د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د مدیره پلاوي غړي ښاغلي عصمت الله وردګ، د غزني اتاق رئیس او د مرکزي اتاق د څارنې پلاوي منشي ښاغلي عبدالمتین قلندري او د بطریو تولیدوونکو او صادروونکو سوداګرو هم حضور درلود، د ماليې وزارت د ګمرکونو معینیت له مسؤلینو سره لیدنه ترسره او د صادراتي مستعملو بطریو تعرفې بیې ټاکلو په اړه يې خبرې اترې وکړې.   

ښاغلي مهمند د کورنیو تولیداتو په ځانګړي ډول د بطریو د تولید په برخه کې د خپل ملاتړ څرګندولو ترڅنګ، په هېواد کې یې د بطریو د تولید د کیفیت او ظرفیت په لوړولو ټینګار وکړ.
ښاغلي مهمند په بازار کې د دغه محصول د تقاضا په پوره کولو کې د بطریو سوداګرو رول مهم وباله او د ګمرکونو وزارت له مسوولینو یې وغوښتل چې د ګمرکي تعرفې د مناسبې کچې په ټاکلو کې توازن رامنځته کړي، څو له یوې خوا سوداګر په دی برخه کې پانګونې ته وهڅول شي او له بلې خوا د استهلاک شویو بطریو سوداګر وکولی شي د مناسبې تعرفې په پریکولو سره خپلو صادراتو ته دوام ورکړي.  

د اتاق د مدیره پلاوي لومړي مرستیال د اتاق هغه میکانیزم په اړه چې د بطریو سرب صادروونکو لپاره په کې لازمې آسانتیاوې ځای پر ځای شوي دي، معلوماتو وړاندی کولو ترڅنګ، زیاته کړه "د افغانستان د سوداګرۍ او پانګونې اتاق د بطریو تولیدوونکو او صادروونکو سره په جلا جلا ناستو کې د استهلاک شویو بطریو سرب باندی په لوړې تعرفې ټنیګار وکړ.

د مالیې وزارت د ګمرکونو معینیت مسوولینو د اتاق د مشرتابه پلاوي، صادروونکو او په کور دننه بطریو تولیدونکو د خبرو له اورېدو وروسته د کورنیو تولیدونکو او سوداګرو د ګډې کمېټې لخوا ټاکل شویو نرخونو سره موافقه څرګنده کړه.

چهارشنبه، غويي ۲۷مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي دارلانشاء رئیس ښاغلي خان محمد سرفراز باز، د مدیره پلاوي مالي رئیس ښاغلي شیرین آغا سخي او د مدیره پلاوي غړي ښاغلي خان جان الکوزي په داسی حال کې چې، د ریاست الوزرا اداري مرستیال ښاغلي عبدالسلام حنفي، د سوداګرۍ او صنعت وزارت سرپرست ښاغلي نورالدین عزیزي، د کابل سوداګرۍ او پانګونې اتاق سرپرست ښاغلي احمد شاه حکیمي، لوړو پوړو حکومتي چارواکو، د کرنې او صنعت او کانونو اتاقونو مشرتابه پلاوو غړو، د هېواد سوداګرو او پانګوالو هم حضور درلود، په مالیاتي چارو کې د لازمو آسانتیاوو رامنځته کولو په موخه په مطبوعاتي ناسته کې ګډون وکړ.

ښاغلي مهمند په مالیاتي چارو کې د لازمو آسانتیاوو رامنځته کولو او سوداګرو او پانګوالو ته د معیاري میکانیزم جوړولو لپاره د ماليې وزارت او حکومت د هڅو او همکاریو ستایلو ترڅنګ، د هېواد پرمختګ په مالیاتي چارو کې لازمو آسانتیاوو رامنځته کولو، ټرانزیټ، صنعت او کرنې پوری تړلی وباله او د حکومت له اړوندو ادارو يې وغوښتل چې د هېواد له خصوصي سکتور سره لا ډیره همکاري وکړي.

