د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي په داسی حال کې چې د عامل پلاوي سرپرست رئیس ښاغلي میرویس هوتک، د صادراتو پراختیا او د دولت سره د اړیکو ډیپارټمنټونو مسؤلینو هم حضور درلود، د NEI ادارې د پروګرامونو له مسؤل ښاغلي نثار احمد سره لیدنه ترسره او د ګډو همکاریو په اړه يې خبرې وکړې.

ښاغلي الکوزي د کارموندنې، د صادراتو د ودې، د صادراتي توکو د پروسس شرکتونو کارکوونکو د ظرفیتونو د لوړولو، د کوچنیو متشبثینو د پېژندنې او نور اړوند مسایل بنسټیزې اړتیاوې وبللې او په دی برخه کې يې د اتاق د هر اړخیزې همکارۍ ډاډ ورکړ.

ښاغلي نثار احمد له NEI ادارې سره د اتاق د هر اړخیزې همکارۍ څخه د مننې په ترڅ کې، د اتاق له مشرتابه څخه وغوښتل چې د ښځینه متشبثینو او د کوچنیو او متوسطو متشبثینو په پیژندنه کې دې له دې ادارې سره همکاري وکړي، ترڅو NEI وکولای شي دوی ته د سوداګرۍ برخه کې مالي امکانات برابر کړي.

ښاغلي میرویس هوتک ښاغلي نثار احمد او ورسره ملګري ټیم ته د ښه راغلاست په ترڅ کې د اتاق د لاسته راوړنو او فعالیتونو په اړه هر اړخیز معلومات وړاندې کړل او زیاته یې کړه: د افغانستان د سوداګرۍ او پانګونې اتاق او د NEI ادارې ترمنځ باید د همکارۍ هوکړه لیک لاسلیک شي تر څو وکولای شو د سوداګرۍ بهیر ګړندی کولو ترڅنګ، د کوچنیو او متوسطو متشبثینو ملاتړ وکړو او په نورو مواردو کې هم اغیزمن ګامونه پورته کړو.

چهارشنبه، غبرګولي ۱۷مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د صرافانو سرتاسري اتحاديې رئیس ښاغلي حاجي بهرام او د ډیر وزن لیږدوونکو وسایطو یو شمیر څښتنانو يې ملتیا کوله د ریاست الوزرا له سیاسي مرستیال او کفیل ښاغلي مولوي محمد کبیر سره لیدنه ترسره او د ډیر وزن لږدوونکو وسایطو ستونزو، په خوست ولایت کې د سرطاني ناروغیو ضد روغتون جوړولو او د صادراتو ډیروالي په اړه يې ورسره خبرې وکړې.

ښاغلي مهمند په تیرو څو میاشتو کې د هېواد د صادراتو زیاتوالي په اړه د معلوماتو وړاندی کولو ترڅنګ، په خوست ولایت کې د سرطاني ناروغیو ضد روغتون جوړولو برخه کې د رامنځته شویو پرمختګونو یادونه وکړه او د ریاست الوزرا له سرپرست يې وغوښتل چې ددی عام المنفعه پروژې څخه ملاتړ وکړي.

ښاغلي مهمند د ډیر وزن لیږدوونکو وسایطو ټراسپورټي ستونزې د فهم وړ بللو ترڅنګ، د حکومت د ټولګټو وزارت لخوا د ډیر وزن انتقال برخه کې د رامنځته شوې طرحې په تعدیل او سمونو ټینګار وکړ او په دی برخه کې يې د ریاست الوزرا د همکارۍ او مرستې غوښتنه وکړه.

ښاغلي مولوي محمد کبیر د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او په ناسته کې د ګډون کوونکو د خبرو له اوریدو وروسته پریکړه وکړه چې، د ټولګټو وزارت، د ټرانسپورټ وزارت او د ډیر وزن لیږدوونکو وسایطو څښتنانو څخه دی یو ګډ پلاوی جوړ کړی شي څو رامنځته شوې ستونزې ته مشروع حل لاره پیداکړي.

په دی ناسته کې د هېواد د صرافانو سرتاسري اتحاديې رئیس او یو شمیر موټر لرونکو د ناستې ګډونوالو په استازولۍ خبرې وکړې او د حکومت له مشرتابه سره يې خپلې ستونزې شریکې کړې.

شنبه، غبرګولي ۱۳مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د سوداګرۍ او صنعت وزارت سرپرست ښاغلي نورالدین عزیزي، د اړوندو حکومتي ادارو مرستیالانو او رئیسانو او د هېواد یو شمیر سوداګرو او پانګوالو هم حضور درلود، د ټرانزیت ملي کمېټې پنځمه ناسته کې چې، د سوداګرۍ او صنعت وزارت په انګړ کې جوړه شوې وه ګډون وکړ.

ښاغلي نورالدین عزیزي ټولو حضوري او آنلاین ګډونوالو ته د ښه راغلاست ویلو ترڅنګ، د بهرنیو چارو وزارت لخوا د سون توکو او اوبلن ګاز ټرانزیټ لپاره جوړه شوې طرحې په اړه مفصل معلومات وړاندی کړل.

