس د ۷۰ میلیونه امریکايي ډالرو په ارزښت په ۱۰ جریبه ځمکه او ۳۰ چتونو لرلو سره په ۳ کلونو کې جوړیږي. د ګلبهار سوداګریز کمپلکس جوړولو پروژه کې به سلګونه کسانو ته د کار زمینه برابره شي."

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د اتاق د مدیره پلاوي غړي ښاغلي خان جان الکوزي او د عامل پلاوي سرپرست رئیس ښاغلي میرویس هوتک يې ملتیا کوله د ولایتي اتاقونو عامل مدیرانو سره يې آنلاین ناسته ترسره او د امام ابو حنیفه (رح) دویم نړیوال نندارتون جوړولو په اړه یې خبرې اترې وکړې.  

ښاغلي مهمند د امام ابوحنیفه (رح) د دویم ملي او نړیوال نندارتون د جوړولو برخه کې په مرکز او ولایتونو کې د سوداګرۍ او پانګونې اتاق د مسوولینو له بی سارو هڅو څخه د مننې په ترڅ کې زیاته کړه: د ولایتي اتاقونو مسوولین باید هڅه وکړي چې په دغه ستر نندارتون کې د ګډون په موخه ټول سوداګر او لوی او واړه پانګوال، متشبثین او د خصوصي سکتور غړي برخه واخلي او خپله ونډه ادا کړي.

ښاغلي ميرويس هوتک د امام ابوحنيفه (رح) د لومړي نندارتون او د دويم نندارتون د چمتووالي په اړه معلومات ورکړل او ويې ويل: د افغانستان د سوداګرۍ او پانګونې اتاق عامل پلاوی په یو منظم پلان کار کوي، څو د لومړي نندارتون د نیمګړتیاوو څخه د تجربې پر بنسټ، دویم نړیوال نندارتون د امکان تر حده غوره او عالي تنظیم کړي.
نوموړي په دې برخه کې خپل مشخص پلانونه او وړاندیزونه هم مطرح کړل.

ښاغلي هوتک د ولایتي اتاقونو له ټولو عامل مدیرانو وغوښتل چې د دغه نندارتون اعلان ټولو سوداګرو او پانګوالو ته او د تولید او خدماتي سکتور په ګډون د روغتیا، کرنې، صنعت، کانونو، غالۍ، لاسي صنایعو، طب، ښوونې او روزنې، ودانیو سکتورونو ته ورسوي څو هغوی وکولی شي په راتلونکي دویم نړیوال نندراتون کې په پراخه کچه ګډون وکړي.