ښاغلي مهمند د حکومت لخوا تولیدي سکتورونو ته د تشویقي کڅوړو رامنځته کولو غوښتنه وکړه او د سوداګرو او پانګوالو ستونزو ته د قانوني لارو چارو پیداکولو برخه کې يې د اتاق د هر اړخیزې همکارۍ ژمنه وکړه.

سربیره پردی، ښاغلي مهمند ډاډ ورکړ چې اتاق به د هېواد سوداګر په بیخبنسټیزو، کانونو او نورو عام المنفعه پروژو کې د پانګونې لپاره وهڅوي.

دوشنبه، غويي ۲۵مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د عامل پلاوي سرپرست ښاغلي میرویس هوتک او د اتاق عامل پلاوي ځینو ډیپارټمنټونو مسؤلینو هم حضور درلود، د آبادي پروژو له مسؤل ښاغلي فیروز سید جواجه یوف سره لیدنه ترسره او د هېواد د خصوصي سکتور ننګونو او ګډو همکاریو په اړه يې خبرې اترې وکړې.

ښاغلي مهمند ښاغلي خواجه یوف او ورسره ملګري ټیم ته د ښه راغلاست ویلو او د هیواد د خصوصي سکتور د فعالیتونو پر وړاندې یو لړ ننګونو ته د اشارې کولو ترڅنګ، د هېواد د خصوصي سکتور په ځانګړي ډول د ودانیو سکتور، د تولیداتو سکتور، د ښځینه متشبثینو د فعالیتونو او د زیربنایي پروژو د تطبیق په برخه کې چې هېوادوالو ته د کار زمینه برابروي، د آبادي پروژو د مسوولینو ملاتړ مهم وباله او د خصوصي سکتور رغښت او سوداګرۍ ودې برخه کې يې د ګډې همکارۍ غوښتنه وکړه.  

ښاغلي میرویس هوتک د افغانستان د سوداګرۍ او پانګونې اتاق مخینې او فعالیتونو په اړه د معلوماتو وړاندی کولو ترڅنګ، او د پروګرامونو تطبیق او په لاره اچولو برخه کې يې د آبادي پروژو مسؤلینو همکاري ګټوره وبلله.
ښاغلي هوتک هغو کوچنیو او منځنیو تشبثاتو ته چې مالي ملاتړ ته اړتیا لري په ځانګړې توګه ښځینه متشبثینو ته د یادې ادارې د مالي ملاتړ غوښتنه وکړه.

ښاغلي خواجه یوف د سوداګریزو فعالیتونو ملاتړ، په شته ننګونو د برلاسي حاصلولو او پانګونو جلب برخه کې د افغانستان د سوداګرۍ او پانګونې اتاق مدیره پلاوي لومړي مرستیال د وړاندیزونو او نظرونو اوریدو وروسته، ژمنه وکړه چې ورته ناستو ته به دوام ورکوي او اتاق سره د ګډ کار کولو په ترڅ کې به شته ستونزو ته د مناسبو حل لارو پیداکولو، سوداګرۍ ودې او د خصوصي سکتور ملاتړ برخه کې همکاري وکړي.

سه شنبه، غويي ۲۶مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د مدیره پلاوي د نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر یو ښاغلي احمد ضیاء عظیمي شینوزاده، ذکریا بریالي او ضیاءالدین اچکزي، د عامل پلاوي سرپرست ښاغلي میرویس هوتک، د اوبلن ګاز او تیلو، ودانیو او خوراکي توکو اتحادیو مسؤلینو، د هېواد سوداګرو او پانګوالو په حضور کې د مالیې وزارت عمومي عوایدو رئیس ښاغلي مولوي مشفق او د ماليې وزارت د حقوقو عمومي رئیس ښاغلي صدیق صدیقي سره لیدنه ترسره او د هېواد خصوصي سکتور لپاره د مالیاتي آسانتیاوو رامنځته کولو په اړه يې خبرې اترې وکړې.