ښاغلي مهمند د افغانستان له لارې د سیمې هېوادونو ته د سون توکو او اوبلن ګاز ټرانزیټ د هېواد د عوایدو زیاتوالي برخه کې مهم وباله او یاده چاره يې د هېواد په سرحدي پولو کې د اوبلن ګاز او سون توکو زخیرو جوړولو او ټرانسپورت برخه کې د پانګونې لپاره ښه فرصت په توګه یاد کړ.

شنبه، غبرګولي ۱۳مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د مدیره پلاوي د دارلإنشاء رئیس ښاغلي خان محمد سرفراز باز، د مدیره پلاوي غړو هر یو ښاغلي خان جان الکوزي او احمد شکیب احمدیار يې ملتیا کوله د افغانستان لپاره د قطر سفارت له سرپرست ښاغلي سید ابن المبارک سره په کابل سرینا هوټل کې لیدنه ترسره او د دوه اړخیزې سوداګرۍ پراختیا په اړه يې خبرې اترې وکړې.
 
ښاغلي مهمند ښاغلي المبارک او ورسره پلاوي ته د ښه راغلاست ویلو او د اتاق د فعالیتونو په اړه د مفصلو معلوماتو ورکولو ترڅنګ، په هېواد کې د اداري فساد نه شتون، ټولیز امنیت شتون او د کوکنارو عدم کرکیله د پانګونې لپاره یو ښه فرصت وباله او د قطر سفارت له سرپرست يې وغوښتل چې قطري سوداګر په هېواد کې د بیخبنسټونو جوړولو، د کرنې میکانیزه کولو، امام ابو حنیفه (رح) ملي او نړیوال نندارتون کې د ګډون او دواړو هېوادونو سوداګرۍ پراختیا لپاره وهڅوي.
 
د اتاق مدیره پلاوي لومړی مرستیال د سوداګرو د پیسو بندېدل، د ویزو د ورکړې د اسانتیاوو نشتوالی، د سیمې هېوادونو ته د سوداګرو د پیسو د لېږد لپاره د بانکي اسانتیاوو نشتوالی او نورې اړوندې ستونزې یې عمده ستونزې وبللې او په دې برخه کې يې له ښاغلي المبارک څخه د هر اړخیزې همکارۍ غوښتنه وکړه.

ښاغلي خان محمد سرفراز باز د افغانستان د سوداګرۍ او پانګونې اتاق او د قطر د سوداګرۍ او پانګونې اتاق ترمنځ د همکاریو د تفاهم لیک په لاسلیکولو ټینګار وکړ.

ښاغلي المبارک د دغې ناستې د جوړولو له امله د اتاق له مشرتابه مننه وکړه او دا ډول ناستې یې د دواړو هېوادونو ترمنځ د ګډې پانګونې او د سوداګریزو اړیکو پراختیا لپاره اړینې وبللې او ګډې پانګونې، د سوداګریزو اړیکو د پراختیا او د امام ابو حنیفه (رح) په دویم ملي او نړیوال نندارتون کې د سوداګرو د ګډون برخه کې يې د خپلو هر اړخیزو همکاریو ډاډ ورکړ.

شنبه، غبرګولي ۱۳مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د حکومتي چارواکو سره د ښي لاس موټرونو واردوونکو ستونزو شریکولو په موخه، یوه ناسته جوړه کړه چې، د سوداګرۍ او صنعت سرپرست وزیر ښاغلي نورالدین عزیزي، د ماليې وزارت د ګمرکونو معین ښاغلي سعید، د اتاق د مدیره پلاوي درالإنشاء رئيس ښاغلي خان محمد سرفراز باز، د مدیره پلاوي غړي ښاغلي خان جان الکوزي، د کابل سوداګرۍ او پانګونې اتاق مدیره پلاوي لومړي مرستیال ښاغلي احمد شاه حکیمي او د ښي لاس موټرونو واردوونکو یو شمیر سوداګرو پکی ګډون درلود.

ښاغلي مهمند ګډونوالو ته د ښه راغلاست ویلو او د ښي لاس موټرونو واردوونکو سوداګرو ستونزو په اړه د خبرو کولو ترڅنګ زیاته کړه "د ۳۵ کلونو راهیسې د ښي لاس موټرونه فعالیت لري او په لس ګونه زره خلکو ته يې په مستقیم او غیر مستقیم ډول د کار زمینه برابره کړیده."

ښاغلي مهمند د ښي لاس موټرونو واردولو او د سټیکر ویشلو مودې اوږدولو غوښتنه وکړه او یاده چاره يې د سوداګرو او پانګوالو ملاتړ وباله.

ښاغلي عزیزي د افغانستان د سوداګرۍ او پانګونې اتاق مشرتابه پلاوي او د موټر واردوونکو سوداګرو له خبرو اوریدو وروسته، ژمنه وکړه چې یاده ستونزه به د حکومت د اړوندو ادارو سره شریکه او د حل په برخه کې به يې خپلې هیڅ ډول مرستې ونه سپموي.

یکشنبه، غبرګولي ۱۴مه، ۱۴۰۲