ښاغلي مهمند د مالیې وزارت مسؤلینو او د دې ناستې ګډونوالو ته د ښه راغلاست په ترڅ کې د مالیې وزارت د عوایدو عمومي ریاست له دوامداره همکاریو څخه مننه وکړه او زیاته یې کړه "مالیه یو اصل دی او د یو هیواد اقتصادي وده په مالیاتو پورې اړه لري."
نوموړي د هېواد له ټولو سوداګرو او پانګوالو وغوښتل، چې په خپل وخت مالیه ورکړي.

ورپسې د اتحادیو مسؤلینو د درې میاشتنۍ او کلنۍ ثابتې مالیې د نه ثبات، د مالیاتو د سیستم پیچلتیا، د بشپړو شویو پروژو د پیسو د نه ورکړې، د بانکي حسابونو د بندیدو او ثابتې ماليې نه پلي کیدو په اړه خپلې ستونزې د ښاغلي مشفق او ماليې وزارت له مسؤلینو سره مطرح کړې او په دې برخه کې یې د مالیې وزارت د عوایدو له عمومي ریاست څخه د هر اړخیزې همکارۍ غوښتنه وکړه.

ښاغلي مولوي مشفق د هېواد د سوداګرو او د بېلابېلو اتحادیو د ستونزو له اورېدو وروسته د مالیې په ورکړه، د کارموندنې او له دولت سره د ملاتړ په برخه کې د خصوصي سکتور د رول ستاینه وکړه او د خصوصي سکتور لپاره د لا زیاتو اسانتیاوو په رامنځته کولو کې یې د هر اړخیزې همکارۍ ژمنه وکړه.

ښاغلي برهان د نظام ثبات د خصوصي سکتور په وده پورې تړلی وباله او د هیواد د خصوصي سکتور په ځانګړې توګه د ودانیو سکتور لپاره یې د لا زیاتو اسانتیاوو رامنځته کول اړین وبلل.

یکشنبه، غويي ۲۴مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د مدیره پلاوي غړي ښاغلي عصمت الله وردګ، د غزني اتاق رئیس او مرکزي اتاق څارنې پلاوي منشي ښاغلي عبدالمتین قلندري او د عامل پلاوي سرپرست ښاغلي میرویس هوتک هم حضور درلود، د بطریو تولیدوونکو او سوداګرو سره لیدنه ترسره او په بطریو د صادراتي تعرفې لوړوالي او شته ننګونو يې خبرې اترې وکړې.

د بطریو تولیدوونکو او صادروونکو په زړو بطریو د ګمرکي تعرفې لوړوالی، ګاونډیو هېوادونو ته د بطریو قاچاق، په تولیدي برخه کې د حکومت نه پاملرنه، د بطریو لپاره د اومه موادو نه برابرونه، د وطني بطریو نه محصول کیدنه، د بطریو بیو نه کنترول او یو شمیر نور مسایل د خپلو عمده ستونزو په توګه یاد کړل او د افغانستان د سوداګرۍ او پانګونې اتاق مشرتابه پلاوي څخه يې وغوښتل چې په دی برخه کې له دوی سره همکاري وکړي.

ښاغلي مهمند د بطریو تولیدوونکو او صادروونکو ته د ښه راغلاست ویلو او د افغانستان د سوداګرۍ او پانګونې اتاق د ټولو سوداګرو او پانګوالو ګډ کور بللو ترڅنګ زیاته کړه "اتاق تل د هېواد د سوداګرو او پانګوالو له مشروع ګټو دفاع او د هېواد د خصوصي سکتور ملاتړ کړی دی."

ښاغلي مهمند د نړۍ او سیمې هېوادونو ته د هېواد د سوداګریزو توکو صدور انوایس برخه کې د اتاق لخوا رامنځته شوي میکانیزم په اړه معلومات وړاندی او د خصوصي سکتور ملاتړ برخه کې يې د اتاق د هر اړخیزې همکارۍ ژمنه وکړه.

ښاغلي وردګ او ښاغلي قلندري د هېواد اقتصادي څرخ په خصوصي سکتور پوری تړلی وباله او د ټولو سوداګرو او پانګوالو په اتفاق او اتحاد يې ټینګار وکړ.

دوشنبه، غويي ۲۵مه، ۱۴۰۲